རྩིས་ལོ་ ༢༠༢༥ ་་ ༢༠༢༦ ལོའི་སྔོན་རྩིས་གཏན་འབེབས་ཀྱི་གྲོས་ཚོགས་ཚོགས་དུས་དགུ་བ་དབུ་ཚུགས་སོང་།

སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་༧སྐུའི་ཡང་སྲིད་ཕེབས་ཕྱོགས་ཐད་རྒྱལ་སྤྱིའི་སྤྱི་ཚོགས་ནང་ངོས་འཛིན་གསལ་བོ་ཡོང་བར་ཐབས་ལམ་མྱུར་དུ་བྱ་རྒྱུ་གལ་ཆེན་པོ་རེད་ཅེས་གསུངས་སོང་།

ལོ་རེའི་ཕྱི་ཟླ་གསུམ་པའི་ནང་བོད་མིའི་སྒྲིག་འཛུགས་ཀྱི་དབུས་ས་གཉིས་ཀྱི་ལས་ཁུངས་མ་ལག་དང་བཅས་པའི་སྔོན་རྩིས་གཏན་འབེབས་གནང་སྲོལ་ཡོད་པ་ལྟར། དེ་རིང་ཕྱི་ཚེས་ ༡༧ ཉིན་གྱི་ཉི་འོད་དྲོ་ཞིང་འཇམ་ལ་བོད་མི་མང་སྤྱི་འཐུས་རྣམ་པས་བོད་ཆས་གཙང་མ་རེ་གྱོན་ཏེ། གྲོས་ཚོགས་ཀྱི་ཚོགས་ཁང་དུ་འཛུལ་ནས་ཡུན་རིང་མ་འགོར་བའི་བར་ཏེ། སྔ་དྲོའི་ཆུ་ཚོད་ ༩།༣༠ སྟེང་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དབུ་བཞུགས་ཐོག སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༩ པ་དབུ་འཛུགས་གནང་སོང་བ་དང་། སྤྱི་འཐུས་བསྟན་འཛིན་ཆོས་འཛིན་ལགས་དང་སྤྱི་འཐུས་རྡོ་རིང་བསྟན་འཛིན་ཕུན་ཚོགས་ལགས། སྤྱི་འཐུས་ཆོས་འཕེལ་ཐུབ་བསྟན་ལགས་བཅས་ཀྱིས་ཉིན་འགའི་རིང་དགོངས་པ་ཞུས་པ་མ་གཏོགས། གཞན་སྤྱི་འཐུས་ཚང་མ་ལྷན་འཛོམས་ཀྱི་ཐོག་ནས་འབྱུང་འགྱུར་ལས་ཉིན་ ༡༣ རིང་རྩིས་ལོ་ ༢༠༢༥ ་་ ༢༠༢༦ ལོའི་བོད་མིའི་སྒྲིག་འཛུགས་ཀྱི་ལས་ཁུངས་མ་ལག་དང་བཅས་པའི་སྔོན་རྩིས་ཐོག་བགྲོ་གླེང་དང་གཏན་འབེབས་གནང་རྒྱུ་ཡིན་ཞིང་། དམིགས་བསལ་གྱིས་ད་ལན་ཁྲིམས་ཞིབ་ཁང་དང་འབྲེལ་བའི་ཁྲིམས་ཡིག་དོན་ཚན་གསུམ་དང་། ལས་བྱེད་འདེམས་ལྷན་གྱི་སྒྲིག་གཞི། བཙན་བྱོལ་བོད་མིའི་གཞུང་དངུལ་འདུ་འགོད་དང་སྟངས་འཛིན་གྱི་སྒྲིག་གཞི། བཙན་བྱོལ་བོད་མིའི་ས་ཁང་སྒྲིག་གཞི།  མཛད་གཙོ་རྣམ་པའི་ཐོང་ཐང་དང་འཕོ་འགྱུར་གྱི་སྒྲིག་གཞི་སོགས་བཅའ་ཁྲིམས་དོན་ཚན་ཁག་ཅིག་བསྐྱར་བཅོས་གནང་རྒྱུ་ཡིན་འདུག

བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་གྲོས་ཚོགས་དབུ་འཛུགས་ཀྱི་གསུང་བཤད་གནང་སྐབས། གསུམ་བཅུའི་དུས་དྲན་ནི་བོད་མི་ཡོངས་ཀྱིས་དུས་ནམ་ཡང་བརྗེད་དུ་མེད་པའི་དུས་དྲན་གལ་ཆེན་པོ་ཞིག་ཆགས་ཡོད། ཡིན་ནའང་ཡིད་སྐྱོ་བ་དང་གནས་སྟངས་སྡུག་པོ་ཞིག་ནི་བོད་ནང་གི་བོད་མི་རྣམས་ཆགས་བསྡད་ཡོད། ཕྱི་ཟླ་གསུམ་པ་མགོ་བཙུགས་པ་ནས་བོད་ནང་དུ་དམ་དྲག་བྱེད་ཤུགས་ཆེ་རུ་བཏང་ཡོད། ང་ཚོས་གོ་ཐོས་སུ་ཕྱི་ཟླ་གསུམ་པའི་སྐབས་བོད་ནང་གི་མཐོ་སློབ་ཁག་གི་སློབ་མ་རྣམས་ཕྱི་ལོགས་སུ་འགྲོ་མི་ཆོག་པ་དང་། འདུ་འཛོམས་དང་སོ་སོའི་བསམ་ཚུལ་སྟོན་པའི་གོ་སྐབས་མེད་པ་རེད། ས་གནས་དང་དགོན་སྡེ་ཁ་ཤས་སུ་ཕྱི་ཟླ་གསུམ་པ་ཧྲིལ་པོར་སློབ་གསོའི་ལས་འགུལ་སྤེལ་བའི་གནས་སྟངས་བྱུང་འདུག ང་ཚོའི་ངོས་ནས་ཉིན་མོ་དེར་གལ་ཆེན་པོ་བརྩིས་ཡོད་པ་བཞིན་རྒྱ་གཞུང་གིས་བོད་ནང་དམ་དྲག་ཤུགས་ཆེན་བྱེད་བཞིན་འདུག རྒྱ་གཞུང་གིས་བོད་མིའི་བསམ་ཚུལ་ལེན་ཐུབ་ཚེ་གནས་ཚུལ་ཆ་ཚང་རྟོགས་ཀྱི་ཡོད་ཀྱང་། ལོ་ངོ་ ༦༦ རིང་རྒྱ་གཞུང་གིས་བོད་ནང་དྲག་གནོན་བྱས་ཡོད་པ་དང་། ད་དུང་མུ་མཐུད་དུ་དྲག་གནོན་བྱས་ཏེ་གནས་རྒྱུ་ཡིན་མིན་དྲི་བ་ཆགས་ཡོད། གསུམ་བཅུའི་དུས་དྲན་གྱི་ཕྱི་ཉིན་༧གོང་ས་རྒྱལ་བ་རིན་པོ་ཆེ་མཆོག་ནས་རྒྱ་གཞུང་ལ་འཐབ་རྩོད་དང་འབྲེལ་བའི་(voice for voiceless )དབྱིན་ཡིག་གི་ཕྱག་དེབ་གསར་བ་ཞིག་དབུ་འབྱེད་གནང་ཡོད།  རྒྱལ་སྤྱིའི་གསར་ལམ་ཁག་ནས་དེའི་ཐོག་དོ་སྣང་ཧ་ཅང་ཆེན་པོ་ཞིག་བྱུང་སོང་། དེའི་ནང་ནས་ཀྱང་༧གོང་ས་མཆོག་གི་ཡང་སྲིད་ཕེབས་ཕྱོགས་དང་འབྲེལ་བའི་ཐོག་གནས་ཚུལ་མང་པོ་ཐོན་སོང་།

