༧གོང་ས་མཆོག་གསེར་ཁྲི་མངའ་གསོལ་དུ་མཛད་པའི་སྐུ་པར་ཁག་ཅིག་རིན་སྡུར་ཚོང་སྒྱུར་བྱ་ཡིན་འདུག

ཕྱི་ལོ་ ༡༩༣༥ ནས་ ༡༩༤༥ བར་གྱི་དབྱིན་ཇིའི་སྐུ་ཚབ་བྷ་སིལ་གྷོལ་ཌི་ཡིས་ཕྱོགས་སྒྲིག་དང་རྒྱ་གར་གྱི་དེང་རབས་རི་མོའི་སྒྱུ་རྩལ་བ་ཀན་ཝལ་ཀི་རི་ཤི་ནཱ་ཡིས་བྲིས་པའི་༧གོང་ས་མཆོག་གི་སྐུ་པར་ཁག་ཅིག་རིན་སྡུར་ཚོང་སྒྱུར་བྱ་རྒྱུ་ཡིན་འདུག

ཕྱི་ཟླ་ ༦ ཚེས་ ༤ ཉིན་དབྱིན་ཇིའི་རྒྱལ་ས་ལི་ཌོན་དུ་རྟེན་གཞི་བྱས་པའི་འཛམ་གླིང་གི་ཚོང་སྒྱུར་ཁང་རྙིང་ཤོས་ཀྱི་གྲས་སུ་གཏོགས་པའི་ (Bonhams) ཚོགས་པས། ཕྱི་ལོ་ ༡༩༤༠ ལོར་༧གོང་ས་རྒྱལ་བ་རིན་པོ་ཆེ་མཆོག་གསེར་ཁྲི་མངའ་གསོལ་མཛད་སྐབས་ཀྱི་སྣུམ་ཚོན་སྐུ་པར་གསུམ་གཙོ་བྱས་པའི་སྐབས་དེའི་བོད་ཀྱི་བཀའ་བློན་དང་སྤྱི་ཚོགས་ཀྱི་གནས་བབ།  ད་དུང་དབྱིན་ཇིའི་སྐུ་ཚབ་སོགས་འདུས་པའི་པར་རིས་རིམ་པ་མི་འདྲ་བ་ ༤༠ རིན་སྡུར་ཚོང་སྒྱུར་བྱ་རྒྱུ་ཡིན་སྐོར་བསྒྲགས་འདུག

ཐེངས་འདིའི་རིན་སྡུར་ཚོང་སྒྱུར་ཁྲོད། ༧གོང་ས་མཆོག་རྒྱལ་བ་རིན་པོ་ཆེ་མཆོག་དང་འབྲེལ་བའི་སྐུ་པར་གཙོ་བོ་གསུམ་ཡོད་པ་ལས། གཅིག་གསེར་ཁྲིར་མངའ་གསོལ་མཛད་མེད་པའི་སྐབས་ཀྱི་སྐུ་པར་ཞིག་དང་། གསེར་ཁྲི་མངའ་གསོལ་མཛད་སྐབས་ཀྱི་སྐུ་པར་གཅིག གསེར་ཁྲིར་མངའ་གསོལ་མཛད་སྐབས་ཀྱི་མཛད་སྒོའི་ཡུལ་དངོས་ཀྱི་སྐུ་པར་གཅིག་བཅས་འདུག་ལ། མཛད་སྒོའི་ཡུལ་དངོས་མཚོན་པའི་སྐུ་པར་དེར་ཚོད་རྩིས་ཀྱི་རིན་སྡུར་ཚོང་སྒྱུར་དབྱིན་ཇིའི་པོ་ཌིན་ ༡༨༠༠༠༠ ནས་ ༢༥༠༠༠༠ བར་དང་། གསེར་ཁྲི་མངའ་གསོལ་སྔོན་གྱི་སྐུ་པར་དེར་པོ་ཌིན་ ༧༠༠༠༠ ནས་ ༡༠༠༠༠༠ བར། དེ་བཞིན། གསེར་ཁྲི་མངའ་གསོལ་མཛད་སྐབས་ཀྱི་སྐུ་པར་དེར་པོ་ཌིན་ ༡༥༠༠༠༠ ནས་ ༢༠༠༠༠༠ བར་གྱི་རིན་སྡུར་གཏན་འབེབས་བྱས་འདུག

