ཀ་ན་ཌ་ཀ་མཁའ་སྡེའི་གྲོས་ཚོགས་འཐུས་མི་སྐུ་ཞབས་ཨར་ཝི་དྷི་ཤ་པན་དྷེ་ (RV Deshapande) ལགས་ཀྱིས་དགའ་ལྡན་ཤར་རྩེ་ཐོས་བསམ་ནོར་གླིང་སློབ་གྲྭ་དེ་ཉིད་དབུ་བརྙེས་ནས་མི་ལོ་ ༥༥ འཁོར་བའི་མཛད་སྒོའི་ཐོག་སྐད་ཡིག་དང་། རྒྱལ་ཁབ། མངའ་སྡེ། དེ་བཞིན་ཆོས་ལུགས་ལ་ས་མཚམས་ཡོད་ཀྱང་ཤེས་ཡོན་གཅིག་པུ་ལ་ས་མཚམས་མེད་པས་འཛམ་གླིང་ཧྲིལ་པོ་འདི་ལ་བརྟེན་ནས་ཡར་རྒྱས་སུ་འགྲོ་ཡི་ཡོད་སྐོར་གསུངས།
དགའ་ལྡན་ཤར་རྩེ་ཐོས་བསམ་ནོར་གླིང་སློབ་གྲྭ་དེ་ཉིད་དབུ་བརྙེས་ནས་མི་ལོ་ ༥༥ འཁོར་བའི་མཛད་སྒོ་འཚོགས། ༢༠༢༥།༡༢།༢༧ དུས་བབ་ཀྱི་པར།
དེ་རིང་དགའ་ལྡན་ཤར་རྩེ་ཐོས་བསམ་ནོར་གླིང་སློབ་གྲྭ་དེ་ཉིད་དབུ་བརྙེས་ནས་མི་ལོ་ ༥༥ འཁོར་བ་དང་། རྒྱ་གར་དབུས་འབྲིང་རིམ་ཤེས་ཡོན་ལྷན་ཚོགས་ཁོངས་སུ་དེབ་སྐྱེལ་ལེགས་འགྲུབ་བྱུང་བའི་མཛད་སྒོ་འཚོགས་ཡོད་ཅིང་། སྐུ་མགྲོན་དུ་ཀ་ན་ཊ་ཀ་མངའ་སྡེའི་གཞི་རིམ་འོག་མའི་ཤེས་རིག་བློན་ཆེན་སྐུ་ཞབས་མཱ་དྷུ་བྷང་བྷུ་རུ་པཱ་ (Madhu Bangarappa )ལགས་དང་། དགའ་ལྡན་ཕོ་བྲང་གི་དྲུང་ཆེ་ཐུབ་བསྟན་སྦྱིན་པ་ལགས། ༧སྐུའི་གཅུང་མོ་བཀའ་ཟུར་རྗེ་བཙུན་སྒྲོལ་མ་མཆོག བདེ་སྲུང་བཀའ་བློན་རྒྱ་རི་སྒྲོལ་མ་མཆོག དེ་བཞིན་སྤྱི་འཐུས་ཁག་ཅིག་ཕེབས་གནང་འདུག
སྐབས་དེར་སློབ་གྲྭའི་སློབ་སྤྱི་བློ་བཟང་ཚེ་རིང་ལགས་ཀྱིས་ངོ་སྤྲོད་གཏམ་བཤད་གནང་སྐབས། དགའ་ལྡན་ཤར་རྩེ་ཐོས་བསམ་ནོར་གླིང་གྲྭ་ཚང་གི་སློབ་གྲྭ་འདི་ཉིད། གཙོ་བོ་༧སྤྱི་ནོར་ྋགོང་ས་སྐྱབས་མགོན་༧རྒྱལ་དབང་སྐུ་འཕྲེང་བཅུ་བཞི་པ་ཆེན་པོ་མཆོག་གི་བཀའ་དགོངས་ནང་བཞིན། ཕྱི་ལོ་ ༡༩༦༩ ལོར་དགེ་འདུན་པ་རྣམས་སྦག་ས་ཆོས་སྒར་ནས་མོན་གྷོ་གཞིས་ཆགས་སུ་འབྱོར་བའི་མཚམས་དེ་ལ། མ་འོངས་པར་སངས་རྒྱས་ཀྱི་བསྟན་པའི་སོན་རྩའི་ཆེད། གྲྭ་རྒྱུན་སློབ་ཕྲུག་གསར་དུ་འཇུག་རྒྱུ་མགོ་བརྩམས་ཏེ། དེ་ཚོ་ལ་ཤེས་ཡོན་སློབ་སྦྱོང་འཐུས་ཚང་ཡོང་ཆེད། ཕྱི་ལོ་ ༡༩༧༠ ལོར་སློབ་གྲྭ་འདི་ཉིད་གསར་དུ་དབུ་འཛུགས་གནང་བ་རེད། དེའི་སྐབས་ལ་སློབ་ཕྲུག་ ༢༢ ཙམ་ཞིག་མ་གཏོགས་བྱུང་མི་འདུག ཡིན་ནའང་། ཁོང་ཚོ་ལ་ཞལ་འདོན་སྐྱོར་སྦྱོང་བྱ་རྒྱུ་དང༌། ཡི་གེ་འབྲི་ཀློག་བཅས་བསླབས། སློབ་ཁྲིད་བྱ་རྒྱུའི་མགོ་བཙུགས་འདུག རིམ་པས་སྦྱང་ཤིང་སྟེང་ཡིག་གཟུགས་འབྲི་བ་དང༌། བོད་ཀྱི་རིག་གནས་སུམ་རྟགས་དང་སྙན་ངག་བསླབས། ཕྱི་ལོ་ ༡༩༧༥ ལོར་༧སྐྱབས་རྗེ་ཛེ་སྨད་རིན་པོ་ཆེ་མཆོག་དང༌། སྐབས་དེའི་གྲྭ་ཚང་གི་མཁན་གདན་ཟུར་རྣམ་པ། ཝ་ར་ཎ་སི་ནས་ཕེབས་པའི་རང་ཁོངས་མཁས་དབང་དགེ་བཤེས་རྣམ་པ་ཁག་ཅིག་བཅས་ལྷན་འཛོམས་གནང་ནས་སློབ་ཚན་ཁག་གཏན་འབེབས་གནང༌། དེ་ནས་ྋསྐྱབས་རྗེ་ཡོངས་འཛིན་ཁྲི་བྱང་རྡོ་རྗེ་འཆང་ཆེན་པོ་མཆོག་དང་། ༧སྐྱབས་རྗེ་ཟོང་རིན་པོ་ཆེ་རྣམ་གཉིས་ལའང་སྤྱན་འབུལ་ཞུས་པ་རེད། དེ་དུས་གཙོ་བོའི་སློབ་ཚན་མཚན་ཉིད་དང་། ཞར་བྱུང་སློབ་ཚན་དེ་ལ་སྙན་སུམ་དང༌། རྩོམ་རིག རྒྱལ་རབས། ཆོས་འབྱུང༌། ཡིག་གཟུགས། རི་མོའི་སྒྱུ་རྩལ་སོགས་དང་། དེང་དུས་ཀྱི་ཤེས་ཡོན་དབྱིན་ཇིའི་སྐད་ཡིག་དང༌། ཨང་རྩིས་བཅས་ཡོད་པ། སྲོལ་རྒྱུན་དང་དེང་རབས་ཀྱི་ཤེས་ཡོན་ཟུང་དུ་འཇུག་པའི་སློབ་གྲྭ་ཞིག་ཚུགས་ཐུབ་པ་བྱུང་འདུག དེ་ནས་རིམ་པས་ཡར་རྒྱས་ཕྱིན་ནས། ཕྱི་ལོ་ ༢༠༠༧ ལོར་གློག་ཀླད་དང༌། རྒྱ་ཡིག་འཛིན་གྲྭ། རིམ་པས་ཚན་རིག་དང་སྤྱི་ཚོགས་ཚན་རིག་བཅས་ཀྱི་འཛིན་གྲྭ་ཡང་གསར་འཛུགས་གནང་ཡོད། ཅེས་བརྗོད་སོང་།
