ནང་སྲིད་ལས་ཁུངས་ཀྱིས་ལ་དྭགས་བྱང་ཐང་གི་འབྲོག་པའི་ཆེད་དུ་མི་མང་ལ་རོགས་དངུལ་ཞུ་རྒྱུ་ཡིན་པས་ནུས་པ་མཉམ་སྤུངས་ཡོང་བའི་འབོད་སྐུལ་གནང་སོང་།
དེ་རིང་སྐབས་ ༡༧ པའི་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དགུ་པའི་ལས་ཉིན་བཅུ་བའི་ཚོགས་ཐུན་གཉིས་པའི་སྟེང་། ནང་སྲིད་ལས་ཁུངས་ཀྱི་སྔོན་རྩིས་ཐོག་སྤྱི་ཡོངས་བགྲོ་གླེང་དང་གཏན་འབེབས་སྐབས་སུ། སྤྱི་འཐུས་ལྷ་རྒྱལ་རི་རྣམ་རྒྱལ་སྒྲོལ་དཀར་ལགས་ཀྱིས་བཀའ་ཤག་གི་ངོས་ནས་རྒྱ་གར་གཞུང་ལ་ཕྱི་རྒྱལ་དུ་སྡོད་མཁན་བོད་མི་བགྲེས་པོ་རྣམས་རྒྱ་གར་ནང་སྡོད་ཆོག་པའི་མཐུན་རྐྱེན་ཐོག་སྙན་སེང་ཞུ་བཞིན་ཡོད་ཀྱང་། རྒྱ་གར་གྱི་མི་སེར་ལག་འཁྱེར་ཡོད་མཁན་རྣམས་ལ་བོད་པའི་གཞིས་ཆགས་ཀྱི་ཐོབ་ཐང་མེད་པ་ཡོངས་གྲགས་ཆགས་དུས།བཅའ་ཁྲིམས་ཀྱི་དགོངས་གཞི་ལྟར་བོད་ཀྱི་ཡུལ་མི་རྣམས་ལ་གཅིག་མཚུངས་ཀྱི་སྲིད་ཇུས་ཤིག་དགོས་པའི་དོགས་འདྲི་གནང་བ་དང་། སྤྱི་འཐུས་གོ་བོ་བློ་བཟང་ཕན་བདེ་ལགས་ཀྱིས་ལ་དྭགས་བོད་པའི་གཞིས་ཆགས་ཁག་ཏུ་ཕྱོགས་སྐྱོད་དང་འབྲེལ། ལ་དྭགས་དབུས་འཛིན་སྐྱོང་དང་བོད་མིའི་སྒྲིག་འཛུགས་གཉིས་ནས་ལ་དྭགས་བྱང་ཐང་ཁུལ་གྱི་དཀའ་ངལ་ཐད་དགོངས་འཆར་དང་དོགས་འདྲི་གནང་སོང་།
ནང་སྲིད་བཀའ་བློན་སྤེན་པ་ཚེ་རིང་མཆོག་གིས་གསལ་བཤད་ལན་འདེབས་གནང་སྐབས། བོད་མིའི་སྒྲིག་འཛུགས་ཀྱི་ངོས་ནས་དེའི་ཐོག་ལངས་ཕྱོགས་ཡིག་ཐོག་ཏུ་འཁོད་པ་ཨེ་ཡོད་ན་བསམ་གྱི་འདུག