འདི་ལོའི་༧སྐུའི་གོ་སྟོན་སྐབས་རྒྱ་ནག་གཞུང་གིས་བོད་ནང་གི་ཡུལ་སྐོར་བ་ཚོས་བོད་སྐོར་སྐད་ཆ་ག་རེ་དྲིས་ནའང་མི་ཤེས་ཞེས་པའི་ཚིག་ལན་གཅིག་རང་འདེབས་དགོས་པའི་བཀའ་རྒྱ་བཏང་འདུག
འདི་ལོའི་༧སྐུའི་གོ་སྟོན་སྐབས་རྒྱ་ནག་གཞུང་གིས་བོད་ཀྱི་རྒྱལ་ས་ལྷ་ས་གཙོ་བོར་གྱུར་བའི་བོད་ཁུལ་གྱི་ས་གནས་མང་པོར་དམ་དྲག་བྱས་ཡོད་པ་མ་ཟད། དམིགས་བསལ་གྱིས་མི་མང་འདུ་འཛོམས་བྱེད་པར་བཀག་སྡོམ་ནན་མོ་བྱས་ཡོད་འདུག་ལ། ད་ལྟའང་བོད་ཀྱི་རྒྱལ་ས་ལྷ་སར་དྲག་ཆས་གྱོན་པའི་ཉེན་རྟོག་པ་སྔར་ལས་མང་བ་འགྲེམ་སྤེལ་བྱས་ཏེ་དམ་དྲག་བྱེད་མུས་ཡིན་འདུག
འབྲེལ་ཡོད་བོད་མི་ཞིག་གིས་འདི་ག་བོད་ཀྱི་དུས་བབ་གསར་ཁང་གི་གསར་འགོད་པར། ཉེ་ལམ་༧སྐུའི་གོ་སྟོན་སྐབས་སུ་བོད་ཀྱི་རྒྱལ་ས་ལྷ་སའི་ཁུལ་དུ་དྲག་ཆས་གྱོན་པའི་ཉེན་རྟོག་པ་སྔར་ལས་མང་བ་འགྲེམས་འཇོག་བྱས་ཏེ། ཕྱོགས་ཡོངས་ནས་བོད་མིའི་འགྲོ་འདུག་སྤྱོད་གསུམ་ལ་ལྟ་རྟོག་བྱས་ཡོད་པ་མ་ཟད། ཡུལ་སྐོར་བ་རྣམས་ལ་འབྲེལ་འདྲིས་བྱེད་ཀྱི་ཡོད་མེད་ལྟ་རྟོག་ཤུགས་ཆེན་བྱས་ཡོད་སྐོར་དང་། ཉིན་ཤས་གོང་དུ་ད་དུང་དྲག་ཆས་ཉེན་རྟོག་པས་མུ་མཐུད་དུ་ལྟ་སྲུང་བྱེད་མུས་ཡིན་པའི་ཁར། གོ་སྟོན་སྐབས་བོད་ཀྱི་མདོ་སྟོད་སྨད་གཉིས་ནས་ཡོང་བའི་བོད་མི་གནས་མཇལ་བ་རྣམས་མགྲོན་ཁང་དུ་བསྡད་ནའང་གནས་ཚུལ་ཚང་མ་ཡར་ཞུ་དགོས་པ་དང་། ལྷ་ས་ནས་གངས་རིན་པོ་ཆེར་གནས་སྐོར་དུ་འགྲོ་བ་ཡིན་ནའང་ཆོག་མཆན་ཞུ་དགོས་སྐོར་དང་། གོ་སྟོན་སྐབས་ལྷ་སའི་ཡུལ་སྐོར་བ་མང་བའི་ཇ་ཁང་དང་ཆང་ཁང་སོགས་ནས་ཡུལ་སྐོར་བས་བོད་ཀྱི་སྐོར་སྐད་ཆ་དྲིས་ན། མི་ཤེས་ཞེས་ཚིག་ལན་གཅིག་རང་འདེབས་དགོས་པའི་བཀའ་རྒྱ་བཏང་ཡོད་སྐོར་བརྗོད་བྱུང་།
ཡང་གནས་ཚུལ་མཁོ་སྤྲོད་པ་གཞན་ཞིག་གིས་འདི་གའི་གསར་འགོད་པར། རྒྱ་ནག་གཞུང་གིས་ལོ་ལྟར་ཕྱི་ཟླ་གསུམ་པའི་ནང་འགྲིམ་འགྲུལ་གྱི་བདེ་འཇགས་ཞིབ་བཤེར་ཟེར་བ་ཞིག་གི་མིང་ཐོག་ནས། བོད་མིའི་འགྲོ་སྐྱོད་ཐད་དམ་དྲག་སྔར་ལྷག་བྱེད་ཀྱི་ཡོད་པ་མ་ཟད། གང་བྱུང་ཁ་པར་སོགས་ལ་ཞིབ་བཤེར་བྱེད་ཀྱི་ཡོད་སྐོར་དང་། འདི་ལོའི་ཕྱི་ཟླ་ ༦ པའི་མཇུག་དང་བདུན་པའི་མགོ་སྟེ། སྐུའི་གོ་སྟོན་སྐབས་གོང་རིམ་ལ་བཀའ་ཁྲོལ་ག་ཚོད་ཞུས་ནའང་། ས་གནས་ཁག་ཅིག་ལ་རྟ་རྒྱུག་དང་ལག་རྩེད་སྤོ་ལོའི་འགྲན་ཚོགས་སོགས་བསྡུ་བཅུག་མེད་པ་མ་ཟད། ས་གནས་ཁག་ཅིག་ཏུ་བསྡུས་པའི་ལག་རྩེད་སྤོ་ལོ་དང་རྟ་རྒྱུག་འགྲན་ཚོགས་སོགས་ལ་དམ་དྲག་ཤུགས་ཆེན་བྱས་ཡོད་སྐོར་བརྗོད་བྱུང་།
གཞན་ཡང་། ཉེ་ལམ་བོད་ནང་གི་རྫོང་རིམ་པ་གསར་འཛུགས་བྱས་པའི་ཉིན་མོ་ཟེར་བ་ཞིག་ཆེད་དུ་སྲུང་གཙི་བྱེད་དུ་བཅུག་ནས་དམར་ཤོག་གི་དྲིལ་བསྒྲགས་ཤུགས་ཆེན་བྱེད་ཀྱི་ཡོད་པའི་ཁར། ཆེད་དུ་རྒྱ་ནག་གཞུང་དང་དམག་ཤོག་རིང་ལུགས་ལ་བསྟོད་གླུ་ལེན་དུ་འཇུག་གི་ཡོད་འདུག དཔེར་ན། འདི་ལོའི་ཕྱི་ཟླ་བདུན་པའི་ཆབ་ཆ་རྫོང་ཁོངས་སུ་འཚོགས་པའི་ཁྲི་གཤོག་རྒྱལ་མོའི་རླབས་ཕྲེང་ཟེར་བའི་གླུ་གཞས་དགོང་ཚོགས་ཀྱི་སྡིངས་ཆའི་དཀྱིལ་དུ། རླབས་ཆེན་གྱི་ཀྲུང་གོ་གུང་ཁྲན་ཏང་ཁྲི་ལོར་བརྟན་པར་ཤོག (伟大的中国共产党万岁) ཅེས་ཡི་གེ་ཆེན་པོ་བྲིས་ནས་རིག་གནས་གསར་བརྗེ་སྐབས་ཀྱི་འབོད་ཚིག་རྙིང་པ་དེ་བསྐྱར་ལོག་རྒྱག་ཏུ་བཅུག་ཡོད་པ་དང་། དེ་བཞིན་ད་ལྟ་འབའ་རྫོང་དུ་འཚོག་བཞིན་པའི་ཐུན་ཏེ་རྫོང་རུ་རིག་གནས་ཡུལ་སྐོར་མི་རིགས་སྲོལ་རྒྱུན་ལུས་རྩལ་སྐབས་བཅུ་དགུ་པ་དང་རྫོང་རུ་རྟགས་མའི་བོད་འབྲེལ་ས་ཁུལ་གྱི་སྐོར་བྲོ་འགྲན་སྡུར་སྐབས་དང་པོའི་མགོ་འཛུགས་མཛད་སྒོའི་དགོང་ཚོགས་སྟེང་། ལྟད་མོ་བའི་མདུན་དུ་ཞབས་བྲོ་བ་རྣམས་ཀྱིས་རྒྱ་ནག་གི་རྒྱལ་དར་ཁྱེར་ནས་དགའ་བ་དང་དུང་བའི་རྣམ་འགྱུར་ཤུགས་ཆེན་སྟོན་དུ་བཅུག་ཡོད་པ་མ་ཟད། གར་སྟེགས་ཀྱི་གཡས་གཡོན་སོགས་སུ་རྒྱལ་དར་དམར་པོ་ཧ་ཅང་མང་པོ་སྒྲེང་འཛུགས་བྱེད་དུ་བཅུག་སྟེ། ཀྲུང་གོའི་དེང་རབས་ཀྱི་ཁྱད་ཆོས་ལྡན་པའི་སྤྱི་ཚོགས་རིང་ལུགས་གསར་པ་ཟེར་བ་དང་། རླབས་ཆེན་གྱི་མགོ་འཁྲིད་ཞི་ཅིན་ཕིན་གྱི་དགོངས་པ་ཟེར་བའི་དམར་ཤོག་གི་དྲིལ་བསྒྲགས་རྣམས་ཞིང་འབྲོག་མང་ཚོགས་ལ་ཤུགས་ཆེན་བསྒྲགས།
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།
