བལ་བཟའ་ཁྲི་བཙུན་བལ་ཡུལ་གྱི་ལོ་རྒྱུས་མི་སྣའི་ཁོངས་སུ་འཇུག་དགོས་པའི་རེ་སྐུལ་ཞུ་བཞིན་འདུག

བལ་ཡུལ་གཞུང་གིས་རྒྱ་ནག་གཅིག་གི་སྲིད་ཇུས་ལ་བསྟུན་མཁས་ཀྱིས་བལ་བཟའ་ཁྲི་བཙུན་བལ་ཡུལ་གྱི་ལོ་རྒྱུས་མི་སྣའི་ཁོངས་སུ་ཕྱིར་བཏོན་ཡོད་པར་བརྟེན། ད་ལྟ་བལ་ཡུལ་གཞུང་གིས་བལ་བཟང་ཁྲི་བཙུན་གྱི་ལོ་རྒྱུས་ཀྱི་གལ་གནད་ལ་གཞིགས་ནས་རྒྱལ་ཁབ་ཀྱི་ལོ་རྒྱུས་མི་སྣའི་ཁོངས་སུ་འཇུག་དགོས་པའི་རེ་འདུན་འདོན་གྱིན་འདུག

བལ་ཡུལ་གྱི་ལོ་རྒྱུས་མི་སྣའི་ཁྲོད་བལ་བཟའ་ཁྲི་བཙུན་གྱི་ལོ་རྒྱུས་ཐོ་འགོད་བྱས་མེད་པའི་གནད་དོན་གླེང་སློང་བྱུང་བ་དང་འབྲེལ། བལ་ཡུལ་གྱི་བྷག་མཱ་ཏི་  (Bagmati) མངའ་སྡེའི་འཛུགས་སྐྲུན་ཡར་རྒྱས་ལྷན་ཁང་གིས། བལ་ཡུལ་གྱི་ལི་ཙ་བི་རྒྱལ་རྒྱུད་ཀྱི་བཟོ་བཀོད་ལྟར་བལ་བཟའ་ཁྲི་བཙུན་གྱི་འཁྲུངས་ཡུལ་བསྐྱར་བཞེངས་བྱ་རྒྱུ་ཡིན་པ་དང་། འཛུགས་སྐྲུན་ལས་གཞི་དེའི་ཆེད་རྩིས་ལོ་ ༢༠༢༥ དང་ ༢༠༢༦ ལོའི་ནང་བལ་སྒོ་ས་ཡ་ ༡༠ འགྲོ་གྲོན་གཏན་འབེབས་བྱས་ཡོད་འདུག

བལ་ཡུལ་གཞུང་གིས། ཕྱི་ལོ་ ༢༠༡༧ ལོར་རྒྱ་ནག་གཅིག་གི་སྲིད་ཇུས་ལ་བསྟུན་མཁས་ཀྱིས། རྒྱ་ནག་གི་ལོ་རྒྱུས་ནང་བལ་བཟའ་ཁྲི་བཙུན་སྐོར་གྱི་ལོ་རྒྱུས་གཅིག་ཀྱང་གསལ་མེད་པ་དང་བལ་ཡུལ་གྱི་ལོ་རྒྱུས་ནང་དུའང་བལ་བཟའ་ཁྲི་བཙུན་གྱི་ལོ་རྒྱུས་ཁ་གསལ་མེད་ཟེར་བ་སོགས་ལ་ཁ་གཡར་ནས། བལ་བཟའ་ཁྲི་བཙུན་བལ་ཡུལ་གྱི་ལོ་རྒྱུས་མི་སྣའི་ཁོངས་ནས་ཕྱིར་འདོན་བྱས་ཡོད་ཀྱང་། བལ་ཡུལ་གཞུང་གིས་བལ་བཟའ་ཁྲི་བཙུན་གྱི་སྐོར་ལ་ཞིབ་འཇུག་ཡག་པོ་བྱས་མེད་ཁར། བལ་ཡུལ་གྱི་ལོ་རྒྱུས་སྨྲ་བ་དང་རྩོམ་པ་པོ་སོགས་ཀྱིས་བལ་བཟའ་ཁྲི་བཙུན་གྱི་ལོ་རྒྱུས་རྟོག་བཟོ་བྱས་པའི་གནས་ཚུལ་ཡོད་སྟབས། ད་ལྟ་བལ་ཡུལ་གྱི་ལོ་རྒྱུས་ལས་བོད་ཀྱི་ལོ་རྒྱུས་ལ་ཕྱིར་མིག་བལྟས་ནས་བལ་བཟའ་ཁྲི་བཙུན་བལ་ཡུལ་གྱི་ལོ་རྒྱུས་མི་སྣའི་ཁོངས་སུ་འཇུག་དགོས་པའི་རེ་སྐུལ་ཞུ་བཞིན་ཡོད་འདུག

བལ་ཡུལ་གྱི་ (risingnepaldaily) གསར་ཁང་གི་གནས་ཚུལ་ལྟར་ན། བལ་ཡུལ་གཞུང་གིས་བལ་བཟའ་ཁྲི་བཙུན་རྒྱ་ནག་ལ་མནའ་མའི་ནོར་སྐལ་དུ་བྱིན་པ་བརྒྱུད་བལ་ཡུལ་གྱི་ནང་ཆོས་ཉར་ཚགས་བྱེད་ཐུབ་ཡོད་པར་བརྟེན་ནས། རྒྱ་ནག་གིས་འཛམ་གླིང་ནང་པའི་ཚོགས་ཆེན་ཐོག་མ་འཚོགས་ཐུབ་ཡོད་པ་དང་། བལ་ཡུལ་གྱི་འཛམ་གླིང་ནང་པའི་ཚོགས་ཆེན་སྐབས་གསུམ་པ་གོ་སྒྲིག་བྱེད་ཐུབ་ཡོད་སྐོར་བརྗོད་འདུག་ཀྱང་། གསར་ཁང་འདིས་དེ་ནི་བོད་ཀྱི་ལོ་རྒྱུས་རྒྱ་བསྒྱུར་བྱེད་ཐབས་ཤིག་ཡིན་པ་མ་ཟད། བལ་ཡུལ་གཞུང་གིས་བལ་བཟའ་ཁྲི་བཙུན་སྐོར་ལ་ཤེས་རྟོགས་ཡོད་བཞིན་དུ་བལ་ཡུལ་བཟའ་ཁྲི་བཙུན་གྱི་གལ་གནད་ཆེ་བའི་དོན་དངོས་ལོ་རྒྱུས་གླེང་སློང་བྱས་མེད་སྐོར་སོགས་བརྗོད་འདུག

ཕྱི་ལོ་ ༡༩༥༥ ལོར་བལ་ཡུལ་གཞུང་གིས། བལ་བཟའ་ཁྲི་བཙུན་ནི་བལ་ཡུལ་གྱི་ནང་པའི་རིག་གཞུང་གི་ཕོ་ཉ་དང་ཞི་བདེའི་མཚོན་རྟགས་སུ་ངོས་འཛིན་གྱིས་རྒྱལ་ཁབ་ཀྱི་ལོ་རྒྱུས་མི་སྣ་ཞིག་ཏུ་གཟེངས་བསྟོད་གནང་། འོན་ཀྱང་། ཕྱི་ལོ་ ༢༠༡༧ ལོར་བལ་ཡུལ་དེ་སྤྱི་མཐུན་རྒྱལ་ཁབ་ཅིག་ཏུ་བསྒྱུར་བ་དང་བསྟུན། བལ་བཟའ་ཁྲི་བཙུན་གཙོ་བྱས་པའི་བལ་ཡུལ་གྱི་མི་སྣ་ ༡༧ རྒྱལ་ཁབ་ཀྱི་ལོ་རྒྱུས་མི་སྣའི་ཁོངས་ནས་ཕྱིར་བཏོན་ཡོད་འདུག

