སྲིད་བློན་མག་ཁར་ནེ་མཆོག་བསྐྱར་དུ་ཁེ་ན་ཌའི་སྲིད་བློན་དུ་འདེམས་ཐོན་བྱུང་།

ཕྱི་ལོ་ ༢༠༢༥ ལོའི་ཁེ་ན་ཌའི་རྒྱལ་ཡོངས་འོས་བསྡུའི་ནང་ད་ལྟའི་གུ་ཡངས་ཚོགས་པའི་མགོ་ཁྲིད་དང་སྲིད་བློན་མག་ཁར་ནེ་མཆོག་ལ་འོས་བསྡུའི་རྒྱལ་ཁ་ཐོབ་འདུག

དེ་རིང་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་ཁེ་ན་ཌའི་ཕྱི་ལོ་ ༢༠༢༥ ལོའི་རྒྱལ་ཡོངས་ཀྱི་འོས་བསྡུའི་གྲུབ་འབྲས་ཐོན་པ་ལྟར་ན། ཁེ་ན་ཌའི་གྲོས་ཚོགས་ནང་མང་མོས་ཐོབ་པར་ཁྱོན་ཞབས་བཀྱག་ ༡༧༢ འཐོབ་དགོས་ཀྱི་ཡོད་པ་དང་། དེ་རིང་ཆུ་ཚོད་ ༢།༣༠ བར་དུ་འོས་བསྡུའི་གྲུབ་འབྲས་བརྒྱ་ཆ་ ༩༩ ཐོན་ཟིན་པའི་ནང་། ལྗང་ཁུ་སྲིད་དོན་ཚོགས་པར་ (Green Party) ཞབས་བཀྱག་ ༡ དང་། (NDP) སྲིད་དོན་ཚོགས་པར་ཞབས་བཀྱག་ ༧། (Bloc Québécois) སྲིད་དོན་ཚོགས་པར་ཞབས་བཀྱག་ ༢༣། རྙིང་ཞེན་སྲིད་དོན་ཚོགས་པར་ཞབས་བཀྱག་ ༡༤༤། གུ་ཡངས་སྲིད་དོན་ཚོགས་པར་ཞབས་བཀྱག་ ༡༦༨ ཐོབ་སྟེ། སྲིད་དོན་ཚོགས་པ་དེའི་སྲིད་བློན་འོས་མི་མག་ཁར་ནེ་མཆོག་བསྐྱར་དུ་སྲིད་བློན་དུ་འདེམས་ཐོན་བྱུང་ཡོད་འདུག

འོས་བསྡུའི་གྲུབ་འབྲས་ཐོན་རྗེས་སྲིད་བློན་མག་ཁར་ནེ་མཆོག་གིས། ང་རང་ལ་དཔལ་འབྱོར་ཉམས་ཉེས་ཐད་དོ་དམ་དང་སྟངས་འཛིན་བྱས་པའི་ཉམས་མྱོང་ཡོད་པ་དང་། ཨ་རིའི་སྲིད་འཛིན་ཊོམ་ཕུ་མཆོག་གིས་རྒྱལ་ཁབ་ཁག་ལ་ཚོང་ཁྲལ་ཤུགས་ཆེན་སྤར་བའི་ཚོང་དམག་ཐད་གདོང་ལེན་བྱེད་པར་གྲ་སྒྲིག་ཡོད། ཅེས་དང་། རྒྱ་གར་དང་མཉམ་དུ་འབྲེལ་ལམ་ཡར་རྒྱས་གཏོང་འཆར་ཡོད་སྐོར་དང་། ཁེ་ན་ཌའི་རྒྱལ་ཡོངས་མི་མང་མཉམ་རུབ་ཀྱི་ཐོག་ནས་ཁེ་ན་ཌའི་རྒྱལ་ཁབ་ཡར་རྒྱས་གཏང་རྒྱུ་ཡིན་སྐོར་སོགས་གསུངས་འདུག

