རྒྱ་ནག་ཏུ་དམག་ཆེན་གཉིས་པ་མཇུག་བསྒྲིལ་ནས་མི་ལོ་ ༨༠ འཁོར་བའི་མཛད་སྒོའི་སྟེང་རྒྱ་ནག་གིས་དམག་སྟོབས་ངོམས་ནས་ཨ་རི་དང་ཨ་རིའི་མཐུན་ཕྱོགས་རྒྱལ་ཁབ་ཁག་ལ་བརྡ་ལན་སྤྲད།
རྒྱལ་སྤྱིའི་གསར་འགྱུར་བརྒྱུད་ལམ་ཁག་གིས་གནས་ཚུལ་སྤེལ་བ་ལྟར་ན། དེ་རིང་རྒྱ་ནག་པེ་ཅིན་གནམ་སྡེ་སྒོ་མོ་ཆེར་འཛམ་གླིང་དམག་ཆེན་གཉིས་པ་མཇུག་བསྒྲིལ་ནས་མི་ལོ་ ༨༠ འཁོར་བའི་དུས་དྲན་ཟེར་བ་ཞིག་འཚོགས་ཡོད་ཅིང་། མཛད་སྒོའི་ཐོག་བྱང་ཀོ་རི་ཡའི་མགོ་ཁྲིད་ཀེམ་ཇུང་ཨན་དང་ཨུ་རུ་སུའི་མགོ་ཁྲིད་པུ་ཊིན་གཙོས་རྒྱལ་ཁབ་ཉི་ཤུ་ལྷག་གི་མགོ་ཁྲིད་ལྷན་འཛོམས་བྱས་ཡོད་ཀྱང་། རྒྱ་ནག་གི་མི་སེར་དང་ཡུལ་སྐོར་བ་རྣམས་ལ་དམ་དྲག་ཆེན་པོ་བྱས་ཏེ། མཛད་སྒོར་དེར་ཞུགས་བཅུག་མེད་པའི་ཁར། ཚོང་ཁང་དང་ཟ་ཁང་སོགས་སྒོ་བརྒྱབ་བཅུག་ཡོད་འདུག་ལ། རྒྱ་ནག་གཞུང་གིས་སྣེ་ཁྲིད་པའི་རྒྱལ་ཁབ་དེ་དག་གིས་ནུབ་ཕྱོགས་རྒྱལ་ཁབ་ཁག་གི་བཀོད་འདོམས་ལ་ཉན་འཇོག་བྱ་མཚམས་བཞག་སྟེ། དམག་དོན་གཙོས་མཉམ་འབྲེལ་གྱི་ནུས་པ་སྐྱེད་ཐབས་བྱ་རྒྱུ་ཡིན་ལུགས་བསྒྲགས་པ་དང་སྦྲགས། ད་ལན་ནི་འཛམ་གླིང་གི་དམར་ཤོག་རྒྱལ་ཁབ་གསུམ་གྱི་ཡོངས་གྲགས་རང་བཞིན་གྱི་ལྷན་འཛོམས་དང་པོར་གྱུར་ཡོད་འདུག
རྒྱ་ནག་གི་མགོ་ཁྲིད་ཞི་ཅིན་ཕིན་གྱིས། དེང་གི་འཛམ་གླིང་འདིར་འགྲོ་བ་མིའི་ཐོབ་ཐང་གི་ཆེད། ཞི་བདེ་དང་དམག་འཁྲུག ཡང་ན། གྲོས་མོལ་དང་གདོང་ལེན་གྱི་ལམ་བུ་ཞིག་གདམ་དགོས། ཞེས་དང་། དེ་རིང་མེས་རྒྱལ་གྱི་མི་སེར་མང་དག་ཅིག་གིས་རང་སྲོག་བློས་བཏང་ནས། འགྲོ་བ་མིའི་དཔལ་ཡོན་དང་འཛམ་གླིང་ཞི་བདེ་ཡོངས་ཐབས་ཀྱི་ཞབས་འདེགས་བསྒྲུབས་ཡོད་པས། ལོ་རྒྱུས་རང་བཞིན་གྱི་སྐྱོ་གར་དེ་དག་ཕྱིར་དྲན་བྱ་དགོས་ལུགས་དང་། རྒྱ་ནག་དར་རྒྱས་གོང་འཕེལ་དུ་འགྲོ་བ་ནི་འགོག་ཐབས་བྲལ་བ་ཞིག་ཡིན་ལུགས་སོགས་བཤད་འདུག
