༧གོང་ས་མཆོག་གི་གསུང་སྐད་ཡོད་པའི་རོལ་དབྱངས་ཤིག་འདི་ལོའི་གྷི་རེ་མི་ཡི་གཟེངས་རྟགས་ཀྱི་འོས་གཞིའི་ཁོངས་སུ་ཚུད།

ཕྱི་ལོ་ ༢༠༠༩ ལོར་རྒྱ་གར་གྱི་རོལ་མོའི་སྒྱུ་རྩལ་བ་ཨམ་ཇཱ་ཨ་ལི་ཁན་དང་ཀ་བྷིར་སེ་གྷལ་ལགས་གཉིས་ཀྱིས་བཟོ་བསྐྲུན་བྱས་པའི་༧གོང་ས་རྒྱལ་བ་རིན་པོ་ཆེ་མཆོག་གི་གསུང་སྐད་ལྡན་པའི་རོལ་དབྱངས་ཤིག་འདི་ལོའི་གྷི་རེ་མི་ཡི་གཟེངས་རྟགས་ཀྱི་འོས་གཞིའི་ཁོངས་སུ་ཚུད་འདུག

ཁ་སང་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་ཐོན་པའི་གནས་ཚུལ་ལྟར་ན། ཕྱི་ལོ་ ༢༠༠༩ ལོར་རྒྱ་གར་གྱི་རོལ་མོའི་སྒྱུ་རྩལ་བ་ཨམ་ཇཱ་ཨ་ལི་ཁན་ (Amjad Ali Khan ) ལགས་དང་ཀ་བྷིར་སེ་གྷལ་(Kabir Sehgal) ལགས་གཉིས་ཀྱིས་བཟོ་བསྐྲུན་བྱས་པའི་༧གོང་ས་རྒྱལ་བ་རིན་པོ་ཆེ་མཆོག་གི་གསུང་སྐད་ལྡན་པའི་རོལ་དབྱངས་(music) དེ། ཕྱི་ལོ་ ༢༠༢༦ ལོའི་གྷེ་རེ་མི་( GRAMMY) གཟེངས་རྟགས་ཀྱི་འོས་གཞིའི་ཁོངས་སུ་སྒྲ་དེབ་དང་འགྲེལ་བརྗོད། དེ་བཞིན་གཏམ་རྒྱུད་ཡག་ཤོས་བཅས་ཀྱི་ཁྱབ་ཁོངས་སུ་ཚུད་ཡོད་འདུག་ལ། འདི་ལོའི་གྷི་རེ་མི་ཡི་གཟེངས་རྟགས་དེ་ཕྱི་ལོ་ ༢༠༢༦ ཟླ་ ༢ ཚེས་ ༡ ཉིན་ཨ་རིའི་ལོ་སི་ཨེན་ཇི་ལེ་སི་(Los Angeles) གྲོང་ཁྱེར་དུ་སྤྲད་རྒྱུ་ཡིན་འདུག

རྒྱ་གར་གྱི་རོལ་མོ་བ་སྐུ་ཞབས་ཨམ་ཇཱ་ཨ་ལི་ཁན་ལགས་ཀྱིས། ང་ཚོས་ཧ་ཅང་གུས་བཀུར་ཆེན་པོས་༸གོང་ས་ཏཱ་ལའི་བླ་མ་མཆོག་དང་མཉམ་འབྲེལ་བྱ་རྒྱུའི་གོ་སྐབས་བྱུང་བ་ནི་ཧ་ཅང་སྐལ་བ་བཟང་པོ་ཡིན། ལོ་མང་རིང་༸གོང་ས་རྒྱལ་བ་རིན་པོ་ཆེ་མཆོག་ནི་ང་ཚོའི་མི་ཚེའི་ནང་གི་ལམ་སྟོན་གྱི་འོད་སྣང་ཞིག་ཡིན། ཁོང་གི་ཞི་བདེ་དང་། སྙིང་རྗེ། རེ་བ་བཅས་ཀྱི་བཀའ་སློབ་ཀྱིས་ང་ཚོའི་རོལ་དབྱངས་ཙམ་མ་ཟད། ང་ཚོའི་འཚོ་བའི་ལས་ཀ་བྱེད་སྟངས་ལའང་སྐུལ་མ་བྱེད་བཞིན་ཡོད། སྒྱུ་རྩལ་པ་ཁྱད་དུ་འཕགས་པ་མང་པོའི་ལེགས་སྐྱེས་དང་མཉམ་དུ། ང་ཚོས་༸གོང་ས་རྒྱལ་བ་རིན་པོ་ཆེ་མཆོག་གི་གཞལ་མེད་ཀྱི་རླབས་ཆེན་གྱི་མཛད་པ་རྣམས། དགའ་སྨོན་བྱེད་མཁན་དང་འཛམ་གླིང་ཡོངས་ལ་བརྩམས་ཆོས་ཤིག་བསྐྲུན་ཐབས་བྱས་ཡོད། རོལ་དབྱངས་འདིས་ཞི་བདེ་དང་། བྱམས་བརྩེ། རེ་བ་བཅས་ནི་སྲིད་པ་ཙམ་མ་ཟད། མེད་དུ་མི་རུང་བ་ཞིག་ཡིན་པའི་དྲན་སྐུལ་ཞིག་བྱེད་པར་ཤོག ཅེས་བརྗོད་འདུག

