བོད་ཀྱི་གཞོན་ནུ་ལྷན་ཚོགས་ནས་རྒྱ་ནག་གཞུང་གིས་བོད་ཀྱི་བླ་སྤྲུལ་ཡང་སྲིད་ངོས་འཛིན་བྱ་ཕྱོགས་ཐད་ཐེ་ཇུས་དང་འགན་དབང་ཡོད་སྐོར་བརྗོད་བཞིིན་པར་མཐའ་གཅིག་ཏུ་དགག་པ་ཡོད་པའི་བསྒྲགས་གཏམ་སྤེལ།
དེ་རིང་སྔ་དྲོའི་ཞོགས་པའི་ཆུ་ཚོད་ ༡༡ སྟེང་བོད་ཀྱི་གཞོན་ནུ་ལྷན་ཚོགས་ཀྱིས་བསྒྲགས་གཏམ་ཞིག་སྤེལ་བའི་ནང་། ཟླ་འདིའི་ཕྱི་ཚེས་ ༨ ཉིན་རྒྱ་ནག་གཞུང་གིས་བོད་གཞིས་ཀ་རྩེ་བཀྲ་ཤིས་ལྷུན་པོའི་དགོན་དུ། བོད་བརྒྱུད་ནང་བསྟན་གྱི་སྤྲུལ་སྐུའི་ཡང་སྲིད་ངོས་འཛིན་ལམ་ལུགས་ཀྱི་བཞུགས་མོལ་ཚོགས་འདུ་ཟེར་བ་ཞིག་འཚོགས་ཡོད་ཅིང་། སྐབས་དེར་རྒྱལ་མཚན་ནོར་བུས་བཙན་བྱོལ་དུ་ཡོད་པའི་ཆོས་ལུགས་དབུ་ཁྲིད་ཏཱ་ལའི་བླ་མ་མཆོག་གི་རྒྱུད་འཛིན་ནི་རྒྱ་ནག་གི་ཁྲིམས་དང་མཐུན་དགོས་པ་དང༌། རྒྱ་ནག་པེ་ཅིང་སྲིད་གཞུང་རང་ནས་རྒྱབ་སྐྱོར་གནང་དགོས་ཞེས་རྒྱལ་མཚན་ནོར་བུ་བེད་སྤྱད་དེ་ྋགོང་ས་ཏཱ་ལའི་བླ་མ་མཆོག་གི་སྐུའི་ཡང་སྲིད་དང་འབྲེལ་བའི་གནད་དོན་ཐད་བཤད་དུ་བཅུག་ཡོད་པ་ནི་ཧ་ཅང་གི་ངོ་ཚ་དང་ཇུས་མེད་ཇུས་འཁྲི་རང་རེད། ཅེས་གསལ་འདུག
བསྒྲགས་གཏམ་ནང་། སྤྱིར་བོད་ཀྱི་སྤྲུལ་སྐུའི་ཡང་སྲིད་ངོས་འཛིན་གནང་ཕྱོགས་ཐད་བོད་ཀྱི་སྲོལ་རྒྱུན་གྱི་ཡང་སྲིད་ངོས་འཛིན་ལམ་ལུགས་ཤིག་ཡོད་བཞིན་པ་དང་། ལྷག་པར་ྋགོང་ས་རྒྱལ་བ་རིན་པོ་ཆེ་མཆོག་ནས་སྐུའི་ཡང་སྲིད་དང་འབྲེལ་བའི་གནད་དོན་ཐད་ཕྱི་ལོ་ ༡༩༦༩ ཙམ་ནས་རིམ་པར་བཀའ་གནང་ཡོད་པ་དང༌། འདི་ལོའི་ཕྱི་ཟླ་ ༧ ཚེས་ ༢ ཉིན་བོད་མིའི་ཆོས་ཚོགས་ཐེངས་བཅོ་ལྔ་པའི་དབུ་འབྱེད་མཛད་སྒོའི་ཐོག་༸གོང་ས་མཆོག་ནས་༸རྒྱལ་དབང་སྐུ་ཕྲེང་ན་རིམ་ངོས་འཛིན་བྱེད་ཕྱོགས་ཐད་བསྒྲགས་གཏམ་སྔོན་མའི་ནང་གསལ་བཞིན། ཡང་སྲིད་ངོས་འཛིན་གྱི་བྱེད་སྒོའི་འགན་འཁུར་གཙོ་བོ་ཏཱ་ལའི་བླ་མའི་བླ་བྲང་དགའ་ལྡན་ཕོ་བྲང་ཡིད་ཆེས་དགེ་རྩའི་དབང་ལྡན་འགན་འཛིན་རྣམས་ལ་ཡོད་པ་དང་། ཁོ་ཚོས་བོད་བརྒྱུད་ནང་བསྟན་ཆོས་རྒྱུད་ཁག་གི་དབུ་ཁྲིད་བླ་ཆེན་རྣམ་པ་དང༌། ༸རྒྱལ་དབང་སྐུ་ཕྲེང་ན་རིམ་དང་ལུས་དང་གྲིབ་བཞིན་འགྲོགས་པའི་དམ་ལྡན་ཆོས་སྲུང་ཁག་ལ་སྐབས་བསྟུན་ལམ་སྟོན་ཞུས་ཏེ་ཡང་སྤྲུལ་རྩད་གཅོད་ངོས་འཛིན་སྔོན་སྲོལ་བཞིན་བྱ་རྒྱུ་ལས། གཞན་སུས་ཀྱང་ཐེ་ཇུས་མི་ཆོག་པའི་གནས་བབས་ལ་འགྱུར་བ་གང་ཡང་མེད། ཅེས་བཀའ་གནང་བ་བཞིན་ྋསྐུའི་ཡང་སྲིད་དང་འབྲེལ་བའི་གནད་དོན་ཐད་༸གོང་ས་མཆོག་སྐུ་སྒེར་དང་དགའ་ལྡན་ཕོ་བྲང་ཡིད་ཆེས་དགེ་རྩའི་འགན་འཛིན་གཅིག་པུར་དབང་ཚད་ཡོད་པ་ལས་གཞན་སུ་ལའང་ཐེ་བྱུས་དང་འགན་དབང་གང་ཡང་མེད་པ་གསལ་པོར་བཀའ་གནང་ཡོད། ཅེས་འཁོད་འདུག
ཡང་བསྒྲགས་གཏམ་ནང་། བོད་ཀྱི་གཞོན་ནུ་ལྷན་ཚོགས་ནས་རྒྱ་ནག་གཞུང་དང༌། རྒྱལ་མཚན་ནོར་བུར་འགན་དབང་དང་ཐེ་ཇུས་བྱེད་དབང་དེ་བས་ཀྱང་མེད་ཅེས་བསྐྱར་དུ་ནན་བརྗོད་བྱ་རྒྱུ་ཡིན། དེ་བཞིན་རྒྱ་གཞུང་གིས་༸གོང་ས་མཆོག་ནས་ཡང་སྲིད་ངོས་འཛིན་གནང་བའི་༸པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཡེ་ཤེས་འཕྲིན་ལས་ཕུན་ཚོགས་དཔལ་བཟང་པོ་མཆོག་ཉེས་མེད་འཛིན་བཟུང་བཙོན་འཇུག་གིས་ད་བར་གར་སོང་ཆ་མེད་དུ་གྱུར་ཡོད་པས། བྱིས་པའི་འགྲོ་བ་མིའི་ཐོབ་ཐང་དང་བོད་ཀྱི་བླ་སྤྲུལ་ཡང་སྲིད་ངོས་འཛིན་གྱི་སྔར་སྲོལ་ལམ་ལུགས་སོགས་ལ་རྩིས་མེད་རྡོག་རོལ་བཏང་སྟེེ། རྒྱ་ནག་གིས་ངོས་འཛིན་དང་དམར་ཤོག་གི་ལྟ་བ་སློབ་ཁྲིད་བྱས་པའི་པཎ་ཆེན་རྫུན་མ་དེར་༸རྒྱལ་བའི་ཡང་སྲིད་དང་འབྲེལ་བའི་གནད་དོན་ཐད་ཐེ་ཇུས་བྱེད་དུ་བཅུག་པ་ལས་རྒྱ་ནག་གི་མགོ་དཔོན་མའོ་ཙེ་ཏུང་སོགས་ཀྱི་ཡང་སྲིད་བཙལ་འཚོལ་བྱས་ན་འོས་ཤིང་འཚམ་པ་ཞིག་ཡོང་ངེས་རེད། ཅེས་དང་། བོད་ཀྱི་གཞོན་ནུ་ལྷན་ཚོགས་ཀྱིས་རྒྱ་ནག་གཞུང་ལ་བོད་ཀྱི་བླ་སྤྲུལ་ཡང་སྲིད་ངོས་འཛིན་བྱ་ཕྱོགས་ཐད་ཐེ་ཇུས་དང་འགན་དབང་གང་ཡང་མེད་པ་ནན་བརྗོད་བྱ་རྒྱུ་དང་། རྒྱལ་སྤྱིའི་ནང་པའི་ལྷན་ཚོགས་ཀྱི་བླ་ཆེན་ཁག་གཙོས་ཕྱི་ནང་གི་དད་ལྡན་རྗེས་འཇུག་པ་ཡོངས་དང༌། ལྷག་པར་བོད་མི་སྤྱི་སྒེར་ཡོངས་ནས་རྒྱ་ནག་གཞུང་གིས་ཇུས་མེད་ཇུས་འཁྲི་བྱས་པར་ངོས་ལེན་རྩ་བ་ནས་མེད་པ་དང་དགག་པ་མཐའ་གཅིག་ཏུ་བྱ་རྒྱུ་ཡིན། ཞེས་གསལ་འདུག
ཟླ་འདིའི་ཕྱི་ཚེས་ ༨ ཉིན་རྒྱལ་མཚན་ནོར་བུས། བོད་བརྒྱུད་ནང་བསྟན་གྱི་སྤྲུལ་སྐུའི་ཡང་སྲིད་ངོས་འཛིན་ཐད་ངེས་པར་དུ་ཁྲིམས་ལྟར་དོ་དམ་དང་། ཆོས་ལུགས་ཀྱི་ཆོ་གར་བརྩི་སྲུང་། ལོ་རྒྱུས་ཀྱི་ངེས་སྲོལ་ལ་བརྩི་སྲུང་བཅས་བྱེད་པའི་རྩ་དོན་གལ་ཆེན་གསུམ་མཐའ་འཁྱོངས་བྱེད་དགོས་ཤིང་། ལྷག་པར་དུ་རྒྱལ་ནང་དུ་བཙལ་འཚོལ་དང་། གསེར་བུམ་དཀྲུག་འདོན། རྒྱ་ནག་གཞུང་གི་ཆོག་མཆན་ཐོབ་དགོས་པ་བཅས་ཀྱི་རྩ་དོན་ལ་བརྩི་སྲུང་ཞུས་ཏེ། ཕྱིའི་རྩ་འཛུགས་དང་མི་སྒེར་གང་རུང་གི་ཐེ་ཇུས་མི་ཕོག་པ་བྱེད་དགོས། དེ་འདྲ་བྱུང་ཚེ་གཞི་ནས་རྒྱལ་ཁབ་ཀྱི་བདག་དབང་དང་སྲིད་གཞུང་གི་དབང་གྲགས་མངོན་པ་དང་། མེས་རྒྱལ་གོང་བུ་གཅིག་གྱུར་དང་མི་རིགས་མཐུན་སྒྲིལ་ལ་སྲུང་སྐྱོང་ཐུབ་ལ། བོད་བརྒྱུད་ནང་བསྟན་སྐྱོན་བྲལ་ངང་རྒྱུན་འཛིན་ཐུབ་པ་ཞིག་ཡོང་ངེས་རེད། དེ་བཞིན་ཀྲུང་གོ་གུང་ཁྲན་ཏང་གི་མགོ་ཁྲིད་མཐའ་འཁྱོངས་ཀྱིས་ནང་བསྟན་མཐུན་ཚོགས་དང་བླ་སྤྲུལ་རྣམས་ཀྱིས་རང་འགན་གང་ལེགས་འཁུར་དགོས་སྐོར་བརྗོད་འདུག
གསར་འགོད་པ། བསྟན་འཛིན་ཕུར་བུ།
