༧པཎ་ཆེན་རིན་པོ་ཆེ་མཆོག་སྐུ་འཁོར་དང་བཅས་བཙན་འཁྲིད་བྱས་ཏེ་མི་ལོ་ ༣༠ འཁོར།

རྒྱ་ནག་གཞུང་གིས་༧པཎ་ཆེན་སྐུ་ཕྲེང་བཅུ་གཅིག་པ་རྗེ་བཙུན་བསྟན་འཛིན་དགེ་འདུན་ཡེ་ཤེས་འཕྲིན་ལས་ཕུན་ཚོགས་དཔལ་བཟང་པོའམ་དགེ་འདུན་ཆོས་ཀྱི་ཉི་མ་མཆོག་དང་ནང་མི་སྐུ་འཁོར་བཅས་འཛིན་བཟུང་བཙན་ཁྲིད་བྱས་ཏེ་གར་སོང་ཆ་མེད་དུ་གྱུར་ནས་ལོ་ངོ་ ༣༠ ཧྲིལ་པོ་འཁོར་བ་དང་ཟླ་འདིའི་ཕྱི་ཚེས་ ༢༥ ནས་ཟླ་བ་གཅིག་རིང་༧པཎ་ཆེན་རིན་པོ་ཆེ་མཆོག་གི་གནད་དོན་དང་འབྲེལ་ནས་གོ་རྟོགས་ལས་འགུལ་དང་གློག་བརྙན་གཟིགས་འབུལ་སོགས་ཀྱི་ལས་རིམ་གོ་སྒྲིག་གནང་འདུག

ཟླ་འདིའི་ཕྱི་ཚེས་ ༢༥ ཉིན་བྱེས་ཀྱི་གདན་ས་བཀྲ་ཤིས་ལྷུན་པོ་རུ་༧ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་རྗེ་བཙུན་བསྟན་འཛིན་དགེ་འདུན་ཡེ་ཤེས་འཕྲིན་ལས་ཕུན་ཚོགས་དཔལ་བཟང་པོ་མཆོག་དགུང་གྲངས་ ༣༦ ལ་ཕེབས་པའི་འཁྲུངས་སྐར་ཉིན་མོ་སྲུང་གཙི་ཞུས་ཡོད་འདུག སྐབས་དེར་སྐུ་མགྲོན་གཙོ་བོ་ལ་དྭགས་ནང་པའི་ཆོས་ཚོགས་ཀྱི་དབུ་འཛིན་ཚེ་རིང་རྡོ་རྗེ་ལྷག་རུང་ལགས་དང་། དམིགས་བསལ་སྐུ་མགྲོན་སེ་ར་བྱེས་སྨད་གཉིས་ཀྱི་༧སྐྱབས་རྗེ་མཁན་རིན་པོ་ཆེ་རྣམ་གཉིས། དེ་བཞིན་མཁན་ཟུར་རིན་པོ་ཆེ་དབུས་པའི་བཀྲ་ཤིས་ལྷུན་པོའི་ལས་སྣེ་དབུ་ཆོས་དང་། སྦེལ་ཀོབ་བདེ་སྐྱིད་སླར་གསོའི་ས་གནས་མགོ་འཛིན། གཞུང་དང་གཞུང་འབྲེལ་མ་ཡིན་པའི་ཚོགས་པ་ཁག་གི་སྐུ་ཚབ་སོགས་ལྷན་འཛོམས་གནང་ཡོད་འདུག