རྒྱ་གར་གྱི་གསར་ཁང་ (NEWS 18 ) གིས་སྤེལ་བའི་གནས་ཚུལ་ནང་། ༧གོང་ས་རྒྱལ་བ་རིན་པོ་ཆེ་མཆོག་གི་གསུང་སྐད་ཡོད་པའི་རོལ་མོའི་བརྩམས་ཆོས་དེ་ནི། འགྲོ་བ་མིའི་ཐུན་མོང་གི་རིན་ཐང་སྟེ། སྙིང་རྗེ་དང་དྲན་ཤེས། ཆོས་ཕྱོགས་ཀྱི་མཐུན་སྒྲིལ་བཅས་ལ་བསྟོད་པ་ཞིག་ཡིན་ལ། དེས་མི་རབས་དང་རིག་གཞུང་བར་གྱི་འབྲེལ་ལམ་མཐུད་པ་མ་ཟད། རོལ་དབྱངས་ཀྱི་སྟོབས་ཤུགས་ལས་འགྱུར་བ་དང་བསམ་གཞིགས་བྱེད་པར་སྐུལ་མ་གཏོང་གི་ཡོད། ཅེས་གསལ་འདུག་ལ། ད་ལན་གྱི་གྷེ་རི་མི་རོལ་དབྱངས་གཟེངས་རྟགས་ཀྱི་ཁོངས་སུ། ཨ་རིའི་གློག་བརྙན་འཁྲབ་སྟོན་པ་ཀེ་དྷི་གྷ་བཱར་(Kathy Garver) དང་། ལྷོ་ཨ་ཧྥི་རི་ཁའི་དགོད་བྲོའི་གཏམ་གླེང་བ་དང་། རྩོམ་པ་པོ། ཆབ་སྲིད་དཔྱད་བརྗོད་པ། གློག་བརྙན་འཁྲབ་སྟོན་པ་ཊི་ཝར་ནོ་ཝ་(Trevor Noah) ། ཧྥ་རན་སིའི་གཞས་པ་དང་གཞས་མ་གཏམ་ལེན་མཁན། གཤོམ་འགྲོས་བ་ཧྥེ་བྷི་མོར་ཝན་(Fab Morvan) བཅས་སོགས་ཚུད་ཡོད་འདུག

གྷེ་རེ་མི་གཟེངས་རྟགས་དེ་ནི་ཕྱི་ལོ་ ༡༩༥༠ ཙམ་ནས་གླུ་བ་དང་གླུ་མ། རོལ་དབྱངས་ཆེད་མཁས་པ་དག་གི་ཕུལ་བྱུང་གི་བརྩམས་ཆོས་དྲག་འདེམས་བྱས་ཏེ་ཐོག་མར་སྤྲོད་མགོ་བཙུགས་ཡོད་ཅིང་། རྒྱལ་སྤྱིའི་རོལ་དབྱངས་ཀྱི་གཟེངས་རྟགས་སྐད་གྲགས་ཆེ་གྲས་དང་རྙིང་ཤོས་གྲས་ཤིག་ཡིན་ཁར། ད་ལྟ་རྒྱལ་སྤྱིའི་ནང་སྐད་གྲགས་ཡོད་པའི་གཞས་མ་བྷི་ཡོན་སི་(Beyoncé) དང་། ལེ་ཌི་གྷ་གྷ་ (Lady Gaga)། བྷོ་ནོ་མ་སི་(Bruno Mars)། ཊེ་ལི་སིབ་ཁྲི་(Taylor Swift) སོགས་བཅས་ལའང་ཐོབ་མྱོང་ཡོད་འདུག

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།