བོད་ཀྱི་བུད་མེད་སྒེར་ལངས་ཐེངས་ ༦༦ པའི་དུས་དྲན་སྲུང་གཙི་གནང་།

བོད་ཀྱི་བུད་མེད་སྒེར་ལངས་ཉིན་མོ་ནི་བོད་མི་ཡོད་དོ་ཅོག་གིས་བརྗེད་ཐབས་མེད་པའི་ལོ་རྒྱུས་ཤིག་ཡིན་པས་གཞུང་སྒེར་སུས་ཀྱང་སྣང་མེད་དུ་འཇོག་ཐབས་མེད་པའི་ཉིན་མོ་ཞིག་ཡིན་ཞེས་བརྗོད་སོང་།

དེ་རིང་ཕྱི་ཚེས་ ༡༢ ཉིན་དྷ་སར་ཐེག་ཆེན་ཆོས་གླིང་གཙུག་ལག་ཁང་གི་ཉེ་འགྲམ་གྱི་རླངས་འཁོར་ས་ཚིགས་སུ། བོད་ཀྱི་བུད་མེད་ལྷན་ཚོགས་ཀྱི་གོ་སྒྲིག་འོག  བོད་ཀྱི་བུད་མེད་སྒེར་ལངས་ཐེངས་ ༦༦ པའི་དུས་དྲན་སྲུང་གཙི་མཛད་སྒོ་ཞིག་འཚོགས་སོང་། མཛད་སྒོའི་ཐོག་སྐུ་མགྲོན་གཙོ་བོ་ཧི་མ་ཅལ་མངའ་སྡེའི་ཀང་ར་རྫོང་གི་གྲོང་སྡེ་སྤྱི་ཁྱབ་ནེ་ནུ་ཤཱར་མ་(Neenu  Sharma) ལགས།    དྷ་ས་ས་གནས་མགོ་འཛིན་དཀོན་མཆོག་མིག་དམར་ལགས། གཞུང་ཁོངས་མ་ཡིན་པའི་ཚོགས་པ་ཁག་གི་སྐུ་ཚབ་དང་སེར་སྐྱ་མི་མང་བཅས་འཛོམས་འདུག མཛད་སྒོ་གྲོལ་རྗེས་མེག་ལོར་ནས་དྷ་ཤོད་ཀ་ཅ་རི་བར་དུ་ཞི་བའི་གོམ་བགྲོད་ཀྱི་སྐད་འབོད་ལས་འགུལ་སྤེལ་སོང་།

བོད་ཀྱི་བུད་མེད་སྒེར་ལངས་ཉིན་མོའི་གལ་གནད་སྐོར་ལ་དབུས་བུད་མེད་ལྷན་ཚོགས་ཀྱི་ཚོགས་གཙོ་ཚེ་རིང་སྒྲོལ་མ་ལགས་ཀྱིས་འདི་གའི་གསར་འགོད་པར། ཕྱི་ཟླ་ ༣ པའི་ཚེས་ ༡༢ ཉིན་མོ་འདི་སྤྱིར་བོད་ཀྱི་རྩ་དོན་དང་བོད་ཀྱི་བུད་མེད་རྣམས་ལ་ཧ་ཅང་གལ་ཆེན་པོ་ཆགས་ཀྱི་ཡོད། ཕྱི་ལོ་ ༡༩༥༩ ལོའི་ཟླ་ ༣ ཚེས་ ༡༠ ཉིན་རྒྱ་ནག་གཞུང་གིས་བོད་བཙན་བཟུང་བྱས་པ་དང་། ཉིན་གཉིས་ཀྱི་རྗེས་སུ་བོད་ཀྱི་བུད་མེད་ཚོས་མ་གྲོས་བསམ་པ་གཅིག་མཐུན་གྱིས་ཕོ་བྲང་པོ་ཏཱ་ལའི་ཐང་ཆེན་དུ་དཔའ་མོ་ཀུན་བཟང་གཙོས་དཔའ་མོ་མང་པོ་ཞིག་འཛོམས་ཏེ་སྐད་འབོད་བརྒྱབ་པའི་ལས་འགུལ་ཞིག་སྤེལ་ཡོད། འདི་ནི་ང་ཚོས་ཧ་ཅང་གལ་ཆེན་པོ་ཞིག་ལ་བརྩི་བཞིན་ཡོད། མ་འོངས་བའང་བོད་ཀྱི་བདེན་མཐའ་མ་གསལ་བར་དུ་སྤྱི་སྒེར་སུ་ཞིག་གིས་ཀྱང་སྣང་མེད་མ་བཏང་བར་མཇུག་སྐྱོང་དགོས་པ་གལ་གནད་ཆེན་པོ་ཞིག་ཏུ་མཐོང་བཞིན་ཡོད། དེ་བཞིན་ད་ལྟའི་ཆར་རྒྱ་གཞུང་གིས་བོད་ནང་གི་བོད་མི་ཚོར་དམ་དྲག་ཆེ་རུ་ཕྱིན་ཏེ་ཛ་དྲག་གི་གནས་སྟངས་འོག་དཀའ་ངལ་འཕྲད་བཞིན་ཡོད། ང་ཚོ་རང་དབང་ལུང་པར་བསྡད་ཡོད་དུས། ཕྱི་ལོ་ ༡༩༥༩ ལོར་བོད་ཀྱི་དཔའ་མོ་ཚོས་རྒྱལ་ཁབ་མང་པོའི་གཞུང་ཚབ་རྣམས་ལ་བོད་བཙན་འཕྲོག་བྱས་པའི་དཔང་བོ་བྱ་དགོས་པའི་སྐད་འབོད་བྱས་ཡོད་པ་བཞིན། བོད་ཀྱི་བུད་མེད་སྒེར་ལངས་ཀྱི་དུས་དྲན་ཧ་ཅང་གལ་ཆེན་པོ་ཆགས་ཡོད། ཅེས་བརྗོད་བྱུང་།

