ས་གནས་གཞིས་མགོ་དང་སོ་ནམ་སློབ་སྟོན་པ་རྣམ་པར་བཀའ་སློབ་བསྩལ།

༧གོང་ས་རྒྱལ་བ་རིན་པོ་ཆེ་མཆོག་ནས་བོད་ཀྱི་གཏིང་ཟབ་ལ་རྒྱ་ཆེ་བའི་ཆོས་རིག་གི་ཐོག་ནས་ཚན་རིག་དང་སེམས་ཁམས་རིག་པ་སོགས་ཀྱིས་མཚོན་པའི་འཛམ་བུ་གླིང་གི་དེང་དུས་ཀྱི་ཤེས་ཡོན་སྦྱོང་ཐུབ་ཀྱི་ཡོད་སྐོར་གསུངས་འདུག

ཟླ་འདིའི་ཕྱི་ཚེས་ ༡༡ ནས་ ༡༤ བར་ཉིན་གྲངས་བཞིའི་རིང་རྒྱ་གར་དང་འབྲུག་བཅས་ནས་བོད་མིའི་ས་གནས་མགོ་འཛིན་ ༣༥ དང་། སོ་ནམ་སློབ་སྟོན་པ་སོགས་མཉམ་ཞུགས་ཀྱིས་ས་གནས་མགོ་འཛིན་གྱི་འཛིན་སྐྱོང་ཚོགས་ཆེན་ཐེངས་ ༡༦ པ་འཚོག་མུས་ཡིན་པ་ལྟར། དེ་རིང་ཞོགས་པར་བཞུགས་སྒར་རྒྱལ་བའི་ཕོ་བྲང་དུ་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་བཅར་ཞུས་ཡོད་པ་དང་། སྐབས་དེར་༧གོང་ས་མཆོག་ནས་བོད་པས་མི་ཐོག་མང་པོའི་རིང་ལ་བདག་པོ་བརྒྱབ་ནས་བསྡད་པའི་གཏིང་ཟབ་པའི་བོད་ཀྱི་རིག་གཞུང་འདི་ལ་ང་རང་ཚོས་བདག་པོ་ཡག་པོ་བརྒྱག་དགོས་སྐོར་གསུངས་འདུག

༧གོང་ས་རྒྱལ་བ་རིན་པོ་ཆེ་མཆོག་ནས། ང་ཚོ་བཙན་བྱོལ་བ་ཆགས་ནས་ལོ་འདི་དག་ཕྱིན་པ་རེད་དེ། ང་ཚོས་ཆོས་དང་རིག་གཞུང་དངོས་གནས་བདག་པོ་ཡག་པོ་རྒྱག་ནས་བསྡད་པ་རེད། རྒྱ་གར་གྱི་རྒྱན་དྲུག་མཆོག་གཉིས་སོགས་ནས་མར་བརྒྱུད་པའི་ཚད་མའི་སྐོར་ཡིན་ན་རེད། མཛོད་འདུལ་སྐོར་ཡིན་ནའང་རེད། གང་ལྟར་ང་ཚོ་བོད་ཀྱི་ཆོས་དང་རིག་གཞུང་གཏིང་ཟབ་པོ་དང་སྤུས་དག་པོ་ཞེ་དྲགས་རེད་འདུག གཞུང་ཆེན་དེ་དག་གི་གྲས་དོན་དག་གཏིང་ཟབ་པོ་ཡིན་དུས་བསམ་བློ་གཏོང་སྟངས་ལ་འགྱུར་བ་ཞེ་དྲགས་ཐེབས་ཐུབ་པ་ཞིག་འདུག བྱས་ཙང་ང་ཚོ་བོད་ལ་གཏིང་ཟབ་པའི་སློབ་སྦྱོང་བྱ་རྒྱུ་ཡོད་པའི་རིག་གཞུང་ཞིག་ཡོད་རེད། དེ་ང་ཚོ་བོད་པའི་མི་རིགས་ལ་སྐྱེས་པའི་སྐྱེས་གོ་ཆོད་པ་ཞིག་རེད། བོད་མི་རིགས་ལ་སྐྱེས་ནས་སློབ་སྦྱོང་བྱེད་དུས་བསམ་བློའི་འགྲོ་སྟངས་དངོས་གནས་དྲང་གནས་རྒྱ་ཆེ་གཏིང་ཟབ་ཅིག་ཡོད་རེད། གཞན་སུ་ཅིག་ལའང་སྨོན་དགོས་ཡ་མི་འདུག་གཱ། ང་ཚོ་བོད་པ་རང་གིས་རིག་གཞུང་ཤོད་དུས་གཏིང་རིང་པོར་བསམ་བློ་གཏང་རྒྱུ་ཡོད་པ། དེ་བཞིན་སེམས་ཁམས་རིག་པ་དང་འབྲེལ་ནས་ཞེ་དྲགས་ཡོད་པ་ཞིག་རེད། གང་ལྟར་ང་ཚོ་བོད་ཀྱི་ཆོས་དང་རིག་གཞུང་དངོས་གནས་དྲང་གནས་རྒྱ་ཆེ་གཏིང་ཟབ་ཞེ་དྲགས་རེད་འདུག ཅེས་གསུངས་འདུག

