༧གོང་ས་རྒྱལ་བ་རིན་པོ་ཆེ་མཆོག་ལ་དགེ་བཤེས་ལྷ་རམས་པའི་བཀའ་དྲིན་རྗེས་དྲན་གྱི་གཟེངས་རྟགས་ཕུལ།

༧གོང་ས་རྒྱལ་བ་རིན་པོ་ཆེ་མཆོག་ལ་བཀའ་དྲིན་རྗེས་དྲན་གྱི་ཆེད། ལྷ་ལྡན་ཆོ་འཕྲུལ་སྨོན་ལམ་ཆེན་མོའི་དགེ་རྩ་དང་། དགེ་ལྡན་སྤྱི་ལས་ཁང་ནས་གསར་བཞེངས་ཞུས་པའི་རིན་ཆེན་གསེར་དངུལ་ལས་གྲུབ་པའི་དགེ་བཤེས་ལྷ་རམས་པའི་གཟེངས་རྟགས་ཕུལ།

སྐབས་དེར་ཤར་རྩེ་མཁན་པོ་བྱང་ཆུབ་སངས་རྒྱས་ལགས་ཀྱིས་གཏམ་བཤད་གནང་བའི་ཁྲོད། འདི་ལོར་མགོན་པོ་གང་ཉིད་དགུང་གྲངས་ ༩༠ ལ་ཕེབས་པའི་སྐུའི་གོ་སྟོན་གྱི་དུས་ཆེན་འཛམ་གླིང་ཡུལ་ལུང་གང་སར་དད་ལྡན་པ་ཁྲི་འབུམ་མང་པོས་སྲུང་བརྩི་ཞུ་བཞིན་པ་ལྟར། གུས་ཅག་སྐྱབས་འོག་པ་རི་བོ་དགེ་ལྡན་པའི་ཆོས་བརྒྱུད་འཛིན་པ་སྤྱི་དང་། དགེ་ལྡན་སྤྱི་ལས་ཁང་ནས་ཇི་ལྟར་གསོལ་འདེབས་ཞུས་དོན་བཞིན། དེ་ཪིང་དགའ་ལྡན་ལྔ་མཆོད་ཆེན་མོའི་དུས་ཆེན་གྱི་ཉིན།  སྟོན་པ་ཕུན་སུམ་ཚོགས་པ་ས་སྟེང་རྒྱལ་བསྟན་ཡོངས་རྫོགས་ཀྱི་མངའ་བདག འཛམ་གླིང་ཞི་བེའི་དེད་དཔོན། བོད་མིའི་བླ་ན་མེད་པའི་དབུ་ཁྲིད། ༧གོང་ས་རྒྱལ་བ་རིན་པོ་ཆེ་མཆོག་ཚོགས་མགོན་དུ་དབུ་བཞུགས་བཀའ་དྲིན་བསྐྱངས་ཤིང་། ཆོས་ཕུན་སུམ་ཚོགས་པ་རིགས་གསུམ་གཅིག་བསྡུས་ཀྱི་བདག་ཉིད་གངས་ཅན་གྱི་ཤིང་རྟ་ཆེན་པོ་རྗེ་བཙུན་ཙོང་ཁ་པ་ཆེན་པོའི་དགོངས་རྫོགས་མཆོད་འབུལ། དགེ་འདུན་ཕུན་སུམ་ཚོགས་པ་འཇམ་མགོན་རྒྱལ་བའི་རྒྱལ་རྒྱལ་ཚབ་དགའ་ལྡན་ཁྲི་ཆེན་རྡོ་རྗེ་འཆང་ཆེན་པོ་མཆོག་དང་། མཚུངས་མེད་ཤར་བྱང་གི་ཆོས་རྗེ་རྣམ་གཉིས་ཀྱིས་གཙོས་རྒྱལ་སྲས་བླ་སྤྲུལ་བཀའ་རམ་འབྱམས་པ་མཁས་དབང་དགེ་བའི་བཤེས་གཉེན་བརྒྱ་ཕྲག་དུ་མ་དང་བཅས་དགེ་འདུན་འདུས་པ་རྒྱ་མཚོ། གནས་ཕུན་སུམ་ཚོགས་པ་དཔལ་ན་ལནྡྲ་གཉིས་པ་གངས་ཅན་བོད་ཀྱི་གདན་ས་ཆེན་པོ་སེ་འབྲས་དགའ་གསུམ་ཞེས་སྙན་པའི་བ་དན་ས་གསུམ་ན་གཡོ་བའི་ནང་ཚན་གདན་ས་ཆེན་པོ་དཔལ་ལྡན་འབྲས་དཀར་སྤུངས་པའི་ཆོས་སྡེ་ཆེན་པོ། དུས་ཕུན་སུམ་ཚོགས་པ་དགའ་ལྡན་ལྔ་མཆོད་ཆེན་མོའི་དུས་ཆེན་ཏེ། དེ་ལྟར་སྟོན་པ་དང་། ཆོས་དང་དགེ་འདུན། གནས་དང་དུས་བཅས་ཕུན་སུམ་ཚོགས་པ་ལྔ་ལྡན་གྱི་ཐོག ༸རྒྱལ་བའི་གོ་སྟོན་གྱི་བྱམས་བརྩེའི་དམིགས་བསལ་ལོ་དུས་དང་། ཕྱི་ལོ་ ༡༩༥༩ ལོར་༧གོང་ས་རྒྱལ་བ་རིན་པོ་ཆེ་མཆོག་གིས་བོད་ཀྱི་རྒྱལ་ས་ལྷ་སར་ཆོ་འཕྲུལ་སྨོན་ལམ་ཆེན་མོར་དགེ་བཤེས་ལྷ་རམས་པའི་དམ་བཅའི་མཛད་ཆེན་བསྐྱངས་ནས་ལོ་ ༦༦ འཁོར་བ་དང་། ཕྱི་ལོ་ ༡༩༧༤ ལོར་རྒྱ་གར་འཕགས་ཡུལ་དུ་དགེ་བཤེས་ལྷ་རམས་པའི་ཕྱག་ཁྱེར་ཐོག་མ་དེ་༧གོང་ས་རྒྱལ་བ་རིན་པོ་ཆེ་མཆོག་ལ་གུས་འབུལ་ཞུས་ནས་ལོ་ངོ་ ༥༡ འཁོར་བ་དང་། ཕྱི་ལོ་ ༡༩༧༥ ལོར་རྒྱ་གར་འཕགས་ཡུལ་དུ་དཔལ་མཉམ་མེད་རི་བོ་དགེ་ལྡན་པའི་གཙུག་ལག་སློབ་གཉེར་ཁང་གི་དགེ་ལུགས་རྒྱུགས་སྤྲོད་ཆེན་མོ་དབུ་འཛུགས་ཞུས་ཏེ་ལོ་ངོ་ ༥༠ འཁོར་བའི་དུས་དྲན་རྣམས་སྲུང་བརྩི་དང་འབྲེལ། ས་གནས་མོན་གྷོ་དཔལ་ལྡན་འབྲས་སྤུངས་བཀྲ་ཤིས་སྒོ་མང་གྲྭ་ཚང་གི་ཆོས་རའི་གཙུག་ལག་ཁང་དུ།༧གོང་ས་རྒྱལ་བ་རིན་པོ་ཆེ་མཆོག་ལ་བཀའ་དྲིན་རྗེས་དྲན་གྱི་ཆེད། ལྷ་ལྡན་ཆོ་འཕྲུལ་སྨོན་ལམ་ཆེན་མོའི་དགེ་རྩ་དང་། དགེ་ལྡན་སྤྱི་ལས་ཁང་ནས་གསར་བཞེངས་ཞུས་པ་རིན་ཆེན་གསེར་དངུལ་ལས་གྲུབ་པའི་དགེ་བཤེས་ལྷ་རམས་པའི་གཟེངས་རྟགས་འདི་ཉིད་གུས་ཅག་སྐྱབས་འོག་པ་དཔལ་མཉམ་མེད་རི་བོ་དགེ་ལྡན་པའི་ཆོས་བརྒྱུད་འཛིན་པ་སྤྱིའི་མཚན་ཐོག་ནས་གུས་འབུལ་ཞུ་རྒྱུ། ཞེས་གསུངས་སོང་།

མཁན་པོ་ལགས་ཀྱིས་དགེ་བཤེས་ལྷ་རམས་པའི་འབྱུང་རིམ་སྐོར་ལ།  ཕྱི་ལོ་ ༡༦༡༣ ནས་པཎ་ཆེན་སྐུ་འཕྲེང་བཞི་པ་བློ་བཟང་ཆོས་ཀྱི་རྒྱལ་མཚན་མཆོག་གིས་དགའ་ལྡན་ཁྲི་ཚབ་མཛད་སྐབས་གདན་ས་ཆེན་པོ་སེ་འབྲས་དགའ་གསུམ་གྱི་སློབ་གཉེར་བ་དྲག་གྲས་རྣམས་ལྷ་ལྡན་སྨོན་ལམ་ཆེན་མོའི་སྐབས་སུ་གཞུང་ཆེན་བཀའ་པོད་ལྔར་གྲྭ་སྐོར་དམ་འཇོག་གིས་ལྷ་ལྡན་རབ་འབྱམས་པའི་སྲོལ་བཏོད། ལྷ་ལྡན་རབ་འབྱམས་པ་ཞེས་པ་མིང་བསྡུས་ན་ལྷ་རམས་པ་ཞུ། རྗེས་སུ་༸རྒྱལ་དབང་སྐུ་འཕྲེང་བཅུ་གསུམ་པ་ཆེན་པོ་མཆོག་གིས་རྒྱུགས་སྤྲོད་ཀྱི་ལམ་ནས་ལྷ་རམས་དགེ་བཤེས་ཀྱི་མཚན་གནས་དང་ཨང་རིམ་འབུལ་བའི་ལམ་སྲོལ་མཛད། དེ་སྔ་བོད་དུ་ལོ་རེར་ལྷ་རམས་པའི་གྲངས་ཚད། བཅུ་དྲུག་དང་། སྨོན་ལམ་གྱི་མཇུག་ཏུ་གཙུག་ལག་ཁང་གི་ཡང་སྟེང་གཞུང་འབྲེལ་མཛད་སྒོའི་ཐོག་དྲུང་ཡིག་ཆེན་མོ་ནས་བཀའ་རབ་འབྱམས་པ་དགེ་བའི་བཤེས་གཉེན་ཞེས་དགེ་བཤེས་ལྷ་རམས་པ་དྲག་གྲས་བདུན་ལ་མཁས་པའི་གཟེངས་བསྟོད་ཨང་རིམ་དང་བྱ་དགའ་གནང་སྲོལ་ཡོད། བཙན་བྱོལ་དུ་འབྱོར་རྗེས་ཕྱི་ལོ་ ༡༩༦༡ ལོ་ནས་སྦག་ས་ཆོས་སྒར་དུ་སྨོན་ལམ་དབུ་འཛུགས་གནང་བ་དང་འབྲེལ། ལོ་དེར་གནས་མཆོག་རྡོ་རྗེ་གདན་དུ་སྨོན་ལམ་འཚོག་སྐབས་སྦག་ས་ཆོས་སྒར་ནས་དགེ་འདུན་པ་གང་འཚམས་ཤིག་གནས་མཆོག་རྡོ་རྗེ་གདན་དུ་ཕེབས་ཏེ་དགེ་བཤེས་ལྷ་རམས་ཀྱི་དམ་འཇོག་གནང་ཡོད། དེ་ནི་བཙན་བྱོལ་དུ་དགེ་བཤེས་ལྷ་རམས་པའི་གྲྭ་སྐོར་དམ་བཅའ་ཐོག་མ་དེ་ཡིན། ཕྱི་ལོ་ ༡༩༧༥ ལོར་གདན་ས་ཆེན་པོ་སེ་ར་ཐེག་ཆེན་གླིང་དུ་དགེ་ལུགས་རྒྱུགས་སྤྲོད་ཆེན་མོ་ཐོག་མ་དབུ་འཛུགས་ཞུས་པ་ནས་ད་ལྟའི་བར་ལོ་ངོ་ ༥༠ རིང་། རྒྱུགས་སྤྲོད་ཀྱི་སྒྲིག་གཞིར་ལེགས་བཅོས་དང་། ཕྱི་ལོ་ ༢༠༡༨ ནས་བཀའ་རམས་ལོ་རིམ་གཉིས་ལ་ཚན་རིག་སློབ་ཚན་གསར་སྣོན་དང་། དེའི་སྔོན་འགྲོར་གྲྭ་ཚང་སོ་སོའི་འདུལ་མཛོད་འཛིན་གྲྭ་བཞི་ལ་ཚན་རིག་སློབ་ཁྲིད་དང་རྒྱུགས་འབུལ་ཞུ་རྒྱུ་གཏན་འབེབས་ཞུས། ཞེས་གསུངས་སོང་།

ཡང་ཁོང་གིས། ཕྱི་ལོ་ ༢༠༢༡ ནས་ལྷ་རམས་ལོ་རིམ་གཉིས་ལ། ཚད་ཆེན་རྩ་འགྲེལ་དང་ཚད་མ་ཀུན་བཏུས། བྱམས་ཆོས་ཕྱི་མ་བཞི། དབུ་མ་རིགས་ཚོགས་དྲུག་དང་། དབུ་མ་སྙིང་པོ་རྩ་འགྲེལ། དབུ་མ་རྒྱན་དང་དབུ་མ་སྣང་བ་སོགས་དབུ་ཕར་ཚད་གསུམ་གྱི་རྒྱ་གཞུང་ཁོ་ན་སློབ་ཚན་དུ་བཞག་སྟེ་རྩོད་རྒྱུགས་དང་གཞུང་བཤད་གཉིས་ཀྱི་སྒོ་ནས་རྒྱུགས་འབུལ་ཞུ་བཞིན་ཡོད་ལ། དེའི་སྔོན་འགྲོར་བྱམས་ཆོས་དང་རིགས་ཚོགས་དགུན་ཆོས་ཆེན་མོ་ལོ་ལྟར་གདན་ས་གསུམ་དུ་འཚོགས་རེས་གནང་སྟེ་ལོ་དགུ་འགྲོ་བཞིན་ཡོད། དགེ་ལུགས་རྒྱུགས་སྤྲོད་ཆེན་མོའི་སློབ་གཉེར་བའི་གྲངས་ཚད་ལ། འདི་ལོར་མཚོན་ན། བཀའ་རམས་ལོ་རིམ་གཉིས་དང་། སློབ་དཔོན་ལོ་རིམ་གཉིས། ལྷ་རམས་ལོ་རིམ་གཉིས་བཅས་འཛིན་གྲྭ་དྲུག་ལ། གདན་ས་ཆེན་པོ་སེ་འབྲས་དགའ་གསུམ་གྱི་གྲྭ་ཚང་དྲུག་དང་། བཀྲ་ཤིས་ལྷུན་པོ། ར་སྟོད་གྲྭ་ཚང་བཅས་ཀྱི་སློབ་གཉེར་བ་གྲངས་ ༡༢༦༩ ཡོད་པ་ལས། འདི་ལོའི་གསར་ཞུགས་པ་གྲངས་ ༢༤༥ དང་། འདི་ལོ་དགེ་ལུགས་རྒྱུགས་སྤྲོད་ཐོན་པ་ལྷ་རམས་པ་གྲངས། ༢༡༥ བྱུང་ཡོད།  ཕྱི་ལོ་ ༡༩༧༥ ནས་ ༢༠༢༥ བར་ལོ་ངོ་ ༥༠ རིང་དགེ་ལུགས་རྒྱུགས་སྤྲོད་ཆེན་མོར་ཞུགས་མཁན་སློབ་གཉེར་བ་གྲངས་ ༤༥༩༦ བྱུང་བ་ནས། ད་བར་དགེ་བཤེས་ལྷ་རམས་པའི་ཕྱག་འཁྱེར་བཞེས་མཁན་གྲངས་ ༢༢༦༠ བྱུང་ཡོད། གཞན་ཡང་༧གོང་ས་རྒྱལ་བ་རིན་པོ་ཆེ་མཆོག་གི་རླབས་ཆེན་གྱི་དགོངས་གཞི་དང་བཀའ་སློབ་ལམ་སྟོན་སྔ་རྗེས་ཕེབས་དགོངས་བཞིན། ཝ་ཎ་སྨོན་ལམ་ཚོགས་པ་ནས་ལོ་ལྟར་༸རྒྱལ་བའི་འཁྲུངས་སྐར་དུས་ཆེན་ཉིན། ཝཱ་ར་ཎ་སི་ས་གནས་ཡུལ་མི་ཉམ་ཐག་གི་ཕྲུ་གུ་ ༡༡༣ ལ་སློབ་ཡོན་ཕུལ་དང་འབུལ་བཞིན་པ་ནས་ད་བར་ཐེངས་ ༡༣ ཙམ་ཕུལ་ཡོད། ཝཱ་ར་ཎ་སི་བོད་ཀྱི་མཐོ་རིམ་གཙུག་ལག་སློབ་གཉེར་ཁང་དུ་སློབ་ཕྲུག་གསར་ཞུགས་པ་རྣམས་ལ་ཟུར་སྦྱོང་ཟླ་བ་གསུམ་ལྷག་བཞུགས་གནས་ཁང་པ་རིན་མེད་ཐོག་མཐུན་འགྱུར་ཞུ་བཞིན་པ་དང་། དེ་བཞིན་རྒྱལ་སྤྱིའི་དགེ་ལྡན་ལྷན་ཚོགས་ཀྱི་གོ་སྒྲིག་འོག་གཞུང་ཆེན་རིགས་གཅིག་རྐང་འཛིན་དང་ཉམས་ཞིབ་ལས་གཞི་ཐེངས་གཉིས་པ་འགྲོ་བཞིན་པ། པཱ་ལི་དང་ལེགས་སྦྱར་ཆོས་བརྒྱུད་འཛིན་པའི་བར་ཤེས་ཡོན་བརྗེ་ལེན་གྱི་ལས་གཞི་ཐེངས་བཞི་པ་འགྲོ་བཞིན་པ། རྒྱལ་སྤྱིའི་ངོས་ལེན་ཡོད་པའི་ནང་པའི་སློབ་གཉེར་ཁང་གི་བཅའ་ཁྲིམས་གཏན་འབེབས་དང་འབྲེལ་གསར་འཛུགས་ཞུ་རྒྱུའི་ལས་གཞི་འགྲོ་བཞིན་ཡོད་པས་མཚོན་༸གོང་ས་རྒྱལ་བ་རིན་པོ་ཆེ་མཆོག་གི་བཀའ་དགོངས་གཞིར་བཟུང་ལས་གཞི་མི་ཉུང་བ་ཞིག་ལག་བསྟར་འགྲོ་བཞིན་ཡོད། ཅེས་གསུངས་སོང་།