རྒྱ་ནག་གཞུང་གིས་གསེར་རྟ་བླ་རུང་སྒར་གྱི་གྲྭ་བཙུན་གཅིག་སྟོང་ཕྱིར་ཕུད་བཏང་འདུག 

རྒྱ་ནག་གཞུང་གིས་གསེར་རྟ་བླ་རུང་སྒར་ནས་གྲྭ་བཙུན་གཅིག་སྟོང་ཕྱིར་ཕུད་བཏང་བ་མ་ཟད། ཡུལ་སྐོར་སྤྲོ་འཆམ་པ་ཚུད་པའི་ཁུལ་དེར་མཇལ་སྐོར་ཡོང་མཁན་རྣམས་ལའང་དམ་དྲག་ཆེན་པོ་བྱེད་ཀྱི་ཡོད་འདུག 

འདས་ལོའི་ཕྱི་ཟླ་ ༡༡ གི་ཟླ་མཇུག་ཙམ་ནས་རྒྱ་ནག་གཞུང་གིས་གསེར་རྟ་བླ་རུང་སྒར་དུ་གྲྭ་བཙུན་གྲངས་  ༥༠༠༠ ལྷག་ལས་བསྡད་ཆོག་གི་མེད་ཀྱང་། ད་ལྟ་མང་པོ་ཞིག་ཁྲིམས་འགལ་དང་ཁྲིམས་མཐུན་གྱི་ཡིག་ཆ་མེད་སྐོར་སོགས་ལ་ཁ་གཡར་ནས། གྲྭ་བཙུན་གྲངས་ ༡༠༠༠  ལྷག་རིམ་པས་དགོན་པ་ནས་ཕྱིར་ཕུད་བྱས་ཏེ། ད་ལྟ་ཕྱིར་ཕུད་བཏང་ཟིན་པའི་གྲྭ་བཙུན་རྣམས་ཀྱི་གྲྭ་ཤག་གཏོར་མེད་ཀྱང་། གྲྭ་བཙུན་རྣམས་ཀྱི་ད་ལྟའི་གནས་སྟངས་ཐད་གསལ་ཁ་གང་ཡང་མེད་པ་རེད། 

རྒྱ་ནག་གིས་བླ་རུང་སྒར་ནས་ཕྱིར་ཕུད་བཏང་བའི་བཙུན་མ་ཞིག་གིས་འདི་གའི་གསར་འགོད་པར། རྒྱ་ནག་གཞུང་གི་ལས་བྱེད་དང་གསེར་རྟ་རྫོང་གི་དམག་མི་སོགས་ཀྱིས་བརྟག་དཔྱད་མང་པོ་ཞིག་བྱས་པ་བརྒྱུད། ང་ཚོ་གྲྭ་བཙུན་གཅིག་སྟོང་དགོན་པར་འདུག་མི་ཆོག་པར་རིམ་པས་དགོན་པ་ནས་བུད་དགོས་པའི་བཀའ་ཕབ་བྱུང་། ཞེས་བརྗོད་བྱུང་། 

ཡང་འབྲེལ་ཡོད་བོད་མི་ཞིག་གིས། རྒྱ་ནག་གཞུང་གིས་ཁྲིམས་མཐུན་གྱི་ལག་ཁྱེར་མེད་ལུགས་ལ་ཁ་གཡར་ནས། ད་ལྟ་གྲྭ་བཙུན་ ༡༠༠༠ ཕྱིར་ཕུད་བཏང་བ་རེད། འོན་ཀྱང་། སྔོན་མ་ལག་ཁྱེར་ཡོད་མཁན་གྱི་འདས་གྲོངས་སུ་གྱུར་བའི་ནང་མི་ཡིན་ན་མུ་མཐུད་བསྡད་ཆོག་ནའང་། གསར་དུ་ཞུགས་མཁན་གྲྭ་བཙུན་རྣམས་ཀྱིས་སྒར་དུ་སྡོད་ཆོག་པའི་ལག་ཁྱེར་ཐོ་འགོད་བྱ་ཆོག་གི་མེད་པའི་སྐོར་བརྗོད་བྱུང་། 

ཡང་འབྲེལ་ཡོད་ཅིག་གིས། ད་ལྟ་གསེར་རྟ་བླ་རུང་སྒར་དུ་མུ་མཐུད་རྒྱ་ནག་གཞུང་གི་ལས་བྱེད་དང་ཉེན་རྟོག་པ་ཉུང་མཐར་ ༤༠༠ ཙམ་གྱིས་བརྟག་ཞིབ་དང་དོ་དམ་བྱེད་ཀྱིན་ཡོད་ཅིང་། སྔོན་མ་ཡུལ་སྐོར་བ་རྣམས་ཀྱིས་ཁ་པར་སོགས་ཁུར་ནས་པར་ལེན་ཆོག་གི་ཡོད་ཀྱང་། དེང་སང་ཡུལ་སྐོར་བ་རྣམས་ཀྱིས་དགོན་པར་མཇལ་སྐོར་འགྲོ་སྐབས་ཁ་པར་དང་པར་ཆས་སོགས་ཁུར་ཆོག་གི་མེད་སྐོར་བརྗོད་བྱུང་། 

ཡང་འབྲེལ་ཡོད་ཅིག་གིས་གསར་འགོད་པར། འདི་ལོའི་ཕྱི་ཟླ་ ༤ ནང་རྒྱ་ནག་གཞུང་གིས་བླ་རུང་སྒར་དུ་གཞུང་ལམ་བརྒྱག་རྒྱུ་ཡིན་ལུགས་ལ་ཁ་གཡར་གྱིན་ཡོད་པས། གྲྭ་བཙུན་རྣམས་ཀྱི་གྲྭ་ཤག་རྣམས་གཏོར་རྒྱུ་ཡིན་པའི་ཚོད་དཔག་ཀྱང་བྱེད་ཀྱིན་ཡོད་སྐོར་དང་། རྒྱ་ནག་གཞུང་གིས་ད་ལན་བླ་རུང་སྒར་ནས་ཕྱིར་ཕུད་བྱས་པའི་གྲྭ་བཙུན་དང་འབྲེལ་བའི་གནས་ཚུལ་རིགས་ཕྱིར་བསྒྲགས་དང་དྲ་ལམ་སོགས་སུ་སྤེལ་ཚེ། ཁྲིམས་སྒྲིག་བཞིན་ཉེས་ཆད་གཅོད་རྒྱུ་ཡིན་པའི་འཇིགས་སྐུལ་ཡང་བྱས་ཡོད་སྐོར་བརྗོད་བྱུང་། 

དེ་བཞིན་འདས་ལོའི་ཕྱི་ཟླ་ ༡༡ ནང་བོད་དཀར་མཛེས་ཁུལ་བྲག་མགོ་རྫོང་དང་ཉེ་འཁོར་གྱི་རྫོང་ཁག་ཁག་ནས་དམག་མི་ ༤༠༠ ཙམ་དང་ཐད་འཕུར་གནམ་གྲུ་སོགས་གསེར་རྟ་བླ་རུང་སྒར་དུ་མངགས་གཏོང་བྱས་ཏེ། གནམ་གྲུ་བརྒྱུད་ནས་བླ་རུང་དགོན་པར་ལྟ་རྟོག་བྱེད་བཞིན་ཡོད་པ་སོགས་དམ་དྲག་ཤུགས་ཆེན་བྱས་ཡོད་པ་མ་ཟད། འདི་ལོ་ནས་བླ་རུང་སྒར་དུ་གྲྭ་བཙུན་རྣམས་ལོ་བཅོ་ལྔ་མ་གཏོགས་འདུག་མི་ཆོག་པ་བཟོ་རྩིས་ཡིན་འདུག

ཕྱི་ལོ་ ༢༠༡༧ ལོར་རྒྱ་ནག་གཞུང་གིས་གསེར་རྟ་བླ་རུང་དགོན་དང་ལྔ་རིག་སློབ་གླིང་གཉིས་བར་ལྕགས་ར་བརྒྱབ་སྟེ་ལོགས་ཁ་བཟོས་ཡོད་པ་མ་ཟད། དགོན་པ་དང་སློབ་གླིང་གཉིས་ལ་དོ་དམ་ལས་ཁུངས་བཙུགས་ཏེ། དེའི་འགན་འཛིན་དང་དྲུང་ཡིག་བཅས་ལ་དམར་ཤོག་ཚོགས་མི་ ༦ བསྐོ་བཞག་བྱས་ཏེ་བླ་རུང་སྒར་གྱི་འཛིན་སྐྱོང་དང་ཉིན་རེའི་བྱེད་སྒོ་ཡོངས་ལ་སྟངས་འཛིན་ནན་མོ་བྱས་ཡོད་འདུག

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།