རྩོམ་པ་པོ་ལཱ་སི་ལོ་ཀ་རཱ་སི་ཛ་ན་ཧོར་ཁའེ་དུས་མཐའི་འཇིགས་སྐྲག་གི་ཁྲོད་སྒྱུ་རྩལ་གྱི་སྟོབས་ཤུགས་བསྐྱར་དུ་ར་སྤྲོད་བྱས་པའི་བརྩམས་ཆོས་ལ་འདི་ལོའི་ནོ་སྦེལ་རྩོམ་རིག་གཟེངས་རྟགས་འབུལ་གཏན་ཁེལ་འདུག
ཁ་སང་ཕྱི་ཚེས་ ༩ ཉིན་སུ་ཝེ་ཌན་གྱི་ཚན་རིག་སློབ་གླིང་དུ། ནོ་སྦེལ་གཟེངས་རྟགས་ཚོགས་ཆུང་གིས་གསལ་བསྒྲགས་སྤེལ་བ་ལྟར་ན། ཕྱི་ལོ་ ༢༠༢༥ ལོའི་ནོ་སྦེལ་རྩོམ་རིག་གཟེངས་རྟགས་དེ་ཧང་གྷ་རིའི་རྩོམ་པ་པོ་ལཱ་སི་ལོ་ཀ་རཱ་སི་ཛ་ན་ཧོར་ཁའེ་ (László Krasznahorkai)་ལགས་ལ་འབུལ་གཏན་ཁེལ་ཡོད་ཅིང་། ཁོང་ལ་འདི་ལོའི་ནོ་སྦེལ་གཟེངས་རྟགས་འབུལ་དོན་ནི། ཁོང་གིས་མི་རྣམས་ཀྱི་བློ་འགུག་ཐུབ་པ་དང་མཐོང་རྒྱ་ཡངས་པའི་བརྩམས་ཆོས་ཀྱིས་དུས་མཐའི་འཇིགས་སྐྲག་གི་ཁྲོད་སྒྱུ་རྩལ་གྱི་སྟོབས་ཤུགས་བསྐྱར་དུ་ར་སྤྲོད་བྱས་པར་བསྔགས་བརྗོད་གནང་ཡོད་འདུག
དེ་འབྲེལ་ནོ་སྦེལ་གཟེངས་རྟགས་ཚོགས་ཆུང་གི་གསལ་བསྒྲགས་ནང་། ཧང་གྷ་རི་རྩོམ་པ་པོ་ལཱ་སི་ལོ་ཀ་རཱ་སི་ཛ་ན་ཧོར་ཁའེ་ལགས་ནི་རྩོམ་པ་པོ་ཀཱ་ཧྥི་ཀ་ལགས་(Kafka)་ནས་རྩོམ་པ་པོ་ཐོ་མ་སི་བྷིར་གར་ཌི་(Thomas Bernhard) བར་དུ་དར་ཁྱབ་བྱུང་བའི་ཡུ་རོབ་དཀྱིལ་མའི་སྲོལ་རྒྱུན་གྱི་རྟོགས་བརྗོད་འབྲི་མཁན་གྱི་རླབས་ཆེ་བའི་རྩོམ་པ་པོ་ཞིག་ཡིན། ཁོང་གི་བརྩམས་ཆོས་ལ་ཆོ་མེད་དང་སྐྱུག་བྲོ་བའི་ཚད་བརྒལ་གྱི་ཁྱད་ཆོས་ཡོད། ཁོང་གི་ཕྱག་ལས་ལ་གནོན་ཤུགས་མང་པོ་ཞིག་ཡོད་ཀྱང་། ཁོང་གིས་བསམ་བློ་ཞིབ་ཚགས་ཀྱི་སྒོ་ནས་རྩོམ་རིག་ཐོག་ལག་ལེན་རྣལ་མ་ཞིག་བྱས་ཐུབ་ཡོད། ཅེས་གསལ་འདུག
རྩོམ་པ་པོ་ལཱ་སི་ལོ་ཀ་རཱ་སི་ཛ་ན་ཧོར་ཁའེ་ལགས་ཀྱིས། སྤྱིར་བཏང་ངས་དེབ་གཅིག་ལས་རྩོམ་འབྲི་བྱེད་འཆར་མེད་ཀྱང་། ངའི་བརྩམས་སྒྲུང་ཐོག་མ་སཱ་ཐན་ཐན་གྷོ་(Satantango)ཞེས་པ་འགྲེམས་སྤེལ་བྱས་པའི་རྗེས་སུ། ངའི་མི་ཚེ་ནི་ནམ་ཡང་ནོར་བཅོས་བྱེད་མུས་ཡིན་ཞེས་པ་བརྩམས་ཏེ། རང་ཉིད་ཀྱི་རྩོམ་ཡིག་འབྲི་རྩལ་ཡར་རྒྱས་གཏོང་འདོད་བྱུང་། ཅེས་དང་། ད་ལྟའི་འཛམ་གླིང་གི་གནས་བབ་ལ་བསམ་བློ་བཏང་ན་ཧ་ཅང་སེམས་པ་སྐྱོ་བ་ཞིག་རེད། དེ་ནི་ཕུགས་འདུན་ཆེ་ཤོས་དེ་ཡིན། ཞེས་བརྗོད་འདུག
རྩོམ་པ་པོ་ལཱ་སི་ལོ་ཀ་རཱ་སི་ཛ་ན་ཧོར་ཁའེ་ལགས་ནི་ཕྱི་ལོ་ ༡༩༥༤ ལོར་ཤར་ཧང་གྷ་རི་བྷི་ཁི་སི་རྫོང་གི་གྷུ་ལ་(Gyula)གྲོང་གསེབ་ཏུ་སྐྱེས་ཤིང་། ཁོང་གི་ཨ་ཕ་གྷོར་གྷི་(György Krasznahorkai)ལགས་ནི་ཁྲིམས་རྩོད་པ་ཞིག་ཡིན་པ་དང་། ཨ་མ་ནི་སྤྱི་ཚོགས་ཞབས་ཞུ་བ་ཞིག་ཡིན་འདུག ཕྱི་ལོ་ ༡༩༧༢ ལོར་ཨེ་རེ་ཁེལ་ཧྥ་རན་ཁི་མཐོ་རིམ་སློབ་གྲྭ་ (Erkel Ferenc high school)ནས་སློབ་མཐར་ཕྱིན། ཕྱི་ལོ ༡༩༧༣ ལོར་ཇོ་སི་ཧྥི་ཨ་ཌི་ལཱ་གཙུག་ལག་སློབ་གླིང་(József Attila University)དུ་ཁྲིམས་ལུགས་རིག་པའི་སློབ་གཉེར་བྱེད་མགོ་བཙུགས། ཕྱི་ལོ་ ༡༩༧༦ ལོར་ཨོ་ཌི་ཝོ་སི་ལོ་རན་ཌི་གཙུག་ལག་སློབ་གླིང་(Eötvös Loránd University) དུ་ཆེད་ལས་བརྗེ་བསྒྱུར་བྱས་ཏེ། ཕྱི་ལོ་ ༡༩༧༨ ནས་ ༡༩༨༣ བར་དུ་མི་རིགས་སྡེ་ཁག་(ELTE Faculty of Humanities)ཏུ་ཧང་གྷ་རིའི་སྐད་ཡིག་དང་རྩོམ་རིག་ཐོག་སློབ་གཉེར་བྱས། ཁོང་གི་མཐར་ཕྱིན་དཔྱད་རྩོམ་ནི་ཧང་གྷ་རི་རྩོམ་པ་པོ་སིན་ཌོར་མཱ་རེ་ (Sándor Márai)ལགས་ཀྱི་ལས་དོན་སྐོར་ལ་བྲིས་ཡོད་འདུག ཕྱི་ལོ་ ༡༩༨༥ ལོར་ཁོང་གིས་སཱ་ཐན་ཐན་གྷོ་ཞེས་པའི་བརྩམས་སྒྲུང་ཞིག་བརྩམས་ཏེ་ཧང་གྷ་རི་ནང་དགའ་བསུ་ཆེན་པོ་ཐོབ། ཕྱི་ལོ་ ༡༩༨༧ ནས་བཟུང་ཧང་གྷ་རི་ནས་རྒྱ་ནག་དང་། ཉི་ཧོང་། ལྷོ་སོག་བཅས་ཀྱི་ཨེ་ཤ་ཡའི་ཁུལ་འགྲུལ་བཞུད་བྱས་ཏེ། ཁོང་གིས་གནམ་འོག་སྐྱོ་གདུང་དང་གཏོར་བཤིག དམག་འཁྲུག་དང་དམག་འཁྲུག ཨོར་གྷི་བཙོན་། འགོག་རྒོལ་གྱི་ཡིད་གདུང་སོགས་བརྩམས་ཆོས་མང་པོ་ཡོད་ཅིང་། ཕྱི་ལོ་ ༡༩༨༧ ལོར་ཨ་ཌི་ལཱ་ཇོ་སི་ཧྥི་གཟེངས་རྟགས་(Attila József Prize)་ཐོབ་ཡོད་པ་དང་། ཕྱི་ལོ་ ༡༩༩༣ ལོར་ཁོང་གི་བརྩམས་ཆོས་འགོག་རྒོལ་གྱི་ཡིད་གདུང་ལ་འཇར་མན་གྱི་རྩོམ་རིག་གཟེངས་རྟགས་(Bestenliste-Prize) ཐོབ། ཕྱི་ལོ་ ༢༠༡༣ ལོར་ཁོང་གི་བརྩམས་ཆོས་སཱ་ཐན་ཐན་གྷོ་ལ་བསྒྱུར་རྩོམ་ཡག་ཤོས་ཀྱི་གཟེངས་རྟགས་(Best Translated Book Award)ཐོབ། ཕྱི་ལོ་ ༢༠༡༤ ལོར་ཝི་ལིན་ནི་ཁ་རྒྱལ་སྤྱིའི་རྩོམ་རིག་དུས་སྟོན་གྱི་གཟེངས་རྟགས་( Vilenica Prize (Vilenica International Literary Festival, Slovenia)ཐོབ། ཕྱི་ལོ་ ༢༠༡༥ ལོར་རྒྱལ་སྤྱིའི་སྐྱེས་པའི་རྩོམ་པ་པོའི་གཟེངས་རྟགས་སོགས་ཐོབ་ཡོད་འདུག
སྤྱིར་ཕྱི་ལོ་ ༡༩༠༡ ནས་ད་བར་ནོ་སྦེལ་རྩོམ་རིག་བྱ་དགའ་ཐེངས་ ༡༡༨ སྤྲད་དེ་གཟེངས་རྟགས་ཐོབ་མཁན་རྩོམ་པ་པོ་གྲངས་ ༡༢༢ བྱུང་ཡོད་པའི་ཁྲོད། ཕྱི་ལོ་ ༢༠༡༩ ལོའི་ནོ་སྦེལ་རྩོམ་རིག་བྱ་དགའ་དེ་ཡུ་རོབ་ཨོ་སི་ཊི་ཡའི་རྩོམ་པ་པོ་པི་ཊར་(Peter Handke ) དང་། ཕྱི་ལོ་ ༢༠༢༠ དེ་ཨ་རིའི་སྙན་ངག་པ་ལུ་སི་ཡ་སུ་(Louise Glück ) ། ཕྱི་ལོ་ ༢༠༢༡ དང་ ༢༠༢༢ ལོར་སྐུ་ཞབས་ཨབ་དྷུལ་ར་ཛག་གྷུར་ནཱ་ (Abdulrazak Gurnah) དང་། ཧྥ་རན་སིའི་རྩོམ་པ་པོ་ཨེ་ནི་(Annie Ernaux ) བཅས་སུ་ཐོབ། ཕྱི་ལོ་ ༢༠༢༣ ལོར་ནོར་ཝེའི་བརྩམས་སྒྲུང་དང་འཁྲབ་གཞུང་རྩོམ་པ་པོ། སྙན་ངག་པ་སྐུ་ཞབས་ཇོན་ཧྥོ་སི་( Jon Fosse) ལགས་ལ་ཐོབ། ཕྱི་ལོ་ ༢༠༢༤ ལོར་ལྷོ་ཀོ་རི་ཡའི་རྩོམ་པ་པོ་ཧན་ཀང་ལགས་སུ་ཕུལ་ཡོད་འདུག རྩོམ་པ་པོ་ལཱ་སི་ལོ་ཀ་རཱ་སི་ཛ་ན་ཧོར་ཁའེ་ལགས་ནི་ཧང་གྷ་རི་རྒྱལ་ཁབ་ཀྱི་ནོ་སྦེལ་རྩོམ་རིག་གཟེངས་རྟགས་ཐོབ་མཁན་གཉིས་པ་དེ་ཡིན་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། པདྨ་མཚོ།