སྐབས་དེར་གདན་བཀྲ་ཤིས་ལྷུན་པོའི་མཁན་རིན་པོ་ཆེ་གཟིག་རྒྱབ་སྤྲུལ་སྐུ་མཆོག་གིས། གདན་ས་བཀྲ་ཤིས་ལྷུན་པོ་དང་༧པཎ་ཆེན་ཨེར་ཏི་ནི་ཞབས་ཞུ་ལས་དོན་ཁང་ཐུན་མོང་གིས་༧པཎ་ཆེན་རིན་པོ་ཆེ་མཆོག་གི་འཁྲུངས་སྐར་ཉིན་མོར་ཡོངས་ཁྱབ་གསལ་བསྒྲགས་ཤིག་སྤེལ་བའི་ནང་། བོད་ཀྱི་ཆོས་ལུགས་ཀྱི་ལམ་སྲོལ་ནང་བླ་སྤྲུལ་ཡང་སྲིད་ངོས་འཛིན་ཞུ་རྒྱུའི་ལམ་ལུགས་ནི་བོད་མིའི་ཐུན་མོང་མ་ཡིན་པའི་ལམ་ལུགས་ཤིག་ཡིན་ལ། ཆོས་དད་རང་དབང་གི་གནད་དོན་ཞིག་ཀྱང་རེད། རྒྱ་ནག་དམར་གཞུང་གིས་བོད་ཀྱི་བླ་སྤྲུལ་ཡང་སྲིད་ངོས་འཛིན་གནང་ཕྱོགས་སོགས་ལ་གང་བྱུང་ཐེ་ཇུས་བྱས་དང་བྱེད་བཞིན་ཡོད་པ་དང་། བོད་མིའི་ཆོས་ལུགས་ཀྱི་ལམ་སྲོལ་དང་དད་སེམས་ལ་འཁྱོག་བརྗོད་དང་འབྲེལ་བཙན་དབང་གི་བྱ་སྤྱོད་སྤེལ་བ་ནི་ཁྲིམས་འགལ་ཡིན་པ་མ་ཟད། མི་ལོ་སུམ་ཅུའི་རིང་རྒྱ་ནག་གཞུང་གིས་མི་སྒེར་གྱི་འཚོ་གནས་དང་རང་དབང་། ཐོབ་ཐང་། ཆོས་དད་རང་མོས་སོགས་བཙན་འཕྲོག་བྱེད་བཞིན་ཡོད་པ་དེ་འཕྲལ་དུ་མཚམས་འཇོག་དགོས་པ་དང་། རྒྱ་ནག་གཞུང་ལ་༧པཎ་ཆེན་རིན་པོ་ཆེ་མཆོག་དང་ཁོང་གི་ཡབ་ཡུམ་སྐུ་འཁོར་དང་བོད་ཀྱི་ཉེས་མེད་ཆབ་སྲིད་བཙོན་པ་རྣམས་འཕྲལ་དུ་ཀློད་གྲོལ་གཏོང་དགོས་པ། བོད་ཀྱི་ནང་བསྟན་ཆོས་ལུགས་ཀྱི་ལམ་སྲོལ་ཐེ་ཇུས་མི་བྱེད་པར་བོད་མིའི་ཆོས་དད་རང་དབང་ལ་བརྩི་བཀུར་དང་ལེན་གནང་དགོས་པའི་དགོས་འདུན་བཏོན་འདུག

ཟླ་འདིའི་ཕྱི་ཚེས་ ༢༥ ཉིན་བོད་མིའི་སྒྲིག་འཛུགས་ཕྱི་དྲིལ་བོད་ཀྱི་ཞུ་གཏུག་ཚན་པའི་གོ་སྒྲིག་འོག ༧ཀུན་གཟིགས་༧པཎ་ཆེན་རིན་པོ་ཆེ་མཆོག་གི་འཁྲུངས་སྐར་དང་བསྟུན། བོད་ཀྱི་འགྲེམས་སྟོན་ཁང་གི་ཚོགས་ཁང་དུ་སཱ་ར་བོད་ཀྱི་མཐོ་རིམ་སློབ་གཉེར་ཁང་གི་ལོ་རྒྱུས་སློབ་དཔོན་འབུམ་རམས་པ་གཙང་ཕྲུག་སྟོབས་ལགས་ཀྱིས་༧པཎ་ཆེན་སྐུ་ཕྲེང་བཅུ་པ་མཆོག་གི་མཛད་རྗེས་དང་སྐུ་ཕྲེང་བཅུ་གཅིག་པ་མཆོག་གར་སོང་ཆ་མེད་དུ་གྱུར་བའི་གནད་དོན་དང་འབྲེལ་ནས་གཏམ་བཤད་གནང་འདུག