འདི་གའི་གསར་འགོད་པ་ཕྱི་ལོ་ ༢༠༡༩ ལོར་ང་ཡི་བཙན་བྱོལ་བའི་ལས་རིམ་ཆེད་བལ་ཡུལ་དུ་སྐོར་སྐྱོད་བྱས་པ་དང་བསྟུན། བལ་བཟའ་ཁྲི་བཙུན་གྱི་ཕོ་བྲང་ལ་ཆེད་དུ་ཕྱིན་ནས་ཞིབ་འཇུག་བྱེད་ཐབས་བྱས་ནའང་། བལ་བཟའ་ཁྲི་བཙུན་གྱི་ཕོ་བྲང་ནང་ལོགས་སུ་པར་ཆས་དང་བརྙན་ལེན་མི་ཆོག་པ་མ་ཟད། ཕོ་བྲང་ནང་ལོགས་སུ་གསང་མིག་པར་ཆས་དང་སྐོར་སྲུང་བ་འགྲེམས་འཇོག་བྱས་ཏེ་ལྟ་རྟོག་ནན་མོ་བྱེད་བཞིན་འདུག་པས། ཕོ་བྲང་གི་ནང་གི་བཟོ་བཀོད་སོགས་ཀྱི་གནས་བབ་སྐོར་ལ་རྒྱུས་ལོན་ཚད་ལྡན་ཞིག་བྱེད་ཐུབ་མེད། འོན་ཀྱང་། གསར་འགོད་པས་ཕོ་བྲང་དངོས་སུ་མཐོང་བའི་མྱོང་ཚོར་ལྟར་ན།   བལ་བཟའ་ཁྲི་བཙུན་གྱི་ཕོ་བྲང་དེ་རྒྱལ་ས་ཀ་ཐི་མན་ཌིའི་ཤར་ཕྱོགས་སུ་ཡོད་པའི་ལྷ་ཁང་གི་གྲོང་ཁྱེར་ཞེས་འབོད་སྲོལ་ལྡན་པའི་ (Bhaktapur) ཞེས་པའི་ས་གནས་སུ་ཆགས་འདུག་ལ། ས་གནས་དེར་ཀ་ཐི་མན་ཌི་ནས་སྤྱི་ལེ་ ༡༣ ལྷག་ཙམ་དང་རླངས་འཁོར་ལ་བསྡད་ནས་སོང་ན་ཆུ་ཚོད་གཅིག་མ་ཟིན་ཙམ་རིང་འགྲོ་དགོས་ཀྱི་འདུག ཕོ་བྲང་ནང་གི་བཟོ་བཀོད་མང་ཆེ་བ་རྙིང་བར་གྱུར་ཏེ། རྩིག་གྱང་སོགས་སུ་ལྡུམ་བུས་ཁེངས་འདུག་ལ། ཕོ་བྲང་ནང་དུ་འཛུལ་བ་དང་ཧིན་རྡུའི་ལྷ་ཁང་ཞིག་ལོས་ཡིན་བསམ་པའི་ཚོར་སྣང་ཞིག་ངང་གིས་སྟེར་ཡོང་ལ། ཕོ་བྲང་གི་དཀྱིལ་དུ་དམར་མཆོད་བྱེད་ཡུལ་ཞིག་དང་རྒྱབ་ལོགས་སུ་བལ་བཟའ་ཁྲི་བཙུན་གྱི་ཁྲུས་རྒྱག་ཡུལ་གྱི་རྫ་བུ་ཞིག་ཀྱང་འདུག

བལ་བཟའ་ཁྲི་བཙུན་ནི་ཕྱི་ལོ་ ༦༠༤ ལོར་འཁྲུངས་པའི་བལ་ཡུལ་གྱི་རྒྱལ་པོ་འོད་ཟེར་གོ་ཆའི་སྲས་མོ་ཡིན་པ་དང་། དུས་རབས་བདུན་པར་པུར་རྒྱལ་བོད་ཀྱི་རྒྱལ་པོ་སྲོང་བཙན་སྒམ་པོས་བོད་དུ་གཉེན་ལ་བསླངས། བལ་ཡུལ་རྒྱལ་པོས་བལ་བཟའ་ཁྲི་བཙུན་གྱི་སྐུ་སྐལ་དུ་ཤཱཀྱ་ཐུབ་པ་དགུང་ལོ་བརྒྱད་ཀྱི་སྐུ་ཚད་ཡིན་པའི་ཇོ་བོ་མི་བསྐྱོད་རྡོ་རྗེ་དང་། ཙན་དན་གྱི་སྒྲོལ་མ། བྱམས་པ་ཆོས་འཁོར་སོགས་བརྫངས་ནས་བོད་དུ་ཕེབས་སྐྱེལ་གནང་། ཇོ་བོ་མི་བསྐྱོད་རྡོ་རྗེ་ད་ལྟའང་བོད་ཀྱི་རྒྱལ་ས་ལྷ་སའི་ར་མོ་ཆེ་གཙུག་ལག་ཁང་དུ་མཇལ་རྒྱུ་ཡོད་ལ། བོད་ཀྱི་བརྩི་སྲོལ་ལྟར་ན་བལ་བཟའ་ཁྲི་བཙུན་ནི་རྗེ་བཙུན་སྒྲོལ་མའི་སྤྲུལ་བ་ཡིན་ཞིང་དུས་རབས་བདུན་པའི་ནང་བོད་ཀྱི་བཟོ་བཀོད་རིག་པའི་ཐད་མཛད་རྗེས་བཞག་ཡོད་པར་གྲགས།

གསར་འགོད་པ། སྐལ་བཟང་སྦྱིན་པ།