ཡང་མགོན་པོ་གང་ཉིད་ཀྱིས། སྔར་བོད་ཀྱི་ཆོས་རྒྱལ་ཚོའི་སྐབས་ནས་རིག་གནས་གཏིང་ཟབ་ཅིག་བཙུགས་པ་རེད་ལ། དུས་ཕྱིས་སུ་ས་སྐྱ་པཎ་ཆེན་ལ་སོགས་པའི་མང་པོ་ཞིག་གིས་གཞུང་མང་པོར་གཟིགས་ནས། ང་ཚོ་བོད་ཀྱི་རིག་གཞུང་ལབ་དུས་གཞུང་རྒྱ་ཆེན་པོ་དེ་དག་དང་འབྲེལ་ནས་འདུག་གཱ།  འདི་དཔེ་ཡག་པོ་རེད་འདུག   བོད་ཀྱི་ཆོས་དང་རིག་གཞུང་དེར་ག་ཚོད་ཐུབ་ཐུབ་ཀྱིས་ང་ཚོས་དོ་སྣང་བྱེད་ཀྱིན་ཡོད་རེད་ལ། ང་ཚོ་བོད་རིགས་ཙམ་མ་ཡིན་པའི་དེང་སང་འཛམ་བུ་གླིང་གི་ས་ཁུལ་མང་པོ་ནས་བོད་པའི་རིག་གཞུང་ལ་དོ་སྣང་གསར་པ་བྱེད་ཀྱི་འདུག་གཱ། བྱས་ཙང་ང་ཚོ་བོད་པའི་རིག་གཞུང་འཛམ་གླིང་གི་སྒང་ལ་ངོམ་ཡ་ཞིག་རེད་འདུག ང་ཚོ་བོད་པ་ལབ་དུས་ལྐུགས་པ་དེ་འདྲ་ཞིག་རྩ་བ་ཉིད་ནས་རེད་ཡོད་མ་རེད་གདའ། ང་ཚོར་རིག་གཞུང་གཏིང་ཟབ་ཡོད་རེད། བྱས་ཙང་ང་རང་ཚོས་མི་ཐོག་མང་པོའི་རིང་ལ་བདག་པོ་བརྒྱབ་ནས་བསྡད་རེད། འབྱུང་འགྱུར་ང་ཚོ་བོད་ལ་རིག་གཞུང་གཏིང་ཟབ་ཡོད་པ་འདི་ལ་ང་རང་ཚོས་བདག་པོ་ཡག་པོ་ཞིག་བརྒྱག་དགོས། ཞེས་དང་། ད་ལྟའི་གནས་ཚུལ་ལ་བལྟས་ན། རྒྱ་ནག་ནང་ལ་བོད་ཀྱི་ཆོས་དང་རིག་གཞུང་ཁྱབ་ཆེན་པོ་ཞིག་ཡོང་རྒྱུའི་ཟོལ་ཞིག་འདུག གང་ལྟར་ང་ཚོ་བོད་ཀྱི་ཆོས་དང་རིག་གཞུང་དེ་དངོས་གནས་དྲང་གནས་རྒྱ་ཆེན་པོ། ཟབ་པོ་དཔེ་ཡག་པོ་རེད་འདུག ང་ཚོའི་རིག་གཞུང་འདིའི་ཐོག་ནས་འཛམ་བུ་གླིང་གི་དེང་དུས་ཀྱི་ཤེས་ཡོན་སྦྱོང་ཐུབ། དེང་སང་ཚན་རིག་པ་མང་པོ་ངོས་རང་ཐུག་ཏུ་ཡོང་གི་འདུག ངོས་རང་ནས་ཚན་རིག་དམིགས་བསལ་སྦྱང་ཡོད་མ་རེད་དེ། ནང་པའི་འགྲོ་སྟངས་དེའི་ཐོག་ནས་རྒྱུས་ཡོད་པ་དེས་ཚན་རིག་གི་ཐོག་ཏུའང་ཕན་ཐོགས་ཞེ་དྲགས་འདུག དེ་རིང་ཁ་སང་ཚན་རིག་པ་མང་པོ་ཞིག་གིས་བོད་ཀྱི་རིག་གཞུང་གཏིང་ཟབ་ཡག་པོ་དེར་དོ་སྣང་བྱེད་ཀྱི་འདུག ཅེས་གསུངས་འདུག

