རྩོམ་པ་པོ། འབར་བྱེད།
རྩོམ་ཁུངས། བོད་ཀྱི་དུས་བབ།
གླེང་སློང་བ།
ཉེར་དྲུག་ལོའི་འོས་བསྡུའི་ལས་རིམ་ཚ་ཚ་འུར་འུར་ངང་འགྲོ་བཞིན་པའི་སྐབས་འདིར་ངེས་པར་དུ་གླེང་དགོས་པ་དང་གླེང་རིན་ཡོད་པ་ནི་སྤྱི་འཐུས་ལས་ཐོག་ཆོས་གྲགས་རྒྱ་མཚོ་ཡིན། མི་རབས་གསར་བའི་ན་གཞོན་མང་པོ་ཞིག་རྐྱེན་སྣ་ཚོགས་ཀྱི་དབང་གིས་འཐབ་རྩོད་ཀྱི་ནུས་པ་ཉམས་ཤིང་བསམ་བློའི་སྟོབས་ཤུགས་མེད་པ། ཡོད་པ་རེ་ཟུང་ལ་གཞི་མེད་ཀྱི་ནག་ཉེས་བཙུགས་ཏེ་བོད་པའི་སྤྱི་ཚོགས་དང་ཁ་ཐག་རང་དུ་གཏོང་བཞིན་པའི་སྐབས་དེར། ཤེས་ཡོན་དང་ལྷག་བསམ། སེམས་ཤུགས་དང་སྙིང་སྟོབས་སོགས་མི་སེམས་ཀྱི་གསོན་ཤུགས་མ་ཉམས་པའི་གཞོན་སྐྱེས་ཁ་ཤས་མདུན་དུ་སླེབས་ནས་བོད་དོན་འཐབ་རྩོད་ཀྱི་བཙན་ས་རེ་བཟུང་ཡོད་ལ་ཆོས་གྲགས་རྒྱ་མཚོ་ཡང་དེའི་གྲས་ཀྱི་གཅིག་ཡིན།
ཉམས་མྱོང་གི་ཐད་ནས།
ཁོས་སློབ་གྲྭ་འགྲིམ་པའི་དུས་སྐབས་ནས་བཟུང་རང་ཉིད་སྐྱབས་བཅོལ་བ་ཞིག་ཡིན་པའི་འདུ་ཤེས་སྟེང་ནས་བོད་པའི་ལས་དབང་འདི་ཁ་ལོ་བསྒྱུར་བ་ལ་སློབ་སྦྱོང་གི་རྨང་གཞི་བརྟན་དགོས་པ་གཙོ་བོར་བཟུང་ནས་སློབ་སྦྱོང་ལ་ཧུར་བརྩོན་བྱས་པས་སློབ་གྲྭའི་ནང་འགན་བདག་རིམ་པ་དང་འཛིན་རིམ་བཅུ་གཉིས་ཀྱི་རྒྱ་གར་རྒྱལ་ཡོངས་ཡིག་རྒྱུགས་ཁྲོད་སློབ་གྲྭའི་ནང་རྩེར་སོན་བླངས། བོད་ཀྱི་བདེན་མཐའ་གསལ་བ་ལ་དབུ་མའི་ལམ་གྱི་སྲིད་ཇུས་མཆོག་ཏུ་མཐོང་ནས་ཕུགས་རྒྱང་ཐུང་བའི་ན་གཞོན་གྱི་ཨ་གསར་བསམ་བློ་དེ་དོར་ནས་དབུ་མའི་ལམ་ལ་ངེས་པ་རྙེད། དངོས་སུ་སྤྱི་ཚོགས་སུ་སླེབས་པ་ནས་བཟུང་དབུ་མའི་ལམ་གྱི་ཚོགས་གཞོན་དང་། རྡ་སའི་ས་གནས་གྲོས་ཚོགས་ཀྱི་འཐུས་མི་སོགས་ཁོང་གི་ལོ་ཚོད་ཀྱིས་མི་ཐེག་པའི་ལས་གནས་དེ་དག་ལ་གདོང་གཏད་ནས་བོད་མི་ཞིག་གི་འགན་འཁྲི་དེ་དང་དུ་བླངས། མ་ཟད་ཉེར་གཅིག་ལོར་མདོ་སྨད་མི་མང་གིས་སྤྱི་འཐུས་ཀྱི་འགན་སྤྲད་པ་ནས་བཟུང་ཁོས་མདོ་སྨད་མི་མང་གི་ངོ་ཚབ་མཚོན་པའི་སྟེང་ནས། ༧གོང་ས་མཆོག་གི་དགོངས་གཞི་དང་། མདོ་སྨད་མི་མང་གི་མངོན་འདོད་གཞི་རྩར་བཟུང་ནས་འདས་པའི་མི་ལོ་ལྔའི་ནང་ཕྱི་རྒྱལ་བ་རྣམས་ལ་བོད་དོན་ངོ་སྤྲོད་དང་ཁྱབ་བསྒྲགས་བྱས་པ། གྲོས་ཚོགས་སུ་ཆ་ཤས་གནད་ལ་འཁེལ་བ་བླངས་བ་སོགས་མདོར་ན་མདོ་སྨད་མི་མང་ལ་ངོ་གནོང་མི་དགོས་པ་ཞིག་བསྒྲུབས་ཡོད། སྤྱི་འཐུས་ཀྱི་ལས་ཡུན་རིང་སྤྱི་འཐུས་རྒྱུན་ལས་དང་། མང་ཚོགས་རྩིས་ཁྲ་ཚོགས་ཆུང་གི་དྲུང་ཆེ། དེ་བཞིན་སྔོན་རྩིས་ཚོད་དཔག་ཚོགས་ཆུང་གི་ཚོགས་གཙོ་སོགས་སྤྱི་འཐུས་ཚད་ལྡན་ཞིག་གིས་སྒྲུབ་དགོས་པ་ཡོངས་སུ་བསྒྲུབས་ནས་ཉམས་མྱོང་ཡང་ཕུན་སུམས་ཚོགས་པ་ཐོབ་ཡོད་པ་མ་ཟད། མདོ་སྨད་གོ་སྟོན་ཆེན་མོའི་དྲུང་ཆེའི་མིང་ཐོག་ནས་གོ་སྟོན་གྱི་ལས་དོན་ཁག་ལ་ནུས་ཚོད་ཀྱིས་ཞབས་འདེགས་ཕྲན་བུ་རེ་ཞུ་ཐུབ་པ་དེ་ཡང་ཁོའི་མི་ཚེའི་ངོས་ནས་བལྟས་ན་རྒྱགས་ཕྱེ་ཆེན་པོ་ཞིག་རེད།
རྣམ་དཔྱོད་ཀྱི་ཐད་ནས།
ཚད་ལྡན་གྱི་འཐུས་མི་་ཞིག་ཡིན་ན་དྲང་ཚུགས་ཁོ་ནས་ལས་ཀ་བྱ་མི་ཐུབ་ལ་རྣམ་དཔྱོད་ནི་ངེས་པར་དུ་ཡོད་དགོས་པ་ཞིག་ཡིན། དེ་མེད་ཚེ་གཡོན་ཐལ་བ་རྣམས་ཁ་དར་ཡོད་པའི་བོད་ཀྱི་གྲོས་ར་ཆུང་ཆུང་འདིར་བཀའ་ཤག་གི་ནུས་པ་ཆུང་རུ་གཏོང་འདོད་མཁན་གྱི་ཆོས་འཐུས་དང་ཆོལ་འཐུས་ཚོའི་སོ་ཁ་འཐབ་རྩོད་ཀྱི་སྟེང་དུ་མི་གཏད་པར་ད་ལྟའི་བཀའ་ཤག་གི་སྟེང་དུ་གཏད་ཡོད་པས་རྣམ་དཔྱོད་བེད་སྤྱད་ནས་དེ་དག་ལ་གདོང་ལེན་མ་བྱས་ཚེ་བཀའ་ཤག་གི་ལས་དོན་མང་པོ་ཞིག་ལམ་ལ་འགྲོ་དཀའ། དཔེར་ན། ཉེ་སྔོན་གྲོས་ཚོགས་ཀྱི་སྐབས་སུ་གཡོན་ཐལ་སྤྱི་འཐུས་རྣམས་ཀྱིས་རུབ་རྡུང་བྱས་ནས་ཨ་རིའི་མེ་ནེ་སོ་ཊའི་ཨ་སྒོར་ས་ཡ་བཞི་ཡི་ལས་འཆར་དང་འབྲེལ་ནས་དཔལ་ལྡན་སྲིད་སྐྱོངམཆོག་ལ་གླེང་ལོག་བྱས་པ་རྣམས་སྲིད་སྐྱོང་མཆོག་གིས་དེའི་སྐོར་གསལ་བཤད་ལན་མང་ཞུས་ཀྱང་གསལ་བོ་ཆགས་རྒྱུའི་རེ་བ་མི་འདུག་པས་”ད་ནས་བཟུང་དེའི་སྐོར་ཚིག་གཅིག་ཞུ་ཡ་མིན་”གསུངས་རྗེས། བང་ཆེན་ཚུལ་ཁྲིམས་ནས་སླར་ཡང་གནས་ཚུལ་དེ་དང་འབྲེལ་སྲིད་སྐྱོང་མཆོག་ནས་རང་གི་ཟ་རོགས་འཐུང་རོགས། འགྲོ་རོགས་དང་འདུག་རོགས་ཚོར་ལས་འཆར་དེ་དང་འབྲེལ་ནས་ཁེ་བཟང་སྤྲོད་བཞིན་ཡོད་པའི་གླེང་སློང་བཟོས་བར། སྐབས་དུས་ལ་བསྟུན་ནས་སྤྱི་འཐུས་ཆོས་གྲགས་རྒྱ་མཚོ་ཡར་ལངས་ནས་བང་ཚུལ་གྱི་ལོག་འགྲེལ་དེར་དཔལ་ལྡན་སྲིད་སྐྱོང་མཆོག་ནས་གསལ་བཤད་གནང་དགོས་སྐོར་ཀྱི་འབོད་སྐུལ་དང་གོ་སྐབས་སྤྲད་པ་ལ་བརྟེན་ནས་སྲིད་སྐྱོང་མཆོག་གིས་བང་ཚུལ་གྱི་བརྡ་ལོག་འགྲེལ་ལོག་རྣམས་བཟློག་ནས་གསལ་གསལ་ཐང་ཐང་བཟོས་པ་དེ་ཡང་ཁོའི་རྣམ་དཔྱོད་ལས་ལོག་སྨྲ་རྣམས་ཚར་གཅོད་སྟངས་ཤིག་རེད་ལ་འདི་ནི་དཔེ་མཚོན་ཙམ་ཡིན།
ཡོན་ཏན་གྱི་ཐད་ནས།
སློབ་སྦྱོང་གི་བརྒྱུད་རིམ་ནི་སྤྱི་འཐུས་ཀྱི་ལས་དོན་དང་འབྲེལ་ཡོད་ལ། སློབ་སྦྱོང་ཡག་པོ་ཞིག་ཡོང་བར་སློབ་སྦྱོང་གི་ཁོར་ཡུག་དང་འབྲེལ་བ་དམ་ཟབ་ཡོད་པས་འཛིན་རིམ་བཅུ་གཉིས་ཀྱི་རྒྱ་གར་རྒྱལ་ཡོངས་ཡིག་རྒྱུགས་སྐབས་སློབ་གྲྭའི་ནང་ཨང་རིམ་དང་པོ་སོན་པ་དེས་ཁོ་རང་རྒྱ་གར་གྱི་སློབ་ཆེན་རྩེར་སོན་ཞིག་འགྲིམས་ཐུབ་པ་བྱུང་། མཐོ་སློབ་ཀྱི་སྐབས་ཁོས་རང་ཉིད་དང་འབྲེལ་བ་ཆགས་པའི་ཆབ་སྲིད་རིག་པར་སློབ་སྦྱོང་བྱས་ནས་བསླབ་གནས་དེའི་ལག་འཁྱེར་བླངས་པ་མ་ཟད་སྔར་བོད་ནང་དུའང་སློབ་སྦྱོང་གི་འབྲས་བུ་གཟེངས་སུ་ཐོན་པ་བྱུང་ཡོད། ལག་འཁྱེར་ཙམ་གྱིས་བསམ་བློ་དང་ཤེས་ཡོན་གྱི་ཚད་འཇལ་མི་ཐུབ་ཡང་། སྤྱི་ཚོགས་ཀྱི་ནང་དུ་ལས་ཀ་ཞིག་བྱས་ན་དེ་ནི་ཆ་རྐྱེན་ཞིག་དུ་གྱུར་འདུག་པ་མ་ཟད། གྲོགས་ཚོགས་ཀྱི་ནང་དུ་བསམ་བློའི་སྤུས་ཚད་སྐྱོ་བའི་རིགས་འཚང་ཁ་རྒྱག་བཞིན་པ་འདི་ཡང་སློབ་གྲྭ་ཆེ་འབྲིང་ཆུང་གསུམ་མ་འགྲིམ་པའི་དན་རྟགས་ཤིག་རེད། ཁོ་བོད་རྒྱ་དབྱིན་གསུམ་གྱི་སྐད་ཡིག་ལ་རང་སྐྱ་ཐུབ་པ་དེས་འདས་པའི་ལོ་ངོ་ལྔའི་རིང་བོད་དོན་ཞུ་གཏུགས་ཀྱི་ལས་འགུལ་ཆེད་ཨ་རི་དང་ཡོ་རོབ་རྒྱལ་ཁབ་ཁག ནེའོ་ཛི་ལན་ཌི། ཨོ་སི་ཁྲོ་ལེ་ཡ་སོགས་སུ་གནད་ཡོད་མི་སྣ་དང་མཇལ་སྐབས་འཐུས་མི་གཞན་ལྟར་མི་གཉིས་པ་ཞིག་བརྒྱུད་མི་དགོས་པར་རང་ངོས་ནས་ཞུ་གཏུགས་བྱ་ཐུབ་པ་བྱུང་བ་འདི་ནི་སྤྱི་འཐུས་རེ་གཉིས་ལ་མ་གཏོགས་མེད་པའི་ཁོའི་ཡོན་ཏན་ཞིག་རེད།
རང་གཤིས་ཀྱི་ཐད་ནས།
ང་ནི་ཁོང་དང་འབྲེལ་བ་དེ་ཙམ་མེད་ན་ཡང་ཁོང་ལ་དོ་སྣང་བྱེད་མཁན་ཞིག་ཡིན་པས་ཁོང་ཉིད་ནི་དཔལ་ལྡན་དགའ་ལྡན་ཕོ་བྲང་དང་། བོད་མིའི་སྒྲིག་འཛུགས་དགྲ་རུ་བལྟ་མཁན་ཚོའི་གདོང་ནས་ལངས་ཐུབ་མཁན་ཞིག་དང་། དོན་མེད་ངོ་ཤེས་མི་ཤེས་ཀུན་ལ་སྙོན་འཛུགས་མི་བྱེད་པ། གྲོགས་པོ་དང་ལས་རོགས་ལ་ཁྲམ་ལས་མི་བྱེད་པ། རྒན་པར་གུས་ཞབས་དང་ཉམ་ཆུང་གི་ཕྱོགས་སུ་ལངས་ཐུབ་མཁན། དྲང་པོ་དང་བདེན་པའི་རྒྱབ་རྩར་ལངས་མཁན་ཞིག་ཡིན་པ་བཅས་མ་འོངས་པ་ན་ཁོང་ཉིད་ལ་རེ་བ་ཆེན་པོ་བཅང་མཁན་བོད་ཀྱི་ཤེས་ལྡན་པ་དང་གནད་ཡོད་མི་སྣ་ཚོའི་ཁྲོད་དུ་མང་པོ་བྱུང་འདུག སྤྱིར་ནོར་འཁྲུལ་རྩ་ནས་མེད་པའི་མི་ཞིག་མི་རྙེད་པས་སྤྱི་འཐུས་ཆོས་གྲགས་རྒྱ་མཚོ་ལགས་ཀྱང་དེ་ལས་མ་འདས་མོད། འོན་ཀྱང་ཁོང་གི་བཟང་ཕྱོགས་ཀྱི་ཁྱད་ཆོས་མང་པོ་ཞིག་གིས་དེ་དག་ར་རུབ་ཏུ་བཏང་ཡོད་ཀྱང་སྲིན་འབུ་མེ་ཁྱེར་ནི་ནམ་ཡང་མེ་ཁྱེར་རང་ཡིན་པས་ཉི་མའི་འོད་སྣང་ལ་ཁོང་ཚོས་ཕྲག་པ་དོག་པ་དེ་ཡང་ཆོས་ཉིད་ཡིན།