དེ་རིང་རྒྱ་གར་གྱི་སྲིད་བློན་མོ་དྷི་མཆོག་གིས། སྲིད་བློན་མག་ཁར་ནེ་མཆོག་ལ་ཁེ་ན་ཌའི་སྲིད་བློན་དུ་འདེམས་ཐོན་བྱུང་བ་དང་། གུ་ཡངས་སྲིད་དོན་ཚོགས་པར་རྒྱལ་ཁ་ཐོབ་པར་འཚམས་འདྲི་ཞུ་ཡི་ཡོད། རྒྱ་གར་དང་ཁེ་ན་ཌ་གཉིས་ནི་དམངས་གཙོའི་རིན་ཐང་མཉམ་སྤྱོད་དང་། མི་དང་མིའི་བར་གྱི་འབྲེལ་བ་ཡར་རྒྱས་གཏང་རྒྱུ་གལ་ཆེན་པོར་ངོས་འཛིན་གྱི་ཡོད། ང་ཚོས་ཁེ་ན་ཌ་དང་མཉམ་དུ་མཉམ་ལས་བྱས་ཏེ་མཉམ་འབྲེལ་གྱི་ནུས་པ་ཆེ་རུ་གཏོང་བ་དང་། མི་མང་ལ་གོ་སྐབས་ཇེ་མང་དུ་གཏོང་བར་རེ་སྒུག་བྱེད་ཀྱི་ཡོད། ཅེས་གསུངས་འདུག

རྙིང་ཞེན་སྲིད་དོན་ཚོགས་པའི་མགོ་ཁྲིད་དང་སྲིད་བློན་འོས་མི་པེ་རི་ (Pierre Poilievre) ལགས་ཀྱིས། ང་ཚོས་ནམ་ཡང་ཁེ་ན་ཌ་ཨང་དང་པོར་འཇོག་གི་ཡིན། ཞེས་དང་། རྙིང་ཞེན་ཚོགས་པའི་ངོས་ནས་སྲིད་བློན་དང་ཚོགས་པ་གཞན་ཚང་མའི་མཉམ་དུ་ཁེ་ན་ཌའི་ཁེ་ཕན་སྲུང་སྐྱོབ་དང་། ཚོང་འབྲེལ་གྱི་གྲོས་མཐུན་གསར་པ་ཞིག་ཐོབ་ཐབས་བྱེད་ཀྱི་ཡིན་ལ། ང་ཚོའི་བདག་དབང་སྲུང་སྐྱོབ་བྱེད་ཀྱི་ཡིན། ཞེས་བརྗོད་འདུག

གཞན་ཡང་། རྒྱ་ནག་ཕྱི་འབྲེལ་ལས་ཁུངས་ཀྱི་མགྲིན་ཚབ་པ་ཀོ་ཅ་ཁུན་ (Guo Jiakun) གྱིས། རྒྱ་ནག་དང་ཁེ་ན་ཌས་ཕན་ཚུན་བརྩི་འཇོག་དང་། འདྲ་མཉམ། ཕན་ཚུན་ཁེ་ཕན་གྱི་རྨང་གཞིའི་ཐོག་ནས་ཕྱོགས་གཉིས་ཀྱི་འབྲེལ་ལམ་ཡར་རྒྱས་གཏོང་འདོད་ཡོད། ཅེས་བརྗོད་འདུག

འདི་ལོའི་ཕྱི་ཟླ་ ༡ ཚེས་ ༦ ཉིན་ཁེ་ན་ཌའི་རྒྱལ་ས་ཨོ་ཊ་ཝ་ (Ottawa) རུ་སྐབས་དེའི་སྲིད་བློན་ལས་ཐོག་རྗ་སི་ཊིན་ཊིར་ཌུའུ་མཆོག་གིས་ཡོངས་ཁྱབ་གསལ་བསྒྲགས་ཤིག་གནང་བའི་ནང་། ངས་ཁེ་ན་ཌའི་སྲིད་བློན་དང་གུ་ཡངས་སྲིད་དོན་ཚོགས་པའི་མགོ་ཁྲིད་ཀྱི་ལས་གནས་ནས་དགོངས་པ་ཞུ་རྒྱུ་ཡིན། དེ་བཞིན་སྲིད་བློན་ཀྱི་ལས་གནས་ནས་ཀྱང་དགོངས་པ་ཞུ་རྒྱུ་ཡིན་ཡང་སྲིད་བློན་གསར་པ་ཞིག་འོས་འདེམས་མ་བྱུང་གི་བར་དུ་ལས་མཚམས་འཇོག་རྒྱུ་མིན། ཞེས་གསུངས་ཡོད་པ་རེད། དེའི་རྗེས། ཕྱི་ཟླ་ ༡ ཚེས་ ༡༦ ཉིན་མག་ཁར་ནེ་ལགས་ཕྱི་ལོ་ ༢༠༢༥ ལོའི་གུ་ཡངས་ཚོགས་པའི་མགོ་ཁྲིད་དུ་ལངས་རྒྱུའི་ཐག་གཅོད་གནང་སྟེ། སྲིད་དོན་ཚོགས་པ་དེའི་ནང་འོས་གྲངས་བརྒྱ་ཆ་ ༨༥།༩ ཡི་རྒྱབ་སྐྱོར་ཐོབ་སྟེ། གུ་ཡངས་ཚོགས་པའི་མགོ་ཁྲིད་དང་། སྲིད་བློན་དུ་འདེམས་ཐོན་བྱུང་ཡོད་པ་རེད།

