ཀིརྟིའི་དགོན་ཁག་གི་ཤེས་ཡོན་འགན་འཛིན་ལྷན་ཚོགས་སྒོ་བརྒྱབ་པ་དང་དཔེ་འཁྲིད་དགེ་རྒན་ཞིག་བཙན་འཁྲིད་བྱས།  

རྒྱ་ནག་གཞུང་གིས་བོད་ནང་གི་༸སྐྱབས་རྗེ་ཀིརྟི་རིན་པོ་ཆེའི་དགོན་པ་ཁག་གི་འདུ་ཁང་དང་གཞུང་གི་ལྷ་ཁང་ཁག དེ་བཞིན་མི་མང་འདུ་འཛོམས་བྱ་སར་༸སྐྱབས་རྗེ་ཀིརྟི་རིན་པོ་ཆེའི་སྐུ་པར་བཤམ་མི་ཆོག་པའི་ཐག་གཅོད་བྱས་ཏེ་དངོས་སུ་ལག་བསྟར་བྱེད་བཞིན་འདུག

འདི་ག་བོད་ཀྱི་དུས་བབ་གསར་ཁང་ལ་ས་གནས་ཀྱི་རྒྱུས་ཡོད་ཅིག་གིས་ཁུངས་ལྡན་གནས་ཚུལ་མཁོ་སྤྲོད་གནང་བ་ལྟར་ན། རྔ་བ་བོད་རིགས་རང་སྐྱོང་ཁུལ་ཟེར་བའི་ཁོངས་ཀྱི་ཀིརྟིའི་དགོན་པ་ཁག་གི་ནང་ཕྱི་ལོ་ ༢༠༢༥ ཟླ་ ༧ ཚེས་ ༡༣ ཉིན་ནས་བཟུང་ཐག་གཅོད་དེ་དངོས་སུ་ལག་བསྟར་བྱ་དགོས་པའི་བཙན་བཀའ་བཏང་སྟེ། ཉིན་དེར་མཛོད་དགེ་རྫོང་ཁོངས་ཀྱི་སྟག་ཚང་ལྷ་མོ་ཀིརྟི་དགོན་དང་། རྔ་བ་རྫོང་ཁོངས་ཀྱི་རྔ་བ་ཀིརྟི་དགོན། འབར་ཁམས་རྫོང་ཁོངས་ཀྱི་རྒྱལ་རོང་ཚོ་བདུན་ཀིརྟི་དགོན་བཅས་ཀིརྟིའི་དགོན་པ་ཆེ་ཁག་རྣམས་སུ་དུས་གཅིག་ཏུ་༸སྐྱབས་རྗེ་ཀིརྟི་རིན་པོ་ཆེའི་སྐུ་པར་རྣམས་ཕྱིར་བསྡུ་བྱེད་དུ་བཅུག་ཡོད་འདུག་ལ། ཉི་མ་དེ་ནས་བཟུང་སྐུ་པར་བཤམ་མི་ཆོག་པའི་ས་གནས་ཁག་ཏུ་༸སྐྱབས་རྗེ་ཀིརྟི་རིན་པོ་ཆེའི་སྐུ་པར་བཤམས་པའི་གནས་ཚུལ་བྱུང་ན་ཆབ་སྲིད་ཀྱི་ནག་ཉེས་ལ་བརྩི་རྒྱུ་ཡིན་པའི་འཇིགས་སྐུལ་ཡང་བྱས་ཡོད་འདུག སྐུ་པར་བཀག་སྡོམ་གྱི་ལས་འགུལ་དེ་ནི་རྒྱ་ནག་དབུས་གཞུང་དང་། དེ་བཞིན་སི་ཁྲོན་ཞིང་ཆེན་སྲིད་གཞུང་། རྔ་བ་རང་སྐྱོང་ཁུལ་སྲིད་གཞུང་། ས་གནས་རྫོང་སྲིད་གཞུང་བཅས་མཉམ་འབྲེལ་སྒོས་སྤེལ་བའི་ལས་འགུལ་ཞིག་ཡིན་འདུག

ཧོར་གཙང་ཀིརྟིའི་དགོན་ནི་ཀིརྟིའི་གདན་ས་ཆེ་ཁག་བཞིའི་ཡ་གྱལ་གཅིག་ཡིན་ནའང་། རྒྱ་གཞུང་གིས་བཅད་བགོས་བྱས་པའི་ས་ཁོངས་ལྟར་ན། ཀན་སུའུ་ཞིང་ཆེན་བསང་ཆུ་རྫོང་ཁོངས་ཡིན་ཞིང་། དེར་ཟླ་ཤས་གོང་ནས་༸སྐྱབས་རྗེ་ཀིརྟི་རིན་པོ་ཆེའི་སྐུ་པར་སྒྲིག་གཤོམ་བྱེད་པ་བཀག་ཟིན་ཡོད་པར་མ་ཟད། མི་ཚང་སྒེར་གྱི་ཁྱིམ་ཚང་གི་ནང་དང་གྲྭ་ཤག་སོགས་ལ་ཡང་དམ་དྲག་བྱེད་བཞིན་ཡོད་འདུག

