བཙན་བྱོལ་བོད་མིའི་གཞིས་ཆགས་སྲ་བརྟན་དང་རྗེས་འབྱོར་བོད་མི་སོགས་ལ་ས་ཁང་གི་དཀའ་ངལ་སེལ་སླད་བོད་མི་དུད་ཚང་ ༨༥༠ ལ་ས་ཁང་བགོ་འགྲེམས་བྱས་ཡོད་འདུག
དེ་རིང་ཕྱི་ཚེས་ ༢༨ ཉིན་ཏེ་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཅུ་གཅིག་པའི་ལས་ཉིན་བཅུ་གཉིས་པའི་སྟེང་། དབུས་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་སྔོན་རྩིས་དང་འབྲེལ་ནས་སྔོན་རྩིས་ཐོག་སྤྱི་ཡོངས་ཀྱི་བགྲོ་གླེང་དང་གཏན་འབེབས་སྐབས། ནང་སྲིད་བཀའ་བློན་དང་སྲིད་སྐྱོང་གཅིག་ལྕོགས་སྤེན་པ་ཚེ་རིང་མཆོག་གིས། དབུས་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་ཁྱབ་ཁོངས་བཙན་བྱོལ་བོད་མིའི་གཞིས་ཆགས་ཁག་གི་གནས་བབ་དང་། རྗེས་འབྱོར་དང་ཁ་འཐོར་བོད་མི་རྣམས་ལ་སྡོད་ཁང་གསར་རྒྱག་གི་ལས་གཞི། གཞིས་ཆགས་ཁག་གི་མཉམ་འབྲེལ་ལས་ཁུངས། ས་གནས་གཞིས་ཆགས་དང་ཡུལ་མི་བར་གྱི་འབྲེལ་ལམ། སོ་ནམ་ལས་གཞི། ས་གནས་རྒན་གསོ་ཁང་། གཞིས་ཆགས་སྲ་བརྟན་གྱི་ལས་གཞི་སོགས་ཀྱི་ཐད་ལ་གླེང་སློང་གནང་སོང་།
ནང་སྲིད་བཀའ་བློན་མཆོག་གིས། རྗེས་འབྱོར་བོད་མི་དང་ཁ་འཐོར་བོད་མི་རྣམས་ལ་སྡོད་ཁང་གསར་རྒྱག་གི་ལས་གཞི་དང་འབྲེལ་ནས། གཞིས་ཆགས་ཁག་ཏུ་རྗེས་འབྱོར་དང་ཁ་འཐོར་བོད་མི་གཞིས་སྤོར་ལས་གཞིའི་ནང་། ཕྱི་ལོ་ ༢༠༢༦ ཟླ་ ༢ བར་ས་ཁང་ཐོ་འགོད་བྱེད་མཁན་དུང་ཚང་ ༡༧༦༨ ཁོངས། བོད་ནས་རྗེས་འབྱོར་བ་དུད་ཚང་ ༩༧༩ དང་ཁ་འཐོར་གྲངས་ ༧༨༩ བྱུང་ཡོད་པའི་ཁྲོད། དུད་ཚང་ ༩༣༦ གཞིས་ཆགས་ཁག་ཏུ་འགྲོ་འདོད་ཡོད་པའི་ཁོངས་རྗེས་འབྱོར་དུད་ཚང་ ༥༧༦ བྱུང་འདུག་ལ། དེ་བཞིན་ལ་དྭགས་མ་ཁྱུ་དང་ཆུ་ཤུལ་ཁུལ་གྱི་བོད་མི་རྣམས་ལ་ས་ཁང་སོགས་སྦྱོར་སྤྲོད་བྱས་མཐར། བཀའ་ཤག་སྐབས་བཅུ་དྲུག་པས་ལ་དྭགས་བྱང་ཐང་ཁུལ་གྱི་བོད་མི་དང་། ཁ་འཐོར། དེ་བཞིན་རྗེས་འབྱོར་བོད་མི་བཅས་ཁྱོན་དུད་ཚང་ ༨༥༠ ལ་ས་ཁང་བགོ་འགྲེམས་ཟིན་ཡོད་སྐོར་དང་། དེ་བཞིན་ཉེ་ལམ་དཔལ་རབ་གླིང་གཞིས་ཆགས་ཀྱི་བོད་མི་རྣམས་ཀྱིས་ཆུ་ལོག་སོགས་ཀྱི་འཇིག་པའི་དབང་གིས། ས་གནས་གཞན་དུ་གནས་སྤོར་བྱ་དགོས་པའི་རེ་སྐུལ་དང་། ས་གནས་མགོ་ཁྲིད་རྣམས་སྲིད་སྐྱོང་ལ་མཇལ་དུ་ཡོང་ཡང་། ད་ལྟ་ས་གནས་དེ་གང་དུ་གནས་སྤོར་བྱ་དགོས་མིན་ཐད་འཛིན་སྐྱོང་བཀའ་ཤག་ནང་གྲོས་བསྡུར་གང་ཡང་བྱུང་མེད་སྐོར་སོགས་གསུངས་སོང་།
