༧རྒྱལ་དབང་སྐུ་ཕྲེང་བཅུ་གསུམ་པ་ཆེན་པོ་མཆོག་གིས་ཕྱི་ལོ་ ༡༩༡༦ ལོར་ལྷ་ལྡན་སྨན་རྩིས་ཁང་ཕྱག་བཏབ་ནས་མི་ལོ་ ༡༠༩ དང་། ༧རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་གིས་ཕྱི་ལོ་ ༡༩༦༡ ལོར་བཞུགས་སྒར་དྷ་རམ་ས་ལར་འགྲོ་ཕན་སྨན་རྩིས་ཁང་བསྐྱར་འཛུགས་བསྐྱངས་ཏེ་ལོ་ངོ་ ༦༤ འཁོར་བའི་དུས་དྲན་སྲུང་གཙི་གནང་།
འགྲོ་ཕན་སྨན་རྩིས་ཁང་དབུ་བརྙེས་པའི་མཛད་སྒོ་འཚོགས། བོད་ཀྱི་དུས་བབ་གསར་ཁང་གིས་པར་སྒྲིག་སྦྱོར་བྱས། ༢༠༢༥།༣།༢༥
དེ་རིང་༧གོང་ས་སྐུ་ཕྲེང་བཅུ་གསུམ་པ་མཆོག་གིས་ལྷ་ལྡན་སྨན་རྩིས་ཁང་ཕྱག་བཏབ་ནས་མི་ལོ་ ༡༠༩ དང་། ༧གོང་ས་རྒྱལ་བ་རིན་པོ་ཆེ་མཆོག་ནས་བྱེས་སུ་འགྲོ་ཕན་སྨན་རྩིས་ཁང་ཕྱག་བཏབ་ནས་མི་ལོ་ ༦༤ འཁོར་བ་དང་བསྟུན། སྨན་སློབ་སྐབས་ ༢༢ དང་རྩིས་སློབ་སྐབས་ ༡༢ ཀྱི་སློབ་ཐོན་སྨན་རྩིས་པ་རྣམས་ཀྱི་བསླབ་པ་མཐར་སོན་གྱི་མཛད་སྒོ་འཚོགས་ཡོད་པ་མ་ཟད། བོད་ལུགས་ལྟར་༧གོང་ས་རྒྱལ་བ་རིན་པོ་ཆེ་མཆོག་དགུང་གྲངས་ ༩༠ ཕེབས་སྐབས་འགྲོ་ཕན་བོད་ཀྱི་སྨན་རྩིས་ཁང་གིས་བརྟན་བཞུགས་བསྟར་འབུལ་གྱི་དྲན་རྟེན་བརྙན་དེབ་ཅིག་ཀྱང་དབུ་འབྱེད་གནང་སོང་།
འགྲོ་ཕན་བོད་ཀྱི་སྨན་རྩིས་ཁང་གི་སྤྱི་ཁྱབ་འགན་འཛིན་ཐུབ་བསྟན་ཚེ་རིང་ལགས་ཀྱིས། སྨན་རྩིས་ཁང་དབུ་བརྙེས་པའི་ཉིན་མོ་ནི་༧སྐུ་མདུན་སྐུ་ཕྲེང་རིམ་བྱུང་ངམ་ལྷག་པར་༧གོང་ས་ལྔ་པ་ཆེན་པོ་དང་། བཅུ་གསུམ་པ་ཆེན་པོ། བཅུ་བཞི་པ་ཆེན་པོ་བཅས་ཀྱིས་བོད་ཀྱི་སྨན་རྩིས་ཀྱི་བསྟན་པ་མི་ཉམས་རྒྱུན་འཛིན་དང་ཉམས་པ་སོར་ཆུད་ཆེད་དུ་ཐུགས་བསྐྱེད་འཕྲིན་ལས་ཇི་ལྟར་མཛད་པ་རྗེས་སུ་དྲན་པའི་ཉིན་མོ་ཞིག་ཡིན། དེ་ཡང་༧གོང་ས་ལྔ་པ་ཆེན་པོའི་སྐུ་དུས་ ༡༦༩༦ ལོར་ཆོས་དང་སྨན་གཉིས་གཙོ་བོར་གྱུར་བའི་རིག་གནས་ཁག་ལ་སློབ་གཉེར་བྱ་ཡུལ་སྨན་པའི་གྲྭ་ཚང་ལྕགས་པོ་རི་བཻཌཱུརྱ་ལྟ་ན་ངོ་མཚར་འགྲོ་ཕན་རིག་བྱེད་གླིང་ཞེས་ཡོངས་སུ་གྲགས་པ་དེ་ཉིད་གསར་འཛུགས་མཛད། ༧རྒྱལ་དབང་སྐུ་ཕྲེང་བཅུ་གསུམ་པ་ཆེན་པོས་ཕྱི་ལོ་ ༡༩༡༦ ལོར་ལྷ་ས་སྨན་རྩིས་ཁང་གསར་འཛུགས་མཛད་པ་ནས་བཟུང་། བོད་མདོ་དབུས་ཁམས་གསུམ་དང་ཧི་མ་ལ་ཡའི་རི་བརྒྱུད་དུ་སྨན་རྩིས་པ་སྟོང་ཕྲག་བརྒལ་བ་གསོ་སྐྱོང་དང་། བོད་ཡུལ་སྟོད་སྨད་བར་གསུམ་གྱི་དགོན་སྡེ་ཁག་ཏུ་སྨན་པ་གྲྭ་ཚང་དང་རྫོང་གཞིས་ཁག་བཅས་ལ་སྐབས་དུས་སོ་སོར་སྨན་ཁང་བཙུགས་གནང་བ་སོགས་མཛད་རྗེས་ཤིན་ཏུ་ཆེ་ལ། ཕྱི་ལོ་ ༡༩༦༡ ལོར་སྐུའི་བླ་སྨན་ཡེ་ཤེས་དོན་ལྡན་ལགས་དང་། བླ་སྨན་པ་མཚོ་སྣ་འཇམ་དབྱངས་བཀྲིས་ལགས། སྐུ་ངོ་བར་གཞིས། ཕུན་ཚོགས་དབང་རྒྱལ་བཅས་པ་དྷ་སར་བཀའ་འགུགས་ཀྱིས་ཅོབ་རཱ་ཧ་འོ་སི་ནང་དུ་བོད་ཀྱི་གསོ་བ་རིག་པའི་འཆད་ཉན་མགོ་འཛུགས་གནང་སྟེ་སྨན་རྩིས་ཀྱི་བསྟན་པའི་མེ་རོ་རྒྱ་གར་དུ་སླར་གསོ་མཛད། ཕྱི་ལོ་ ༡༩༦༧ ལོར་སྨན་རྩིས་མཐོ་སློབ་གཉིས་ཀ་ཟླ་སྒྲིལ་བཏང་སྟེ་སྒྲིག་འཛུགས་ཀྱི་མིང་དུ་འགྲོ་ཕན་སྨན་རྩིས་ཁང་ཞེས་གསོལ་བར་གནང་ཞིང་། འཛམ་གླིང་ཀུན་ཏུ་སྨན་རྩིས་བསྟན་པ་རྒྱས་པའི་རྨང་གཞི་ཡང་དེ་ནས་ཚུགས་ཡོད། དེ་ལྟར་མགོན་པོ་རྣམས་ཀྱི་ཐུགས་རྗེ་བཀའ་དྲིན་ལ་བརྟེན་ནས་སྙིགས་མའི་དུས་འདིར་སྨན་རྩིས་ཀྱི་བསྟན་པ་ཡར་ངོས་ཟླ་ལྟར་འཕེལ་ཞིང་གནས་ཐུབ་པ་བྱུང་ཡོད། ཅེས་གསུངས་སོང་།