དེ་བཞིན་བོད་རང་བཙན་སློབ་ཕྲུག་ཚོགས་པའི་འགན་འཛིན་བསྟན་འཛིན་པ་སངས་ལགས་ཀྱིས་འདི་གའི་གསར་འགོད་པར། ཕྱི་ཟླ་ ༣ པའི་ཚེས ༡༢ ཉིན་བུད་མེད་སྒེར་ལངས་ཉིན་མོར་སྲུང་གཙི་བྱེད་བཞིན་ཡོད། ཕྱི་ལོ་ ༡༩༥༩ ལོའི་ཟླ་ ༣ ཚེས་ ༡༠ ཉིན་བོད་ཀྱི་རྒྱལ་ས་ལྷ་སར་བོད་ཀྱི་སྐྱེས་པ་མང་པོས་༧གོང་ས་མཆོག་ལ་སྲུང་སྐྱོབ་དང་བོད་ཀྱི་རང་བཙན་འཐབ་རྩོད་བྱས་ཡོད། ཉིན་གཅིག་གི་རྗེས་སུ་རྒྱ་ནག་གཞུང་གིས་བོད་ནང་མནར་གཅོད་བྱེད་བཞིན་ཡོད་པ་ཤེས་ཡོད་ཀྱང་། བོད་ཀྱི་བུད་མེད་རྣམས་ཐང་དུ་ཐོན་ཏེ་བོད་རང་བཙན་ཆེད་རྒྱ་ནག་གཞུང་ལ་ངོ་རྒོལ་བྱས་ཡོད། འདི་ནི་བོད་ཀྱི་ལོ་རྒྱུས་ཐོག་གལ་ཆེན་པོ་ཞིག་ཆགས་ཡོད། འཛམ་གླིང་གི་ལོ་རྒྱུས་ཐོག་ནས་བལྟས་ཀྱང་བུད་མེད་ཀྱིས་རང་ཉིད་ཀྱི་རྒྱལ་ཁབ་རང་བཙན་ཆེད་དུ་ངོ་རྒོལ་བྱས་པ་དཀོན་པོ་རེད། སྔོན་མ་བུད་མེད་ནི་ཁང་པ་གྲུ་བཞི་ཞིག་གི་ནང་ལས་ཀ་བྱེད་མཁན་ཞིག་ཏུ་བརྩི་བཞིན་ཡོད་ཀྱང་། ང་ཚོ་བོད་པའི་བུད་མེད་ཀྱིས་རང་ཉིད་ཀྱི་རྒྱལ་ཁབ་ཆེད་དུ་འཐབ་རྩོད་བྱེད་ཐུབ་པ་གསལ་བོ་བསྟན་ཡོད། ཉིན་མོ་འདི་ང་ཚོ་ཚང་མས་དྲན་གསོ་དང་སྲུང་གཙི་བྱ་དགོས་པ་གལ་ཆེན་པོ་རེད། བོད་ཀྱི་བུད་མེད་སྒེར་ལངས་ཀྱང་བོད་མིའི་ཆེད་དུ་ཡིན་པ་ཤེས་རྒྱུ་གལ་ཆེན་པོ་རེད། བུད་མེད་སྒེར་ལངས་ཉིན་མོར་བུད་མེད་གཅིག་པོ་ཡོང་དགོས་པ་ཞིག་རེད་བསམ་གྱི་མི་འདུག ང་ཚོ་བོད་པ་ཚང་མ་འཛོམས་ནས་ཉིན་མོ་འདི་སྲུང་གཙི་བྱས་པ་བརྒྱུད་བོད་ཀྱི་དཔའ་མོ་རྣམས་དྲན་གསོ་བྱ་དགོས་པ་གལ་ཆེན་པོ་རེད། ཅེས་བརྗོད་བྱུང་།