ཀ་ན་ཌ་ཀ་མཁའ་སྡེའི་གྲོས་ཚོགས་འཐུས་མི་སྐུ་ཞབས་ཨར་ཝི་དྷི་ཤ་པན་དྷེ་ (RV Deshapande) ལགས་མཛད་སྒོར་ཕེབས་ནས་གསུང་བཤད་གནང་། ༢༠༢༥།༡༢།༢༧ དུས་བབ་ཀྱི་པར།
ཡང་ཁོང་གིས། དེང་སྐབས་ལོ་རེ་ནས་ལོ་རེར་ཤེས་ཡོན་ཡིན་ན་རེད། གྲྭ་ཚོགས་ཀྱང་མང་དུ་ཕྱིན་ནས། ད་ལྟའི་འཆར་ལ་སྔོན་འགྲོ་འཛིན་གྲྭ་དང༌། འཛིན་གྲྭ་དང་པོ་ནས་བཅུ་བ་བར་སློབ་ཕྲུག་དྲུག་བརྒྱ་ལྷག་ཡོད། ཕར་ཕྱིན་ནས་འདུལ་བ་འཛིན་གྲྭ་བར་དགེ་འདུན་པ་ཞལ་གྲངས་ ༣༠༠ ལྷག་ཙམ་དེ་འདྲ་ཞིག་ཡོད། རྒྱུགས་སྤྲོད་སྐོར་ལ་ཡིན་ནའང་འཛིན་གྲྭ་སྔོན་འགྲོ་ནས་འཛིན་གྲྭ་ལྔ་བ་བར་ལ་ལོ་རེར་ཟླ་གསུམ་རྒྱུགས་སྤྲོད་དང༌། ཟླ་དྲུག་རྒྱུགས་སྤྲོད། ལོ་འཁོར་རྒྱུགས་སྤྲོད་བཅས་གཏོང་བཞིན་ཡོད། འཛིན་གྲྭ་དྲུག་པ་ནས་འདུལ་བ་འཛིན་གྲྭ་བར་ལ་ལོ་རེར་ཟླ་དྲུག་རྒྱུགས་སྤྲོད་དང་ལོ་འཁོར་རྒྱུགས་སྤྲོད་གཏོང་བཞིན་ཡོད་པ་མ་ཟད། རྒྱུགས་སྤྲོད་ཀྱི་སློབ་ཚན་གཙོ་བོ། མཚན་ཉིད་བྲིས་རྒྱུགས་དང་། རྩོད་རྒྱུགས། བློ་འཛིན། སྙན་སུམ། རྩོམ་རིག རྒྱལ་རབས། ཆོས་འབྱུང་། ཡིག་གཟུགས། རི་མོ། ཚན་རིག སྤྱི་ཚོགས་ཚན་རིག གློག་ཀླད། མ་ཚད་རྒྱ་ཡིག་སྦྱོང་མཁན་ཁག་གཅིག་ལའང་རྒྱ་ཡིག་རྒྱུགས་སྤྲོད་བཅས་བྱེད་ཀྱི་ཡོད། ཕྱི་ལོ་ ༡༩༧༠ ལོར་སློབ་གྲྭ་འདི་ཉིད་དབུ་བརྙེས་པ་ནས་བཟུང་ད་ལྟའི་བར། ཚད་མ་རབ་འབྱམས་པའི་ཕྱག་འཁྱེར་བཞེས་མཁན་དགེ་འདུན་པ་གྲངས་ ༡༣༤༨ དང༌། ཕར་ཕྱིན་རབ་འབྱམས་པའི་ཕྱག་འཁྱེར་བཞེས་མཁན་གྲངས་ ༡༠༢༥ དང་། དབུ་མ་རབ་འབྱམས་པའི་ཕྱག་འཁྱེར་བཞེས་མཁན་གྲངས་ ༩༧༥ །ཆོས་མངོན་པ་རབ་འབྱམས་པ་བཞེས་མཁན་གྲངས་ ༧༥༥། འདུལ་བ་རབ་འབྱམས་པའི་ཕྱག་འཁྱེར་བཞེས་མཁན་ ༦༢༥ བཅས་བྱུང་ཡོད་པ་དག་གིས། ད་ལྟའི་འཆར་གཞུང་ཞབས་ཁག་དང༌། སྐུའི་གསུང་བསྒྱུར། རྒྱལ་སྤྱིའི་ནང་པའི་སྤྱི་ཁྱབ་དྲུང་ཆེ། མཐོ་སློབ་ཁང་གི་སློབ་སྤྱི་དང་སློབ་དགེ། གཏན་ཉིན་སློབ་གྲྭ་ཁག་གི་ལྟ་གྲུབ་སློབ་དཔོན་དང༌། བོད་ཡིག་དགེ་རྒན། བོད་ཕྱི་ནང་གཉིས་སུ་གཞིས་དགོན་གྱི་མཁན་པོ་དང༌། ཕྱི་རྒྱལ་ཆོས་ཚོགས་ཁག་གི་སློབ་དཔོན་སོགས་ལས་རིགས་འདྲ་མིན་ནང་ལ་སློབ་གྲྭ་འདི་ནས་ཐོན་པ་མི་ཉུང་བ་ཞིག་བྱུང་ཡོད། ཕྱི་ལོ་༢༠༢༢ ལོ་ནས་བཟུང༌། ང་ཚོའི་སློབ་གྲྭ་འདི་རྒྱ་གར་དབུས་སློབ་གྲྭ་ (CBSE) ཁོངས་སུ་ཞུགས་པར་ཐབས་ཤེས་མང་པོ་བྱས་ནས། མཐའ་མ་དེར་ཕྱི་ལོ་ ༢༠༢༥ ཟླ་ ༡༡ ཚེས་ ༡༠ ཉིན། རྒྱ་གར་དབུས་འབྲིང་རིམ་ཤེས་ཡོན་ལྷན་ཚོགས་ཟེར་ན་མི་འདུག (CBSE) ཁོངས་སུ་དེབ་སྐྱེལ་ཡིག་ཆ་ཆ་ཚང་ལེགས་གྲུབ་ཟིན། ཞེས་ལས་དོན་དེར་ལམ་སྟོན་ཕྱག་རོགས་གནང་མཁན་ལྷོ་སྤྱི་ལགས་ཀྱི་དབུས་ལས་བྱེད་ཚང་མར་ཐུགས་རྗེ་ཆེ་ཞུས་སོང་།
དགའ་ལྡན་ཤར་རྩེ་ཐོས་བསམ་ནོར་གླིང་སློབ་གྲྭ་དེ་ཉིད་དབུ་བརྙེས་ནས་མི་ལོ་ ༥༥ འཁོར་བའི་མཛད་སྒོའི་ཐོག་ལྷོ་སྤྱི་འཇིགས་མེད་ཚུལ་ཁྲིམས་ལགས་ལ་གསོལ་རེས་གནང་། ༢༠༢༥།༡༢།༢༧ དུས་བབ་ཀྱི་པར།
ཀ་ན་ཌ་ཀ་མཁའ་སྡེའི་གྲོས་ཚོགས་འཐུས་མི་སྐུ་ཞབས་ཨར་ཝི་དྷི་ཤ་པན་དྷེ་ (RV Deshapande) ལགས་ཀྱིས། འཛམ་གླིང་གི་མ་འོངས་པའི་ཆེད་དུ་བུ་ཕྲུག་ཚོ་ལ་གུས་བཀུར་ཞུ་ཡི་ཡོད། ང་སྒེར་ནས་གུས་བཀུར་ཞུ་ཡི་ཡོད། ༧གོང་ས་རྒྱལ་བ་རིན་པོ་ཆེ་མཆོག་ང་ཚོའི་མངའ་སྡེར་ཕེབས་པ་ཧ་ཅང་དགའ་པོ་བྱུང་། ལྷག་པར་དུ་མངའ་སྡེའི་བློན་ཆེན་ཞིག་ཡིན་པའི་ཆ་ནས། ཁྱེད་ཚོ་ཚང་མས་ང་སྐད་བཏང་ནས་དེ་རིང་ཞོགས་པར་ཁོང་གི་བྱིན་རླབས་ཞུ་རྒྱུ་དེ་ངའི་གཟི་བརྗིད་རེད། ཁོང་གི་དུས་ཚོད