བོད་མི་མང་སྤྱི་འཐུས་ལྷན་ཚོགས་ཀྱི་གསུམ་བཅུའི་དུས་དྲན་གསུང་བཤད་ནང་ཡང་སྲིད་ཕེབས་ཕྱོགས་སྐོར་ཁ་གསལ་འཁོད་ཡོད། རྒྱལ་སྤྱིའི་སྤྱི་ཚོགས་ནང་༧གོང་ས་མཆོག་གི་སྐུའི་ཡང་སྲིད་དང་བོད་ཀྱི་གནད་དོན་ཐོག་དོ་སྣང་ཤུགས་ཆེན་འགྲོ་བ་དང་བསྟུན། རྒྱ་ནག་ཕྱི་སྲིད་ལྷན་ཁང་གིས་དེའི་ཐོག་ལན་འདེབས་གནང་བའི་གནས་སྟངས་བྱུང་སོང་། ༧གོང་ས་རྒྱལ་བ་རིན་པོ་ཆེ་མཆོག་གི་སྐུའི་ཡང་སྲིད་ཕེབས་ཕྱོགས་དེ་བོད་བརྒྱུད་ནང་བསྟན་གྱི་ཆོས་ཕྱོགས་ཀྱི་འགྲོ་སྟངས་ཐོག་འགྲོ་དགོས་པ་ཞིག་ཆགས་ཡོད། ལྷག་པར་དུ་ཡང་སྲིད་ཞེས་པ་སྐུ་གོང་མའི་མཛད་པ་འཕྲིན་ལས་མཐའ་སྐྱོང་གནང་མཁན་ཞིག་ཆགས་ཡོད། རྒྱ་ནག་གིས་ཆབ་སྲིད་ཀྱི་དགོས་མཁོ་དང་འབྲེལ་བའི་ཐོག་ནས་ལག་པ་བརྐྱངས་བསྡད་ཚེ། རྒྱལ་སྤྱིའི་སྤྱི་ཚོགས་དང་བོད་ནང་། རྒྱ་ནག་མི་མང་བཅས་ཀྱིས་ཡིད་ཆེས་བྱེད་མི་ཐུབ་པའི་གནས་སྟངས་གསལ་བོ་ཆགས་ཡོད། དེའི་ཐོག་ང་ཚོས་བསྒྲུབ་དགོས་པའི་གནད་དོན་ཅིག་ཡོད། ཕྱི་ལོ་ ༢༠༡༡ ལོར་༧གོང་ས་རྒྱལ་བ་རིན་པོ་ཆེ་མཆོག་ནས་ཡང་སྲིད་ཕེབས་ཕྱོགས་སྐོར་ཡོངས་ཁྱབ་ཡིག་ཆ་ཞིག་གསལ་བསྒྲགས་གནང་ཡོད། དེའི་ནང་དུ་༧གོང་ས་མཆོག་ནས་ངོས་རང་རྒྱལ་བ་དགེ་འདུན་གྲུབ་པའི་སྐུ་ཚེའི་དུས་ཚོད་ཅིག་ལ་ཕེབས་ཚེ།༧སྐུའི་ཡང་སྲིད་ངོས་འཛིན་བྱེད་ཕྱོགས་ཀྱི་གནས་སྟངས་ཐོག་ཡིག་ཐོག་ནས་གསལ་བོ་འཇོག་རྒྱུ་ཡིན་པའི་བཀའ་ཕེབས་ཡོད། ཉེ་ཆར་བཏོན་པའི་༧གོང་ས་མཆོག་གི་ཕྱག་དེབ་དེའི་ནང་དུ་༧སྐུའི་ཡང་སྲིད་ཕེབས་ཕྱོགས་ཐད་ཁ་གསལ་གྱིས་གསལ་བསྒྲགས་གནང་རྒྱུའི་དགོངས་གཞི་ཞིག་འདུག རྒྱལ་སྤྱིའི་སྤྱི་ཚོགས་ནང་༧སྐུའི་ཡང་སྲིད་བྱེད་ཕྱོགས་ཐད་ངོས་འཛིན་གསལ་བོ་བྱུང་བར་ཐབས་ལམ་མྱུར་དུ་བྱ་རྒྱུ་གལ་ཆེན་པོ་རེད།  ཅེས་གསུངས་སོང་།

དེ་བཞིན་ཚོགས་གཙོ་མཆོག་གིས། ཉེ་ལམ་རྒྱ་ནག་གི་སྲིད་གྲོས་ཚོགས་ཆེན་དང་རྒྱ་ནག་འཐུས་མི་ཚོགས་ཆེན་གཉིས་འཚོགས་པ་རེད། དེ་ལ་རྒྱལ་སྤྱིའི་ཆབ་སྲིད་གནས་བབ་ཐོག་ནས་བལྟས་ཚེ། རྒྱ་ནག་ནང་དཔལ་འབྱོར་གནས་བབ་ཐོག་གདོང་ལེན་བྱ་དགོས་པའི་བགྲོ་གླེང་གནང་ཡོད། དེ་བཞིན་བོད་རང་སྐྱོང་ལྗོངས་ཟེར་བའི་མགོ་ཁྲིད་ཁག་ནས་བོད་ཕྱི་ཕྱོགས་ཀྱིས་བོད་ནང་གི་གནས་སྟངས་འགྲེལ་བརྗོད་གནང་བ་དངོས་ཡོད་མིན་པ་དང་། བོད་ནང་དུ་ཡར་རྒྱས་དང་བདེ་སྐྱིད་ཡོད་པ་མུ་མཐུད་དུ་དྲིལ་བསྒྲགས་བྱེད་བཞིན་འདུག  གསུམ་བཅུའི་དུས་དྲན་སྐབས་རྒྱ་གཞུང་གིས་བོད་ནང་དམིགས་བསལ་དམ་དྲག་བྱེད་བཞིན་ཡོད་ཀྱང་། གཞིས་ལུས་བོད་མིའི་ལྷག་བསམ་དང་སེམས་ཤུགས་ཧ་ལས་པ་ཆགས་བསྡད་ཡོད། ཡིན་ནའང་། རྒྱ་གཞུང་གི་འོག་ཏུ་འགྲོ་དགོས་མཁན་རིགས་ཀྱིས་དེ་ལྟར་བཤད་བསྡད་ཡོད། དངོས་ཡོད་གནས་ཚུལ་ཐོག་དེ་ལྟར་མིན་པའི་ལན་རྒྱག་ཐུབ་པའི་གདོང་སྤོབས་ཡོད། ང་ཚོ་བཙན་བྱོལ་དུ་གྱར་ནས་ལོ་ངོ་ ༦༦ འགྲོ་བཞིན་པའི་དུས་ཡུན་རིང་༧གོང་ས་རྒྱལ་བ་རིན་པོ་ཆེ་མཆོག་གི་མཛད་པ་འཕྲིན་ལས་དང་། བོད་པའི་མི་རབས་རྒན་པ་དང་ད་ལྟའི་མི་རབས། རྒྱལ་སྤྱིའི་སྤྱི་ཚོགས། གནས་ཡུལ་རྒྱ་གར་གཞུང་གི་མཐུན་སྦྱོར་དང་རྒྱབ་སྐྱོར་སོགས་ལ་བརྟེན་ནས། བོད་ཀྱི་རྩ་དོན་འཐབ་རྩོད་དང་། བོད་ཀྱི་ཆོས་དང་རིག་གཞུང་སོགས་གསོན་པོར་གནས་ཐུབ་ཡོད་ལ། རྒྱལ་སྤྱིའི་སྤྱི་ཚོགས་ནས་ཀྱང་དོ་སྣང་བསླེབས་པའི་གནས་སྟངས་ཤིག་ཆགས་ཡོད། དེའི་ཐོག་བོད་མིའི་སྒྲིག་འཛུགས་ཀྱི་ལས་དོན་བྱེད་ཕྱོགས་དང་། གནད་ཡོད་མི་སྣ་རྣམས་ཀྱིས་ནུས་པ་ཆེ་རུ་གཏོང་བར་མུ་མཐུད་འགན་འཁུར་གྱི་དགོངས་པ་བཞེས་རྒྱུ་གལ་ཆེན་པོ་རེད། ཅེས་གསུངས་སོང་།

