མིའི་ཀུན་སྤྱོད་བཟང་པོ་ཡོང་རྒྱུ་དང་ཚང་མ་མཐུན་པོ་ཡོང་རྒྱུ་དེ་ལས་འགན་གཙོ་བོ་ཡིན་པས་ང་ཚོ་མཐུན་པོ་བྱས་ཏེ་མཉམ་དུ་བསྡད་ཐུབ་རྒྱུ་དེ་ངོས་ཀྱི་དམིགས་ཡུལ་གཙོ་བོ་ཡིན་ཞེས་གསུངས།
དེ་རིང་ཕྱི་ཚེས་ ༢ ཉིན་བཞུགས་སྒར་རྒྱལ་བའི་ཕོ་བྲང་དུ། ༧གོང་ས་རྒྱལ་བ་རིན་པོ་ཆེ་མཆོག་ནས་རྒྱ་རིགས་ཚན་རིག་པ་ཁག་ཅིག་དང་ལྷན་དུ་ནང་ཆོས་དང་འབྲེལ་བའི་བགྲོ་གླེང་ཐེངས་གསུམ་པ་གནང་ཡོད་ཅིང་། ཕྱི་ལོ་ ༢༠༡༨ ཟླ་ ༡༡ ནང་༧གོང་ས་མཆོག་ནས་རྒྱ་རིགས་ཚན་རིག་པ་ལྷན་དུ་ཚད་རྡུལ་དངོས་ཁམས་དང་འབྲེལ་བའི་ཚན་རིག་ཐོག་བགྲོ་གླེང་ཐེངས་དང་པོ་འཚོག་ཡོད་པ་རེད།
བགྲོ་གླེང་སྐབས་༧གོང་ས་རྒྱལ་བ་རིན་པོ་ཆེ་མཆོག་ནས། ངོས་རང་རྒྱ་གར་དུ་བཙན་བྱོལ་བ་ཆགས་ཏེ་བསྡད་པའི་རིང་ལུང་པ་འདྲ་མིན་ནས་ཡོང་པའི་ཚན་རིག་པ་དང་ཆོས་པ་སོགས་ལ་ཐུག་པའི་གོ་སྐབས་ཡག་པོ་འདུག ངོས་རང་གི་རེ་བར་རྒྱ་ནག་ནང་མཁས་པ་རྣམས་འཛོམས་ཏེ་ཚོགས་འདུ་ཞིག་འཚོག་ཐུབ་ན་བསམ་གྱི་ཡོད། རྒྱ་ནག་ནང་དུ་ནང་པ་མང་པོ་འཕེལ་ཡོང་གིན་ཡོད་པ་བཤད་ཀྱི་འདུག རྒྱ་ནག་ནང་དུ་ནང་པའི་ཆོས་ཡག་པོ་དར་བ་ཡིན་ཚེ། དེས་ཕན་ཐོགས་ཏན་ཏན་ཡོད་པ་རེད། ངོས་རང་བཙན་བྱོལ་བ་བྱས་ཏེ་ལུང་པ་གང་སར་ནས་ཡོང་བའི་མི་ཐུག་ཡོད་ཅིང། དེའི་ནང་ནས་ཚན་རིག་པའང་མང་པོར་ཐུག་གི་ཡོད། ངོས་རང་ཆུང་ཆུང་སྐབས་ནས་བསྡུས་གྲྭ་བསླབ། ཁ་དོག་དཀར་དམར་ནས་བཟུང་དབུ་མ་དང་ཕར་ཕྱིན་བར་དཔེ་ཆ་མང་པོར་བལྟས་པ་རེད། དཔེ་ཆ་བལྟས་པ་དེ་རྒྱུ་མཚན་བྱས་ཏེ་རྒྱ་གར་དུ་བསླེབས་རྗེས་ཚན་རིག་མང་པོར་ཐུག་པ་རེད། མཁས་དབང་མང་པོར་ཐུག་སྟེ་སོ་སོའི་བསམ་བློ་རྒྱ་ཆེ་རུ་འགྲོ་བར་ཕན་ཐོགས་ཆེན་པོ་འདུག དེང་སང་རྒྱ་ནག་ནང་དུ་ནང་ཆོས་ལ་དོ་སྣང་ཇེ་མང་ནས་ཇེ་མང་དུ་འགྲོ་བཞིན་འདུག ད་ལྟ་ང་ཚོའི་གལ་ཆེ་བ་ཞིག་ནི་མིའི་ཀུན་སྤྱོད་བཟང་པོ་ཡོང་རྒྱུ་དང་། སེམས་བཟང་པོ་ཡོང་རྒྱུ། ང་ཚོ་ཚང་མ་མཐུན་པོ་ཡོང་རྒྱུ་དེ་ལས་འགན་གཙོ་བོ་ཡིན། གང་ལྟར་ང་ཚོ་མཐུན་པོ་བྱས་ཏེ་མཉམ་དུ་བསྡད་ཐུབ་རྒྱུ་དེ་ངོས་ཀྱི་དམིགས་ཡུལ་གཙོ་བོ་རེད། རྒྱ་ནག་ནང་དུ་ནང་ཆོས་བྱེད་མཁན་ཇེ་མང་དུ་འགྲོ་བའི་བཟོ་ཞིག་འདུག ཅེས་གསུངས་སོང་།
