སྲིད་སྐྱོང་མཆོག་གིས་ཨ་རིའི་གྲོས་ཚོགས་འོག་མའི་ཚོགས་གཙོ་ཟུར་པ་ནན་སི་ཕི་ལོ་ལོ་སི་མཆོག་གི་གཙོས་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་གི་ཚོགས་གཙོ་ལས་ཐོག་དང་ཟུར་པ་སོགས་གནད་ཡོད་མི་སྣ་ཁག་ཅིག་དང་མཇལ་འཕྲད་གནང་འདུག
ཕྱི་ཟླ་ ༤ ཚེས་ ༢༦ ནས་ཕྱི་ཟླ་ ༦ ཚེས་ ༨ བར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ཨ་རི་དང་། ཁེ་ན་ཌ། ཉི་ཧོང་བཅས་རྒྱལ་ཁབ་གསུམ་གྱི་ནང་གཞུང་འབྲེལ་ཕྱོགས་ཕེབས་གནང་བཞིན་ཡོད་པ་ལྟར། ཁ་སང་ཕྱི་ཟླ་ ༤ ཚེས་ ༣༠ ཉིན་སྲིད་སྐྱོང་སྤེན་པ་ཚེ་རིང་མཆོག་གིས་ཨ་རིའི་གྲོས་ཚོགས་འཐུས་མི་སྐུ་ཞབས་མཱ་རའོ་ཊི་ཛི་བྷ་ལཱར་ཌི་ ( Mario Diaz-Balart) མཆོག་དང་མཇལ་འཕྲད་གནང་ཡོད་ཅིང་། སྐབས་དེར་སྲིད་སྐྱོང་མཆོག་གིས་༧གོང་ས་རྒྱལ་བ་རིན་པོ་ཆེ་མཆོག་ནས་མཚན་རྟགས་བསྐྱོན་པའི་བོད་དང་བོད་མིའི་མགྲིན་ཚབ་(Voice for the voiceless) ཀྱི་ཕྱག་དེབ་ཅིག་ཕུལ་ཡོད་འདུག
ཕྱི་ཟླ་ ༤ ཚེས་ ༢༩ ཉིན་སྲིད་སྐྱོང་མཆོག་གིས་ཨ་རིའི་གྲོས་ཚོགས་འོག་མའི་འཐུས་མི་དང་ཨ་རིའི་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་གི་ཚོགས་གཙོ་ཟུར་པ་སྐུ་ཞབས་མའེ་ཁིལ་མག་ཁལ་ (Michael McCaul) མཆོག་དང་མཇལ་འཕྲད་གནང་སྟེ། སྲིད་སྐྱོང་མཆོག་གིས་ཨ་རིའི་ཕྱི་སྲིད་དྲུང་ཆེ་མཆོག་ལ་ཡིག་འབྲེལ་གནང་བའི་སྐོར་དང་། དབུས་བོད་མིའི་སྒྲིག་འཛུགས་ཀྱི་དཔལ་འབྱོར་གནས་བབ་ཀྱི་ཨ་རིའི་རོགས་དངུལ་སྐོར། ཨ་རིའི་གཞུང་ནས་བོད་དོན་དམིགས་བསལ་འབྲེལ་མཐུད་པ་བསྐོ་གཞག་དགོས་པའི་སྐོར། བོད་དོན་ཐོག་རྒྱབ་སྐྱོར་སྔར་ལྷག་ཡོང་བ་དང་། དམིགས་བསལ་ས་ཁམས་ཆབ་སྲིད་ཀྱི་འགྱུར་ལྡོག་ཐོག་ནན་བརྗོད་གནང་འདུག
དེ་བཞིན་ཨ་རིའི་རླུང་འཕྲིན་ཁང་དང་ཨེ་ཤ་ཡ་རང་དབང་རླུང་འཕྲིན་ཁང་གཉིས་ཀྱི་དཀའ་ངལ་སྐོར་སོགས་གསུངས་ཡོད་འདུག སྐུ་ཞབས་མའེ་ཁིལ་མག་ཁལ་མཆོག་ནི་བོད་དོན་ཐོག་ནམ་རྒྱུན་རྒྱབ་སྐྱོར་ཤུགས་ཆེན་གནང་མཁན་གྱི་ཨ་རིའི་གྲོས་ཚོགས་འཐུས་མི་ཞིག་ཡིན་པ་དང་། ཁོང་གིས་ཨ་རིའི་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་གི་ཚོགས་གཙོའི་ཐུགས་འགན་བཞེས་མྱོང་ཡོད་ཅིང་། འདས་ལོར་ཁོང་གིས་སྣེ་ཁྲིད་པའི་ཨ་རིའི་གྲོས་ཚོགས་ཀྱི་ཆེས་མཐོའི་སྐུ་ཚབ་ཚོགས་ཆུང་ཞིག་བཞུགས་སྒར་དྷ་སར་ཆེད་ཕེབས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་བཅར་ཞུས་ཡོད་པ་མ་ཟད། ཨ་རིའི་གྲོས་ཚོགས་གོང་འོག་གཉིས་ནས་གཏན་འབེབ་གནང་བའི་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་དེ་སྤྱན་འབུལ་ཞུས་ཡོད་པ་རེད།
