བོད་མིའི་སྒྲིག་འཛུགས་ཀྱིས་གཞིས་བྱེས་བོད་མི་ཡོངས་ཀྱི་ཚབ་ཞུས་ཏེ་༧གོང་ས་མཆོག་ལ་བརྟན་བཞུགས་བསྟར་འབུལ་ཞུས།

༧གོང་ས་རྒྱལ་བ་རིན་པོ་ཆེ་མཆོག་ནས་ངོས་རང་ལ་འཕགས་པ་སྤྱན་རས་གཟིགས་ཀྱི་བྱིན་རླབས་ཡོད་པའི་གནས་ཚུལ་གསལ་བོ་ཡིན་པ་དང་། ད་དུང་ཡང་ཉུང་ཤོས་ལོ་སུམ་ཅུ་བཞི་བཅུའི་རིང་བཞུགས་རྒྱུ་ཡིན་སྐོར་བཀའ་སློབ་སྩལ་སོང་།

དེ་རིང་སྔ་དྲོར་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ། ༸གོང་ས་རྒྱལ་བ་རིན་པོ་ཆེ་མཆོག་ལ་དབུས་བོད་མིའི་སྒྲིག་འཛུགས་ཀྱིས་གཞིས་བྱེས་བོད་མི་ཡོངས་ཀྱི་ཚབ་ཞུས་ཏེ་བརྟན་བཞུགས་བསྟར་འབུལ་ཞུས་སོང་། སྐབས་དེར་༧གོང་ས་རྒྱལ་བ་རིན་པོ་ཆེ་མཆོག་ནས། དེ་རིང་བོད་ཀྱི་ལྷ་སྡེ་མི་སྡེ་ཡོངས་ཀྱི་ཚབ་བྱས་ཏེ་ངོས་རང་ལ་ཚེ་ཡི་རྟེན་འབྲེལ་བསྒྲིགས་ནས་ཁྱེད་ཚོ་ཚང་མས་ཁ་ཞེ་གཉིས་མེད་ཀྱི་སྨོན་ལམ་བརྒྱབ་པ་དེ་འདྲ་རེད། ངོས་རང་གི་ངོས་ནས་ཆ་བཞག་ནའང་འཕགས་པ་སྤྱན་རས་གཟིགས་དང་འབྲེལ་བ་ཡོད་པ་གསལ་བོ་རེད། ཆུང་དུས་སྐབས་ནས་འཕགས་པ་སྤྱན་རས་གཟིགས་དང་འབྲེལ་བ་ཡོད་པ་གསལ་བོ་རེད། ངོས་ཀྱི་མི་ཚེ་ག་ཚད་རིང་བ་དེ་ཚད་ཀྱིས་བོད་ཀྱི་བསྟན་སྲིད་ལ་ཕན་ཐོགས་ཡོང་བསྡད་པ་མངོན་སུམ་ཚད་གྲུབ་རེད། ངོས་ཀྱི་མི་ཚེ་གང་ལ་གང་འཚམ་ཕྱིན་པ་རེད། ད་དུང་ལོ་བརྒྱ་དང་སུམ་ཅུ་སོ་གྲངས་སྡོད་རྒྱུ་རེ་བ་རྒྱག་གི་ཡོད། སྔོན་མ་རྒྱ་ནག་ཏུ་མའོ་ཙེ་ཏུང་ལ་ཐུག་པ་རེད། མའོ་ཙེ་ཏུང་གིས་ཆོས་ཞེས་པ་དུག་རེད་ཟེར། ངོས་ཀྱིས་ལན་གང་ཡང་བརྒྱབ་མེད། སྡང་མིག་གིས་བལྟས་ཏེ་ཟེར་གྱི་འདུག ངོས་རང་གིས་སྙིང་རྗེ་སྐྱེ་བ་མ་གཏོགས་ཁོང་ཁྲོ་སྐྱེས་མ་སོང་། དེའི་རྗེས་སུ་རྒྱ་གར་སྲིད་བློན་ནེ་རུའི་ལ་ཐུག་པ་རེད། ཁོང་གིས་ཧ་ཅང་དགའ་མོས་ཆེན་པོ་བྱེད་ཀྱི་འདུག དེ་དང་དེ་ཡི་མཚོན་པའི་ངོས་ཀྱི་མི་ཚེ་ནང་དུ་ཆོས་ལ་དོ་སྣང་ཡོད་མཁན་དང་། དམིགས་བསལ་དོ་སྣང་མེད་མཁན། ཆོས་ལ་སྐྱོན་དུ་ལྟ་མཁན་དེ་འདྲའི་མི་སྣ་མང་པོ་ཞིག་ལ་ཐུག་ཡོད་པ་རེད། གང་ལྟར་མིའི་ཁམས་དང་མོས་པ་སྣ་ཚོགས་ཡིན་བསྡད་པ་དེ། དེ་བཞིན་གཤེགས་པའི་བཀའ་དང་མདོ་སྡེ་ནས་གསུངས་ཡོད་པ་རེད། དེ་འདྲ་ཡིན་དུས་ཁམས་དང་མོས་པ་ཐ་དད་པའི་ཐོག་ནས་བསམ་བློ་མ་འདྲ་བ་ཡོང་བསྡད་པ་དེ་ཆོས་ཉིད་རེད། ཁམས་དང་མོས་པ་སྣ་ཚོགས་ལ་ཁམས་དང་མོས་པར་མཐུན་པའི་སྡུག་བསྔལ་སེལ་བ་དང་བདེ་བ་བསྒྲུབ་རྒྱུ་ཐབས་ལམ་ཞིག་ཡོད་ན་ཀུན་ལ་དགོས་པ་དེ་རེད། ཆོས་མེད་མཁན་གྱི་མི་རིགས་ཡིན་ཡང་སྡུག་བསྔལ་སེལ་བ་དང་བདེ་བ་བསྒྲུབ་པར་དོ་སྣང་བྱེད་བཞིན་ཡོད་པ་རེད། ཅེས་གསུངས་སོང་།