དེ་བཞིན་དེ་རིང་འཛམ་གླིང་གི་གནད་དོན་དབྱེ་ཞིབ་པ་དང་། རྒྱལ་ཁབ་མང་པོས་རྒྱ་ནག་གི་དམག་དོན་རྗེས་དྲན་དེ་དང་བསྟུན། ཨ་རི་དང་མཐུན་རོགས་རྒྱལ་ཁབ་ཁག་གི་བྱེད་བབ་ལ་དོ་སྣང་བྱེད་མུས་ཡིན་སྟབས། ཨ་རིའི་སྲིད་འཛིན་སྐུ་ཞབས་ཊོམ་ཕུ་མཆོག་གིས། སྐུ་ཞབས་ཞི་དང་བཀུར་འོས་རྒྱ་ནག་གི་མི་མང་ཀུན་ལ་འཚམས་འདྲི་ཞུ། དེ་བཞིན་སྐུ་ཞབས་ཀིམ་དང་པུ་ཊིན་གཉིས་ཀྱིས་ཀྱང་། ཨ་རིའི་ལྐོག་ཏུ་ངན་ཇུས་གཤམ་རོགས་བྱེད་པར་འཚམས་འདྲི་ཡོད། ཅེས་གསུངས་ཏེ། ཨུ་རྒྱ་ཀོ་གསུམ་གྱིས་ཨ་རིའི་ལྡོག་ཕྱོགས་སུ་ལངས་བར་སྐྱོན་བརྗོད་དང་ཟུར་ཟ་གནང་འདུག
རྒྱ་ནག་གིས་གོ་སྒྲིག་བྱས་པའི་འཛམ་གླིང་ཆེན་གཉིས་པ་མཇུག་བསྒྲིལ་ནས་མི་ལོ་ ༨༠ འཁོར་བ་ཟེར་བའི་དུས་དྲན་སྐབས་གནམ་སྡེ་སྒོ་མོ་ཆེའི་ཐང་གཞུང་དུ། རྒྱ་ནག་བཅིངས་གྲོལ་དམག་མི་ཟེར་བས་རུ་སྒྲིག་དང་། མཚོ་དམག་དང་། ས་དམག མཁའ་དམག དེ་བཞིན་དཔུང་དམག དྲག་དམག་བཅས་ཀྱི་གོ་མཚོན་དང་། མེ་སྒྱོགས། མཚོན་ཆའི་རིགས་འགྲེམས་སྟོན་བྱས་ཡོད་ཅིང་། རྒྱ་ནག་གིས་འཛམ་གླིང་གི་དཔོན་རིགས་ཉི་ཤུ་ལྷག་ལ་མིག་སྔར་ DF-61 རྟགས་ཅན་དང་DF-41 རྟགས་ཅན་གྱི་མེ་ཤུགས་འཕུར་མདའ། རྒྱག་ཐག་རིང་པོར་བགྲོད་ནུས་པའི་མེ་ཤུགས་འཕུར་མདའ། དེ་བཞིན་སྒྱོགས་རྡོའི་མེ་ཤུགས་འཕུར་JL-3 རྟགས་ཅན་དང་། DF-31AG རྟགས་ཅན་གྱི་རྡུལ་ཕྲན་མཚོན་ཆ་སོགས་ཚུད་པའི། རྒྱ་ནག་གི་ས་མཚོ་གནམ་གསུམ་གྱི་དམག་དོན་གྱི་མཚོན་ཆ་རིགས་འགྲེམས་སྟོན་བྱས་ཏེ། རྒྱ་ནག་གི་དམག་དོན་གྱི་སྟོབས་ཤུགས་གསལ་སྟོན་བྱེད་ཐབས་དང་། རྒྱལ་ཁབ་ཁག་གི་མགོ་ཁྲིད་ཚོར་རྒྱ་ནག་གི་དམག་དོན་ལ་ཡིད་ཆེས་སྐྱེད་ཐབས་བྱས་ཡོད་པ་རེད།
