བཙན་བྱོལ་བོད་མིའི་རི་མོའི་སྒྱུ་རྩལ་གྱི་རེ་འདོད་སྐོང་ཆེད་རི་མོའི་བརྩམས་ཆོས་ ༩༠ འགྲེམས་སྟོན་བྱེད་ཀྱི་འདུག

ཁ་དོག་སྒྱུ་རྩལ་མཐུན་ཚོགས་ཀྱིས་བོད་ཀྱི་བྱིས་པའི་བསམ་བློ་གཙང་མས་བྲིས་པའི་༧གོང་ས་མཆོག་མཚོན་བྱེད་ཀྱི་བརྩམས་ཆོས་རི་མོ་གྲངས་ ༩༠ འགྲེམས་སྟོན་བྱེད་བཞིན་འདུག

ཟླ་འདིའི་ཕྱི་ཚེས་ ༡༧ ནས་ ༢༤ བདུན་ཕྲག་གཅིག་རིང་བཞུགས་སྒར་དྷ་སའི་ཇུ་ནི་པར(Juniper Cafe ) ཚིག་ཇ་ཁང་དང་། The Other Space Gallery དེ་བཞིན་ Cafe Dakini House ཚིག་ཇ་ཁང་བཅས་སུ་ཁ་དོག་མཐུན་ཚོགས་ཀྱི་གོ་སྒྲིག་འོག ཨོ་གླིང་དང་། རྒྱ་གར། ཨ་རི། བལ་ཡུལ་བཅས་ཀྱི་རང་ལོ་བཅོ་བརྒྱད་མན་གྱི་བོད་ཕྲུག་ཚོས་བྲིས་པའི་རི་མོ་ ༩༠ ཡིས་བརྩེ་བའི་སྐུ་མདུན་ (Dear Kundun) ཞེས་པའི་རི་མོ་འགྲེམས་སྟོན་ཞིག་བྱེད་བཞིན་འདུག།

འདི་གའི་གསར་འགོད་པས་ཐེངས་འདིའི་འགྲེམས་སྟོན་གྱི་རི་མོ་འདེམས་ཐོན་སྐོར་ཁ་དོག་མཐུན་ཚོགས་ཀྱི་ཚོགས་མི་བསྟན་འཛིན་སྨིན་ལེགས་ལགས་ལ་དྲིས་པར་ཁོང་གིས། བརྩེ་བའི་སྐུ་མདུན་གྱི་རི་མོ་འགྲེམས་སྟོན་ནང་སློབ་ཕྲུག་ ༩༠ ཡི་རི་མོ་འདེམས་ཐོན་བྱུང་ཡོད། དེ་ནི་༧གོང་ས་རྒྱལ་བ་རིན་པོ་ཆེ་མཆོག་གི་དགུང་གྲངས་ཀྱི་མཚོན་རྟགས་ཡིན། དང་ཐོག་ཁ་དོག་མཐུན་ཚོགས་ཀྱིས་འཛམ་གླིང་ཡོངས་སུ་རི་མོའི་འགྲེམས་སྟོན་ཐོག་མཉམ་ཞུགས་བྱེད་པའི་གསལ་བསྒྲགས་བྱས་པ་ཡིན། མཐའ་མར་མཉམ་ཞུགས་བྱེད་མཁན་གྱི་རི་མོ་གྲངས་ཁྱོན་ ༧༠༠ ལྷག་འབྱོར་སོང་། དེའི་ཁྲོད་ནས་རང་ལོ་བཅོ་བརྒྱད་མན་གྱི་བོད་ཕྲུག་རྣམས་ཀྱི་རི་མོ་འདེམས་ཐོན་བྱུང་ཡོད་པ་རེད། རི་མོ་འདེམས་མཁན་གྱི་གཟུ་དཔང་རྣམས་ཀྱང་ཆེད་ལས་འདྲ་མིན་ཐོག་ནས་ཡོང་ཡོད། ཆེད་ལས་རྒྱབ་ལྗོངས་མི་འདྲ་བ་ཡིན་ཚེ་རི་མོ་ལ་ལྟ་སྟངས་མི་འདྲ་བ་ཞིག་ཡོང་གི་ཡོད། ཐེངས་འདིའི་རི་མོ་འདེམས་མཁན་གྱི་གཟུ་དཔང་ཁྲོད་སྒྱུ་རྩལ་པ་དང་། ༧གོང་ས་མཆོག་གི་ཧིན་དྷི་སྐད་བསྒྱུར་བ་ཀེ་ལ་ཤི་བྷོ་ཏ། དེ་བཞིན་སློབ་ཕྲུག་གི་སྐུ་ཚབ་བཅས་མཉམ་ཞུགས་གནང་ཡོད། ཅེས་བརྗོད་བྱུང་།