་ཧ་ཅང་བྲེལ་ཟིང་ཆེ་བའི་དབར་དུའང་ང་ཚོ་དང་འཛམ་གླིང་གང་སར་ནས་ཕེབས་པའི་མི་མང་ལ་མཇལ་ཁ་སྩལ་བ་ནི་གཟི་བརྗིད་ཅིག་དང་། ལྷག་པར་དུ་ཁྱེད་ཚོ་གཞིས་ཆགས་ཆེ་ཤོས་དེ་ཀར་ན་ཊ་ཀ་རུ་ཡོད་པ་དེ་གཟི་བརྗིད་རེད། བོད་དང་རྒྱ་གར་རྒྱལ་ཁབ་གཉིས་ཀྱི་འབྲེལ་ལམ་ཧ་ཅང་བཟང་ཞིང་། རྒྱ་གར་ནི་ང་ཚོ་ཚང་མ་ལ་རྟག་ཏུ་ཡོད། ང་ཚོ་ཚང་མ་རྒྱ་གར་རྒྱལ་ཁབ་ཀྱི་ཆ་ཤས་ཤིག་རེད། དེ་ནི་ང་ཚོས་རྟག་ཏུ་གུས་བཀུར་ཞུ་བའི་བརྩེ་བ་དང་བརྩི་འཇོག་ཞུ་འོས་པ་ཞིག་རེད། ཅེས་གསུངས་སོང་།
ཡང་ཁོང་གིས། ང་རང་ཤེས་རིག་བློན་ཆེན་ཞིག་ཡིན་པའི་ཆ་ནས། ཤེས་ཡོན་ཡག་པོ་སྤྲོད་པར་བཀག་འགོག་གང་ཡང་མེད། ཆོག་མཆན་སྤྲོད་པའི་བརྒྱུད་རིམ་དང་། སློབ་ཁྲིད་བྱེད་པའི་གོ་རིམ་ཁྲོད་ས་མཚམས་གང་ཡང་མེད། སྐད་ཡིག་དང་། རྒྱལ་ཁབ། མངའ་སྡེ། དེ་བཞིན་ཆོས་ལུགས་ལ་ས་མཚམས་ཡོད། འོན་ཀྱང་། ཤེས་ཡོན་གཅིག་པུ་ལ་ས་མཚམས་མེད། འཛམ་གླིང་ཧྲིལ་པོ་ཤེས་ཡོན་ཁོ་ནའི་འོག་ཡར་རྒྱས་འགྲོ་ཡི་རེད། ཞི་བདེ་རྒྱུན་གནས་བྱེད་ཀྱི་རེད། སྨྱུ་གུ་ནི་རལ་གྲི་ལས་རྣོ་བ་རེད། སློབ་ཕྲུག་འདི་ཚོ་ནི་རྒྱལ་ཁབ་འདིའི་མ་འོངས་པ་རེད། ང་རང་ཤེས་རིག་བློན་ཆེན་ཞིག་ཡིན་པའི་ཆ་ནས་འདིར་ཡོང་རྒྱུ་དེ་གཟི་བརྗིད་ཅིག་རེད་ལ། གཞིས་ཆགས་ཆེ་ཤོས་ཤིག་འདིར་ཡོད་པ་དེའང་གཟི་བརྗིད་རེད། ཅེས་སོགས་གསུངས་སོང་།
དགའ་ལྡན་ཤར་རྩེ་ཐོས་བསམ་ནོར་གླིང་སློབ་གྲྭ་དེ་ཉིད་དབུ་བརྙེས་ནས་མི་ལོ་ ༥༥ འཁོར་བའི་མཛད་སྒོ་འཚོགས། ༢༠༢༥།༡༢།༢༧ དུས་བབ་ཀྱི་པར།