ཡང་མུ་མཐུད་༸མགོན་པོ་གང་ཉིད་མཆོག་ནས། ནུབ་ཕྱོགས་རྒྱལ་ཁབ་ཀྱི་ཚན་རིག་པའི་ཁྲོད་ནང་ཆོས་ལ་དོ་སྣང་བྱེད་མཁན་ཇེ་མང་དུ་འགྲོ་བཞིན་འདུག ངོས་ཀྱིས་ནང་ཆོས་ངོ་སྤྲོད་བྱེད་དུས་སེམས་ཁམས་རིག་པ་དང་འབྲེལ་ནས་བཤད་ཀྱི་ཡོད་པ་མ་གཏོགས། དེ་སྔ་ང་ཚོས་སྨོན་ལམ་རྒྱག་བཞིན་པ་དེ་བཤད་ཀྱི་མེད། འཛམ་གླིང་འདིར་ང་ཚོ་ཚང་མར་ཞི་བདེ་དགོས་ཀྱི་ཡོད་པ་རེད། དེ་རྒྱུ་མཚན་ལྡན་པ་རེད། ཞི་བདེ་ཡོང་བའི་མ་རྩ་སེམས་འདུལ་བ་དགོས་ཀྱི་འདུག སེམས་ལ་ཞི་བདེ་ཡོད་ན་འཛམ་བུ་གླིང་ཞི་བདེ་ཡོང་ཐུབ་པ་དང་། སེམས་ལ་ཞི་བདེ་མེད་ན་ཁ་ནས་ཞི་བདེ་ཞེས་ལབ་ཀྱང་ཕན་རྒྱུ་མི་འདུག ཧི་མ་ལ་ཡའི་རི་རྒྱུད་ཀྱི་མི་རྣམས་ངོས་རང་ལ་མོས་པ་ཆེན་པོ་ཡོད། ང་ཚོ་ཚང་མ་འཆམ་པོ་དང་མཐུན་པོ་དགོས། མི་རིགས་ཕན་ཚུན་བར་གྱི་བརྩེ་བ་གལ་ཆེན་པོ་རེད་ཅེས་བཤད་ཀྱི་ཡོད།ངོས་རང་རྒྱ་གར་དུ་བཙན་བྱོལ་བ་བྱས་ཏེ་བསྡད་དུས། ལུང་པ་འདྲ་མིན་གྱི་ཚན་རིག་པ་མང་པོ་ཐུག་གི་ཡོད། ཚན་རིག་པའི་ཁྲོད་སེམས་ཁམས་རིག་པའི་ཚན་རིག་པ་ཐུག་དུས་ཕན་ཐོགས་ཆེན་པོ་འདུག ང་ཚོ་ནང་པའི་གཞུང་གི་ནང་དུ་སེམས་ཁམས་རིག་པའི་སྐོར་ལ་འགྲེལ་བཤད་མང་པོ་ཡོད། ཚན་རིག་པས་སེམས་ཁམས་རིག་པའི་ཐོག་བཤད་པ་དེ་ང་ཚོས་གོ་བསྡུར་བྱེད་པར་ཕན་ཐོགས་ཆེན་པོ་འདུག ཀླད་པའི་སྐོར་གྱི་ཚན་རིག་མཁས་པས་བཤད་པ་དང་ང་ཚོའི་དཔེ་ཆ་ནང་དུ་བཤད་ཡོད་པ་དེ་གཉིས་གོ་བསྡུར་བར་ཕན་ཐོགས་ཆེན་པོ་འདུག རྒྱ་གར་རང་དབང་ལུང་པའི་ནང་ཆོས་ལུགས་འདྲ་མིན་གྱི་མི་ཡོད་དུས། སེམས་ཁམས་རིག་པའི་ཚན་རིག་པ་དང་འཕྲད་དུས་དཀའ་ངལ་གང་ཡང་མེད་པའི་ཕན་ཐོགས་ཆེན་པོ་འདུག ཅེས་གསུངས་སོང་།
དེ་ནས་རྒྱ་རིགས་ཚན་རིག་པ་ཞིག་གིས། སྤྱིར་ཚན་རིག་པ་སྤྱི་ཡོངས་ནས་ཤེས་པ་ནི་ཀླད་པའི་ཆ་ཤས་སུ་འདོད་ཀྱང་། དེང་ཚན་ཚན་རིག་པ་གྲགས་ཅན་འགའ་ཞིག་གིས་ཤེས་པ་ཀླད་པའི་ཆ་ཤས་སུ་འདོད་ཀྱིན་མེད། ནང་པ་ལྟར་ན། ཤེས་པ་ཕྲ་མོ་དེ་གཟུགས་ཅན་ཡིན་པ་དང་། འཁོར་འདས་ཀྱི་རྩ་བར་འདོད་དམ། ཞེས་བཀའ་འདྲི་ཞུས་པར། ༧གོང་ས་མཆོག་ནས། སྤྱིར་ང་ཚོས་ལུས་དང་སེམས་གཉིས་སུ་དབྱེ་ཡི་འདུག