༧མགོན་པོ་གང་ཉིད་མཆོག་ནས། དེང་སང་ཚན་རིག་པར་ཆ་བཞག་ན་ཆོས་ཀྱི་སྐད་ཆ་གང་ཡང་མེད་ཀྱང་། གང་ལྟར་སྡུག་བསྔལ་སེལ་བ་དང་བདེ་བ་བསྒྲུབ་རྒྱུར་འབད་བརྩོན་སྣ་ཚོགས་བརྒྱུད་ནས་འགྲོ་བསྡད་ཡོད། གཞན་བདེ་ཁྱད་དུ་སེལ་བའི་ཐོག་ནས་རང་གི་བདེ་སྡུག་བསྒྲུབ་པ་དང་སེལ་བཞིན་ཡོད། འཛམ་གླིང་འདིའི་ཐོག་གི་མི་ཚང་མས་སྡུག་བསྔལ་མི་འདོད་པ་དང་བདེ་བ་འདོད་པ་ཤ་སྟག་རེད། ང་ཚོ་བོད་མི་ལ་ཆ་བཞག་ནའང་སྡུག་བསྔལ་མི་འདོད་པ་དང་བདེ་བ་འདོད་པ་ཤ་སྟག་རེད། ང་ཚོ་བོད་དུ་བསྡད་པའི་རིང་ཇོ་བོ་ཡིད་བཞིན་ནོར་བུ་དང་ལྷ་ས་ལོ་ཀེ་ཤྭ་ར་ཡ་སོགས་ལ་གསོལ་བ་བཏབ་སྟེ་སྨོན་ལམ་བརྒྱབ་ཡོད་ཀྱང་། ང་ཚོའི་ཐུན་མོང་གི་ལས་འབྲས་ཀྱི་ཐོག་ནས་ངོས་རང་བོད་ལུང་པ་དང་ཁ་བྲལ་བའི་གནས་སྟངས་ཤིག་ཆགས་པ་རེད། ཡིན་ནའང་ལུས་པོ་ཁ་བྲལ་བ་ཙམ་མ་གཏོགས་བསམ་བློའི་ནང་འཕགས་པ་ལོ་ཀེ་ཤྭ་ར་ཡའི་སྟེང་དུ་བསྡད་ཡོད། ང་ཚོ་ཚང་མས་འཕགས་པ་ལོ་ཀེ་ཤྭ་ར་ཡའི་རྗེས་སུ་འབྲངས་བཞིན་ཡོད། ཚང་མས་མཁྱེན་གསལ་རེད། ངོས་རང་ལ་ཆ་བཞག་ན་འཕགས་པ་ལོ་ཀེ་ཤྭ་ར་ཡའི་རྗེས་སུ་བཟུང་བའི་མཚན་མ་བརྟན་པོ་འདུག   གཙོ་བོ་ངོས་ཀྱིས་བྱང་ཆུབ་ཀྱི་སེམས་སྒོམ་གྱི་ཡོད་པ་རེད། ཞོགས་པར་གཉིད་སད་པ་དང་། རང་གཞན་དོན་ནི་རང་བསྒྲུབ་ཕྱིར།། བྱང་ཆུབ་སེམས་ནི་བསྐྱེད་པར་བགྱི།། ཞེས་བྱང་ཆུབ་ཀྱི་སེམས་ལ་བསམ་བློ་གཏོང་བཞིན་ཡོད། སེམས་དེའི་ཟིན་པའི་ངོས་རང་དང་དངོས་ཤུགས་བརྒྱུད་གསུམ་འབྲེལ་བ་ཡོད་པ་སྲོག་ཆགས་དུད་འགྲོ་ཚུན་ཆད་ལ་ངོས་ཀྱིས་ཕན་ཐོགས་བྱེད་ཐུབ་པར་ཤོག་ཅེས་སྨོན་ལམ་རྒྱག་བཞིན་ཡོད། གང་ལྟར་ལོ་འདིའི་རིང་འཕགས་པ་སྤྱན་རས་གཟིགས་ངོས་ཀྱི་སྤྱི་བོར་ཡོད་པ་རེད། འཕགས་པ་སྤྱན་རས་གཟིགས་ཀྱི་བྱིན་རླབས་མཐོང་ཆོས་སུ་ཡོང་གི་རེད་བསམ་པའི་ཡིད་ཆེས་ཡོད། ཅེས་གསུངས་སོང་།

ཡང་༧མགོན་པོ་གང་ཉིད་མཆོག་ནས། དེ་རིང་འདིར་ངོས་རང་ལ་བརྟན་བཞུགས་གནང་བ་རེད། ཁྱེད་ཚོ་ཚང་མས་དངོས་གནས་དྲང་གནས་ལྷག་བསམ་རྩེ་གཅིག་ཐོག་ནས་བརྟན་བཞུགས་གནང་བ་ཧ་ཅང་ཡག་པོ་རེད། སྔོན་མ་གུང་ཁྲན་ཏང་གིས་བོད་ས་བཟུང་བའི་སྐབས་སུའང་སེམས་ཤུགས་གཅིག་སྒྲིལ་གྱི་ཐོག་ནས་ལས་དོན་བསྒྲུབ་པའི་ནུས་པ་འདུག ང་ཚོས་ཀྱང་དེ་དེ་བཞིན་སངས་རྒྱས་ཀྱི་ཆོས་ལ་དད་པ་དང་། ཡང་སྒོས་འཕགས་པ་སྤྱན་རས་གཟིགས་ལ་ཡིད་ཆེས་དང་གསོལ་འདེབས་བྱས་ཡོང་དུས། དེ་ལ་ཕན་པའི་ནུས་པ་ཞིག་གཏན་གཏན་ཐོན་ཡོང་གི་རེད། ངོས་རང་གིས་ཀྱང་སྨོན་ལམ་བརྒྱབ་དང་བརྒྱག ངོས་རང་ལ་ཆ་བཞག་ན་མདོ་སྨད་ནས་ལྷ་སར་བསླེབས་པ་རེད། ལུང་བསྟན་ཁག་ཏུ་བལྟས་ཡོང་དུས། ངོས་རང་ལ་འཕགས་པ་སྤྱན་རས་གཟིགས་ཀྱི་བྱིན་རླབས་ཡོད་བསྡད་པའི་གནས་ཚུལ་གསལ་བོ་འདུག ད་ལྟ་བར་དུ་ཧུར་ཐག་བྱས་པ་ཡིན། ད་དུང་ཡང་ངོས་རང་ཉུང་ཤོས་ལོ་སུམ་ཅུ་བཞི་བཅུ་བསྡད་ཐུབ། ད་ལྟ་བར་དུ་སྨོན་ལམ་བརྒྱབ་པ་བཞིན་དུ་དོན་དག་གང་འཚམ་འགྲུབ་པ་རེད། ང་ཚོའི་ལུང་པ་དང་ཁ་བྲལ་བ་རེད་ཀྱང་། རྒྱ་གར་ལུང་པའི་ནང་བསྡད་དེ་བསྟན་པ་དང་འགྲོ་བའི་ཆེད་གང་འཚམ་ཕན་ཐོགས་བྱེད་ཐུབ་ཀྱི་འདུག ད་དུང་རྒྱ་གར་ལྷོ་ནུབ་ས་ཆ་དྷ་རམ་ས་ལར་བསྡད་དེ་བསྟན་པ་དང་འགྲོ་བའི་ཆེད་ཞབས་འདེགས་གང་ཐུབ་བསྒྲུབ་པའི་བསམ་བློ་གཏོང་བཞིན་ཡོད། འཕགས་སྤྱན་རས་གཟིགས་རྟག་ཏུ་སྤྱི་བོར་སྒོམ་སྟེ་སྤྱན་རས་གཟིགས་མཁྱེན་བསམ་པ་བཞིན་འགྲོ་ཡི་ཡོད། ཁྱེད་ཚོས་ཀྱང་དེ་དེ་བཞིན་འཕགས་པ་སྤྱན་རས་གཟིགས་མཁྱེན་བསམ་པ་བཞིན་སྤྱན་རས་གཟིགས་ལ་གསོལ་འདེབས་ཡག་པོ་བྱོས། ཆོས་ཀྱི་སྙིང་པོ་བྱང་ཆུབ་ཀྱི་སེམས་རེད། ང་ཚོ་ཚང་མས་རང་གཞན་དོན་ནི་རབ་བསྒྲུབ་ཕྱིར།། བྱང་ཆུབ་སེམས་ནི་བསྐྱེད་པར་བགྱི།། ཞེས་པ་དེ་བསམ་བློ་ཡག་པོ་ཐོངས། ཞེས་གསུངས་སོང་།

གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། སྐལ་བཟང་སྦྱིན་པ།