རྒྱ་གར་གྱི་གྲོས་ཚོགས་འཐུས་མི་ཏ་ཕིར་གྷའོ་མཆོག་གིས་༧གོང་ས་རྒྱལ་བ་རིན་པོ་ཆེ་མཆོག་ནས་འཚེ་མེད་ཞི་བདེ་དང་། བྱམས་བརྩེ། འཛམ་གླིང་ཞི་བདེ་བསྐྲུན་ཐབས་ཀྱི་རླབས་ཆེན་གྱི་མཛད་པ་བསྐྱངས་དང་སྐྱོང་བཞིན་པར་ཆེ་བསྟོད་དུ་རྒྱ་གར་གྱི་སྤྱི་དམངས་གཟེངས་རྟགས་མཐོ་ཤོས་བྷ་ར་ཏི་རཱ་ཏ་ན་དབུལ་ཐུབ་ན་རྒྱ་ནག་གཞུང་ལ་བརྡ་ལན་ཤུགས་ཆེན་པོ་ཞིག་སྤྲོད་ཐུབ་རྒྱུ་ཡིན་སྐོར་གསུངས།
ཁ་སང་ཕྱི་ཚེས་ ༣༠ ཉིན་གྱི་ཉིན་རྒྱབ་ཀྱི་གྲོས་ཚོགས་ནང་དུ། ཨ་རུ་ན་ཅལ་མངའ་སྡེའི་གྲོས་ཚོགས་འཐུས་མི་སྐུ་ཞབས་ཏ་ཕིར་གྷའོ་མཆོག་གིས། ད་ལྟ་༧གོང་ས་ཏཱ་ལའི་བླ་མ་སྐུ་འཕྲེང་བཅུ་བཞི་པ་ཆེན་པོ་མཆོག་དགུང་གྲངས་ ༩༠ ཕེབས་ཡོད་ཅིང་། ནཱ་ལེནྜ་ནས་བརྒྱུད་པའི་བོད་བརྒྱུ
དེ་བཞིན་འདས་ལོའི་ཕྱི་ཟླ་ ༡༢ ཚེས་ ༡༦ ཉིན་རྒྱ་གར་གྱི་གྲོས་ཚོགས་འོག་མའི་ནང་སྐུ་ཞབས་ཏ་ཕིར་གྷའོ་མཆོག་གིས། རྒྱ་གར་གཞུང་གིས་དགའ་ལྡན་ཕོ་བྲང་གི་ཡིག་ཚང་ལ་གཞུང་འབྲེལ་ངོས་འཛིན་ཞུ་དགོས་པ་དང་། འཛམ་གླིང་ཁྱོན་ཡོངས་སུ་༧མགོན་པོ་གང་ཉིད་མཆོག་ནས་འཚེ་མེད་ཞི་བའི་ལམ་དང་བྱམས་བརྩེའི་བཀའ་སློབ་སྩལ་གྱི་ཡོད་སྟབས། རྒྱ་གར་གྱི་སྤྱི་དམངས་གཟེངས་རྟགས་མཐོ་ཤོས་བྷ་ར་ཏི་རཱ་ཏ་ནཱ་དབུལ་དགོས་སྐོར་དང་། རྒྱ་ནག་གཞུང་གིས་ཕྱི་ལོ་ ༡༩༥༩ ལོ་ནས་བཟུང་༧གོང་ས་སྐུ་འཕྲེང་བཅོ་ལྔ་པ་བསྐོ་གཞག་བྱ་རྒྱུའི་ཐག་གཅོད་བྱས་ཡོད། གལ་ཏེ་༧གོང་ས་མཆོག་སྐུ་འཚོ་བཞུགས་མ་གནང་བ་ཡིན་ན། བཙན་བྱོལ་དུ་བོད་བརྒྱུད་ནང་བསྟན་གྱི་ལམ་ལུགས་ལྟར་༧གོང་ས་མཆོག་གི་ཡང་སྲིད་ངོས་འཛིན་གནང་གི་རེད། དེ་བཞིན། ད་ལྟ་རྒྱ་ནག་གཞུང་གིས་༧སྐུའི་ཡང་སྲིད་བསྐོ་གཞག་བྱ་རྒྱུར་གྲ་སྒྲིག་བྱེད་མུས་ཡིན་སྟབས། རྒྱ་གར་གཞུང་ནས་༧སྐུའི་ཡང་སྲིད་ཐད་ཐག་གཅོད་ཅིག་གང་མགྱོགས་བླང་དགོས། ཞེས་གསུངས་འདུག