སེམས་ཀྱི་ཐོག་སླེབས་དུས་རྣམ་པར་ཤེས་པ་དང་། སྒོ་ལྔའི་ཤེས་པ། ཡིད་ཀྱི་ཤེས་པ་སོགས་འདྲ་མིན་འདུག ཤེས་པ་བརྟན་པོ་ཡོང་བར་སྒོམ་རྒྱག་ན་ཧ་ཅང་ཕན་གྱི་འདུག ངོས་ཀྱིས་ཀྱང་ཞོགས་པ་རྟག་ཏུ་གཉིད་སད་པ་དང་བསམ་བློ་བཏང་སྟེ་སྒོམ་ཅུང་ཙམ་རྒྱག་གི་ཡོད། དེས་བསམ་བློ་གསལ་དུ་འགྲོ་བར་ཁྱད་པར་འདུག ཤེས་པ་གསལ་བོ་བྱུང་ཚེ་དཔྱད་པ་གཏོང་བའི་ནུས་པ་ཆེན་པོ་འདུག སྔོན་ན་ལེནྡྲའི་མཁས་པ་ཚོས་ནང་པའི་ཚད་མ་རིག་པ་གསུངས་ཡོང་དུས་དཔྱད་པ་བྱ་རྒྱུ་ཧ་ཅང་གལ་ཆེན་པོ་བརྩིས་ཡོད། ངོས་རང་ན་ལེནྡྲའི་མཁས་པ་ཚོའི་རྗེས་འབྲངས་ཆགས་བསྡད་ཡོད། དཔྱད་པ་བྱེད་རྒྱུ་ཧ་ཅང་གལ་ཆེན་པོ་བརྩིས་ཡོད། ཚད་མ་རྣམ་འགྲེལ་གྱི་ཐོག་རིག་པས་དཔྱད་པ་བྱེད་སྟངས་དེ་ཚན་རིག་པས་བཤད་དུས་གཉིས་ཆར་ཕན་ཐོགས་ཡོང་གི་འདུག སེམས་ཁམས་རིག་པའི་ཚན་རིག་པ་དང་ཐུག་དུས་ངོས་ཀྱང་ཚན་རིག་པ་བཞིན་ཆགས་ཀྱི་ཡོད། ཡིན་ནའང་། སེམས་ཁམས་རིག་པའི་ནང་རིག་པ་ཕྲ་རགས་ཀྱི་སྐོར་མང་པོ་བཤད་དགོས། དེ་དག་ནི་དཔེ་ཆའི་ནང་དུ་བཤད་པ་བཞིན་ཞིབ་ཚགས་དང་ཁུངས་འཁྱོལ་བ་ཆགས་དགོས། ངོས་ཀྱིས་མངོན་པ་མཛོད་དེ་གལ་ཆེན་པོ་དང་གནད་འགག་ཞིག་ཏུ་མཐོང་གི་མི་འདུག གང་ལྟར་དབུ་མ་དང་ཕར་ཕྱིན་ནི་གཙོ་བོ་རིག་པའི་ལམ་ནས་ཤེས་བྱའི་གནས་ཚད་གཏན་ལ་ཕབ་པར་ཧ་ཅང་ཞིབ་ཚགས་པོ་རེད། ཅེས་གསུངས་སོང་།
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། པདྨ་མཚོ།
འགོག་ངེས་ཤེས་པ་ཟེར་ན་གང་ཟེར་གྱི་ཡོད་དམ། སྒོ་ལྔའི་ཤེས་པ་ཟེར་བ་ཡིན་གྱི་བསམ། སྒོ་ལྔའི་ཤེས་པ་ནི་དབང་ཤེས་ལྔ་སྟེ། མིག་གི་ཤེས་པ། རྣ་བའི་ཤེས་པ། སྣའི་ཤེས་པ། ལྕེའི་ཤེས་པ། ལུས་ཀྱི་ཤེས་པ་བཅས་ལ་གོ་དགོས། འགོག་ངེས་ཤེས་པ་ཟེར་བའི་ཐ་བརྙད་ཞིག་གང་དུ་ཡོད་དམ།
བཟོད་པ་ལྷ་རྩེ་ལགས། ཐུགས་སྣང་བྱུང་བར་བཀའ་དྲིན་ཆེ།
འགོག་ངེས་ཤེས་པ་ཟེར་ན་ནོར་མེད་དམ་སྙམ། སྒོ་ལྔའི་ཤེས་པ་ཡིན་གྱི་རེད།
ཕུན་ཚོགས་ལགས། ཐུགས་སྣང་བྱུང་བར་བཀའ་དྲིན་ཆེ།