གནད་དོན་དེའི་ཐད་ཉི་ཧོང་བདེ་སྲུང་བློན་ཆེན་སྐུ་ཞབས་ཡོ་ཤི་མ་ས་ཧ་ཡ་ཤི་(Yoshimasa Hayashi ) ལགས་ཀྱིས། ཉི་ཧོང་ལ་རྡུལ་མཚོན་གྱིས་དྲག་རྒོལ་བྱས་པ་དེ་ཞི་བདེ་ཡི་ཆེད་དུ་ཡིན་པའི་འགྲེལ་བཤད་རྒྱག་མུས་ཡིན་ཡང་། རྒྱ་ནག་གིས་ད་ལྟ་རྙོག་གླེང་མང་དག་ཅིག་བཟོ་མུས་ཡིན་པ་དེས། ཉི་ཧོང་གིས་བདེ་སྲུང་ལས་དོན་ཐད་གོམ་སྟབས་གསར་པ་ཞིག་སྤོ་དགོས་སྐོར་དང་། ཐའེ་ཝན་གྱིས་ཀྱང་དེ་རིང་རྒྱ་ནག་གཞུང་གི་དམག་དོན་གྱི་འཇིགས་སྐུལ་ཡོང་བར་དོགས་ནས་མཚོ་གླིང་ཁུལ་དུ་འགོག་སྲུང་བྱེད་མུས་ཡིན་འདུག
ཕྱི་ལོ་ ༢༠༡༨ དང་ ༢༠༡༩ ལོར་ཀེམ་དང་རྒྱ་ནག་གི་ཞི་ཅིན་ཕིན་གཉིས་ཐེངས་འགར་ཐུག་འཕྲད་བྱས་པ་མ་ཟད། ཕྱི་ལོ་ ༢༠༡༨ ལོར་ཀེམ་ཇུང་ཨན་སྔོན་ཆད་ཁོའི་ཕ་རྒན་ཀེམ་ཇུང་ཨེལ་རྒྱ་ནག་ནང་སྐྱོད་བྱེད་ཀྱི་མེ་འཁོར་ནང་བསྡད་དེ། ཁུ་སིམ་སིམ་གྱིས་རྒྱ་ནག་པེ་ཅིན་དུ་ཕྱིན་ཡོད་ཅིང་། སྐབས་དེར་རྒྱ་ནག་གཞུང་གིས་ཀེམ་ལ་མཐོང་ཆེན་གྱིས་ཉིན་མ་མང་པོར་མེ་འཁོར་གྱི་འགྲུལ་བཞུད་བཀག་ནས། ཀེམ་གྱི་རྒྱ་ནག་གི་འགྲུལ་བཞུད་ལ་སྣེ་ལེན་ཟབ་རྒྱས་བྱས་ཡོད་ལ། ཕྱི་ལོ ༢༠༡༥ ལོར་དམག་ཆེན་གཉིས་པ་མཇུག་བསྒྲིལ་ནས་མི་ལོ་ ༧༠ འཁོར་བའི་དུས་དྲན་སྐབས་པུ་ཊིན་རྒྱ་ནག་ཏུ་ཕྱིན་ཡོད་ཀྱང་། ཀེམ་ད་ལན་ཐེངས་དང་པོར་རྗེས་དྲན་དེར་ཞུགས་པའི་མུར་ཁོ་པའི་བུ་མོ་ཡང་ལྷན་དུ་འཁྲིད་འདུག
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
