ཟླ་འདིའི་ཕྱི་ཚེས་ ༧ ནས་ ༩ བར་གངས་ཅན་སྐྱིད་གཤོངས་སུ་བོད་དོན་རྒྱབ་སྐྱོར་བ་བརྒྱ་ལྷག་འདུ་འཛོམས་ཀྱིས་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་དམིགས་བསལ་ཚོགས་ཆེན་འཚོག་གིན་འདུག
དེ་རིང་སྔ་དྲོ་ཆུ་ཚོད་ ༩ ཙམ་གྱི་སྟེང་བོད་མིའི་སྒྲིག་འཛུགས་ཀྱི་སྲིད་སྐྱོང་ཚོགས་ཁང་དུ་ཉིན་གསུམ་རིང་གི་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་དམིགས་བསལ་ཚོགས་ཆེན་དབུ་འཛུགས་ཞུས་སོང་བ་དང་། མཛད་སྒོའི་ཐོག་འཛམ་གླིང་རྒྱལ་ཁབ་ ༣༢ ནས་བོད་དོན་རྒྱབ་སྐྱོར་བ་མི་གྲངས་ ༡༠༠ ལྷག་འཛོམས་འདུག་ལ། ཚོགས་འདུ་དབུ་འཛུགས་ཀྱི་མཛད་སྒོ་གྲོལ་བ་དང་ལྷན་དུ། ཚོགས་ཆེན་གྱི་བསྒྲགས་གཏམ་ཞིག་སྤྱི་མོས་ཐོག་ཡོངས་བསྒྲགས་གནང་སོང་།
ད་ལན་གྱི་ཚོགས་འདུ་དེ་ནི་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་མཐུན་འགྱུར་འོག་རྒྱ་གར་གྱི་བོད་དོན་རྒྱབ་སྐྱོར་ཚོགས་པས་གོ་སྒྲིག་གནང་ཡོད་པ་ལྟར། སྐབས་དེར་རྒྱ་གར་བོད་དོན་རྒྱབ་སྐྱོར་ཚོགས་པའི་ཚོགས་གཙོ་རིན་ཆེན་མཁན་འགྲོ་ཁེར་མེ་ལགས་ཀྱིས་ཕེབས་བསུའི་གསུང་བཤད་གནང་སྐབས། སྲིད་སྐྱོང་སྤེན་པ་ཚེ་རིང་མཆོག་ལ་སྔོན་འགྲོའི་འོས་བསྡུའི་ནང་རྒྱལ་ཁ་ཐོབ་པར་འཚམས་འདྲི་ཞུས་པ་དང་སྦྲགས། རྒྱ་གར་བོད་དོན་རྒྱབ་སྐྱོར་ཚོགས་པ་དབུ་འཛུགས་གནང་བའི་བརྒྱུད་རིམ་དང་ད་ལྟའི་ཆར་རྒྱ་གར་ནང་བོད་དོན་རྒྱབ་སྐྱོར་ཚོགས་པ་ ༣༠ ཡོད་སྐོར་དང་། ཐེངས་འདིར་དྷ་རམ་ས་ལར་བོད་དོན་རྒྱབ་སྐྱོར་ཚོགས་ཆེན་ཚོགས་ཏེ་བོད་ཀྱི་བདེན་པའི་འཐབ་རྩོད་ལ་རྒྱབ་སྐྱོར་དང་བོད་མིའི་རང་དབང་སླར་གསོ་མ་ཐུབ་ཀྱི་བར་དུ་བོད་ཀྱི་བདེན་པའི་འཐབ་རྩོད་རྒྱུན་སྐྱོང་དང་དེར་མུ་མཐུད་རྒྱབ་སྐྱོར་བྱ་རྒྱུ་གལ་ཆེན་ཡིན་པའི་འབོད་སྐུལ་ཞུས་སོང་། སྲིད་སྐྱོང་སྤེན་པ་ཚེ་རིང་མཆོག་གིས། ད་ལྟ་བོད་མིའི་སྒྲིག་འཛུགས་ཀྱི་སྲིད་བྱུས་ལམ་དབུ་མ་ཡིན་པ་ལྟར་འཐབ་ཇུས་ལ་འགྱུར་བ་བཏང་སྟེ། རྒྱལ་སྤྱིའི་སྟེང་བོད་དེ་ལོ་རྒྱུས་ཀྱི་ཐོག་ནས་རང་བཙན་གཙང་མའི་རྒྱལ་ཁབ་ཅིག་ཡིན་པར་རྒྱབ་སྐྱོར་ཐོབ་ཐབས་གནང་བཞིན་ཡོད་སྐོར་དང་། དབྱིན་ཡུལ་དང་ཡུ་རོབ་མཐུན་ཚོགས་ཀྱི་ཚོགས་མི་རྒྱལ་ཁབ་ཁག་གི་ནང་གལ་གནད་ཆེ་བའི་བོད་ཀྱི་ལོ་རྒྱུས་ཀྱི་གནད་དོན་ཐོག་རྒྱབ་སྐྱོར་འཚོལ་ཐབས་བྱ་རྒྱུ་ཡིན་སྐོར། དེ་བཞིན་འདས་ལོའི་ཕྱི་ཟླ་ ༧ ཚེས་ ༢ ཉིན་༸གོང་ས་རྒྱལ་བ་རིན་པོ་ཆེ་མཆོག་གིས་༸སྐུའི་ཡང་སྲིད་ཕེབས་ཕྱོགས་ཀྱི་ཐུགས་ཐག་བཅད་པའི་གནད་དོན་ཐོག་རྒྱལ་སྤྱིའི་རྒྱབ་སྐྱོར་ཐོབ་དང་ཐོབ་བཞིན་ཡོད་པ་ལྟར་བོད་མིའི་སྒྲིག་འཛུགས་ངོས་ནས་མུ་མཐུད་རྒྱབ་སྐྱོར་འཚོལ་ཐབས་བྱ་རྒྱུ་ཡིན་སྐོར། ཐེངས་འདིའི་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་དམིགས་བསལ་ཚོགས་འདུའི་སྟེང་དུ་ཕེབས་པའི་སྐུ་མགྲོན་རྣམས་གསུམ་བཅུའི་དུས་དྲན་གྱི་མཛད་སྒོའི་སྐུ་མགྲོན་དུ་ཕེབས་རྒྱུ་ཡིན་པ་དེས་བོད་ཀྱི་ལོ་རྒྱུས་དང་ཆབ་སྲིད་ཀྱི་ཐོག་ནས་གནད་འགོག་ཆེན་པོ་མཚོན་ཐུབ་ཀྱི་ཡོད་སྐོར་སོགས་གསུངས་སོང་།
བསྒྲགས་གཏམ་དེའི་ནང་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་ཚོགས་མི་ཡོངས་ནས་འདི་ལོར་༸གོང་ས་རྒྱལ་བ་རིན་པོ་ཆེ་མཆོག་དགུང་གྲངས་ ༩༠ ཕེབས་པའི་འཁྲུངས་སྐར་སྲུང་གཙིའི་ལས་རིམ་བྱམས་བརྩེའི་ལོ་སྲུང་གཙི་ཞུ་བཞིན་པར་༸མགོན་པོ་གང་ཉིད་མཆོག་ལ་འཚམས་འདྲི་དང་འབྲེལ་སྐུ་ཚེ་བསྐལ་བརྒྱར་བརྟན་པའི་སྨོན་འདུན་ཞུས། ཕྱི་ལོ་ ༢༠༢༥ ཟླ་ ༧ ཚེས་ ༢ ཉིན་༸གོང་ས་མཆོག་གིས་དགའ་ལྡན་ཕོ་བྲང་མུ་མཐུད་གནས་ངེས་ཡིན་པ་དང་ཡང་སྲིད་མུ་མཐུད་ཕེབས་རྒྱུའི་ཞལ་བཞེས་བསྩལ་བར་བཀའ་དྲིན་ཆེ་ཞུས་དང་འབྲེལ། ༸གོང་ས་མཆོག་གི་ཐུགས་ཐག་དེར་བོད་དོན་རྒྱབ་སྐྱོར་ཚོགས་པ་ཡོངས་ནས་སྤྱི་མོས་རྒྱབ་སྐྱོར་དང་སྐུའི་ཡང་སྲིད་ཀྱི་གནད་དོན་ཐོག་གི་བསྒྲགས་གཏམ་དེ་ཉིད་མཐར་ཐུག་གི་དབང་ཚད་ཡིན་པར་ངོས་འཛིན་ཞུས་ཡོད། རྒྱ་ནག་གཞུང་གིས་གལ་གནད་ཆེ་བའི་བོད་ཀྱི་ཆོས་ཕྱོགས་ཀྱི་བྱེད་སྒོ་དེར་ཐེ་བྱུས་བྱས་ཚེ། དེ་ནི་རྒྱལ་སྤྱིའི་ཆོས་དད་རང་དབང་གི་གཞི་རྩའི་ཐོབ་ཐང་ལ་ཚབས་ཆེ་བའི་རྩིས་མེད་རྡོག་རོལ་བཏང་བར་ངོས་འཛིན་བྱས་ཏེ། ཐེ་བྱུས་དེའི་རིགས་ལ་ངོ་རྒོལ་དང་གདོང་ལེན་བྱ་རྒྱུ་ཡིན་པ་རེད།
བོད་མིའི་སྒྲིག་འཛུགས་ནི་གཞིས་བྱེས་གཉིས་ཀྱི་བོད་མི་ཡོངས་ཀྱི་ཁྲིམས་མཐུན་གྱི་གཞུང་ཁོ་ན་དེ་ཡིན་པར་ངོས་འཛིན་ཞུས་པའི་ཐོག་རྒྱབ་སྐྱོར་བྱ་རྒྱུ་དང་། དེ་མཚུངས་བཞིན་རྒྱལ་སྤྱིའི་ཚོགས་སྡེ་ཁག་དང་གཞུང་། སྤྱི་དམངས་ཚོགས་སྡེ་ཁག་ནས་གཞུང་འབྲེལ་ཐོག་བོད་མིའི་སྒྲིག་འཛུགས་ལ་བཙན་བྱོལ་བོད་གཞུང་ཞིག་ཏུ་ངོས་འཛིན་གྱིས་འབྲེལ་མཐུད་གནང་དགོས་པའི་འབོད་སྐུལ་ཞུས་ཡོད། དེ་བཞིན་བོད་ནང་རྒྱ་ནག་གཞུང་གིས་ལག་བསྟར་བྱེད་བཞིན་པའི་དྲག་གནོན་གྱི་སྲིད་བྱུས་ལ་བགྲོ་གླེང་ཞིབ་ཚགས་བྱེད་དགོས་པ་དང་། བོད་དོན་འཐབ་རྩོད་དང་བོད་རྒྱའི་དཀའ་རྙོག་ཞི་བའི་ཐོག་ནས་སེལ་ཐབས་ལ་གཡོ་བ་མེད་པའི་ཆོད་སེམས་བརྟན་པོ་ཡོད་པ་བསྐྱར་ནན་གནང་བ་དང་། ༸གོང་ས་རྒྱལ་བ་རིན་པོ་ཆེ་མཆོག་གི་སྐུ་ཚབ་བམ་མང་གཙོའི་ལམ་ནས་འོས་འདེམས་བྱུང་བའི་བོད་ཀྱི་དབུ་ཁྲིད་དང་རྒྱ་ནག་མི་དམངས་སྤྱི་མཐུན་རྒྱལ་ཁབ་གཉིས་དབར་སྔོན་འགྲོའི་ཆ་རྐྱེན་གང་ཡང་མེད་པའི་ཐོག་གྲོས་མོལ་བསྐྱར་འཛུགས་དགོས་པའི་འབོད་སྐུལ་ཞུས་ཡོད། བོད་དོན་རྒྱབ་སྐྱོར་ཚོགས་པ་ཁག་གིས་རྒྱལ་སྤྱིའི་སྟེང་བོད་དོན་ལ་དོ་སྣང་ཡོང་ཐབས་དང་བོད་མིའི་འགྲོ་བ་མིའི་ཐོབ་ཐང་རྡོག་རོལ་བཞིན་པའི་གནས་སྟངས་ཡིག་ཚགས་སུ་ཉར་རྒྱུ་དང་། ལྷག་པར་བོད་ཀྱི་བདེན་མཐའ་མ་གསལ་གྱི་བར་དུ་འཛམ་གླིང་ནང་བོད་དོན་ཞུ་གཏུགས་བྱ་རྒྱུ་ཡིན་སྐོར་སོགས་བཀོད་འདུག
གསར་འགོད་པ། སྐལ་བཟང་སྦྱིན་པ།
