དེ་རིང་བོད་ལྗོངས་མདོ་སྨད་ཆོལ་ཁའི་གཞིས་བྱེས་མི་མང་ཡོངས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་དགུང་གྲངས་དགུ་བཅུར་ཕེབས་པར་གོ་སྟོན་སྲུང་གཙི་དང་སྦྲགས་༧གོང་ས་མཆོག་ལ་བརྟན་བཞུགས་བསྟར་འབུལ་ཞུས་སོང་།
དེ་རིང་ཕྱི་ཟླ་ ༦ ཚེས་ ༣༠ སྟེ། བོད་ཟླ་ ༥ ཚེས་ ༥ ཉིན་གྱི་སྔ་དྲོར་དྷ་ས་ཐེག་ཆེན་ཆོས་གླིང་གཙུག་ལག་ཁང་དུ། བོད་ལྗོངས་མདོ་སྨད་ཆོལ་ཁའི་གཞིས་བྱེས་མི་མང་ཡོངས་ཀྱིས། ༧གོང་ས་རྒྱལ་བ་རིན་པོ་ཆེ་མཆོག་དགུང་གྲངས་ ༩༠ ཕེབས་པའི་གོ་སྟོན་མཛད་སྒོ་དང་། བརྟན་བཞུགས་བསྟར་འབུལ། དུས་རབས་ཉེར་གཅིག་གི་བླ་ན་མེད་པའི་སྟོན་པ་ཆེན་པོར་མངའ་གསོལ་མཛད་སོང་། གོ་སྟོན་མཛད་སྒོའི་ཐོག་༧གོང་ས་མཆོག་དབུ་བཞུགས་ཀྱིས་བོད་ཀྱི་བསྟན་བདག་བླ་ཆེན་རྣམ་པ་དང༌། རྒྱ་བརྒྱུད་ནང་བསྟན་གྱི་སྐུ་ཚབ། རྒྱ་གར། ཤྲི་ལངྐ་། ཐའེ་ལན་ཌི། འབར་མ་བཅས་ཀྱི་གནས་བརྟན་སྡེ་པའི་སྐུ་ཚབ། ཧིན་རྡུ། ཡེ་ཤུ། ཁ་ཆེ། བཱ་ཧའེ། འཇིའུ། རྗེན། སིག་སོགས་ཆོས་ལུགས་རིས་མེད་ཀྱི་སྐུ་ཚབ་བླ་མ་རྣམ་པ་བཅས་གདན་ཞུས་ཐོག བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་། སེར་སྐྱ་མི་མང་སྟོང་ཕྲག་མང་པོ་ལྷན་འཛོམས་གནང་འདུག
སྐབས་དེར་༧གོང་ས་རྒྱལ་བ་རིན་པོ་ཆེ་མཆོག་ནས། དེ་རིང་ངོས་རང་ལོ་དགུ་བཅུ་ནང་བསླེབ་ཀྱི་ཡོད་པ་རེད། གཟུགས་པོ་ཆ་ཚང་བདེ་ཐག་ཆོད་ཡིན། ལོ་ཡུན་འདི་དག་རིང་བོད་ཀྱི་བསྟན་སྲིད་སྐྱེ་འགྲོའི་བདེ་སྐྱིད་དང་བཅས་པར་ནུས་པ་གང་ཡོད་བཏོན་ཏེ་ཕན་ཐོགས་གང་ལ་གང་འཚམ་བསྒྲུབས་ཡོད། འཛམ་གླིང་གི་ལུང་པ་གཞན་དག་ཏུའང་ཕན་ཚུན་འབྲེལ་བ་ཟབ་པོ་བྱས་པ་ཡིན། ལྷག་པར་དུ་ཚན་རིག་པ་དང་མཉམ་དུ་སྐད་ཆ་བཤད་པ་སོགས་ཀྱིས་ཡིད་ཚིམས་ཡོད། གོ་བསྡུར་དང་བགློ་གླེང་བྱས་པའི་ཐོག་ནས་ཧ་ཅང་ཕན་ཐོགས་ཡག་པོ་བྱུང་། ད་ལྟ་བར་དུ་ངོས་ནས་མི་གོ་ཆོད་པ་ཞིག་གི་མི་ཚེ་བསྐྱལ་བ་རེད། གང་ལྟར་ངོས་བོད་གཙོ་བོར་གྱུར་བའི་འཛམ་གླིང་གི་ཤར་ནུབ་ལྷོ་བྱང་ཡུལ་གྲུ་མང་པོར་བསླེབས་པ་རེད། དགའ་མོས་བྱེད་མཁན་ཧ་ཅང་མང་པོ་ཡོང་གི་འདུག