དགའ་ལྡན་ཤར་རྩེ་གྲྭ་ཚང་གི་མཁན་རིན་པོ་ཆེ་བྱང་ཆུབ་སངས་རྒྱས་ལགས་ཀྱིས་མཛད་སྒོ་དང་འབྲེལ་བའི་གསུང་བཤད་གནང་སྐབས། འདི་ལོར་༧གོང་ས་རྒྱལ་བ་རིན་པོ་ཆེ་མཆོག་དགུང་གྲངས་དགུ་བཅུར་ཕེབས་པའི་གོ་སྟོན་དང་བསྟུན། བྱམས་བརྩེའི་ལོ་འཛམ་གླིང་ཡུལ་ལུང་གང་སར་ཚོགས་པ་སྒྲིག་འཛུགས་དང་། དད་ལྡན་ཁྲི་འབུམ་མང་པོས་སྲུང་གཙི་ཞུས་དང་ཞུ་བཞིན་པ་ལྟར། འདི་ག་དགའ་ལྡན་ཤར་རྩེ་གྲྭ་ཚང་ནས་ཀྱང་༸རྒྱལ་བའི་གོ་སྟོན་སྲུང་བརྩིའི་ཆེད། གྲྭ་ཚང་དང་སློབ་གྲྭའི་གོ་སྒྲིག་འོག་༸རྒྱལ་བའི་འཁྲུངས་སྐར་དུས་ཆེན་ལོ་ལྟར་སྲུང་བརྩི་ཞུ་མུས་ལྟར་འདི་ལོར་གདན་ས་ཆེན་པོ་དགའ་འབྲས་གཉིས་ཀྱི་གྲྭ་ཚང་བཞིའི་སློབ་གྲྭ་དང་སམ་བྷོ་ཊའི་སློབ་གྲྭའི་སློབ་ཕྲུག་རྣམས་ཀྱིས་༸རྒྱལ་བའི་མཛད་རྣམ་སྐོར་གསུང་བཤད། ༸གོང་ས་མཆོག་ལ་ཨ་རིའི་རྒྱལ་ཡོངས་གསེར་གྱི་གཟེངས་རྟགས་འབུལ་བཞེས་ཀྱི་དུས་དྲན་མཛད་སྒོ་གདན་ས་ཆེན་པོ་དགའ་འབྲས་གཉིས་ཀྱི་གྲྭ་ཚང་བཞིའི་སློབ་དགེ་དང་སམ་བྷོ་ཊའི་སློབ་དགེ་བཅས་ཀྱིས་༸རྒྱལ་བའི་མཛད་གཞིས་སྤྱིའི་ནོར་བུ་རིར་དགའ་ལྡན་ཤར་རྩེ་གྲྭ་ཚང་གིས་ལོ་ལྟར་གོ་སྒྲིག་ཞུས་ཏེ་ལོ་ངོ་ ༡༨ འཁོར་བ་འདི་ལོར་མཛད་རྣམ་སྐོར་གསུང་བཤད། གྲྭ་ཚང་གི་ཚན་རིག་སྡེ་ཚན་གིས་གོ་སྒྲིག་ཞུས་ཏེ་ཚན་རིག་གི་བགྲོ་གླེང་དང་མཁས་པའི་གསུང་བཤད། གྲྭ་ཚང་གི་སློབ་གཉེར་ལྷན་ཚོགས་དང་དཔེ་མཛོད་ཀྱིས་གོ་སྒྲིག་ཞུས་ཏེ། ཚད་ཆེན་རྩ་འགྲེལ་མཁས་པའི་འཆད་ཁྲིད་དང༌། ཆོས་བརྒྱུད་རིས་མེད་གསང་སྔགས་བགྲོ་གླེང་ཆེན་མོ་སོགས་འཚོགས་ཟིན་པ་དང་། འདི་ལོའི་བོད་ཟླ་ ༡༢ ཚེས་ ༣ ནས་ཉིན་ལྔའི་རིང་གྲྭ་ཚང་གི་ཤེས་ཡོན་ལྷན་ཚོགས་ཀྱི་གོ་སྒྲིག་འོག བོད་ཀྱི་མཐོ་རིམ་སློབ་མའི་ཚོགས་ཆེན་འཚོག་གཏན་ཁེལ་ཡོད་ལ། སྐབས་དེར་ནང་ཆོས་དང༌། བོད་ཀྱི་སྐད་ཡིག ལྷག་པར་༸རྒྱལ་བའི་མཛད་རྣམ་དང་ཕྱག་དེབ་སྐོར་བགྲོ་གླེང་གནང་གཏན་ཁེལ་ཡོད། ཅེས་གསུངས་སོང་།