བྱིས་པའི་རི་མོའི་བརྩམས་ཆོས་ཀྱི་ཐོག་ནས་༧སྐུ་མདུན་ལ་ངོས་འཛིན་ཞུ་ཕྱོགས་ཐད་ཁོང་གིས། ༧གོང་ས་རྒྱལ་བ་རིན་པོ་ཆེ་མཆོག་གི་༧སྐུའི་གོ་སྟོན་དང་བསྟུན། ང་ཚོའི་མཐུན་ཚོགས་ནི་རྟོག་འཆར་སྒྱུ་རྩལ་ཐོག་འབྲེལ་བ་ཆགས་ཡོད་དུས། བྱིས་པ་རྣམས་ཀྱི་སེམས་ཀྱི་ཚོར་བ་དེ་ཁ་ནས་བཤད་མ་ཐུབ་ཀྱང་། བཟོ་ལྟ་དང་། ཚོན་མདོག སྒྱུ་རྩལ་བརྒྱུད་ནས་བཤད་རྒྱུ་ཡོད་པ་ཞིག་རེད། སློབ་ཕྲུག་རྣམས་ཀྱི་སེམས་ལ་ཡོད་པའི་ཚོར་བ་གཙང་མ་རེད། ༧གོང་ས་མཆོག་ག་འདྲ་མཐོང་ཡོད་པའི་ཚོར་བ་ཧ་ཅང་གཙང་མ་ཡོད་པས། མི་མང་གིས་བྱིས་པ་རྣམས་ཀྱིས་བྲིས་པའི་རི་མོ་མཐོང་བ་ཙམ་གྱིས་བྱིས་པའི་ཚོར་བ་མྱོང་ཐུབ་པ་ཞིག་ཡོང་གི་འདུག ཅེས་བརྗོད་བྱུང་།

བཙན་བྱོལ་བོད་མིའི་སྤྱི་ཚོགས་ཁྲོད་ཀྱི་རི་མོའི་སྡིངས་ཆ་དང་ཁ་དོག་མཐུན་ཚོགས་ཀྱིས་རི་མོའི་ལམ་ནས་སྒྱུ་རྩལ་གསལ་བཏོན་བྱེད་བཞིན་པའི་སྐོར་ལ་ཁོང་གིས། སྤྱིར་བཙན་བྱོལ་གྱི་བོད་མིའི་སྤྱི་ཚོགས་ནང་རི་མོའི་སྒྱུ་རྩལ་ནི་སེམས་སྐྱོ་དགོས་པའི་གནས་སྟངས་ཤིག་རེད། ང་ལ་མཚོན་པ་ཡིན་ནའང་བཙན་བྱོལ་དུ་འཚར་ལོངས་བྱུང་སྟེ་བོད་ཁྱིམ་སློབ་གྲྭར་ཕྱིན་པ་རེད། རི་མོའི་སློབ་སྦྱོང་བྱེད་སའི་ལམ་ཁ་མེད་པ་རེད། བོད་ཀྱི་སྤྱི་ཚོགས་ལ་མཚོན་ན་རི་མོའི་སྒྱུ་རྩལ་གྱི་སྡིངས་ཆ་མི་འདུག  སྔོན་མ་ང་ཚོས་རི་མོ་སློབ་སྦྱོང་བྱེད་པའི་གོ་སྐབས་རག་མེད་པ་དང་། རྗེས་སུ་སོ་སོའི་རེ་བ་བཞིན་དཀའ་ལས་འཕར་མ་བརྒྱབ་སྟེ་སློབ་སྦྱོང་བྱས་པ་ཞིག་རེད། དེང་སང་བོད་པའི་སློབ་གྲྭ་ཁག་ཏུ་རི་མོའི་སྒྱུ་རྩལ་ལ་ཤུགས་རྒྱག་མཁན་གཞོན་སྐྱེས་མང་པོ་ཡོད་པས། ང་ཚོས་བོད་པའི་སློབ་ཕྲུག་རྣམས་ཀྱི་རེ་བའི་ཐོག་ལ་ཟུར་ནས་ཤུགས་རྒྱག་བཞིན་པའི་གནས་སྟངས་ཤིག་ཡིན། དེ་ནི་སེམས་པ་སྐྱོ་བའི་གནས་སྟངས་ཤིག་རེད། བོད་ནང་དུ་མཚོན་པ་ཡིན་ན་སྔོན་མ་རི་མོའི་སྒྱུ་རྩལ་མཐུན་ཚོགས་མང་པོ་བྱུང་འདུག བཙན་བྱོལ་ནང་ཕྱི་རྒྱལ་ཁག་ཏུ་རི་མོའི་སྒྱུ་རྩལ་ཐོག་མཐུན་ཚོགས་ཁག་ཅིག་བྱུང་ཡོད་ཀྱང་། དཔལ་འབྱོར་སོགས་ཀྱི་ཐོག་ནས་རྒྱབ་སྐྱོར་ཁག་པོ་ཡིན་དུས་མེད་པ་ཆགས་རེད། ཁ་དོག་མཐུན་ཚོགས་ལ་མཚོན་པ་ཡིན་ན། མགོ་བཙུགས་ཏེ་ད་ལྟའི་ཆར་ལོ་གསུམ་པ་དེ་འགྲོ་བཞིན་ཡོད། བོད་ཀྱི་ཐེབས་རྩ་སོགས་ཀྱི་རྒྱབ་སྐྱོར་ཐོབ་སྟེ་མུ་མཐུད་དུ་ལས་ཀ་བྱེད་བཞིན་ཡོད། ཅེས་བརྗོད་བྱུང་།