མཇལ་ཁ་གྲུབ་རྗེས་ནང་སྲིད་དྲུང་ཆེ་དཔལ་ལྡན་དོན་གྲུབ་ལགས་ཀྱིས་འདི་གའི་གསར་འགོད་པར། དེ་སྔ་སྐལ་བ་བཟང་བའི་དུས་ལ་ས་གནས་མགོ་འཛིན་གྱི་ཚོགས་ཆེན་ཐོག་༧གོང་ས་རྒྱལ་བ་རིན་པོ་ཆེ་མཆོག་ཆིབས་བསྒྱུར་གནང་ནས་བཀའ་སློབ་གནང་རྒྱུ་དང་། བཀའ་སློབ་གནང་བ་དེས། ལོ་གཅིག་གི་རིང་ལ་ལས་ཀ་བྱེད་མཁན་གྱི་ལྷག་བསམ། སྤོབས་པ་བྱེད་སྟངས། ལས་ཀར་འགན་ཁུར་སྟངས་སོགས་ཀྱི་ཐད་ལ་ཞེ་དྲགས་ཕན་ནུས་ཐེབས་ཀྱི་ཡོད་རེད། ཕྱིས་སུ་ང་ཚོས་ཡར་སྙན་གསེང་ཞུས་ནས་ས་གནས་མགོ་འཛིན་གྱི་ཚོགས་ཆེན་དེ་ལོ་རེ་རེར་གཅིག་གམ་མཚམས་རེར་ལོ་གཉིས་ལ་ཐེངས་གཅིག་མ་གཏོགས་འཚོག་ཐུབ་ཀྱི་ཡོད་མ་རེད། ས་གནས་མགོ་འཛིན་དེ་འགྱུར་བ་ཞེ་དྲགས་ཐེབས་འགྲོ་ཡི་ཡོད་དུས། ད་ལན་ལ་མཚོན་ན་ས་གནས་མགོ་འཛིན་བཅུ་རྦད་དེ་གསར་པ་གསར་རྐྱང་རེད། དེ་དག་ལ་༧གོང་ས་རྒྱལ་བ་རིན་པོ་ཆེ་མཆོག་ནས་གསོལ་རས་གནང་བ་ནང་བཞིན་བཀའ་སློབ་ཅིག་གནང་ཡོང་དུས། སྤྱི་པའི་ལས་ཀ་བྱེད་མཁན་གྱི་སེམས་ནང་ལ་སྔར་དང་མ་འདྲ་བའི་འགུལ་སྐྱོད་ཅིག་ཐེབས་ཡོད་པ་དེ་ལ་བརྟེན་ནས་གསོལ་འདེབས་ཞུས་ནས་དེ་རིང་མཇལ་ཁ་རག་བྱུང་། དེ་རིང་བཀའ་སློབ་དམིགས་བསལ་ཕེབས་སོང་ལ། གྲོལ་མ་ཐག་རྒྱལ་གླུ་བླང་དགོས་རེད་ཅེས་བཀའ་གནང་བ་བཞིན་རྒྱལ་གླུ་ཞིག་ཀྱང་བླངས་པ་ཡིན།  ཞེས་བརྗོད་བྱུང་།

དགའ་ལྡན་ཕོ་བྲང་གི་དྲ་རྒྱར་གསལ་བའི་༧གོང་ས་རྒྱལ་བ་རིན་པོ་ཆེ་མཆོག་གི་མཛད་འཆར་ལྟར་ན། ཕྱི་ཟླ་ ༡༡ ཚེས་ ༡༧ ཉིན་༧གོང་ས་རྒྱལ་བ་རིན་པོ་ཆེ་མཆོག་ལ་ཐེག་ཆེན་ཆོས་གླིང་གཙུག་ལག་ཁང་དུ་དབུས་བོད་སློབ་འཛིན་སྐྱོང་ཚོགས་པའི་ཁྱབ་ཁོངས་ཀྱི་གཏན་སློབ་(CST)ཁག་བདུན་གྱི་སློབ་མ་ཟུར་པ་དང་། བོད་ཕྲུག་ཁྱིམ་སྡེ། མ་སུ་རི་བོད་ཁྱིམ། རྒྱ་གར་དང་བལ་ཡུལ་གྱི་ཉིན་སློབ་ཁག་བཅས་ནས་འཚོག་གཏན་འཁེལ་བའི་བཀའ་དྲིན་རྗེས་དྲན་གྱི་མཛད་སྒོར་ཆིབས་བསྒྱུར་བསྐྱང་གཏན་ཁེལ་ཡོད་ཅིང་།  ཕྱི་ལོ་ ༢༠༢༦ ལོའི་ཟླ་ ༢ ཚེས་ ༢༣ ཉིན་༸གོང་ས་རྒྱལ་བ་རིན་པོ་ཆེ་མཆོག་ལ་ཐེག་ཆེན་ཆོས་གླིང་གཙུག་ལག་ཁང་དུ་རྒྱལ་སྤྱིའི་བོད་ཀྱི་ཆབ་སྲིད་བཙོན་ཟུར་ཚོགས་པ་དང་། སུད་སི་ལྷ་ས་བུའི་ཚོགས་པ་གཉིས་ཀྱིས་ཚེ་དཔག་མེད་དྭགས་མ་བཅུད་འདྲེན་གྱི་ཆོ་གའི་སྒོ་ནས་བརྟན་བཞུགས་བསྟར་འབུལ་ཞུ་རྒྱུ་ཡིན་འདུག

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།