བོད་མཚོ་ལྷོ་འབའ་རྫོང་གཙང་དགོན་པའི་དགེ་འདུན་པ་མཛེས་དགའ་རྒྱ་མཚོ་ལགས་ཀློད་འདུག་ཀྱང་མིག་གཉིས་སྐྱོ་བོ་ཆགས་པ་སོགས་འཕྲོད་བསྟེན་ཐོག་དཀའ་ངལ་འཕྲད་བཞིན་འདུག
འདས་ལོའི་ཕྱི་ཟླ་ ༧ ཚེས་ ༢ ཡས་མས་ཙམ་ལ་བོད་མཚོ་ལྷོ་འབའ་རྫོང་གཙང་དགོན་པའི་དགེ་འདུན་པ་མཛེས་དགའ་རྒྱ་མཚོ་ལགས། རྒྱ་ནག་ཉེན་རྟོག་པས་ཟི་ལིང་གྲོང་ཁྱེར་ནས་བཙན་འཁྲིད་བྱས་ཏེ། འདི་ལོའི་ཕྱི་ཟླ་༡ ཆེས་ ༢ ཉིན་ཏེ་ཟླ་བ་དྲུག་རིང་བཀག་ཉར་འདྲི་བརྩད་བྱས་རྗེས་ཀློད་གྲོལ་བཏང་ཡོད་ཀྱང་། མིག་མི་བདེ་བ་དང་པུས་མོ་ན་བ་སོགས་འཕྲོད་བསྟེན་གྱི་དཀའ་ངལ་འཕྲད་བཞིན་ཡོད་པའི་ཁར། རྒྱ་ནག་གཞུང་གིས་ལྟ་རྟོག་ནན་པོ་བྱེད་བཞིན་ཡོད་པའི་རྐྱེན་གྱིས། ད་བར་གནས་ཚུལ་གང་ཡང་ཕྱིར་བསྒྲགས་མ་ཐུབ་པར་ལུས་ཡོད་འདུག
འབྲེལ་ཡོད་ཀྱིས་འདི་གའི་གསར་འགོད་པར། གྲྭ་མཛེས་དགའ་རྒྱ་མཚོ་ལགས་ཀྱི་ལུས་པོའི་ཚིགས་ན་བ་དང་། དེ་སྔོན་མིག་ལ་དཀའ་ངལ་གང་ཡང་མེད་ནའང་། བཀག་ཉར་སྐབས་གློག་འོད་ཆེན་པོའི་འོག་ཡུན་རིང་བཙན་བཀག་བྱས་རྐྱེན་མིག་གཉིས་སྐྱོ་བོ་ཆགས་འདུག ཡིན་ནའང་། དམ་དྲག་གི་དབང་གིས་ཞིབ་ཕྲའི་གནས་ཚུལ་རག་ཐབས་མེད་སྐོར་བརྗོད་བྱུང་།
ཡང་འབྲེལ་ཡོད་དེས། རྒྱ་ནག་གཞུང་གིས་ཁོང་ཀློད་གྲོལ་བཏང་རྗེས། རྒྱ་ནག་གཞུང་གིས་ཕྱོགས་ཡོངས་ནས་ཁོང་གི་འགྲོ་འདུག་སྤྱོད་གསུམ་ལ་དམ་དྲག་དང་སོ་ཉུལ་བྱེད་ཀྱི་ཡོད་པ་དང་། ནང་ལ་འབྱོར་ནས་ཉིན་གསུམ་གྱི་རྗེས་སླར་ཡང་ཟི་ལིང་དུ་འབོད་འགུག་བྱས་ཏེ། རྗེས་མར་རྒྱ་ནག་གཞུང་གི་འདོད་བློ་དང་མི་མཐུན་པའི་ལས་ཀ་རིགས་བྱ་རྒྱུ་མིན་པའི་ཡིག་ཆ་ཞིག་ཀྱང་འཇོག་ཏུ་བཅུག་ཡོད་འདུག འདི་ལོའི་ལོ་སར་རྗེས་དགོན་པར་ལོག་ཡོད་ཀྱང་གནས་སྟངས་ག་འདྲ་ཡིན་གསལ་ཁ་གང་ཡང་མེད་སྐོར་བརྗོད་བྱུང་།
འདས་ལོའི་ཕྱི་ཟླ་ ༧ པའི་ཚེས་མགོར་ཁོང་གི་གཟུགས་གཞི་བདེ་མིན་གྱི་རྐྱེན་གྱིས་གྲོང་ཁྱེར་ཟི་ལིང་དུ་སྨན་པར་བསྟེན་གཏུག་བྱེད་དུ་ཕྱིན་སྐབས། རྒྱ་གཞུང་ཉེན་རྟོག་པས་ཟི་ལིང་ནས་འཛིན་བཟུང་བཙན་ཁྲིད་བྱས་ཡོད་པ་མ་ཟད། ཕྱི་ལོ་ ༢༠༠༨ ལོར་ཁོང་གི་མ་སྤུན་བུ་མཁས་གྲུབ་རྒྱ་མཚོ་ལགས་འཛིན་བཟུང་བྱས་པ་ནས་བཟུང་གྲྭ་མཛེས་དགའ་རྒྱ་མཚོ་ལགས་གཙོ་བོར་གྱུར་བའི་གཉེན་ཉེ་དང་འབྲེལ་ཡོད་མང་པོ་ཞིག་ལ་རྒྱ་གཞུང་གིས་ལྟ་རྟོག་དང་དོགས་ཟོན་བྱ་སའི་ཁོངས་སུ་བཅུག་སྟེ་ཕྱི་ཕྱོགས་སུ་འབྲེལ་ལམ་ཡོད་སྐོར་བརྗོད་ནས་འདྲི་བརྩད་དང་ཉེན་བརྡ་གཏོང་བ། དུས་ཚོད་ངེས་མེད་ལ་ཉེན་རྟོག་ཁང་དུ་སྐད་གཏོང་བ་སོགས་སུན་གཙེར་ཐེངས་མང་པོ་བཟོས་ཡོད་འདུག
བོད་རྨ་ལྷོ་སོག་རྫོང་ནས་ཡིན་པའི་དགེ་འདུན་པ་མཛེས་དགའ་རྒྱ་མཚོ་ནི། ད་ལྟ་དགུང་ལོ་ ༤༨ ཡིན་ཞིང་། ཕ་བསོད་དབང་དང་མ་བཀྲ་ཤིས་གཉིས་ལ་བུ་གསུམ་དང་བུ་མོ་གསུམ་བཅས་ཁྱོན་བུ་རྒྱུད་དྲུག་ཡོད་ལས་ཆེ་ཤོས་དེ་ཡིན་འདུག ཕྱི་ལོ་ ༢༠༠༢ ལོར་རྒྱ་གར་དུ་ཕེབས་ཏེ། སེར་བྱེས་གྲྭ་ཚང་དུ་ལོ་གཅིག་ཙམ་རིང་སློབ་གཉེར་བྱས་རྗེས། ཕྱི་ལོ་ ༢༠༠༣ ལོར་ཕྱིར་ཕ་ཡུལ་དུ་ལོག་སྟེ་རྭ་རྒྱ་ཤེས་རིག་ནོར་གླིང་དུ་སློབ་སྦྱོང་བྱས། དེ་སྔ་འཛིན་བཟུང་བཙན་ཁྲིད་མ་བྱས་གོང་། གཙང་དགོན་པའི་སློབ་གྲྭ་ལྔ་རིག་ལེགས་བཤད་གླིང་གི་བོད་ཡིག་དགེ་རྒན་གནངས་འདུག
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།