ཡང་ཁོང་གིས། ད་ལྟའི་ཆར་སྨན་རྩིས་ཁང་དུ་ལས་བྱེད་དང་ལས་མི་བསྡོམས་པའི་མི་གྲངས་ ༦༡༩ ཡོད་ལ། དེའི་ནང་ནས་ ༣༡༦ ཕོ་དང་ ༣༠༣ མོ་ཡིན། དེ་ཡང་སྨན་པ་ ༡༢༩ དང༌། སྐར་རྩིས་པ་ ༢༨ ། ལས་བྱེད་ངོ་མ་ཡིན་པ་ ༢༨༥ ། ཚོད་ལྟའི་ལས་བྱེད་ཡིན་པ་ ༡༨ ། ཆོད་གན་ལས་བྱེད་ཡིན་པ་ ༤༥ ། ཆོད་གན་ལས་མི་ཡིན་པ་ ༡༡༤ བཅས་ཡོད། ཕྱི་ལོ་ ༢༠༢༤ ཟླ་ ༤ ཚེས་ ༡ ནས་ཕྱི་ལོ་ ༢༠༢༥ ཟླ་ ༣ ཚེས་ ༢༠ བར་རྩ་དགོངས་ཕྱིན་པའི་ལས་བྱེད་གྲངས་ ༣༦ དང༌། བགྲེས་ཡོལ་ཕྱིན་པ་ ༡༣ བྱུང་ཡོད་ཅིང་། དེ་མཚུངས་ཆོད་གན་ལས་བྱེད་ ༢༧ དང་། ཚོད་ལྟའི་ལས་བྱེད་ ༣༨ གསར་བསྐོའང་བྱས་ཡོད། དངུལ་རྩིས་ཀྱི་ཆ་ནས་ཞུས་ན། རྩིས་ལོ་ ༢༠༢༢་་་༢༣ ནང་ཁེ་བཟང་ངམ་སོང་ལས་བྱུང་ཧིན་སྒོར་ས་ཡ་ ༢༠ མིན་ཙམ་ཞིག་ཐོན་ཡོད་པ་དང་། དེ་སྔོན་རེ་བ་བྱས་པ་བཞིན་རྩིས་ལོ་ ༢༠༢༣་་་༢༤ ནང་དུ་སོང་ལས་བྱུང་ཧིན་སྒོར་ས་ཡ་ ༤༥ ཙམ་མང་བ་བྱུང་ཡོད། དེ་བཞིན་དེ་སྔ་རྩིས་སྤྲོད་རྩིས་ལེན་སྐབས་སྤྲོད་བསྡད་ཧིན་སྒོར་ས་ཡ་ ༣༣༠ ཙམ་ཡོད་པ་ཆ་གསེས་ཐོག་ཕྱིར་སློག་བྱས་ཏེ་ད་ལྟའི་ཆར་ས་ཡ་ ༧༠ ཙམ་ལས་མེད། དེ་ཡང་རིང་མིན་གཙང་བཟོ་ཐུབ་པ་བྱ་རྒྱུ་ཡིན། ནད་པའི་ཞབས་ཞུར་མཚོན་ན། དབུས་དང་ཡན་ལག་སྨན་ཁང་ཁག་ ༦༣ གྱིས་ཕྱི་ལོ་ ༢༠༢༤ ཟླ་ ༤ ཚེས་ ༡ ནས་ཕྱི་ལོ་ ༢༠༢༥ ཟླ་ ༢ ཚེས་ ༢༨ བར་ནད་པའི་གྲངས་འབུམ་ ༦ དང་ཁྲི ༧ ཙམ་ལ་བརྟག་དཔྱད་ཀྱི་ཞབས་ཞུ་བསྒྲུབས་ཡོད་པ་དང་། སྨན་སྦྱིན་ཧིན་སྒོར་ས་ཡ་ ༣༨ མིན་ཙམ་ཕུལ་ཡོད། སྐར་རྩིས་སྡེ་ཚན་ནས་ཚེ་རྩིས་རྒྱས་འབྲིང་བསྡུས་གསུམ་འདོན་འབུལ་བྱས་པ་ ༢༦༣ དང༌། བག་རྩིས་དང་གཤིན་རྩིས་སོགས་འདོན་འབུལ་བྱས་པ་ ༡༣༤ ། ངག་ཐོག་རྩིས་འབྲས་བྱས་པ་ ༡༣༩ བཅས་བྱུང་ཡོད། ནད་བཅོས་ཉམས་ཞིབ་སྡེ་ཚན་ནས་སྤྱིར་བཏང་དངངས་ཚབས་ནད་གཞི་ (General Anxiety Disorder) ཐོག་ཉམས་ཞིབ་གནང་ཡོད། ཅེས་གསུངས་སོང་།