གཞན་ཡང་། ཨ་རིའི་གྲོས་ཚོགས་འོག་མའི་གཞུང་སྒྲུབ་ཁང་ (Rayburn Building) དུ། སྲིད་སྐྱོང་མཆོག་གིས་ཨ་རིའི་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་གི་ཚོགས་གཙོ་སྐུ་ཞབས་བྷེ་རེན་མ་སི་ཌི (Brian Mast) མཆོག་དང་མཇལ་འཕྲད་གནང་ཡོད་ཅིང་། སྐབས་དེར་ཨ་རིའི་གྲོས་ཚོགས་གོང་འོག་གཉིས་ཀྱིས་བོད་དོན་ཐོག་རྒྱབ་སྐྱོར་དང་འབྲེལ་ལམ་ཡར་རྒྱས་གཏོང་ཕྱོགས་སྐོར་དང་། བོད་ནང་གི་བོད་མིར་དཀའ་ངལ་འཕྲད་བཞིན་པའི་ཛ་དྲག་གནས་སྟངས། ཨ་རིའི་རོགས་དངུལ་མཚམས་འཇོག་གིས་བོད་མིའི་ལས་གཞི་ཁག་ལ་ཤུགས་རྐྱེན་ཇི་ལྟར་ཐེབས་ཀྱི་ཡོད་པའི་སྐོར་སོགས་ལ་བཀའ་སྡུར་གནང་ཡོད་འདུག འདི་ནི་སྲིད་སྐྱོང་མཆོག་གིས་ཁོང་དང་མཇལ་འཕྲད་གནང་བ་ཐེངས་གཉིས་པ་དེ་ཆགས་ཡོད་ཅིང་། འདས་ལོའི་ཕྱི་ཟླ་ ༡༢ པའི་ནང་ཨ་རིའི་གྲོས་ཚོགས་ཕྱི་འབྲེལ་ལས་དོན་ཚོགས་ཆུང་གི་མིང་བསྒྱུར་མཛད་སྒོའི་སྐབས་སུ་མཇལ་འཕྲད་བྱུང་ཡོད་འདུག
སྲིད་སྐྱོང་མཆོག་གིས་བོད་དོན་ཐོག་ཡུན་རིང་རྒྱབ་སྐྱོར་གནང་མཁན་ཨ་རིའི་གྲོས་ཚོགས་འོག་མའི་ཚོགས་གཙོ་ཟུར་པ་ལྕམ་སྐུ་ནན་སི་ཕེ་ལོ་སི་(Nancy Pelosi) མཆོག་དང་མཇལ་འཕྲད་གནང་སྟེ། ཁོང་མོའི་བཀའ་དྲིན་རྗེས་དྲན་མཚོན་ཆེད་དུ་༧གོང་ས་མཆོག་ནས་མཚན་རྟགས་བཀོད་པའི་བོད་དང་བོད་མིའི་མགྲིན་ཚབ་ཀྱི་ཕྱག་དེབ་ཅིག་ཕུལ་ཡོད་འདུག་ལ། ཨ་རིའི་གྲོས་ཚོགས་འཐུས་མི་ལྕམ་ཇེན་ཤ་ཀོ་སི་ཀ་ཡེ་(Jan Schakowsky) མཆོག་དང་མཇལ་མོལ་གནང་ཡོད་པ་མ་ཟད། སྐབས་དེར་ཁོང་མོས་བོད་མིའི་ཐོབ་ཐང་དང་མངོན་འདོད་འགྲུབ་པར་མུ་མཐུད་རྒྱབ་སྐྱོར་གནང་རྒྱུ་ཡིན་སྐོར་གསུངས་འདུག
དེ་བཞིན་ཨ་རིའི་ཁེ་ཕི་ཌོལ་ཧིལ་(Capitol Hill )རུ། སྲིད་སྐྱོང་སྤེན་པ་ཚེ་རིང་མཆོག་གི་གཙོས་ཨ་རི་སྐུ་ཚབ་དོན་གཅོད་རྣམ་རྒྱལ་ཆོས་གྲུབ་ལགས་དང་། ཨ་རིའི་སྐུ་ཚབ་དོན་ཁང་གི་རྒྱ་རིགས་འབྲེལ་མཐུད་པ་ཚུལ་ཁྲིམས་རྒྱ་མཚོ་ལགས། རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་བསྟན་ཆོས་རྒྱ་མཚོ་ལགས་དང་། ཚོགས་གཙོ་ཧྥ་རེན་ཛི་མེ་ཌི་ཛི་ནར་ལགས་( Franz Matzner )བཅས་ཀྱིས་ཨ་རིའི་གྲོས་ཚོགས་འོག་མའི་ཨ་རི་དང་རྒྱ་ནག་དམར་ཤོག་ཚོགས་པ་བར་གྱི་ཐབས་ཇུས་སྐོར་གྱི་འདེམས་སྒྲུག་ཚོགས་ཆུང་གི་ཚོགས་མི་(Members of the Select Committee on the CCP)དང་ལྷན་དུ་བཀའ་སྡུར་གནང་ཡོད་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་པ། པདྨ་མཚོ།
