རྒྱ་ནག་དབུས་ཆབ་སྲིད་རྒྱུན་ལས་ཁང་གི་རྒྱལ་སྤྱིའི་ཚན་ཁག་གི་བློན་ཆེན་ལུའུ་ཅན་ཁྲོ་ཟེར་བར་རྒྱུ་མཚན་གང་ཡང་འགྲེལ་བརྗོད་མེད་པའི་ཐོག་ནས་འཛིན་བཟུང་གིས་འདྲི་རྩད་གཏོང་གི་ཡོད་འདུག
རོའུ་ཊར་གསར་ཁང་གིས་གནས་ཚུལ་སྤེལ་བ་ལྟར་ན། རྒྱ་ནག་དམར་ཤོག་ཚོགས་པའི་དབུས་ཆབ་སྲིད་རྒྱུན་ལས་ཁང་གི་རྒྱལ་སྤྱིའི་སྡེ་ཚན་གྱི་བློན་ཆེན་ལུའུ་ཅན་ཁྲོ་ཟེར་བ་གློ་བུར་དུ་འཛིན་བཟུང་བྱས་ཏེ་འདྲི་རྩད་གཏོང་གི་ཡོད་ཅིང་། ད་ལྟའི་ཆར་རྒྱ་ནག་གཞུང་གིས་ཁོ་འཛིན་བཟུང་བྱེད་དོན་གྱི་རྒྱུ་མཚན་གང་ཡང་འགྲེལ་བརྗོད་བྱས་མེད་པ་རེད།
ལུའུ་ཅན་ཁྲོ་ལ་འདྲི་རྩད་གཏོང་བཞིན་ཡོད་པའི་གནས་ཚུལ་དེ་ཐོག་མར་ཨ་རིའི་གསར་ཁང་ (The wall street journal) གིས་སྤེལ་བ་དང་། གསར་ཁང་དེར་འབྲེལ་ཡོད་མི་སྣས་གནས་ཚུལ་མཁོ་སྤྲོད་བྱས་སྐོར་བརྗོད་འདུག་ལ། གནས་ཚུལ་ལྟར་ན། ཟླ་སྔོན་མའི་ཟླ་མཇུག་ཙམ་ལ་ལུའུ་ཅན་ཁྲོ་ཕྱི་ཕྱོགས་སུ་གཞུང་འབྲེལ་སྐོར་བསྐྱོད་བྱས་ཏེ་ཕྱིར་རྒྱ་ནག་ཏུ་ལོག་མ་ཐག་འཛིན་བཟུང་བྱས་ཡོད་པ་དང་། རྒྱལ་སྤྱིའི་གསར་ཁང་རོའུ་ཊར་སོགས་ཀྱིས་རྒྱ་ནག་གཞུང་ལ་གནས་ཚུལ་དེའི་སྐོར་རྒྱུས་ལོན་བྱེད་ཐབས་བྱས་ཡོད་ཀྱང་། རྒྱ་ནག་གཞུང་གིས་བརྡ་ལན་གང་ཡང་སྤྲད་མེད་པ་རེད།
རོའུ་ཊར་གསར་ཁང་གི་གནས་ཚུལ་ལྟར་ན། ལུའུ་ཅན་ཁྲོ་འཛིན་བཟུང་བཙན་ཁྲིད་བྱས་པའི་གནད་དོན་དེ་ནི་ཕྱི་སྲིད་བློན་ཆེན་ཟུར་བ་ཆིན་གཱང་གི་རྗེས་ཀྱི་རྒྱ་ནག་གི་ཕྱི་སྲིད་དང་འབྲེལ་བའི་ཆེས་མཐོ་བའི་དཔོན་རིགས་ཤིག་ལ་འདྲི་རྩད་གཅོད་བཞིན་པའི་གནས་སྟངས་ཤིག་ཆགས་ཡོད་པ་དང་། ཕྱི་ལོ་ ༢༠༢༣ ལོར་ཞི་ཅིན་ཕིན་གྱི་བློ་མཐུན་ཕྱི་སྲིད་བློན་ཆེན་ཆིན་གཱང་ལ་ཕྱི་ཕྱོགས་སུ་མཛའ་འབྲེལ་ཡོད་པའི་གནས་ཚུལ་ཁྱབ་རྗེས། འཛིན་བཟུང་འོག་འདྲི་རྩད་བྱས་ཏེ་ཕྱི་སྲིད་བློན་ཆེན་གྱི་གོ་གནས་ནས་ཕྱིར་ཕུད་བཏང་ཡོད།
