སྐུ་ཚབ་དོན་གཅོད་ཀྱི་ལོ་འཁོར་ཚོགས་འདུ་ཐོག་༧གོང་ས་རྒྱལ་བ་རིན་པོ་ཆེ་མཆོག་གི་༸སྐུའི་གོ་སྟོན་སྲུང་གཙི་ཞུ་ཕྱོགས་དང་། ཆབ་སྲིད་དང་འབྲེལ་བའི་ལས་དོན་བྱེད་ཕྱོགས། དང་བླངས་བོད་དོན་ཞུ་གཏུག་ལས་འགུལ་སྐོར། འཛིན་སྐྱོང་འབྲེལ་ཡོད་སོགས་ཀྱི་ཐོག་བགྲོ་གླེང་གནང་འདུག
ཟླ་འདིའི་ཕྱི་ཚེས་ ༦ ནས་ ༩ ཉིན་གྲངས་བཞི་རིང་ཉི་ཧོང་གི་རྒྱལ་ས་ཊོག་ཡོ་རུ། བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་གོ་སྒྲིག་འོག བོད་མིའི་སྒྲིག་འཛུགས་ཀྱི་ཁྱབ་ཁོངས་སྐུ་ཚབ་དོན་གཅོད་རྣམ་པའི་ལོ་འཁོར་ཚོགས་འདུ་དང་། རྒྱལ་སྤྱིའི་ལམ་སྲོལ་དང་མཐུན་པའི་སྣེ་ཤན་བྱེད་ཕྱོགས་ཟབ་སྦྱོང་གཉིས་འཚོགས་ཡོད་ཅིང་། དབུ་འབྱེད་མཛད་སྒོའི་ཐོག་བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་དང་། ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས། བོད་མིའི་སྒྲིག་འཛུགས་ཀྱི་མགྲིན་ཚབ་པ་བསྟན་འཛིན་ལེགས་བཤད་ལགས། དེ་བཞིན་ཕྱི་དྲིལ་ལས་ཁུངས་ཀྱི་ཁྱབ་ཁོངས་སྐུ་ཚབ་དོན་གཅོད་ཁང་ཁག་ ༡༣ གྱི་སྐུ་ཚབ་དོན་གཅོད་དང་འབྲེལ་མཐུད་པ་རྣམས་ཀྱིས་མཉམ་ཞུགས་གནང་ཏེ། ཟབ་སྦྱོང་སྣེ་ཤན་དང་འབྲེལ་བའི་ལས་དོན་ཐོག་གི་ཁྱད་ལས་སྡེ་ཁག་ (Protocol International) གི་སྐུ་ཞབས་མག་ཝར་ཧིལ་ (Mark Verheul) ལགས་དང་། ལྕམ་མར་སི་མེ་ལི་ (Maryse Larche Mele) ལགས་གཉིས་ཀྱིས་ཟབ་ཁྲིད་གནང་འདུག
ཐེངས་འདིའི་ཟབ་སྦྱོང་གི་སྐོར་ལ་ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས་ཀྱིས། རྒྱལ་སྤྱིའི་གྲོས་ཚོགས་འཐུས་མི་བོད་དོན་རྒྱབ་སྐྱོར་ཚོགས་ཆེན་ཐེངས་དགུ་བ་གྲོལ་བ་དང་བསྟུན་ནས། བོད་མིའི་སྒྲིག་འཛུགས་ཀྱི་ཕྱི་དྲིལ་ལས་ཁུངས་ཀྱི་ཁྱབ་ཁོངས་སྐུ་ཚབ་དོན་གཅོད་རྣམས་ཀྱི་ཚོགས་འདུ་སྐོང་འཚོགས་བྱས་ཡོད། ཚོགས་འདུ་སྐབས་སུ་༧སྐུའི་གོ་སྟོན་སྲུང་གཙི་ཞུ་ཕྱོགས་ཐད་འདས་ལོ་ནས་གྲ་སྒྲིག་བྱས་པའི་ལྷག་མ་བསྐྱར་དུ་གོ་བསྡུར་བྱས་ཡོད། དེ་བཞིན་ཕྱི་དྲིལ་ལས་ཁུངས་ཀྱི་ཁྱབ་ཁོངས་ཀྱི་སྐུ་ཚབ་དོན་གཅོད་རྣམས་ཀྱི་ཆབ་སྲིད་དང་འབྲེལ་བའི་ལས་དོན་བྱེད་ཕྱོགས་ཐོག་གོ་བསྡུར་བྱས་ཡོད། དང་བླངས་བོད་དོན་ཞུ་གཏུག་ལས་འགུལ་གྱི་སྐོར། འཛིན་སྐྱོང་འབྲེལ་ཡོད་ཀྱི་སྒྲིག་གཞི་ཆེ་ཁག་བཞིའི་སྐོར་ལ་གོ་བསྡུར་ལྷུག་པོ་དང་ཚོགས་འདུ་ཚགས་ཚད་བྱུང་སོང་། ཞེས་བརྗོད་འདུག
ཡང་ཁོང་གིས། ཟླ་འདིའི་ཕྱི་ཚེས་ ༨ ནས་ཉིན་གྲངས་གཉིས་རིང་རྒྱལ་སྤྱིའི་ལམ་ལུགས་དང་མཐུན་པའི་སྣེ་ཤན་བྱེད་ཕྱོགས་ཀྱི་ཟབ་སྦྱོང་ཞིག་གོ་སྒྲིག་བྱས་པ་ཡིན། ཟབ་སྦྱོང་འདི་དྷ་རམ་ས་ལར་བོད་མིའི་སྒྲིག་འཛུགས་ཀྱི་མཐོ་རིམ་གྱི་ལས་བྱེད་རྣམས་ལ་ཐེངས་གཉིས་གོ་སྒྲིག་ཞུས་ཡོད། སྣེ་ཤན་དང་འབྲེལ་བའི་ལས་དོན་རྣམས་གལ་ཆེན་པོ་ཡིན་པས། སྐུ་ཚབ་དོན་གཅོད་རྣམ་པས་སོ་སོའི་ཁྱབ་ཁོངས་རྒྱལ་ཁབ་ཀྱི་དབུ་ཁྲིད་དང་གྲོས་ཚོགས་འཐུས་མི་རྣམས་ལ་ཐུག་འཕྲད་བྱེད་པར་གལ་ཆེན་པོ་དགོངས་ནས་གོ་སྒྲིག་ཞུས་ཡོད། ཟབ་སྦྱོང་སྤྲོད་མཁན་རྣམས་ཀྱང་རྒྱལ་སྤྱིའི་ཐོག་ཚད་དང་ལྡན་པའི་ཚོགས་པ་ཞིག་རེད། སྐུ་ཚབ་དོན་གཅོད་རྣམས་ལ་བཀའ་འདྲི་ཞུ་དུས་ཟབ་སྦྱོང་གིས་ཕན་ཐོགས་འདུག་ཅེས་བརྗོད་ཀྱི་འདུག ཅེས་བརྗོད་བྱུང་།
དབུ་འབྱེད་མཛད་སྒོའི་ཐོག་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས། སྐུ་ཚབ་དོན་གཅོད་རྣམ་པ་ནི་གཞུང་ཚབ་ཁང་གི་ངོ་བོའི་ཐོག་ཕྱག་ལས་གནང་བཞིན་ཡོད་པས། ལས་དོན་དེ་ཡང་རྒྱལ་འབྲེལ་ཐབས་བྱུས་བརྒྱུད་དེ་ཞུ་གཏུག་གནང་རྒྱུ་དེ་གལ་ཆེན་པོ་ཡིན་ཞེས་དང་། ཆབ་སྲིད་ཀྱི་ལས་དོན་སྤེལ་སྐབས་དམིགས་ས་གཙོ་བོ་གསུམ་ཡོད་པ་དེ་དག་ནི། རྒྱལ་སྤྱིའི་སྤྱི་ཚོགས་དང་། རྒྱ་ནག་མི་མང་། དེ་བཞིན་བོད་མི་མང་ཚོགས་བཅས་ཡིན་སྟབས། རྒྱལ་སྤྱིའི་གཞུང་དང་གྲོས་ཚོགས་ནང་བོད་དོན་རྒྱབ་སྐྱོར་བ་གང་མང་བཟོས་ཏེ། རྒྱ་ནག་གཞུང་ལ་རྒྱལ་སྤྱིའི་གཞུང་གིས་གནོན་ཤུགས་སྤྲད་པ་བརྒྱུད་བོད་རྒྱའི་དཀའ་རྙོག་སེལ་ཆེད་གྲོས་མོལ་ཡོང་ཐབས་དང་། ད་བར་སྙོབ་མ་ཐུབ་པའི་ཁྱབ་ཁོངས་ས་ཁུལ་ཁག་གི་ནང་སྙོབ་ཐབས་དགོས་པ། རྒྱ་ནག་མི་མང་ཁྲོད་དུ་གྲོས་མོལ་ཡོང་ཆེད་དུ་གནད་དོན་གསལ་ཁ་བཟོ་རྒྱུ་དེ་གལ་ཆེན་པོ་ཡིན་སྐོར་གསུངས་འདུག
ཐེངས་འདིའི་ཚོགས་ཐོག་ཏུ་ལྡི་ལི་སྐུ་ཚབ་དོན་གཅོད་འཇིགས་མེད་འབྱུང་གནས་ལགས་དང་། བྱང་ཨ་རི་སྐུ་ཚབ་དོན་གཅོད་རྣམ་རྒྱལ་ཆོས་གྲུབ་ལགས། སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས། ཉི་ཧོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས། དབྱིན་ཡུལ་སྐུ་ཚབ་དོན་གཅོད་ཚེ་རིང་དབྱངས་སྐྱིད་ལགས། ཨོ་གླིང་སྐུ་ཚབ་དོན་གཅོད་ཀརྨ་སེངྒེ་ལགས། ཧྥ་རན་སི་འབྲེལ་མཐུད་པ་ཐུབ་བསྟན་ཚེ་རིང་ལགས། ཨུ་རུ་སུ་སྐུ་ཚབ་དོན་གཅོད་ཏེ་ལོ་རིན་པོ་ཆེ། ཨ་ཧྥི་རི་ཁའི་སྐུ་ཚབ་དོན་གཅོད་ཁང་གི་ཆོས་དགེ་འཇམ་དབྱངས་མགོན་པོ་ལགས། ཐའེ་ཝན་སྐུ་ཚབ་དོན་གཅོད་འབའ་པ་སྐལ་བཟང་རྒྱལ་མཚན་ལགས། ལྷོ་ཨ་རི་སྐུ་ཚབ་དོན་གཅོད་འཇིགས་མེད་ཚེ་རིང་ལགས། སྦེལ་ཇམ་སྐུ་ཚབ་དོན་གཅོད་རིག་འཛིན་ཆོས་སྒྲོན་ལགས། བལ་ཡུལ་སྐུ་ཚབ་དོན་གཅོད་རྩིབས་རི་ལོ་པཎ་སྤྲུལ་སྐུ་ངག་དབང་མཆོག་གྲུབ་ལགས། ཉི་ཧོང་སྐུ་ཚབ་དོན་ཁང་གི་དྲུང་ཆེ་བཀྲ་ཤིས་དབྱངས་འཛོམས་ལགས་བཅས་ཀྱིས་ལྷན་འཛོམས་བྱུང་ཡོད་འདུག
གསར་འགོད་པ། བྱམས་པ་ཚེ་རིང་།