ཡང་ཚོགས་ཐོག་ཏུ་རྒྱ་གར་གྱི་སྲིད་བློན་ཟུར་པ་མན་མོ་ཧན་སིངྒ་མཆོག་དང་། ཨ་རིའི་སྲིད་འཛིན་ཟུར་པ་སྐུ་ཞབས་ཇི་མིའི་ཀ་ཊར་མཆོག བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཞོན་ཟུར་པ་བྱ་དུར་བསོད་ནམས་བཟང་པོ་ལགས། ༧སྐུའི་གཅེན་པོ་བཀའ་ཟུར་རྒྱལ་ལོ་དོན་འགྲུབ་མཆོག བོད་མིའི་སྒྲིག་འཛུགས་ཀྱི་བཀའ་ཟུར་ཞེ་བོ་བློ་བཟང་དར་རྒྱས་ལགས། བོད་མི་མང་སྤྱི་འཐུས་སྐབས་དྲུག་པའི་སྤྱི་ཟུར་ཆོས་རྗེ་སྒ་ཨཿདབྱངས་སྤྲུལ་སྐུ་རིན་པོ་ཆེ་མཆོག བོད་མི་མང་སྤྱི་འཐུས་སྐབས་བཅུ་གསུམ་པ་དང་བཅུ་བཞི་པའི་སྤྱི་ཟུར་འཁོར་ཚ་བསོད་ནམས་དགྲ་འདུལ་ལགས། བོད་མི་མང་སྤྱི་འཐུས་སྐབས་བཅུ་གཉིས་དང་བཅུ་གསུམ་པའི་སྤྱི་ཟུར་སྨན་པ་ཁྱུང་ལུང་ཐོགས་མེད་ལགས་བཅས་དགོངས་པ་རྫོགས་ཡོད་པར་གཞུང་འབྲེལ་མྱ་ངན་གུས་འདུད་ཀྱི་རྗེས་དྲན་གྲོས་ཆོད་བཏོན་གནང་སོང་བ་མ་ཟད། སྲིད་སྐྱོང་སྤེན་པ་ཚེ་རིང་མཆོག་གིས་སྔོན་རྩིས་འགོད་འབུལ་སྐོར་གྱི་གསུང་བཤད་གནང་ཞིང་། སྔོན་རྩིས་ཚོད་དཔག་འཆར་རྩིས་ཚོགས་ཆུང་གི་ཚོགས་གཙོ་སྤྱི་འཐུས་དགེ་བཤེས་ལྷ་རམས་པ་ཨ་ཀྲུག་ཚེ་བརྟན་ལགས་ཀྱིས་ཚོགས་ཆུང་གི་སྙན་ཐོ་སྒྲོག་སྦྱངས་གནང་སོང་།

གསར་འགོད་པ། བསྟན་འཛིན་ཕུར་བུ། བྱམས་པ་ཚེ་རིང་། རྩོམ་སྒྲིག་བྱེད་མཁན། སྐལ་བཟང་སྦྱིན་པ།