མག་ཁར་ནེ་མཆོག་ནི་ཕྱི་ལོ་ ༡༩༦༥ ཟླ་ ༣ ཚེས་ ༡༦ ཉིན་ཁེ་ན་ཌའི་གྲོང་བརྡལ་ཧྥོར་ཌི་སི་མི་ཐི་ (Fort Smith) རུ་སྐྱེས་ཤིང་། ཕྱི་ལོ་ ༡༩༨༣ ལོར་ (St. Francis Xavier High School) དུ་སློབ་སྦྱོང་བྱས། དེའི་རྗེས་ཧར་ཝ་ཌི་མཐོ་རིམ་སློབ་གཉེར་ཁང་དུ་དཔལ་འབྱོར་རིག་པའི་ཐོག་ཉེ་བའི་གཙུག་ལམ་རབ་འབྱམས་པའི་སློབ་སྦྱོང་བྱས། ཕྱི་ལོ་ ༡༩༩༣ ལོར་དཔལ་འབྱོར་རིག་པའི་གཙུག་ལག་རབ་འབྱམས་པའི་སློབ་མཐར་ཕྱིན། དེ་ནས་ཕྱི་ལོ་ ༡༩༩༥ ལོར་དཔལ་འབྱོར་རིག་པའི་ཐོག་འབུམ་རམས་པའི་སློབ་མཐར་ཕྱིན། འདས་པའི་ལོ་ངོ་ ༡༣ རིང་བྷོ་སི་ཊོན་དང་། ལོན་ཌོན། ནེའུ་ཡོག ཊོག་ཡོ། ཊོ་རོན་ཊོ་སོགས་ལ་ཡོད་པའི་དངུལ་ཁང་མང་པོ་ཞིག་ཏུ་ཕྱག་ལས་གནང་། ཕྱི་ལོ་ ༢༠༠༣ ལོར་ཁེ་ན་ཌའི་དངུལ་ཁང་དུ་འགན་འཛིན་གཞོན་པའི་ལས་གནས་གཉེར་ཞིང་། ལོ་ངོ་གཅིག་གི་རྗེས་སུ་ཁེ་ན་ཌའི་དཔལ་འབྱོར་ལས་ཁུངས་ཀྱི་དྲུང་ཆེ་རུ་བསྐོ་གཞག་གནང་། ཕྱི་ལོ་ ༢༠༠༨ ནས་ ༢༠༡༣ བར་ཁེ་ན་ཌའི་དངུལ་ཁང་དུ་འགན་འཛིན་གྱི་ཕྱག་ལས་གནང་མྱོང་བ་མ་ཟད། ཕྱི་ལོ་ ༢༠༡༣ ནས་ ༢༠༢༠ བར་དབྱིན་ཡུལ་དངུལ་ཁང་གི་འགན་འཛིན་གྱི་ཕྱག་ལས་གནང་། ༢༠༢༠ ནས་ ༢༠༢༤ བར་ལོ་ངོ་བཞིའི་རིང་ཁེ་ན་ཌའི་སྲིད་བློན་རྗ་སི་ཊིན་ཊིར་ཌུའུ་མཆོག་གི་སློབ་སྟོན་པའི་ཕྱག་ལས་གནང་། ཕྱི་ལོ་ ༢༠༢༥ ལོའི་ཕྱི་ཟླ་ ༡ པོའི་ནང་སྲིད་བློན་དུ་འདེམས་ཐོན་བྱུང་སྟེ། ད་ལྟའི་ཆར་སྲིད་བློན་གྱི་ཕྱག་ལས་གནང་མུས་ཡིན་པ་རེད།

གསར་འགོད་པ། བསྟན་འཛིན་ཕུར་བུ།

རྩོམ་སྒྲིག་བྱེད་མཁན། པདྨ་མཚོ།