དེ་རིང་འདི་གའི་གསར་འགོད་པས་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་བོད་དོན་ཞུ་གཏུག་ཚན་པའི་འགན་འཛིན་འབྲུག་ལྡན་སྐྱིད་ལགས་སུ་༧པཎ་ཆེན་རིན་པོ་ཆེ་མཆོག་དང་འབྲེལ་ནས་ཟླ་བ་གཅིག་རིང་ལས་གཞི་ག་རེ་སྤེལ་གྱི་ཡོད་མེད་དྲིས་པར་ཁོང་མོས། ཕྱི་དྲིལ་ལས་ཁུངས་ཀྱི་ངོས་ནས་བོད་ཀྱི་འགྲེམས་སྟོན་ཁང་དང་དྷ་སའི་ཉེ་འཁོར་གྱི་བོད་ཁྱིམ་སློབ་གྲྭ་ཁག་ཏུ་ལས་གཞི་སྤེལ་དང་སྤེལ་མུས་ཡིན་ལ། དེ་མིན་དོན་གཅོད་ཁང་ཁག་བརྒྱུད་ནས་ཕྱི་རྒྱལ་ཡུལ་གྲུ་ཁག་ཏུ་ལས་གཞི་འགྲོ་བཞིན་པ་རེད། བོད་ཀྱི་འགྲེམས་སྟོན་ཁང་དུ་བདུན་ཕྲག་རེའི་གཟའ་པ་སངས་འཆར་ཅན་༧པཎ་ཆེན་རིན་པོ་ཆེ་མཆོག་དང་འབྲེལ་ནས་གཏམ་བཤད་གནང་རྒྱུ་དང་། གཟའ་ལྷག་པ་འཆར་ཅན་རིན་པོ་ཆེ་མཆོག་གི་གློག་བརྙན་གཟིགས་འབུལ་ཞུ་རྒྱུ། དམིགས་བསལ་གྱིས་གདན་ས་བཀྲ་ཤིས་ལྷུན་པོའི་མཁན་རིན་པོ་ཆེ་མཆོག་གིས་གསུང་བཤད་གནང་འཆར་ཡོད་པ་རེད། གཞན་ཡང་། གར་སོང་ཆ་མེད་དུ་གྱུར་བའི་ཉིན་མོ་སྟེ་ཕྱི་ཟླ་ ༥ ཚེས་ ༡༧ ཉིན་དྷ་སའི་ཉེ་འཁོར་གྱི་སློབ་གྲྭ་ཁག་གི་སློབ་ཕྲུག་ཚོས་ངག་རྩལ་གཏམ་བཤད་གནང་འཆར་ཡོད་པ་རེད། ཅེས་འགྲེལ་བརྗོད་གནང་བྱུང་།

ལས་གཞིའི་དགོས་དམིགས་སྐོར་ལ་འབྲུག་ལྡན་སྐྱིད་ལགས་ཀྱིས། ༧ཀུན་གཟིགས་༧པཎ་ཆེན་རིན་པོ་ཆེ་མཆོག་གར་སོང་ཆ་མེད་དུ་གྱུར་ནས་ལོ་ངོ་ ༣༠ ཧྲིལ་པོ་འཁོར་ཡོད་ཀྱང་། ད་དུང་རིན་པོ་ཆེ་མཆོག་གི་གནས་སྟངས་དང་འབྲེལ་ནས་ཁུངས་སྐྱེལ་གྱི་གནས་ཚུལ་མེད་པར་བརྟེན། དེའི་ཐོག་ལ་མུ་མཐུད་དུ་ལས་འགུལ་འདྲ་མིན་སྤེལ་རྒྱུ་དང་། རྒྱལ་སྤྱིའི་སྡིངས་ཆའི་སྟེང་གོ་རྟོགས་ཀྱི་ལས་འགུལ་སྤེལ་རྒྱུ་དང་བློ་འཚབ་ཀྱི་རྣམ་པ་སྟོན་ཐུབ་རྒྱུ། རྒྱབ་སྐྱོར་རག་ཐུབ་རྒྱུའི་ཆེད་དུ་རེད། ཅེས་འགྲེལ་བརྗོད་གནང་བྱུང་།