སྐུ་མགྲོན་གཙོ་བོ་འཕྲོད་བསྟེན་དྲུང་ཆེ་བྱམས་པ་ཕུན་ཚོགས་ལགས་ཀྱིས། དེ་རིང་༧གོང་ས་རྒྱལ་བ་རིན་པོ་ཆེ་མཆོག་ནས་བཙན་བྱོལ་དུ་སྨན་རྩིས་ཁང་བསྐྱར་གསོ་མཛད་ནས་མི་ལོ་ ༦༤ འཁོར་བའི་ཉོན་མོ་འདིའི་ཐོག གདོད་མ་ནས་བོད་ཀྱི་མི་རབས་རྒན་པ་དག་གིས་དཀའ་སྤྱད་ལས་བྱུང་བའི་བོད་ཀྱི་ཐུན་མོང་མ་ཡིན་པའི་གསོ་བ་རིག་པ་དེ། དེང་གི་ཆར་འཛམ་གླིང་གི་རྒྱལ་ཁབ་སུ་ལ་ངོམས་ནའང་ངོམ་ཆོག་པ་ཞིག་ཡོད་པའི་ཁར། ༧གོང་ས་རྒྱལ་བ་རིན་པོ་ཆེ་མཆོག་གི་དབུ་འཁྲིད་བཟང་པོའི་མཐུ་འོག་དང་། བོད་ཀྱི་ཐུན་མོང་མ་ཡིན་པའི་སྲོལ་རྒྱུན་རིག་གཞུང་ཕྱུག་པོ་དེའི་ཟིལ་ཤུགས་ལ་བརྟེན་ནས། འཛམ་གླིང་ས་ཕྱོགས་གང་སར་ནས་དེང་གི་ཆར་བོད་ཀྱི་ཆོས་རིག་ལ་དོ་སྣང་ཆེན་པོ་བྱེད་མུས་ཡིན་ལ། ལྷག་པར་བོད་ཀྱི་གསོ་བ་རིག་པའི་གཞུང་ལུགས་དེ་ལའང་དོ་དབྱིངས་དང་ཆེ་མཐོང་གནང་མུས་ཡིན་ཞིང་། རྒྱ་གར་ཡུལ་མི་མང་དག་ཅིག་གིས་དང་བླངས་ཀྱི་ཐོག་ནས་བོད་ཀྱི་འགྲོ་ཕན་སྨན་རྩིས་ཁང་ལ་ས་ཆ་དང་ཁང་པ་སོགས་ཞལ་འདེབས་སམ་རིན་མེད་དུ་འབུལ་མུས་ཡིན་པ་ནི། བོད་ཀྱི་གསོ་བ་རིག་པས་བཙན་བྱོལ་ནང་གི་སྤྱི་ཚོགས་མང་དག་ཅིག་ལ་ཕན་བདེ་སྒྲུབ་མུས་ཡིན་པའི་མཚོན་དོན་ཞིག་ཡིན་པས། མུ་མཐུད་དུ་བོད་ཀྱི་གསོ་བ་རིག་པ་དེ་བདག་སྐྱོང་བྱ་རྒྱུ་དེ་ཧ་ཅང་གལ་ཆེན་པོ་ཡིན་སྐོར་སོགས་གསུངས་སོང་།