འདི་འདྲར་བསམ་བློ་གཏོང་དུས་ངོས་ཀྱི་མི་ལུས་ཐོབ་ཡོད་བསྡད་པ་དེས་ལྷག་བསམ་བསྐྱེད་པ་བཞིན། འཛམ་གླིང་འདིའི་ཐོག་ཕན་ཐོགས་གང་འཚམ་བསྒྲུབ་པར་ངོས་ཀྱིས་རྗེས་སུ་ཡི་རངས་སྐྱེས་པ་ཡོང་གི་འདུག ད་དུང་ཡང་ངོས་ཀྱི་མི་ཚེ་ལྷག་མ་དེས་གཞན་ཕན་ག་ཚོད་ཐུབ་ཐུབ་ཀྱིས་རྒྱ་ཆེར་སྤེལ་ཐུབ་རྒྱུ་དང་། དེའི་ཐོག་ནས་༧རྒྱལ་བ་རིན་པོ་ཆེའི་ཏཱ་ལའི་བླ་མའི་སྒྲིག་འཛུགས་མུ་མཐུད་དུ་བསྡད་པའི་སྒྲོམ་གཞི་ཞིག་བསླེབ་ཡོང་གི་རེད། མདོ་དོན་ད་ལྟ་བར་དུ་ངོས་རང་མདོ་སྨད་ཙོང་ཁའི་ཡུལ་ནས་ལྷ་སར་ཡོང་། ལྷ་སར་སློབ་གཉེར་བྱས་ཏེ་གྲྭ་སྐོར་སྔ་རྗེས་བཞག་པ་རེད། ངོས་རང་གི་ངོས་ནས་ཆ་བཞག་ན་བསྟན་འགྲོའི་དོན་དག་གང་ལ་གང་འཚམ་བསྒྲུབས་ཡོད། ད་དུང་ཡང་ངོས་ཀྱི་མི་ཚེ་འདིས་ག་ཚོད་ཐུབ་ཐུབ་ཀྱིས་བསྟན་པ་དང་འགྲོ་བའི་དོན་དུ་སྨིན་པ་ཞིག་ཡོང་ཐུབ་རྒྱུའི་སེམས་ཐག་བཅད་ནས་བསྡད་ཡོད། དེ་ག་རང་ཡིན། བཀྲ་ཤིས་བདེ་ལེགས། ཐུགས་རྗེ་ཆེ། ཞེས་གསུངས་སོང་།
ད་དུང་མཛད་སྒོའི་སྟེང་བོད་མིའི་སྒྲིག་འཛུགས་ཀྱི་ཁྲིམས་ཞིབ་པ་ཆེ་བ་ཡེ་ཤེས་དབང་མོ་མཆོག་གིས་མཛད་རྣམ་ནོར་བུའི་འཕྲེང་བ་ཞེས་པ་དང་། བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་མཛད་བརྒྱ་མཐོང་བ་དོན་ལྡན་གྱི་བརྙན་དེབ། བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་མཛད་རྣམ་སྨྲ་བསམ་གྱི་ཡུལ་ལས་འདས་པ་དང་། ༧སྐུའི་གོ་སྟོན་གྱི་ཤེས་ཚིག་དང་རྩོམ་ཡིག་ཕྱོགས་སྒྲིག་རྒྱལ་བ་དགྱེས་པའི་མཆོད་སྤྲིན་ཕྱག་དེབ་སོགས་དབུ་འབྱེད་གནང་སོང་།