ལུའུ་ཅན་ཁྲོ་ཡིས་ཕྱི་ལོ་ ༢༠༢༢ ལོ་ནས་རྒྱ་ནག་དམར་ཤོག་ཚོགས་པའི་དབུས་ཆབ་སྲིད་རྒྱུན་ལས་ཁང་དུ་ཕྱི་སྲིད་དང་འབྲེལ་བའི་རྒྱལ་སྤྱི་ཞེས་པའི་ཚན་ཁག་གལ་ཆེན་ཞིག་གི་འགན་འཁུར་ཡོད་པ་དང་། དེ་ནས་བཟུང་ཁོ་འཛམ་གླིང་རྒྱལ་ཁབ་ ༢༠ ལྷག་གི་ནང་བསྐྱོད་ཅིང་རྒྱལ་ཁབ་ ༡༦༠ ལྷག་གི་གནད་ཡོད་མི་སྣར་ཐུག་འཕྲད་བྱས་མྱོང་ཡོད་འདུག འདས་ལོའི་ཕྱི་ཟླ་ ༡༢ ནང་ལུའུ་ཅན་ཁྲོ་ཨ་རིར་གཞུང་འབྲེལ་སྐོར་བསྐྱོད་དུ་ཕྱིན་སྐབས། ཁོས་ཨ་རིའི་ཕྱི་སྲིད་བློན་ཆེན་ཟུར་བ་ཨན་ཊོ་ནེ་བྷི་ལི་ཁིན་སོགས་ཨ་རིའི་གནད་ཡོད་མི་སྣ་མང་པོར་ཐུག་འཕྲད་ཀྱིས་རྒྱ་ནག་དང་འབྲེལ་བའི་གནད་དོན་མང་པོ་ཞིག་སྦས་གསང་མེད་པར་བཤད་ཡོད་པར་བརྟེན། སྐབས་དེར་རྒྱལ་སྤྱིའི་གསར་འགྱུར་མང་པོའི་ནང་ལུའུ་ཅན་ཁྲོ་མ་འོངས་པའི་རྒྱ་ནག་གི་ཕྱི་སྲིད་བློན་ཆེན་ཆགས་སྲིད་སྐོར་གྱི་གནས་ཚུལ་ཐོན་ཡོད།
ལུའུ་ཅན་ཁྲོ་ཕྱི་ལོ་ ༡༩༦༤ ཟླ་ ༢ ཚེས་ ༢༣ ཉིན་རྒྱ་ནག་ཅི་ལིན་ཞིང་ཆེན་གྱི་ཏེ་ཧྥོ་རྫོང་ཁུལ་དུ་སྐྱེས། ཕྱི་ལོ་ ༡༩༨༦ ནས་ ༡༩༨༧ བར་ཁོས་འཛམ་གླིང་ནང་གྲགས་ཆེ་བའི་དབྱིན་ཡུལ་གྱི་ཨོག་སི་ཧྥོ་ཌི་སློབ་ཆེན་དུ་རྒྱལ་སྤྱིའི་འབྲེལ་ལམ་ཐོག་སློབ་སྦྱོང་བྱས་ཤིང་། དེ་ནས་བཟུང་རྒྱ་ནག་ཕྱི་སྲིད་ལྷན་ཁང་དུ་ལས་ཀ་བྱེད་མགོ་བརྩམས་འདུག་ལ། ཕྱི་ལོ་ ༡༩༩༥ ནས་ ༡༩༩༨ བར་དབྱིན་ཡུལ་དུ་རྒྱ་ནག་གཞུང་ཚབ་ཁང་གི་དྲུང་ཆེའི་ལས་འགན་འཁུར། ཕྱི་ལོ་ ༢༠༠༦ ནས་ ༢༠༠༩ བར་རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་བྱས། ཕྱི་ལོ་ ༢༠༡༥ ལོར་རྒྱ་ནག་དབུས་སྒྲིག་ཁྲིམས་ཞིབ་བཤེར་ལས་ཁུངས་ཀྱི་རྒྱལ་སྤྱིའི་སྡེ་ཚན་གྱི་འགན་འཛིན་དུ་བསྐོས། ཕྱི་ལོ་ ༢༠༢༢ ཟླ་ ༦ ནང་ལུའུ་ཅན་ཁྲོ་རྒྱ་ནག་དབུས་ཆབ་སྲིད་རྒྱུན་ལས་ཁང་གི་རྒྱལ་སྤྱིའི་ཚན་ཁག་ཟེར་བའི་བློན་ཆེན་དུ་བསྐོས་ཡོད་འདུག
གསར་འགོད་པ། སྐལ་བཟང་སྦྱིན་པ།