འདི་ལོའི་ཕྱི་ཟླ་ ༧ ཚེས་ ༥ ནས་ ༡༥ བར་རྒྱ་གར་གྱི་རྒྱལ་ས་ལྡི་ལི་རུ་རྟེན་གཞི་བྱས་པའི་རྒྱ་གར་རྒྱལ་སྤྱིའི་བསྟི་གནས་ཁང་གི་ཀཱ་མ་ལ་དྷེ་ཝི་ (Kamaladevi Complex) ཞེས་པའི་འགྲེམས་སྟོན་ཁང་ཞིག་ཏུ། ༧གོང་ས་༧སྐྱབས་མགོན་ཏཱ་ལའི་བླ་མ་མཆོག་གི་ཀུན་ཕན་བདེ་རྩ་ (Foundation for Universal Responsibility of His Holiness the Dalai Lama) དང་ཁ་དོག་མཐུན་ཚོགས་གཉིས་ཀྱི་གོ་སྒྲིག་འོག ༧གོང་ས་རྒྱལ་བ་རིན་པོ་ཆེ་མཆོག་དགུང་ལོ་ ༩༠ ལ་ཕེབས་པའི་སྐུའི་གོ་སྟོན་སྲུང་གཙི་ཞུས་པ་དང་བསྟུན། ༧མགོན་པོ་གང་ཉིད་མཆོག་གི་བཀའ་དྲིན་རྗེས་དྲན་དང་ཕྱག་རྟགས་མཚོན་སླད། བརྩེ་བའི་སྐུ་མདུན་ཞེས་པའི་བརྗོད་གཞིའི་ཐོག་བོད་ཕྲུག་རང་ལོ་ ༡༨ མན་གྱི་རི་མོའི་བརྩམས་ཆོས་གྲངས་ ༩༠ དེ་འགྲེམས་སྟོན་གནང་ཡོད་འདུག

འདས་ལོའི་ཕྱི་ཟླ་ ༡༡ ཚེས་ ༡ ནས་ ༡༦ བར་དྷ་ས་མེག་གྷན་དུ་ཁ་དོག་མཐུན་ཚོགས་ཀྱི་གོ་སྒྲིག་འོག ངེས་མེད་ཅེས་པའི་བརྗོད་གཞིའི་ཐོག་ནས་རྒྱ་གར་དང་བལ་ཡུལ། ཕྱི་རྒྱལ་ཁག་ཏུ་ཡོད་པའི་བོད་པའི་རི་མོའི་སྒྱུ་རྩལ་བ་ ༢༠ ཡི་རི་མོའི་འགྲེམས་སྟོན་བྱས་ཏེ། རི་མོའི་ལམ་ནས་བཙན་བྱོལ་བོད་མི་རྣམས་ཀྱི་ངེས་མེད་ཀྱི་འཚོ་བ་གསལ་སྟོན་བྱེད་ཐབས་བྱས་ཡོད་པ་རེད། དེ་བཞིན་འདས་ལོའི་ཕྱི་ཟླ་ ༩ ཚེས་ ༡༣ ནས་ ༡༩ བར་ཉིན་གྲངས་བདུན་རིང་དྷ་ཤོད་ཀང་ར་སྒྱུ་རྩལ་འགྲེམས་སྟོན་ཁང་དུ། ཧི་མ་ཅལ་མངའ་སྡེའི་ཁོངས་ཀྱི་བོད་སློབ་ཁག་ལྔའི་སློབ་ཕྲུག་གིས་བྲིས་པའི་བོད་ནང་གི་གནས་སྟངས་མཚོན་པའི་བྱིས་པའི་རི་མོ་གྲངས་ ༥༠ འགྲེམས་སྟོན་བྱས་ཡོད་འདུག

གསར་འགོད་པ། དཔལ་ལྡན། བྱམས་པ་ཚེ་རིང་། རྩོམ་སྒྲིག་བྱེད་མཁན། པདྨ་མཚོ།