༧མགོན་པ་གང་ཉིད་མཆོག་གི་སྐུ་པར་མཐོང་གྲོལ་རིན་པོ་ཆེ་དག་དང་ལྷན་དུ། གཞན་ཡང་ཕྱི་ལོ་ ༡༩༣༦ ནས་ ༡༩༣༧ བར་གྱི་བོད་ནང་གི་གནས་སྟངས་མཚོན་པའི་པར་རིས་ ༡༥༡༥ ཅན་ཞིག་ལ་རིན་སྡུར་ཚོང་སྒྱུར་པོ་ཌིན་ ༢༠༠༠༠ ནས་ ༣༠༠༠༠ བར་དང་། དུས་རབས་ ༡༨ དང་ ༡༩ བར་གྱི་སངས་རྒྱས་ཀྱི་སྐུ་རྟེན་གསུམ་ལ་པོ་ཌིན་ ༨༠༠༠ ནས་ ༡༢༠༠༠ བར་བཅས་གཏན་འབེབས་བྱས་ཏེ་རིན་སྡུར་ཚོང་སྒྱུར་བྱ་རྒྱུ་ཡིན་འདུག

དབྱིན་ཇིའི་རིན་སྡུར་ཚོང་སྒྱུར་(Bonhams) ཚོགས་པའི་གནས་ཚུལ་ལྟར་ན། སྐུ་པར་དེ་དག་ཕྱི་ལོ་ ༡༩༣༩ དང་ ༡༩༤༠ ནང་དབྱིན་ཇིའི་སྐུ་ཚབ་བྷ་སིལ་གྷོལ་ཌི་ (Sir Basil Gould) དང་རྒྱ་གར་གྱི་དེང་རབས་རི་མོའི་སྒྱུ་རྩལ་བ་ཀན་ཝལ་ཀི་རི་ཤི་ནཱ་ (KANWAL KRISHNA) གཉིས་བོད་ནང་དུ་བསྐྱོད་ཡོད་ཅིང་། དམིགས་བསལ་ཁོང་གཉིས་ལ་༧གོང་ས་རྒྱལ་བ་རིན་པོ་ཆེ་མཆོག་གི་གསེར་ཁྲི་མངའ་གསོལ་གྱི་མཛད་སྒོར་ཞུགས་ཆོག་པའི་བཀའ་འཁྲོལ་ཐོབ་པ་ལ་བརྟེན་ནས་བྱུང་བའི་སྐུ་པར་ཡིན་འདུག་ལ།  ཀན་ཝལ་ཀི་རི་ཤི་ནཱ་ནི་༧གོང་ས་མཆོག་གི་གསེར་ཁྲི་མངའ་གསོལ་གྱི་མཛད་སྒོར་ཞུགས་པའི་རྒྱ་གར་བའི་རི་མོའི་སྒྱུ་རྩལ་བ་ཐོག་མ་དེ་ཡིན་འདུག

ཡང་། ཕྱི་ལོ་ ༢༠༡༩ ལོར་རྒྱལ་སྤྱིའི་རིན་སྡུར་ཚོང་སྒྱུར་ཁང་གྲགས་ཆེ་ཤོས་ཡིན་པའི་ (Sotheby) ཚོང་གཉེར་ཁང་གིས། ༧གོང་ས་མཆོག་གི་ཆིབས་འཁོར་ཞིག་ལ་ཨ་སྒོར་ ༡༠༠༠༠༠ ནས་ ༡༥༠༠༠༠ བར་གྱི་རིན་སྡུར་ཚོང་སྒྱུར་གཏན་འབེབས་བྱས་ཏེ། རིན་སྡུར་བྱེད་སྐབས་ཆིབས་འཁོར་དེར་ཨ་སྒོར་ ༡༤༣༠༠༠ བྱས་ནས་བཙོང་ཡོད།

གསར་འགོད་པ། སྐལ་བཟང་སྦྱིན་པ།