སྤྱི་འཐུས་ཁག་ཅིག་གིས་འདས་ལོར་ཆར་དུས་ཀྱི་དབང་གིས་བཞུགས་སྒར་དྷ་སའི་ཁུལ་གྱི་གཞུང་ལམ་ཁག་ཅིག་བརྡིབས་སྐྱོན་བྱུང་བ། དེ་བཞིན་གསང་སྤྱོད་ཀྱི་ཆུ་ལམ་བརྡོལ་ནས་གཞུང་ལམ་སོགས་སུ་བརྩོག་ཆུ་བཞུར་བ་སོགས་ཀྱི་དཀའ་ངལ་ཞིག་འབྱུང་མུས་ཡིན་པའི་ཐད་གླེང་སློང་དང་། ས་གནས་སྲིད་གཞུང་དང་ས་གནས་ཀྱི་དཔོན་རིགས་རྣམས་ལ་བཞུགས་སྒར་དྷ་སའི་གཞུང་ལམ་བསྐྱར་གསོ་བྱ་དགོས་པའི་ཐད་གླེང་སློང་གནང་བ་དང་འབྲེལ། ནང་སྲིད་བཀའ་བློན་མཆོག་གིས། ས་གནས་མགོ་འཛིན་ལས་ཁུངས་ལ་ཆེད་དུ་བཀོད་མངགས་བྱས་ནས་ས་གནས་མགོ་འཛིན་གྱིས་དཔོན་རིགས་རྣམས་ལ་འབྲེལ་མཐུད་བགྱིས་ནས་ལས་དོན་གཉེར་མུས་ཡིན་ཡང་། ད་ལྟ་ཧི་མ་ཅལ་མངའ་སྡེ་ལ་རོགས་དངུལ་གྱི་དཀའ་ངལ་ཡོད་སྟབས། དབུས་བདེ་སྲུང་ལས་ཁུངས་ཀྱིས་ཀྱང་རོགས་དངུལ་གནང་རྒྱུ་ཡིན་སྐོར་ཞུས་ཀྱང་། ས་གནས་ཀྱི་གཞུང་ལམ་ལ་དབུས་བོད་མིའི་སྒྲིག་འཛུགས་ཀྱིས་ལག་པ་འཆང་ཐབས་བྲལ་བས། ས་གནས་སྲིད་གཞུང་དང་གཞུང་ལམ་གསར་རྒྱག་གི་ལས་གཞི་གཉེར་མཁན་གྱི་ཚོགས་སྡེ་ཁག་གིས་ལས་དོན་ཅི་བྱེད་ལ་བལྟས་ནས། ལས་དོན་གང་མགྱོགས་ལེགས་གྲུབ་ཡོང་རྒྱུར་རེ་བ་རྒྱག་པ་ལས། ནང་སྲིད་ལས་ཁུངས་ཀྱིས་ས་གནས་མགོ་འཛིན་ལས་ཁུངས་བརྒྱུད་ནས་ས་གནས་སྲིད་གཞུང་སོགས་སུ་ཡང་དང་བསྐྱར་དུ་ཡར་ཞུ་རིམ་པ་བྱེད་མུས་ཡིན་སྐོར་སོགས་གསུངས་སོང་།
སྤྱི་འཐུས་ཁག་ཅིག་གིས་བཙན་བྱོལ་བོད་མིའི་གཞིས་ཆགས་ཁག་ཏུ་གཉེར་མུས་ཡིན་པའི་ས་གནས་མཉམ་ལས་ཁག་ནི་དབུས་བོད་མིའི་སྒྲིག་འཛུགས་ཀྱི་ཐད་ཀར་བཀོད་འདོམས་འོག་ཏུ་མེད་ཀྱང་ཁྱབ་ཁོངས་ཆགས་ཡོད་སྟབས། དེའི་ཐད་ནང་སྲིད་བཀའ་བློན་མཆོག་གིས། ས་གནས་མཉམ་ལས་ཁག་གིས་ཀྱང་ས་གནས་མགོ་འཛིན་ལས་ཁུངས་དང་མཉམ་འབྲེལ་བྱས་ཏེ་ལས་དོན་གཉེར་དགོས་པའི་མུར། དེ་སྔ་ས་གནས་མགོ་འཛིན་དེ་མཉམ་ལས་ཁག་གི་འགན་འཛིན་ལྷན་ཚོགས་ཀྱི་ཁོངས་སུ་དགོས་པའི་རེ་སྐུལ་མང་དག་ཅིག་བྱུང་ཡང་། ས་གནས་མགོ་འཛིན་མང་ཆེ་བ་ས་གནས་གཞན་དང་གཞན་ནས་ཡོང་བ་ཡིན་སྟབས། རྒྱ་གར་དབུས་གཞུང་གི་ཁྲིམས་སྒྲིག་བཞིན་མ་གཤེར་མེད་པས་འགན་འཛིན་ལྷན་ཚོགས་ཀྱི་ཁོངས་སུ་ཞུགས་ཐབས་བྲལ་བ་དང་། དེ་སྔ་ས་གནས་ཁག་གི་མཉམ་ལས་དང་འབྲེལ་ནས་དངུལ་རྩིས་རིགས་ཏག་ཏག་ཡོང་གི་མེད་པའི་གནས་ཚུལ་རེ་གཉིས་ཤིག་བྱུང་བས། ནང་སྲིད་ལས་ཁུངས་ཀྱིས་ས་གནས་མཉམ་ལས་ཀྱི་ལས་དོན་ཚགས་ཚུད་དང་གཙང་མ། དེ་བཞིན་མཉམ་ལས་ཁག་གིས་ཀྱང་ས་གནས་མགོ་འཛིན་ལས་ཁུངས་མཉམ་དུ་ལས་དོན་གཉེར་ཐུབ་པའི་རེ་སྐུལ་དང་ལམ་སྟོན། དེ་བཞིན་བྷན་དྷ་ར་ས་དང་ཏེ་ཛུ་ས་གནས་མཉམ་འབྲེལ་གྱི་རྩིས་ཞིབ་ཀྱི་དཀའ་ངལ་སོགས་ཀྱི་ཐད་ལའང་གསལ་བཤད་གནང་སོང་།
བཀའ་ཤག་སྐབས་བཅུ་གཉིས་བཅུ་གསུམ་གྱི་ཐག་གཅོད་བཞིན། བཙན་བྱོལ་བོད་མིའི་ས་གནས་བཅུ་གཉིས་ལྷག་གི་ནང་འདས་པའི་ལོ་ཤས་ནང་སོ་ནམ་འདེབས་ལས་ཀྱི་ལས་དོན་གཉེར་ཡོད་ལ། དབུས་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱིས་ཀྱང་ས་གནས་སོ་སོའི་སོ་ནམ་ལས་གཞིའི་ཐད་རོགས་འདེགས་མི་ཉུང་བ་ཞིག་གནང་མུས་ཡིན་ཡང་། ད་ལྟ་ས་གནས་ཁག་ཅིག་ཏུ་སོ་ནམ་འདེབས་ལས་ཀྱི་ལས་དོན་འཕྲོ་སྐྱོང་མ་ཐུབ་པར་ལྷག་ཡོད་ཅིང་། ཁག་ཅིག་གི་ཐོན་འབྲས་རྣམས་ཁྲོམ་རར་ཚོང་འགྲེམས་ཀྱི་དཀའ་ངལ་མི་ཉུང་བ་ཞིག་འབྱུང་མུས་ཡིན་པའི་མུར། ཡང་ས་གནས་ཁག་ཅིག་ཏུ་ཆེད་ལས་རང་བཞིན་གྱི་ཐོག་ནས་ཐོན་འབྲས་བདག་གཅེས་བྱེད་སྟངས་མི་ཤེས་པ་སོགས་ཀྱི་དཀའ་ངལ་མང་པོ་ཞིག་འཕྲད་མུས་ཡིན་པའི་ཐད་གླེང་སློང་གནང་སྟབས། ནང་སྲིད་བཀའ་བློན་སྤེན་པ་ཚེ་རིང་མཆོག་གིས། སོ་ནམ་འདེབས་ལས་གཉེར་མཁན་རྣམས་ཀྱིས་སོ་སོས་འགན་ཁུར་དགོས་པ་ལས། ཚང་མ་ནང་སྲིད་ལས་ཁུངས་སམ་དབུས་བོད་མིའི་སྒྲིག་འཛུགས་ལ་ཁ་གཡར་བ་དང་ཁག་འཇོག་ས་མི་འཚོལ་བར། གཞུང་གི་མཐུན་རྐྱེན་གྱི་ཐོག་མི་སྒེར་རང་གིས་ཀྱང་དཀའ་ལས་བརྒྱག་དགོས་པའི་ཁར། སོ་ནམ་འདེབས་ལས་སྐབས་བོད་མི་རྣམས་ཀྱིས་གནས་སྐབས་ཀྱི་ཁེ་ཚོང་སླད་རྫས་ལུད་མང་པོ་འདེབས་མི་ཉན་ཞིང་། དེས་མ་འོངས་པར་ཞིང་ས་འཕྲོ་བརླག་དང་། ཆུ་དང་ལྷག་པར་འཐུང་ཆུའི་དཀའ་ངལ་འཕྲད་ཉེན་ཡོད་སྐོར་སོགས་གསུངས་སོང་།
གསར་འགོད་པ། བྱམས་པ་ཚེ་རིང་། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