བཀའ་ཤག་སྐབས་བཅུ་དྲུག་སྐབས་སུ་མེད། བོད་པ་ཞིག་རྒྱ་གར་གྱི་མི་སེར་ཆགས་ཡོད་ན། བོད་པའི་གཞིས་ཆགས་ཀྱི་ཐོབ་ཐང་ཡོད་པ་མ་རེད་ཟེར་བ་ད་ལྟའི་བར་དུ་ཞུ་རྒྱུ་མ་བྱུང་། དེ་ཚོ་ཚང་མ་རྒྱ་གར་གཞུང་གི་ཐག་གཅོད་བྱེེད་དགོས་པ་ཞིག་རེད། བོད་པའི་སྤྱི་ཚོགས་ནང་ཁུལ་དུ་འགྲིག་བསྡད་པ་དེ། རྒྱ་གར་གཞུང་གི་གསར་བའི་ལས་ཁུངས་ཀྱིས་མ་མཐོང་བ་ལྟར་བཞག་ཡོད་པ་མ་གཏོགས། རྒྱ་གར་གཞུང་ནས་རྒྱ་གར་མི་སེར་ཞུས་ཚར་ཚེ། བོད་པའི་གཞིས་ཆགས་ནང་གི་ཐོབ་ཐང་འཕྲོག་འགྲོ་བ་གོ་མྱོང་མེད། ད་ལྟའི་བར་དུ་དེ་འདྲའི་དབྱེ་བ་གང་ཡང་ཕྱེ་ཡོད་པ་མ་རེད། ཡིན་ནའང་རྒྱ་གར་དང་ཕྱི་རྒྱལ་ཁག་གི་མི་མང་ཚོགས་འདུ་སྐབས་སུ་ཞུ་བཞིན་ཡོད། དཔེར་ན་བོད་པ་ཞིག་ཕྱི་རྒྱལ་དུ་བསླེབ་སྟེ། རྒྱ་གར་དུ་ནང་མི་གཅིག་ཀྱང་སྡོད་མཁན་མེད་པར་ཞིང་ཁ་སོགས་སུ་བདག་པོ་བརྒྱབ་བསྡད་ཡོད་ཚེ། ཉིན་གཅིག་རྒྱ་གར་གཞུང་གིས་ཧ་གོ་འགྲོ་ཡི་རེད། དེང་སྐབས་གྲངས་འཛིན་གྱི་ངོ་བོ་འགྲོ་བཞིན་ཡོད་དུས། སྔོན་མ་དང་མི་འདྲ་བར་ལྟ་ཆོག་ཆོག་ཆགས་འགྲོ་ཡི་ཡོད། དེ་དུས་ཕྱི་རྒྱལ་མི་སེར་ཆགས་པར་རྒྱ་གར་གྱི་ཐོབ་ཐང་འཕྲོག་ཚེ། དོ་བདག་སོ་སོ་དང་བོད་མིའི་སྒྲིག་འཛུགས་གཉིས་ཀར་ས་ཞིང་མེད་པ་ཆགས་པའི་ཉེན་ཁ་ཡོད་པ་རེད། གནས་སྟངས་དེའི་རིགས་ནམ་རྒྱུན་ཞུ་བཞིན་ཡོད། བོད་མིའི་སྒྲིག་འཛུགས་ཀྱི་ངོས་ནས་གསལ་བོ་བཟོ་དགོས་པ་ཞིག་ཏུ་མ་མཐོང་བ་རེད། ད་ལྟའི་བར་དུ་དེའི་ཐོག་གསལ་བོ་བཟོས་ཡོད་པ་མ་རེད་དྲན་གྱི་འདུག གལ་སྲིད་སྔོན་མ་ཡིག་ཐོག་ཏུ་ཡོད་ཚེ། དེའི་ཐོག་འགྱུར་བ་ག་རེ་གཏོང་དགོས་མིན་བལྟ་རྒྱུ་མ་གཏོགས། ད་ལྟའི་གནས་སྐབས་སུ་དེའི་ཐོག་དབྱེ་བ་གང་ཡང་ཡོད་པ་མ་རེད། ཕྱི་རྒྱལ་ནས་ཚུར་ཡོང་མཁན་རྣམས་ཀྱང་ཁྲིམས་མཐུན་ལྟར་ཐོངས་མཆན་གྱི་དུས་ཚོད་ལ་གཙི་སྲུང་བྱས་ཏེ་སྡོད་དགོས་པ་མ་གཏོགས། གཞིས་ཆགས་ནང་རང་འདོད་དུ་བསྡད་ཚེ་རྒྱ་གར་གཞུང་ནས་ཀྱང་ཁྲིམས་གསར་བ་བསླེབ་བཞིན་ཡོད། རྒྱ་གར་རྒྱལ་ཁབ་ཆེན་པོའི་ནང་བྷང་ག་ལ་དང་འབར་མ་སོགས་ཀྱི་སྐྱབས་བཅོལ་བ་མང་པོ་ཡོད། དེའི་ཐོག་རྒྱ་གར་གཞུང་ནས་སྤྱི་ཡོངས་ལྟ་དགོས་པ་ཆགས་ཡོད་ལ། རྒྱ་གར་གཞུང་གིས་བོད་པར་ནམ་རྒྱུན་དམིགས་བསལ་འོག་ནས་གཟིགས་བཞིན་ཡོད་ཀྱང་། ང་ཚོས་ཧ་ཅང་དམིགས་བསལ་བཏང་བར་ཁེ་ཕན་བླངས། རྗེས་སུ་ཁྲིམས་དམ་དུ་འགྲོ་དུས་དཀའ་ངལ་ཆེན་པོ་འཕྲད་སྲིད་པ་ཡིན་དུས། ང་ཚོའི་གནས་བབ་དང་བསྟུན་ནས་བྱ་རྒྱུ་གལ་ཆེན་པོ་རེད། རྒྱ་གར་གཞུང་གི་ཁྲིམས་དང་སྒྲིག་གཞི། ཡུལ་ཁྲིམས་བཅས་གཙི་སྲུང་བྱས་ཏེ་འགྲོ་རྒྱུ་ལས། རྒྱ་གར་གྱི་ཁྲིམས་དང་འགལ་ན་བོད་མིའི་སྒྲིག་འཛུགས་ལ་ཞུས་ཀྱང་སྐྱོབ་ཐུབ་རྒྱུ་ཁག་པོ་རེད། ཅེས་གསུངས་སོང་།
ཡང་ནང་སྲིད་བཀའ་བློན་སྤེན་པ་ཚེ་རིང་མཆོག་གིས། སྔོན་མར་གྲོས་ཚོགས་སུ་ཞུས་ཟིན་པ་ཡིན། ཡུལ་མི་གཞན་གྱི་མི་སེར་བྱ་རྒྱུ་དེ་དོ་བདག་སོ་སོའི་དགོངས་པ་བཞེས་རྒྱུ་ལས། བཀའ་ཤག་གིས་དེའི་ཐད་ཐག་གཅོད་ཐུབ་ཀྱི་མ་རེད། རྒྱ་གར་ལ་མཚོན་ན་ཡུལ་ཁྲིམས་ཀྱི་ཐག་གཅོད་ཡོད་པ་རེད། ཕྱི་རྒྱལ་དུ་རྒྱ་གར་ནང་བཞིན་སྐྱབས་བཅོལ་དུ་ཡུན་རིང་སྡོད་རྒྱུ་ཁག་པོ་རེད། ཕྱི་རྒྱལ་གྱི་མི་སེར་མ་ཞུས་ཚེ་གནས་ཐུབ་རྒྱུ་ཁག་པོ་ཆགས་ཡོད། གང་ལྟར་ཕྱི་རྒྱལ་གྱི་མི་སེར་དང་རྒྱ་གར་གྱི་མི་སེར་གཉིས་གནས་སྟངས་གཅིག་པ་རེད། དེ་གཉིས་ལ་དབྱེ་བ་ཕྱེ་དགོས་པ་མ་རེད། གནས་སྟངས་གཅིག་པ་ཡིན་པའི་རྒྱུ་མཚན་ལ་བརྟེན་ནས་ད་ལྟའི་གྲོས་ཚོགས་སུ་རྒྱ་གར་མི་སེར་ལག་འཁྱེར་ཡོད་མཁན་མང་པོ་ཡོད། ཅེས་གསུངས་སོང་།