ཕྱི་ལོ་ ༢༠༢༢ ཟླ་ ༨ པའི་ནང་རྒྱ་གར་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་མི་ ༢༠ ཡིས་མགྲིན་གཅིག་གི་ཐོག་ནས་༧གོང་ས་རྒྱལ་བ་རིན་པོ་ཆེ་མཆོག་ལ་བྷ་ར་ཏི་རཱ་ཏ་ན་ (Bharat Ratna) དབུལ་དགོས་པའི་དགོས་འདུན་ཆེད་བཏོན་གནང་ཡོད་པ་མ་ཟད། རྒྱ་གར་གྱི་བྷི་རྗེ་པི་ (BJP) ཆབ་སྲིད་ཚོགས་པའི་སྣེ་ཁྲིད་པ་རྒན་གྲས་དང་རྒྱ་གར་གྱི་ཕྱི་སྲིད་དྲུང་ཆེ་ཟུར་པ་གཙོས། ཧི་མ་ལ་ཡའི་རིགས་རྒྱུད་ཀྱི་གཞུང་དང་གཞུང་འབྲེལ་མ་ཡིན་པའི་ཚོགས་ཁག་དང་། གནད་ཡོད་མི་སྣ་བཅས་ཀྱིས་གསར་འགོད་གསལ་བསྒྲགས་དང་ཁག་ཅིག་གི་གྲོས་ཆོད་གཏན་འབེབས་བྱས་ཏེ་འབོད་སྐུལ་ཞུས་འདུག
བྷ་ར་ཏི་རཱ་ཏ་ན་ཞེས་པའི་གཟེངས་རྟགས་དེ། ཕྱི་ལོ་ ༡༩༩༠ ལོར་ལྷོ་ཨ་ཧྥི་རི་ཀའི་སྲིད་འཛིན་ཟུར་པ་དང་ནོ་སྦེལ་ཞི་བདེའི་གཟེངས་རྟགས་བཞེས་མཁན་མཱན་ཌེལ་ལཱ་ (Nelson Mandela) དང་། ཕྱི་ལོ་ ༡༩༨༧ ལོའི་རྒྱ་གར་རང་བཙན་འཐབ་རྩོད་པ་ཁཱན་ཨབ་དུལ་གྷ་ཕར་ཁཱན (Khan Abdul Ghaffar Khan)། དེ་བཞིན་ཕྱི་ལོ་ ༡༩༨༠ ལོའི་ཡི་ཤུ་ཨ་མ་ཊི་རེ་སཱ་མཆོག་དང་། སྲིད་བློན་དམ་པ་ནེ་རུ་མཆོག་བཅས་མི་སྣ་གྲགས་ཅན་ ༥༣ ཙམ་ལ་ཕུལ་འདུག་ལ། དེ་ནི་རྒྱ་གར་སྤྱི་མཐུན་རྒྱལ་ཁབ་ཀྱི་གཟེངས་རྟགས་མཐོ་ཤོས་ཤིག་དང་། དམིགས་བསལ་ཞབས་ཞུ་བ་དང་ཆེས་མཐོའི་བྱ་གཞག་སྒྲུབ་མཁན། ཕོ་མོ་དང་མི་རིགས་དབྱེ་འབྱེད་མེད་པར་བྱ་བཞག་སྒྲུབ་མཁན། རིག་གཞུང་དང་ཚན་རིག་ཐོག་ལ་བྱས་རྗེས་ཅན། མི་མང་ཞབས་འདེགས་ཞུ་མཁན་དག་ལ་འབུལ་སྲོལ་འདུག
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།