རྒྱལ་ཡོངས་བོད་ཀྱི་བུད་མེད་སྒེར་ལངས་ཐེངས་ ༦༦ པའི་ཐོག་བོད་ཀྱི་བུད་མེད་ལྷན་ཚོགས་ཀྱི་ཡོངས་ཁྱབ་བསྒྲགས་གཏམ་ཞིག་སྤེལ་བའི་ནང་། རྒྱ་ནག་དམར་པོའི་སྲིད་གཞུང་གིས་བོད་སར་བཙན་འཛུལ་བྱས་པ་ནས་བཟུང་མུ་མཐུད་དྲག་གནོན་འོག་བོད་མི་རིགས་རྩ་མེད་བཟོ་རྒྱུའི་སྲིད་ཇུས་རབ་དང་རིམ་པ་ཞིག་ལག་བསྟར་བྱ་དང་བྱེད་མུས་ཀྱིས་གནས་སྟངས་ཉིན་རེ་ནས་ཉིན་རེ་ཇེ་ཞན་ནས་ཇེ་སྡུག་ཏུ་འགྲོ་བཞིན་ཡོད།  ལྷག་པར་དུ་བོད་ནང་གི་བོད་མི་རྣམས་རྒྱ་ནག་དམར་པོའི་སྲིད་གཞུང་གི་བཙན་གནོན་དང་དམ་དྲག་ཁོ་ནའི་འོག་ཉིན་མཚན་མི་འཁྱོལ་བའི་གནས་སྟངས་ཛ་དྲག་ངང་གནས་ཡོད། ཕྱི་ལོ་༡༩༥༩ ནས་བཟུང་རང་དབང་དང་ཞི་བདེ་ལ་དགའ་བའི་བོད་མི་རྣམས་ནས་ལས་འགུལ་རབ་དང་རིམ་པ་སྤེལ་བར་བརྟེན། རྒྱ་གཞུང་གྱིས་གོ་མཚོན་སྣ་ཚོགས་བེད་སྤྱོད་ཀྱིས་ད་བར་བོད་མི་གྲངས་མེད་དམར་གསོད་བཏང་ཡོད་པ་དང༌། ཀུན་གཟིགས་ྋཔཎ་ཆེན་རིན་པོ་ཆེ་སྐུ་ཕྲེང་༡༡ པ་མཆོག་གཙོས་པའི་བོད་མི་གྲངས་ལས་འདས་པ་གར་སོང་ཆ་མེད་དུ་གྱུར་ཡོད། ལྷག་པར་དུ་རྒྱ་གཞུང་གི་དམ་དྲག་སྲིད་བྱུས་ལ་འུ་ཐུག་ཐབས་ཟད་ཀྱིས་བོད་ནང་བོད་རྒྱལ་ཁབ་དང་མི་རིགས་ཀྱི་དོན་དུ་འུ་ཐུག་བཟོད་བྲལ་གྱིས་རང་ལུས་མེར་སྲེག་གནང་དགོས་བྱུང་ཡོད། མ་ཟད་རྒྱ་གཞུང་གྱིས་བོད་མི་རིགས་རྩ་མེད་བཟོ་རྒྱུའི་བསམ་ངན་རྩུབ་སྤྱོད་ཀྱི་སྲིད་བྱུས་མུ་མཐུད་བཟུང་ནས་དོན་མེད་འཛིན་བཟུང་བཙོན་འགག་དང་། ཉིན་མཚན་ཀུན་དུ་མི་མང་རྣམས་འགྲོ་འདུག་སྤྱོད་གསུམ་གྱི་རང་དབང་མེད་པར་བཀག་འགོག་སྟངས་འཛིན་བྱེད་པ། རྒྱ་གཞུང་གྱིས་བོད་ནང་བཅའ་སྡོད་སློབ་གྲྭ་ཟུར་བཙུགས་ཀྱིས་བོད་ཕྲུག་རྣམས་སློབ་གྲྭར་བཙན་འགག་བྱས་པ་མ་ཟད། དམར་ཤོག་གི་ལྟ་བ་བཙན་ཁྲིད་ཀྱིས་སློབ་གསོ་སྤྲོད་བཞིན་ཡོད། ལྷག་པར་དུ་གྲྭ་བཙུན་རྣམས་སློབ་གྲྭར་བཙན་འགག་བྱས་པ་མ་ཟད། དམར་ཤོག་གི་ལྟ་བ་ཟབ་ཁྲིད་བྱེད་པ་ལས་རང་མི་རིགས་ཀྱི་ཆོས་དང་རིག་གཞུང་གི་བྱེད་སྒོའི་ཐད་བཀག་འགོག་བྱས་པ། དེ་བཞིན་བོད་རིགས་ལས་བྱེད་པ་རྣམས་ཆོས་ཕྱོགས་ཀྱི་བྱེད་སྒོ་ཁག་ལ་མཉམ་ཞུགས་བྱ་མི་ཆོག་པ། བོད་རིགས་རྣམས་བོད་ས་སྟོད་སྨད་བར་གསུམ་དུ་ཡུལ་སྐོར་འགྲོ་རྒྱུར་ཡང་བཀག་འགོག་སྟངས་འཛིན་ལ་སོགས་པའི་བྱ་སྤྱོད་ཚད་ལས་བརྒལ་བ་བྱེད་མུས་རེད། ཅེས་འཁོད་འདུག

ཡང་དེའི་ནང་བསྒྲགས་གཏམ་ནང་། སྤྱིར་བོད་མཐོ་སྒང་ལ་འཛམ་གླིང་གི་སྣེ་གསུམ་པ་ཞེས་འབོད་ཅིང་གོ་ལ་སྤྱི་ཡོངས་ཀྱི་ཁོར་ཡུག་གི་འགྱུར་འགྲོས་ལ་ཁྱད་པར་བཟོ་ཐུབ་པའི་ནུས་པ་ལྡན་ཞིང་བོད་ནང་གི་ཁོར་ཡུག་གི་བརྟན་ལྷིང་ནི་བོད་མི་ཙམ་མ་ཟད། ཨེ་ཤ་ཡའི་མི་འབོར་དུང་ཕྱུར་གཅིག་དང་ཕྱེད་ཀའི་འཚོ་བའི་རྟེན་གཞིའང་བོད་ཀྱི་ཆུ་རྒྱུན་ཁག་ལ་ཐུག་ཡོད་པ་དང༌། འདི་ལོའི་ཟླ་དང་པོའི་ནང་བོད་ལ་སྟོད་ས་ཁུལ་ནང་ས་ཡོམ་གྱིས་གོད་ཆག་འབྱུང་རྩ་གཙོ་བོ་ནི་རྒྱ་ནག་དམར་གཞུང་གིས་བོད་ས་བཙན་འཕྲོག་བྱས་པ་ནས་བཟུང་བོད་ནང་གི་ཤིང་ནགས་གཅོད་བྲེག་དང༌། གཏེར་ཁ་སྔོག་འདོན། བོད་ནང་གི་ཆུ་ཆེན་དང་གཙང་ཆུ་ཆེ་ཁག་གང་སར་ཆུ་མཛོད་གསར་རྒྱག་དང་གཙང་ཆུ་ཁ་བསྒྱུར། དེ་མ་ཟད་བོད་མིའི་འགྲོ་སྡོད་ཀྱི་རང་དབང་ལ་བརྩི་སྲུང་མེད་པར་བཙན་དབང་གིས་ས་གནས་གཞན་དུ་གནས་སྤོ་རུ་བཅུག་པ། དེ་བཞིན་རྡུལ་ཕྲན་མཚོན་ཆ་སོགས་རྫས་རིགས་དང་འབྲེལ་བའི་བཟོ་གྲྭ་སྣ་མང་འཛུགས་སྐྲུན་བྱས་པ། བོད་ནང་ཁ་རླུང་འབག་བརྩོག་བཟོས་པ་སོགས་ལ་བརྟེན་ནས་བྱུང་ཡོད་པས། རྒྱ་ནག་དམར་གཞུང་གིས་བོད་ནང་གི་སྣོད་བཅུད་གཉིས་ལ་གཏོར་སྐྱོན་གཏོང་བཞིན་པར་ངེས་པར་མཚམས་འཇོག་དགོས།  གནད་དོན་དེ་བོད་དང་བོད་མི་ཁོ་ནའི་བདེ་སྡུག་ཙམ་མ་ཡིན་པར་བོད་ཀྱི་ཉེ་འབྲེལ་རྒྱལ་ཁབ་ཁག་གི་བདེ་འཇགས་དང་མི་མང་གི་འཚོ་གནས་བདེ་སྡུག་དང་ཐད་ཀར་འབྲེལ་བ་ཡོད་པས། ཨེ་ཤ་ཡ་རྒྱལ་ཁབ་ཀྱི་མི་མང་ནས་ཀྱང་དོ་སྣང་དགོས་རྒྱུར་དྲན་སྐུལ་དང་སྦྲགས་རྒྱལ་སྤྱིའི་སྤྱི་ཚོགས་ནས་ཀྱང་དོ་སྣང་ནན་པོ་གནང་རྒྱུར་འབོད་སྐུལ་ཞུ་རྒྱུ་ཡིན། ཞེས་འཁོད་འདུག

གསར་འགོད་པ། བྱམས་པ་ཚེ་རིང་། རྩོམ་སྒྲིག་པ། པདྨ་མཚོ།