དེ་བཞིན་ནང་སྲིད་བཀའ་བློན་མཆོག་གིས། ལ་དྭགས་བྱང་ཐང་གི་འབྲོག་པ་རྣམས་ལ་དཀའ་ངལ་འཕྲད་པ་གནས་སྟངས་གཅིག་རེད། བྱང་ཐང་འབྲོག་པའི་གནས་སྟངས་ཐད་ཞིབ་འཇུག་གི་ལས་གཞི་མགོ་བཙུགས་ཡོད་ཀྱང་ཨ་རིའི་རོགས་དངུལ་དང་འབྲེལ་བ་ཆགས་ཡོད། ཅེས་དང་། ད་ལོའི་དགུན་ཁ་བྱང་ཐང་དུ་གངས་ཆེན་པོ་བརྒྱབ་སྟེ་ར་ལུག་མང་པོ་ཤི་འདུག ད་དུང་ལ་དྭགས་ས་མེ་རུ་ར་ལུག་ཤི་བའི་གྲངས་འབྱོར་མ་སོང་། ཉེ་ལམ་ལ་དྭགས་ས་གནས་མགོ་འཛིན་གྱིས་འབྲོག་ས་ཚང་མར་བསྐོར་བའི་སྙན་ཐོ་ཞིག་ནང་སྲིད་ལས་ཁུངས་སུ་ཕུལ་འདུག ནང་སྲིད་ལས་ཁུངས་ཀྱིས་ཀྱང་དེའི་ཐོག་ཚ་ཚ་འུར་འུར་བྱས་བསྡད་ཡོད། གོད་ཆག་ཆེན་པོ་བྱུང་བར་ནང་སྲིད་ལས་ཁུངས་ལ་ཚད་ལྡན་གྱི་རོགས་སྐྱོར་བྱེད་པའི་དངུལ་ཕོན་ཆེན་པོ་ཡོད་པ་མ་རེད། གནམ་གཤིས་ཀྱི་རྐྱེན་གྱིས་ད་ལྟའི་ཆར་ས་མེ་འབྲོག་པ་མ་བརྩིས་པར་ལ་དྭགས་བྱང་ཐང་གི་འབྲོག་པའི་ར་ལུག་ ༣༨༠༠ ལྷག་ཤི་འདུག ནམ་རྒྱུན་གོད་ཆག་དེ་འདྲ་བྱུང་སྐབས་སྤྱི་ཚོགས་དྲ་ལམ་དུ་མི་མང་ལ་དངུལ་གྱི་རོགས་སྐྱོར་ཞུ་བཞིན་ཡོད་པ་རེད། སྒེར་ནས་མགོ་འཁྲིད་སྐབས་འགྲིག་དང་མ་འགྲིག་ཀྱང་ཡོང་གི་ཡོད། དངུལ་ལྷག་མ་སོགས་ཀྱི་ཐོག་སྐད་ཆ་མང་པོ་བྱུང་ཡོད། སྔོན་མ་ནང་སྲིད་ལས་ཁུངས་ཀྱིས་ས་གནས་གང་དུ་གོད་ཆག་ཅི་ཞིག་བྱུང་སྐབས། སྒེར་སོ་སོའི་རོགས་དངུལ་གྱི་གནས་སྟངས་ལ་བལྟས་ཏེ་ནང་སྲིད་ལས་ཁུངས་ནས་རོགས་སྐྱོར་འཕར་མ་སོགས་ཡོང་གི་འདུག ཅེས་དང་། གངས་བརྒྱབ་པའི་གོད་ཆག་གི་གནས་སྟངས་ཐད། ནང་སྲིད་ལས་ཁུངས་ཀྱིས་གོད་རྒུད་བྱུང་བའི་གནས་སྟངས་བརྙན་ལམ་ཐོག་ནས་ཡོངས་ཁྱབ་གསལ་བསྒྲགས་བྱ་རྒྱུ་ཡིན། མི་མང་ངོས་ནས་རོགས་སྐྱོར་བྱེད་པའི་མཉམ་སྤུངས་བྱ་རོགས་ཞུ་རྒྱུ་ཡིན། ཞེས་གསུངས་སོང་།