བོད་ལྗོངས་མདོ་སྨད་ཆོལ་ཁའི་གོ་སྟོན་ཚོགས་ཆུང་གི་ཚོགས་གཙོ་བཀའ་ཟུར་ཐུབ་བསྟན་ལུང་རིག་མཆོག་གིས་གསུང་བཤད་གནང་སྐབས། ༧གོང་ས་རྒྱལ་བ་རིན་པོ་ཆེ་མཆོག་དགུང་གྲངས་ ༩༠ ལ་ཕེབས་པའི་༧སྐུའི་གོ་སྟོན་ཆེན་མོ་སྲུང་གཙི་ཞུ་དགོས་དོན་གཙོ་བོ་ནི་ཕྱི་ལོ་ ༢༠༡༥ ཟླ་ ༦ ཚེས་ ༢༢ ཉིན་བོད་ལྗོངས་མདོ་སྨད་ཡུལ་གྱི་སྤྱི་སྲོལ་ལྟར། ༧སྐུའི་གྱ་སྟོན་དང་བརྟན་བཞུགས་རྒྱས་པ་བསྟར་འབུལ་ཞུ་སྐབས། ཐུགས་ཧ་ཅང་དགྱེས་ཚོར་ཆེན་པོས་ད་ལྟ་ལོ་བརྒྱད་ཅུ་ནས་ལོ་བཅུ་ཕྱིན་ན་ལོ་དགུ་བཅུ་རེད། ད་ལྟ་འདིར་ལོ་བརྒྱད་ཅུ་ལོན་པའི་གྱ་སྟོན་ཞེས་ཁྱེད་རང་ཚོས་ཞེད་པོ་ཤོད་ཀྱི་འདུག གཞུག་གུར་ལོ་དགུ་བཅུ་ལོན་པའི་སྐབས་སུ་གོ་སྟོན་ཟེར་བ་དེ་བྱེད་དགོས་པ་རེད་གདའ། ཁྱེད་རང་ཚོ་སྤོ་བོ་རྨོ་བོ་དེ་ཚོས་རིག་པ་བསྒྲིམས་ཏེ། འཆི་བདག་གཤིན་རྗེ་ཡོང་ནའང་ཨམ་གཙིགས་བསྡམས་ཏེ། ༧རྒྱལ་བ་རིན་པོ་ཆེའི་ལོ་དགུ་བཅུའི་གོ་སྟོན་བར་དུ་བསྡད་ཐུབ་པ་བྱེད་ཀྱི་ཡིན་ཞེས་ཨམ་གཙིགས་བསྡམས་ཏེ་སེམས་ཤུགས་སྐྱེད་ཤོག་ཨ། ཞེས་མ་ཡིས་བུ་ལ་བརྩེ་བས་བདམས་པ་བཞིན་ཐུགས་བརྩེ་བ་སྙིང་རྗེ་ཆེན་པོས་སྲིད་ན་རྙེད་པར་དཀའ་བའི་བསོད་ནམ་བསགས་པའི་སྐལ་བཟང་གི་གོ་སྐབས་སྨད་དུ་བྱུང་གསོལ་སྩལ་གནང་བ་ལྟར། ད་ལྟ་འདིར་སྐུའི་གོ་སྟོན་གྱི་དགའ་སྟོན་དང་འབྲེལ་བའི་མཛད་རིམ་སྟེ། རྟེན་གསུམ་རྟེན་འབྲེལ་གྱི་ཞུལ་འབུལ་བཞེས་དང་། མཛད་ཐང་དང་མཛད་རྣམ། གླུ་གར་གྱི་མཆོད་པ་སོགས་ཀྱི་མཛད་རིམ་ཁག་སྐྱོང་བཞིན་པ་འདི་ནི་ངོ་མཚར་སྨད་དུ་བྱུང་བའི་སྐལ་བཟང་མངོན་དུ་བྱུང་བ་བསུ་བ་ལགས། ཞེས་དང་། མདོ་སྨད་ཆོལ་ཁའི་སྐུའི་གོ་སྟོན་གྱི་བྱུང་རིམ་ནི་མདོ་སྨད་ཚོགས་ཆེན་ཐོག་གྲོས་བསྡུར་ལྷུག་པོ་བྱུང་བ་བརྒྱུད་གོ་སྟོན་གོ་སྒྲིག་ཚོགས་ཆུང་ཆེད་འཛུགས་ཀྱིས་༧གོང་ས་མཆོག་ལ་བརྟན་བཞུགས་བསྟར་འབུལ་དང་གོ་སྟོན་སྲུང་གཙིའི་སྙན་ཞུ་ཕུལ་བ་བཞིན་གོ་སྟོན་སྲུང་གཙི་ཞུ་བཞིན་ཡོད་སྐོར་སོགས་གསུངས་སོང་ལ། གོ་སྟོན་ཚོགས་ཆུང་གི་ཚོགས་གཞོན་སྤྱི་འཐུས་ཡེ་ཤེས་སྒྲོལ་མ་ལགས་ཀྱིས་གོ་སྟོན་དང་འབྲེལ་རྩིས་ཁྲ་སྙིང་བསྡུས་སྙན་སྒྲོན་ཞུ་སྐབས། བོད་ལྗོངས་མདོ་སྨད་ཆོལ་ཁའི་གོ་སྟོན་དང་འབྲེལ་བའི་ཆོ་ག་ཕྱག་ལས་སོགས་བྱ་རིམ་ཡོངས་ཀྱི་འགྲོ་གྲོན་གྱི་ལྷག་བསྡད་དངུལ་ཚང་མ་༧གོང་ས་ཏཱ་ལའི་བླ་མ་བོད་དང་རྒྱ་གར་གྱི་གནའ་བོའི་རིག་གཞུང་ལྟེ་གནས་ཁང་དུ་ཞལ་འདེབས་སུ་ཕུལ་རྒྱུ་ཡིན་སྐོར་གསུངས་སོང་ལ། མཇུག་ཏུ་གོ་སྟོན་ཚོགས་ཆུང་གི་དྲུང་ཆེ་སྤྱི་འཐུས་ཆོས་གྲགས་རྒྱ་མཚོ་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་སོང་།
༧སྐུའི་གོ་སྟོན་སྲུང་གཙི་དང་འབྲེལ་ནས་གསར་འགོད་གསལ་བསྒྲགས་ཤིག་སྤེལ་བའི་ནང་། ༧སྐུའི་གོ་སྟོན་དངོས་གཞིའི་མཛད་རིམ་གཙོ་བོ་གསུམ་ནི་༧གོང་ས་རྒྱལ་བ་རིན་པོ་ཆེ་མཆོག་དུས་རབས་ཉེར་གཅིག་པའི་བླ་ན་མེད་པའི་སྟོན་པ་ཆེན་པོར་མངའ་གསོལ་དང་། བསྟན་པ་དང་འགྲོ་བའི་དོན་དུ་སྐུ་ཚེ་བསྐལ་བརྒྱར་བརྟན་པའི་བརྟན་བཞུགས་ཀྱི་རྟེན་གསུམ་འདེགས་འབུལ། དགུང་གྲངས་དགུ་བཅུ་བཞེས་པར་དགའ་དད་སྤྲོ་གསུམ་གྱིས་༧སྐུའི་གོ་སྟོན་ཆེན་མོ་བཅས་ཡིན། ཞེས་དང་།
༧གོང་ས་རྒྱལ་བ་རིན་པོ་ཆེ་མཆོག་དགུང་གྲངས་ ༩༠ ལ་ཕེབས་པའི་༧སྐུའི་གོ་སྟོན་ཆེན་མོ་སྲུང་གཙི་ཞུ་དགོས་དོན་གཙོ་བོ་ནི་ཕྱི་ལོ་ ༢༠༡༥ ཟླ་ ༦ ཚེས་ ༢༢ ཉིན་བོད་ལྗོངས་མདོ་སྨད་ཡུལ་གྱི་སྤྱི་སྲོལ་ལྟར། ༧སྐུའི་གྱ་སྟོན་དང་བརྟན་བཞུགས་རྒྱས་པ་བསྟར་འབུལ་ཞུ་སྐབས། ཐུགས་ཧ་ཅང་དགྱེས་ཚོར་ཆེན་པོས་ད་ལྟ་ལོ་བརྒྱད་ཅུ་ནས་ལོ་བཅུ་ཕྱིན་ན་ལོ་དགུ་བཅུ་རེད། ད་ལྟ་འདིར་ལོ་བརྒྱད་ཅུ་ལོན་པའི་གྱ་སྟོན་ཞེས་ཁྱེད་རང་ཚོས་ཞེད་པོ་ཤོད་ཀྱི་འདུག གཞུག་གུར་ལོ་དགུ་བཅུ་ལོན་པའི་སྐབས་སུ་གོ་སྟོན་ཟེར་བ་དེ་བྱེད་དགོས་པ་རེད་གདའ། ཁྱེད་རང་ཚོ་སྤོ་བོ་རྨོ་བོ་དེ་ཚོས་རིག་པ་བསྒྲིམས་ཏེ། འཆི་བདག་གཤིན་རྗེ་ཡོང་ནའང་ཨམ་གཙིགས་བསྡམས་ཏེ། ༧རྒྱལ་བ་རིན་པོ་ཆེའི་ལོ་དགུ་བཅུའི་གོ་སྟོན་བར་དུ་བསྡད་ཐུབ་པ་བྱེད་ཀྱི་ཡིན་ཞེས་ཨམ་གཙིགས་བསྡམས་ཏེ་སེམས་ཤུགས་སྐྱེད་ཤོག་ཨ། ཞེས་གོ་སྐབས་བཟང་པོ་གསོལ་སྩལ་གནང་བ་ལྟར། ༢༠༢༣ ཟླ་ ༣ ཚེས་ ༡༡ ཉིན་དང༌། ཟླ་ ༦ ཚེས་ ༡༦ ཉིན་༧སྐུའི་གོ་སྟོན་ཁོ་ནའི་ཆེད་མདོ་སྨད་དམིགས་བསལ་ཚོགས་ཆེན་སྔ་རྗེས་ཐེངས་གཉིས་ཚོགས་ཡོད། ཅེས་སོགས་འཁོད་འདུག
ཡང་བསྒྲགས་གཏམ་ནང་། གོ་སྟོན་གྱི་ལས་རིམ་འཆར་འགོད་དང་ཚོགས་མི་ལས་གྲུབ་པའི་གོ་སྟོན་གོ་སྒྲིག་ཚོགས་ཆུང་ཆེད་འཛུགས་ཞུས་པ་མ་ཟད། རྒྱ་བལ་འབྲུག་གསུམ་དང་ཕྱི་རྒྱལ་ཡུལ་ཁག་ཏུ་༧སྐུའི་གོ་སྟོན་གོ་སྒྲིག་ཚོགས་ཆུང་གི་ས་གནས་འབྲེལ་མཐུད་པ་ ༥༥ བསྐོ་བཞག་གིས་ལས་དོན་དངོས་སུ་དབུ་འཛུགས་ཞུས་ནས། འདས་པའི་ལོ་གཉིས་ལྷག་རིང་དབུས་དང་ས་གནས་སོ་སོ་ནས་གྲ་སྒྲིག་གནང་ཞིང་། ༧སྐུའི་གོ་སྟོན་གྱི་སྔོན་འགྲོར་༧གོང་ས་མཆོག་གི་སྐུ་ཚེ་ཡུན་དུ་བརྟན་ཅིང་རླབས་ཆེན་མཛད་འཕྲིན་སྔར་ལྷག་རྒྱས་ཆེད། སྲུང་མ་དམར་ནག་གཉིས་དང་བོད་པའི་ཆོས་བརྒྱུད་ཁག་གི་དབུ་ཁྲིད་བླ་ཆེན་རྣམ་པར་ཐུགས་དམ་བཀའ་ལུང་ཞུས་ཏེ་སྐུ་ཚེའི་ཚེ་སྒྲུབ་དང་། ཆོས་བརྒྱུད་རིས་མེད་ཀྱི་དགོན་སྡེ་གྲྭ་ཚང་ཁག་གི་དགེ་འདུན་པ་རྣམ་པར་བསྙེན་བཀུར། དེ་བཞིན་བོད་ཕྱི་ནང་གཉིས་ཀྱི་མི་མང་ནས་ཞབས་རིམ་གསོག་སྒྲུབ་གནང་བ་སོགས་ཚོགས་བསགས་དང་རྣམ་དཀར་དགེ་སྒྲུབ་རྒྱ་ཆེ་གནང་ཡོད་སྐོར་སོགས་གསལ་འདུག
ཐེངས་འདིར་བོད་ལྗོངས་མདོ་སྨད་ཆོལ་ཁས་གོ་སྒྲིག་ཞུ་བཞིན་པའི་༧སྐུའི་གོ་སྟོན་ཆེན་མོར་ཉིན་གྲངས་གསུམ་རིང་ཡོད་ཅིང་། སང་ཉིན་ཕྱི་ཟླ་ ༧ ཚེས་ ༡ ཉིན་གྱི་སྔ་དྲོར་ཐེག་ཆེན་ཆོས་གླིང་གཙུག་ལག་ཁང་དུ་༧གོང་ས་མཆོག་གི་གསུང་རྩོམ་དང་མཛད་ཐང་འགྲེམ་སྟོན། ཕྱི་དྲོར་བོད་ཀྱི་ཟློས་གར་ཁང་དུ་༧སྐུའི་གོ་སྟོན་གྱི་རིག་རྩལ་དགོང་ཚོགས་ཆེན་མོ་སྟེ། དུས་ཡུན་ཟླ་ངོ་གསུམ་ལྷག་རིང་གྲ་སྒྲིག་དང་སྦྱོང་བརྡར་ཞུས་པའི་བོད་ཆོལ་ཁ་གསུམ་གྱི་གཞས་དང་ཞབས་བྲོ། རྒྱ་བལ་འབྲུག་གསུམ་དང་ཕྱི་རྒྱལ་བཅས་ནས་གདན་འདྲེན་ཞུས་པའི་གཞས་པ་གཞས་མ་གྲགས་ཆེན་རྣམ་པའི་འཁྲབ་སྟོན་གཟིགས་འབུལ་ཞུ་རྒྱུ་དང༌། ཕྱི་ཚེས་ ༢ ཉིན་ཀིརྟིའི་བྱེས་པ་གྲྭ་ཚང་དུ་མདོ་སྨད་དགྱེས་འཛོམས་ཆེན་མོ་ཚོགས་ཏེ་༧སྐུའི་གོ་སྟོན་བསུ་བའི་ལྷ་དར་དཀར་པོ་ཞེས་པ་དང་། བོད་ཀྱི་གསོ་བ་རིག་པའི་འབྱུང་ཁོངས་དང་འཕེལ་རིམ་ལ་དཔྱད་པ་གཟུར་གནས་ཚངས་ཐིག ༸གོང་ས་རྒྱལ་བ་རིན་པོ་ཆེ་སྐུ་ཕྲེང་རིམ་བྱོན་དང་སོག་པོའི་བར་གྱི་ཐུན་མོང་མ་ཡིན་པའི་འབྲེལ་ལམ་ཟབ་མོའི་སྐོར་ཆེ་ལོང་དུ་བརྗོད་པ་དངུལ་དཀར་མེ་ལོང་ཞེས་པ་བཅས་སྒེར་བའི་དཔེ་དེབ་ཁག་ཅིག་དབུ་འབྱེད་དང༌། ༧སྐུའི་གོ་སྟོན་དང་འབྲེལ་བའི་བྱུང་སོང་ལྷག་གསུམ་གྱི་རྩིས་ཁྲ་རྒྱས་པ་སྙན་སྒྲོན། དེ་བཞིན་གཞས་སྣ་འཁྲབ་སྟོན་སོགས་ཞུ་རྒྱུ་ཡིན་འདུག
གསར་འགོད་པ། བྱམས་པ་ཚེ་རིང་། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
༑ ་བོད་ལྗོངས་མདོ་སྨད་ཆོལ་ཁའི་གཞིས་བྱེས་མི་མང་ཡོངས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་དགུང་གྲངས་དགུ་བཅུར་ཕེབས་པར་གོ་སྟོན་སྲུང་གཙི་དང་སྦྲགས་༧གོང་ས་མཆོག་ལ་བརྟན་བཞུགས་བསྟར་འབུལ་ཞུས་པ་དག་སྤྱི་ཡོངས་ཆ་ནས་ཤིན་ཏུ་ནས་ཟབ་རྒྱས་ཤིག་བྱུང་སོང་པའི་ཐུགས་རྗེ་ཆེ་དང་བཀྲ་ཤིས་བདེ་ལེགས་གྲངས་མང་ཞུ་རྒྱུ་ཡིན།།
གྲལ་གྲོད་པ་ཤིག་ནས་༧ རྒྱལ་བའི་མཛད་པར་བསྟོད་པ་ཚིག་བརྒྱན་ཆ་་ནས་ཚད་དང་ལྡན་པ་ཡོད་གཤའ་ཀྱང་རང་གི་ཤེས་པ་དམའ་པའི་ཞུ་སྤོབ་མ་མཆིས་ཀྱང་དོན་ཆར་ང་རང་ལ་ཡིད་མགུ་དགའ་བ་བལྟས་པ་ཞིག་ཕུལ་སོང་བ་དེ་བཞིན་ཡིག་ལམ་ནས་མཇལ་བའི་རེ་བ་དང་ཐབས་ལམ་ཡོད་ན་སྟོན་ཐབས་ཡོང་བ་།སླར་ཐུགས་རྗེ་ཆེ་བ་དང་མཉམ་རྒྱལ་བ་དགྱེས་པའི་མཆོད་སྤྲིན་རང་རེའི་བདེ་དོན་བོད་རྒྱལ་ཁབ་དེ་བོད་མིས་སྐྱོང་ཐབས་སུ་འབད་བརྩོན་མི་ལྷོད་པ་དང་། དུས་ཚོད་ནམ་ཐོབ་ཏུ་ལོངས་སུ་སྤྱོད་དུ་གསོལ་ཅེས་དྲན་བཀུལ་དང་བཅས་ཏེ།།