ཡང་ཁོང་གིས། དེང་གི་ཆར་རྒྱ་ནག་གཞུང་གིས་རྒྱལ་སྤྱིའི་སྡིངས་ཆ་མང་པོར་བོད་ཀྱི་གསོ་བ་རིག་པ་དེ་རྒྱ་ནག་གཞུང་གི་ཡིན་ལུགས་ཀྱི་དྲིལ་བསྒྲགས་ཡང་ཡང་བྱེད་ཀྱི་ཡོད་ཅིང་། དེ་ལས་ང་ཚོས་བོད་ཀྱི་ཐུན་མོ་མ་ཡིན་པའི་གསོ་བ་རིག་པའི་གཞུང་ལུགས་དེ་རིན་ཐང་འགྲན་ཟླ་མེད་པ་ཞིག་དང་གལ་ཆེན་ཞིག་ཡིན་པ་ཤེས་ཐུབ་ལ། ད་ལྟ་སྨན་རྩིས་ཁང་གི་མགོ་ལས་ཡོངས་ཀྱིས་སྤྱི་ཚོགས་ཞབས་འདེགས་ཞུས་ནས་ལས་དོན་བསྒྲུབས་པར་བསྔགས་བརྗོད་དང་། མ་འོངས་པར་ལས་མི་ཡོངས་ཀྱིས་མུ་མཐུད་ལས་དོན་བཟང་པོ་ཞིག་གཉེར་དགོས་སྐོར་དང་། སྨན་རྩིས་ཁང་གིས་མུ་མཐུད་དུ་སྨན་བཟོའི་ལས་དོན་སྤེལ་ནས། མ་འོངས་པར་སྨན་གྱི་བསླབ་པ་མཐར་སོན་གྱི་སློབ་མ་དང་མི་སྒེར་སོགས་ཀྱིས་སྒེར་གཉེར་སྨན་ཁང་བཙུགས་ཏེ། བོད་སྨན་མཁོ་འདོན་ཐད་ལ་ནུས་པ་འདོན་དགོས་སྐོར་སོགས་གསུངས་སོང་།
དེ་རིང་སློབ་ཐོན་སློབ་མའི་མཛད་སྒོའི་ཁྲོད། སྨན་སློབ་སྐབས་ ༢༢ པའི་ནང་སློབ་མ་གྲངས་ ༢༥ དང་རྩིས་སློབ་སྐབས་ ༡༢ ཁྲོད་སློབ་མ་ ༧ བཅས་ཡོད་ཅིང་། སྐབས་དེར་སྨན་པ་འབུམ་རམས་པ་ཚེ་རིང་ནོར་བུ་ལགས་ཀྱིས་བརྩམས་པའི་གསོ་རིག་རྒྱུད་བཞིའི་བཤད་རྒྱུད་ལེའུ་ཉི་ཤུ་པ་དང་། སྔོ་སྨན་འཁྲུགས་དཔེ་བསྡུས་པ་ངོ་མཚར་གསེར་གྱི་སྙེ་མའི་ནང་གསལ་སྨན་རྫས་ཁག་གི་པར་རིས་དང་ཁ་སྐོང་གསལ་བཤད་དང་། སྨན་པ་མགོན་པོ་ཚེ་རིང་ལགས་ཀྱིས་བརྩམས་པའི་ཀྲུང་ལུགས་གསོ་རིག་ལས་དོན་སྣོད་ཀྱི་རྣམ་གཞག ཅེས་པའི་དཔེ་དེབ་གཉིས་དབུ་འབྱེད། དེ་བཞིན་འགྲོ་ཕན་བོད་ཀྱི་སྨན་རྩིས་ཁང་གི་ཞབས་ལོ་ ༢༠ དང་ ༣༠ འཁོར་བའི་ལས་བྱེད་ཁག་ཅིག་ལ་གཟེངས་བསྟོད་ལག་འཁྱེར་སོགས་གནང་སོང་།
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