དེ་བཞིན་ཁོང་གིས། སྔོན་མ་ལ་དྭགས་དེ་ཇ་མུ་ཀ་ཤི་མར་མངའ་སྡེའི་ཁོངས་སུ་རེད། ལ་དྭགས་ཀྱི་གཞུང་འབྲེལ་ཡིག་ཆ་ཚང་མར་ཤི་རི་ན་གྷར་བརྒྱུད་ནས་འགྲོ་དགོས་པ་རེད། ད་ལྟ་ལ་དྭགས་དེ་རྒྱ་གར་དབུས་གཞུང་གིས་ཐད་ཀར་འཛིན་སྐྱོང་བྱེད་པའི་ས་ཁུལ་ཞིག་ཆགས་དུས། དབུས་གཞུང་ནས་ཐད་ཀར་དངུལ་རག་གི་ཡོད་པས། སྔོན་མ་དང་བསྡུར་ན་ལ་དྭགས་ཀྱི་གཞུང་དཔལ་འབྱོར་ཐོག་ནས་ཡག་པོ་ཆགས་ཡོད། ལ་དྭགས་མཚོན་པ་ཡིན་ན་མི་གྲངས་མང་པོ་རེད་ལ། ལ་དྭགས་ཀྱི་བོད་མི་ཁྱོན་གྲངས་ ༧༧༠༠ ཙམ་རེད། ལ་དྭགས་དབུས་གཞུང་ནས་བོད་པར་རོགས་རམ་གནང་བཞིན་འདུག དེ་དག་ང་ཚོའི་ངོས་ནས་ངོས་ལེན་ཞུ་བཞིན་ཡོད། ཨག་ལན་གཞིས་ཆགས་ནང་ཆུ་དང་གློག ལམ་ཁ་བཙུགས་ཡོད་ཅིང་། གྲོང་སྡེ་ཁ་ཤས་ནང་ཚོགས་ཁང་འཛུགས་སྐྲུན་ཞུས་འདུག འཕྲོད་བསྟེན་དང་ས་གནས་ཁྲིམས་ཞིབ་སོགས་ལའང་ཞུས་འདུག དེ་བཞིན་ལ་དྭགས་བོད་ཕྲུག་ཁྱིམ་སྡེ་རྩེད་ཐང་ཆེད་འབུམ་ ༤ ཙམ་རོགས་རམ་གནང་ཡོད། དེ་བཞིན་ལ་དྭགས་རི་ལྗོངས་ཡར་རྒྱས་ལྷན་ཚོགས་ཀྱིས་ལ་དྭགས་འབྲོག་པར་ར་ལུག་གྲངས་ ༢༥༠ ལྷག་གི་ཆེད་དུ་ཧིན་འབུམ་ ༡༤ ཙམ་གནས་སྤོ་བྱེད་ཐུབ་པའི་ཁང་པ་འཛུགས་སྐྲུན་བྱས་འདུག
ལ་དྭགས་རི་ལྗོངས་ཡར་རྒྱས་ལྷན་ཚོགས་ཀྱི་སྡེ་དཔོན་བཀྲ་ཤིས་རྒྱལ་མཚན་ལགས་ཀྱིས་མགོ་ཁྲིད་འོག་བོད་པའི་ཆེད་དུ་འབྲེལ་མཐུད་བསྐོ་བཞག་གནང་ཡོད། ལ་དྭགས་བོད་ཕྲུག་ཁྱིམ་སྡེ་རུ་སློབ་ཕྲུག་གྲངས་ ༡༤༠༠ ཙམ་ཡོད་ཅིང་། དེའི་ཁྲོད་སློབ་ཕྲུག་ ༤༠༠ ཙམ་ལ་དྭགས་པ་ཆགས་ཡོད། ཅེས་དང་། དེ་བཞིན་གོ་སྟོན་ཐོག་ལ་དྭགས་རི་ལྗོངས་ཡར་རྒྱས་ལྷན་ཚོགས་ཕེབས་གཏན་ཁེལ་ཡོད་པ་དང་། ལ་དྭགས་ཀྱི་ཆོས་ཚོགས། ཡུལ་མི་སོགས་སུ་འབྲེལ་ལམ་ཡག་པོ་ཡོད། ཅེས་གསུངས་སོང་།
གསར་འགོད་པ། བསྟན་འཛིན་ཕུར་བུ། བྱམས་པ་ཚེ་རིང་། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