ཟླ་འདིའི་ཕྱི་ཚེས་ ༢༥ ཉིན་༧ཀུན་གཟིགས་༧པཎ་ཆེན་རིན་པོ་ཆེ་མཆོག་དགུང་གྲངས་ ༣༦ ལ་ཕེབས་པའི་འཁྲུངས་སྐར་དང་བསྟུན། ཡུ་རོབ་གྲོས་ཚོགས་འཐུས་མི་རྣམས་ཀྱིས་རིན་པོ་ཆེ་མཆོག་མྱུར་དུ་ཀློད་གྲོལ་དགོས་པ་དང་། རྒྱ་ནག་གཞུང་གིས་རིན་པོ་ཆེ་མཆོག་གར་ཡོད་ཀྱི་གནས་སྟངས་ཡོངས་ཁྱབ་བྱ་དགོས་སྐོར་ནན་བརྗོད་གནང་ཡོད་འདུག་ལ། ཡུ་རོབ་གྲོས་ཚོགས་འཐུས་མི་རྣམས་ཀྱིས་རྒྱ་ནག་གཞུང་ལ་འདས་པའི་ལོ་ངོ་བཅུ་ཕྲག་འགའི་རིང་༧ཀུན་གཟིགས་པཎ་ཆེན་རིན་པོ་ཆེ་མཆོག་གི་གནས་སྟངས་ཐོག་འཛམ་གླིང་ཡོངས་ལ་གསལ་བཤད་དགོས་པའི་རེ་འདུན་བཏོན་ཡོད་པ་རེད།

ཕྱི་ལོ་ ༡༩༩༥ ཟླ་ ༥ ཚེས་ ༡༤ ཉིན་༧གོང་ས་རྒྱལ་བ་རིན་པོ་ཆེ་མཆོག་ནས་བོད་ནག་ཆུ་ལྷ་རི་རྫོང་དུ་འཁྲུངས་པའི་ཁྱེའུ་དགེ་འདུན་ཆོས་ཀྱི་ཉི་མ་མཆོག་པཎ་ཆེན་སྐུ་ཕྲེང་བཅུ་པའི་ཡང་སྲིད་འཁྲུལ་མེད་དུ་ངོས་འཛིན་གསལ་བསྒྲགས་བསྐྱངས་གནང་ཡོད་པ་དང་། ཉིན་གྲངས་ ༣ ལས་མ་འགོར་བར་ཕྱི་ཚེས་ ༡༧ ཉིན་རྒྱ་ནག་དམར་གཞུང་གིས་དགུང་ལོ་དྲུག་ལས་སོན་མེད་པའི་༧པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་དང་། ཁོང་གི་ཡབ་ཡུམ་སྐུ་འཁོར། བོད་ཀྱི་གདན་ས་བཀྲ་ཤིས་ལྷུན་པོའི་དབུ་འཛིན། ཡང་སྲིད་འཚོལ་ཞིབ་ཚོགས་ཆུང་གི་ཚོགས་གཙོ་བྱ་བྲལ་རིན་པོ་ཆེ་སོགས་གནད་ཡོད་ཀྱི་མི་སྣ་ཚང་མ་གློ་བུར་དུ་འཛིན་བཟུང་བཙན་འཁྲིད་བྱས་རྗེས། རྒྱ་ནག་གཞུང་གིས་ཆུང་སྲིད་རིན་པོ་ཆེ་མཆོག་སྐུ་སྒེར་གྱི་འཚོ་བར་བར་ཆད་བཟོ་འདོད་མེད་སྐོར་བཤད་དེ་ཁོང་གང་དུ་ཡོད་མེད་ཙམ་གྱི་གནས་ཚུལ་ཡང་རྦད་དེ་གསང་བ་བྱས་ནས་རྒྱལ་སྤྱིའི་ཐོག་ནས་འབོད་སྐུལ་ཇི་ལྟར་གནང་ཡང་ཉན་འཇོག་བྱེད་ཀྱི་མེད་པ་རེད།

གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། པདྨ་མཚོ།