དེ་བཞིན་འདི་ལོའི་ཕྱི་ཟླ་༧ ཙམ་ནས་ཀིརྟིའི་དགོན་ཁག་སྤྱིའི་ཤེས་ཡོན་སློབ་གཉེར་ཐོག་ལྟ་རྟོག་གནང་མཁན་“ཀིརྟིའི་དགོན་ཁག་གི་སྤྱི་ཁྱབ་ནང་བསྟན་ཤེས་ཡོན་འགན་འཛིན་ལྷན་ཚོགས་”ཞེས་པ། མཚན་ཉིད་སློབ་གཉེར་ཡོད་པའི་གོང་གསལ་དགོན་པ་ཆེ་ཁག་བཞིའི་མི་སྣ་ཐུན་མོང་གིས་གྲུབ་པའི་ཤེས་ཡོན་ལྷན་ཚོགས་ཤིག་ཡོད་པ་དེ་༸སྐྱབས་རྗེ་ཀིརྟི་རིན་པོ་ཆེ་ལ་འབྲེལ་བ་ཡོད་པར་བསྙད་ནས་སྒོ་བརྒྱབ་ཡོད་འདུག་ལ། ལྷན་ཚོགས་དེ་ད་ནས་བཟུང་རྩ་བ་ནས་ཚུགས་མི་ཆོག་པའི་བཙན་བཀའ་ནན་མོ་བཏང་ཡོད་འདུག

གཞན་ཡང་། ཕྱི་ལོ་༢༠༢༤ ཟླ་༡༢ ནང་ཧོར་གཙང་ཀིརྟིའི་དགོན་གྱི་ཁྲི་ཚབ་དང་དཔེ་ཁྲིད་དགེ་རྒན་དགེ་བཤེས་ལྷ་རམས་པ་དཀོན་མཆོག་ཆོས་གྲགས་ལགས་བསང་ཆུ་རྫོང་ཉེན་རྟོག་པས་མཚན་འགེབས་ཀྱིས་བཙན་ཁྲིད་བྱས་ཡོད་པ་མ་ཟད།  ཁོང་གི་བཞུགས་ཤག་ལ་སྔོག་བཤེར་བྱས་ནས་ཤེས་ཡོན་འགན་འཛིན་ལྷན་ཚོགས་དང་འབྲེལ་བའི་ཡིག་ཆ་སོགས་བཅའ་དངོས་མང་པོ་ཞིག་ཁྱེར་ཡོད་འདུག་ལ། ད་ལྟ་ཁོང་གང་དུ་བཀག་ཉར་བྱས་ཡོད་མེད་དང་། གནས་སྟངས་ག་འདྲ་ཡིན་མེད་སོགས་ཅི་ཡང་ཤེས་རྟོགས་མ་ཐུབ་པར་ལྷག་འདུག

ཁོང་ནི་མཛོད་དགེ་རྫོང་འབྲིང་བའི་རྡོ་མཆོག་ནས་ཡིན་ཞིང་། ཕ་མིང་ལ་ཨ་བློས་དང་། མ་མིང་ལ་མ་ཅིག་སྐྱིད་ཡིན། ཕ་མ་གཉིས་ཀ་སྔ་མོ་ནས་འདས་གྲོངས་སུ་གྱུར་ཡོད་འདུག ཁོང་ཆུང་ཆུང་སྐབས་ནས་སྟག་ཚང་ལྷ་མོ་ཀིརྟི་དགོན་དུ་ཆོས་ཞུགས་བྱས་ནས་ཕྱི་ལོ་༢༠༡༩ ལོར་དགེ་བཤེས་ལྷ་རམས་པའི་དམ་བཅའ་བཞག་ཡོད་ཅིང་། ཕྱི་ལོ་༢༠༢༡ ལོར་ཧོར་གཙང་ཀིརྟིའི་དགོན་གྱི་ཁྲི་ཚབ་ཏུ་ཕེབས་པ་ཞིག་ཡིན་འདུག་ལ། ཧོར་གཙང་ཀིརྟིའི་དགོན་གྱི་ཁྲི་པ་རིམ་བྱོན་སྟག་ཚང་ལྷ་མོ་ཀིརྟི་དགོན་ནས་མངགས་གཏོང་གནང་སྲོལ་ཡོད་པ་རེད་འདུག