༸གོང་ས་རྒྱལ་བ་རིན་པོ་ཆེ་མཆོག་བཞུགས་སྒར་རྒྱལ་བའི་ཕོ་བྲང་དུ་ཞབས་སོར་བདེ་བར་འཁོད་སོང་།

དེ་རིང་ཕྱི་ཚེས་ ༡༣ ཉིན་༸གོང་ས་མཆོག་གི་རྒྱ་གར་ལྷོ་ཕྱོགས་ཀྱི་ཟླ་གཉིས་རིང་གི་མཛད་འཕྲིན་ཁག་ལེགས་པར་གྲུབ་སྟེ་བཞུགས་སྒར་རྒྱལ་བའི་ཕོ་བྲང་དུ་ཞབས་སོར་བདེ་བར་འཁོད་སོང་།

དེ་རིང་སྔ་དྲོའི་ཆུ་ཚོད་ ༩།༣༠ ཙམ་ལ་༸གོང་ས་རྒྱལ་བ་རིན་པོ་ཆེ་མཆོག་གྷ་གྷལ་གནམ་ཐང་བརྒྱུད་བཞུགས་སྒར་དུ་ཆིབས་བསྒྱུར་བསྐྱངས་སོང་བ་དང་། སྐབས་དེར་གྷ་གྷལ་གནམ་ཐང་དུ་བཞུགས་སྒར་ཁུལ་གྱི་སེར་སྐྱ་མི་མང་དང་ས་རཱ་མཐོ་སློབ་ཀྱི་དགེ་ལས་སློབ་ཕྲུག་རྣམ་པ་བཅས་མི་གྲངས་བརྒྱ་ཕྲག་ལྷག་གིས་ལག་ཏུ་མཇལ་དར་དང་ཕྲེད་དར་སོགས་བཟུང་ནས་དགའ་དད་སྤྲོ་གསུམ་གྱི་ངང་ནས་ཕེབས་ཞུས་པ་མ་ཟད། དྷ་ཤོད་དང་མེག་གྷན་སྤྱི་སྤྱོད་རླངས་འཁོར་འབབ་ཚིགས་ནས་ཕོ་བྲང་གི་སྒོ་འགྲམ་བར་དུ་བོད་མིའི་སྒྲིག་འཛུགས་ཀྱི་ལས་བྱེད་རྣམ་པ་དང་གཞུང་འབྲེལ་མིན་པའི་ཚོགས་སྡེ་ཁག་གི་སྐུ་ཚབ་དང་མི་མང་བཅས་སེར་སྐྱ་མི་མང་སྟོང་ཕྲག་ལྷག་གིས་༸མགོན་པོ་གང་ཉིད་མཆོག་ལ་ཕེབས་བསུ་ཞུས་སོང་།

ཟླ་འདིའི་ཕྱི་ཚེས་ ༩ ཉིན་༸གོང་ས་རྒྱལ་བ་རིན་པོ་ཆེ་མཆོག་གི་རྒྱ་གར་ལྷོ་ཕྱོགས་ཀྱི་ཟླ་གཉིས་རིང་གི་མཛད་འཆར་ཁག་ལེགས་པར་གྲུབ་སྟེ་རྒྱ་གར་གྱི་རྒྱལ་ས་ལྡི་ལིར་ཞབས་སོར་བདེ་བར་འཁོད་ཡོད། འདས་ལོའི་ཕྱི་ཟླ་ ༡༢  ཚེས་ ༡༢ ཉིན་༸གོང་ས་རྒྱལ་བ་རིན་པོ་ཆེ་མཆོག་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་དུ་རྟེན་གཞི་བྱས་པའི་འབྲས་སྤུངས་སྒོ་མང་གྲྭ་ཚང་དུ་ཟླ་གཉིས་རིང་བཞུགས་ཏེ་ས་གནས་སུ་མཛད་འཕྲིན་རྒྱ་ཆེན་བསྐྱངས་ཡོད་པ་དང་། དགའ་ལྡན་ཕོ་བྲང་གི་མཛད་འཕྲིན་ལ་གཞིགས་ན། ཟླ་གཉིས་ཙམ་གྱི་རིང་༸གོང་ས་རྒྱལ་བ་རིན་པོ་ཆེ་མཆོག་ནས་རྒྱ་གར་གྱི་ཡུལ་མི་ ༢༥༨༥ དང་། ཕྱི་རྒྱལ་བ་ ༡༤༨༠།  བོད་དང་ཧི་མ་ལ་ཡའི་རི་རྒྱུད་ཀྱི་དད་ལྡན་ ༡༢༡༩༣ བཅས་ཁྱོན་དད་ལྡན་དོན་གཉེར་བ་མི་གྲངས་ ༡༦༢༥༨ ལྷག་ལ་མཇལ་ཁ་བསྩལ་འདུག གཞན་ཡང་། ཕྱི་ཟླ་ ༡༢ ཚེས་ ༢༤ ཉིན་༸རྒྱལ་བ་སྐུ་ཕྲེང་གཉིས་པ་དགེ་འདུན་གྲུབ་པ་དང་། སྐུ་ཕྲེང་ལྔ་པ་ངག་དབང་བློ་བཟང་རྒྱ་མཚོ་མཆོག སྐུ་ཕྲེང་བཅུ་གསུམ་པ་ཐུབ་བསྟན་རྒྱ་མཚོ་མཆོག་བཅས་ཀྱིས་འབྲས་སྤུངས་ཁྲི་པ་མཛད་པའི་ལོ་རྒྱུས་གཞིར་བཟུང་སྐུ་ཕྲེང་བཅུ་བཞི་པ་མཆོག་འབྲས་སྤུངས་ཁྲི་པར་མངའ་གསོལ་མཛད་ཡོད་པ་དང་། དེ་བཞིན་འབྲས་སྤུངས་སྒོ་མང་གི་མཁན་པོ་བླ་སྤྲུལ་རྣམ་པས་སྤྱི་མོས་ཐོག་ནས་དཔལ་ལྡན་འབྲས་སྤུངས་གྲྭ་ཚང་གི་༸གོང་ས་རྒྱལ་བ་རིན་པོ་ཆེ་མཆོག་གི་ཕོ་བྲང་དང་ཆོས་ར་གསར་པ་བཅས་དགའ་ལྡན་ཕོ་བྲང་ལ་ཕུལ་ཡོད་འདུག

དགའ་ལྡན་ཕོ་བྲང་གི་དྲ་ངོས་སུ་གསལ་བའི་མཛད་འཆར་ལྟར་ན། ཕྱི་ཟླ་ ༢ ཚེས་ ༢༣ ཉིན་ཐེག་ཆེན་ཆོས་གླིང་གཙུག་ལག་ཁང་དུ་༸གོང་ས་རྒྱལ་བ་རིན་པོ་ཆེ་མཆོག་ལ་རྒྱལ་སྤྱིའི་བོད་ཀྱི་ཆབ་སྲིད་བཙོན་ཟུར་ཚོགས་པ་དང་། སུད་སི་ལྷ་ས་བུའི་མཐུན་གྲོགས་ཚོགས་པ་གཉིས་ནས་ཇི་ལྟར་གསོལ་བ་བཏབ་པ་ལྟར་སྒྲོལ་དཀར་ཡིད་བཞིན་འཁོར་ལོའི་ཆོ་གའི་སྒོ་ནས་བརྟན་བཞུགས་བསྟར་འབུལ་ཞུ་རྒྱུ་ཡིན་འདུག

གསར་འགོད་པ། སྐལ་བཟང་སྦྱིན་པ།