ཡང་མཁན་རིན་པོ་ཆེ་མཆོག་གིས། ༸གོང་ས་༧རྒྱལ་བ་རིན་པོ་ཆེ་མཆོག་གི་བཀའ་དགོངས་བཞིན། སློབ་གྲྭ་འདི་ཉིད་རྒྱ་གར་དབུས་འབྲིང་རིམ་ཤེས་ཡོན་ལྷན་ཚོགས་ (CBSE) ཁོངས་སུ་དེབ་སྐྱེལ་ལེགས་གྲུབ་བྱུང་བ་འདི་ལ་བརྟེན་ནས། སློབ་ཕྲུག་རྣམས་ཀྱི་གནའ་དེང་ཤེས་ཡོན་གནས་ཚད་གོང་མཐོར་འགྲོ་རྒྱུ་དང༌། སློབ་གྲྭ་ཐོན་རྗེས་འཛམ་གླིང་ཡུལ་ལུང་གང་སར་བསྟན་འགྲོའི་དོན་རྒྱ་ཆེན་པོ་བསྒྲུབ་རྒྱུར་ཕན་ཐོགས་རླབས་ཆེན་པོ་ཡོང་རྒྱུའི་རེ་བ་ཙམ་དུ་མ་ཟད། འགན་འཁྲི་ཡོད་པའི་ལས་སྣེ་སྤྱི་དང༌། ལྷག་པར་སློབ་གྲྭའི་དགེ་སློབ་ཡོངས་ཀྱིས་འབད་བརྩོན་སྒོ་ཀུན་ནས་ཞུ་རྒྱུར་ཆོད་སེམས་བརྟན་པོ་ཡོད་དགོས། རྒྱ་གར་དབུས་དང་ས་གནས་གཞུང་ནས་ཀྱང་ལམ་སྟོན་དང་མཐུན་འགྱུར་གནང་སྐྱོང་ཡོང་བའི་རེ་སྐུལ་ཞུ་བཞིན་ཡོད། ཅེས་དང་། ཡང་ཁོང་གིས། སློབ་ཕྲུག་སྟོང་ཕྲག་མང་པོར་ལོ་ངོ་ ༢༠ ལྷག་གི་རིང་། གཞུང་ཆེན་སློབ་གཉེར་གཙོར་བཟུང་ཐོག་བོད་ཀྱི་སྙན་སུམ་རིག་གནས་དང་། རྒྱལ་རབས་ཆོས་འབྱུང་། དེང་རབས་ཀྱི་སྐད་ཡིག་དང་ཨང་རྩིས། ཚན་རིག་བཅས་གནའ་དེང་ཤེས་ཡོན་ཕུན་སུམ་ཚོགས་པ་འདབ་གཤོག་གཉིས་ལྡན་སྐྱེས་སྲིང་བྱེད་བཞིན་ཡོད་པ་དང་། རང་རེའི་ཆོས་དང་རིག་གཞུང་ལོ་ངོ་སྟོང་ཕྲག་གི་ལོ་རྒྱུས་ཡོད་པ་འཛམ་གླིང་གི་གཅེས་ནོར་དུ་གྱུར་བ་འདི་ཉིད་སྒོ་མོ་ཡངས་པོར་ཕྱེས་ཡོད་པས། བོད་མིའི་གཞིས་ཆགས་དང་རྒྱ་བལ་འབྲུག་གསུམ། ཕྱི་རྒྱལ་ཡུལ་ལུང་གང་ས་ནས་སློབ་གྲྭ་འདིའི་ནང་འཛུལ་ཞུགས་བྱེད་མཁན་གང་མང་ཡོང་བའི་རེ་སྐུལ་ཞུ་བཞིན་ཡོད། ཅེས་གསུངས་སོང་།
གསར་འགོད་པ། དཔལ་ལྡན་གྱིས་སྒོ་མང་ཟུང་ཆུ་ཁང་ཚན་ནས་སྤེལ། རྩོམ་སྒྲིག་བྱེད་མཁན། པདྨ་མཚོ།