རེ་སྐུལ་དང་བཅས་མཇུགབསྡུ་བ།
བོད་ཀྱི་ཁ་དཔེར། རི་མཐོ་པོ་མགོ་ལ་སྨུག་པ་འཁོར། བུ་སུ་ངར་མགོ་ལ་ཁ་མཆུ་མང་ཟེར་སྲོལ་ཡོད་པ་བཞིན། ཉེར་དྲུག་ལོའི་སྤྱི་འཐུས་འོས་བསྡུ་ཆེན་མོའི་འགྲན་རྩོད་ཁྲོད་གཞི་རྩ་གང་ཡང་མེད་པར་རྐང་བཙུགས་ནས་སྤྱི་འཐུས་ཆོས་གྲགས་རྒྱ་མཚོ་ནག་པོ་བཟོ་མཁན་ཁ་ཤས་ཤིག་མངོན་ལྐོག་ཅི་རིགས་ནས་སླེབ་བཞིན་འདུག་ལ། གཙོ་ཆེ་བ་ནི་ཉམས་པ་སླར་གསོ་དང་། མདོ་སྨད་གླིང་ཟེར་བའི་མདོ་སྨད་ཀྱི་ཆབ་སྲིད་བཙོན་ཟུར་དང་གནད་ཡོད་མི་སྣ་རྣམས་ནག་པོ་བཟོ་སའི་དྲ་ཚོམས་དེ་གཉིས་ནས་བྱུང་ཡོད། ༸སྐུའི་གོ་སྟོན་གྱི་ལས་དོན་དང་འབྲེལ་ནས་སྤྱི་འཐུས་ཁོང་ལ་མ་ཉེས་ཁག་གཡོགས་ཀྱིས་ཐབས་བརྒྱ་ཇུས་སྟོང་བརྩམས་ཀྱང་། གོ་སྟོན་ཚོགས་ཆུང་དང་ཚོགས་ཆུང་གི་ཚོགས་གཙོས་ཡིག་ངག་གཉིས་ཐོག་ནས་ཆོས་གྲགས་རྒྱ་མཚོ་ལགས་ལྐོག་ཟ་དང་སྐར་མ་གང་གི་ཡང་འབྲེལ་བ་མེད་པ་སོགས་གསལ་བཤད་གནངས་ཀྱང་། ཁོང་ཚོའི་དམིགས་ཡུལ་ངོ་མ་ནི་འོས་བསྡུ་ཁྲོད་ཀྱི་ཆབ་སྲིད་ཀྱི་རོལ་གར་ཞིག་ཡིན་པས་ཅི་ལ་ཕན། དེང་སང་གི་མི་རྣམས་ནི་རྣམ་དཔྱོད་ཅན་ཤ་སྟག་ཡིན་པས་རང་ཉིད་ཀྱི་རྣམ་དཔྱོད་བེད་སྤྱོད་བཏང་ནས་ཆབ་སྲིད་གྱི་རོལ་གར་དེའི་རྒྱབ་ལོག་ན་ཅི་ཡོད་པ་དང་། རང་ཉིད་དེ་དག་གི་བྲན་གཡོག་ཏུ་མ་གྱུར་བ་ཞིག་བྱས་ནས་ཉེར་དྲུག་ལོའི་འོས་འདེམས་ཁྲོད་ཞུགས་རྒྱུ་ནི་ཧ་ཅང་གལ་ཆེའོ།།
གཟའ་ཉི་མའི་དུས་ཚོད་སྤྱད་ནས་འབར་བྱེད་དུ་འབོད་པས་ལྷོ་ཕྱོགས་ཀྱི་རང་སྤྱིལ་ནང་མཇུག་གྲུབ་པའོ།།
མཆན། གོང་འཁོད་རྩོམ་ཡིག་འདི་རྩོམ་པ་པོའི་དགོངས་ཚུལ་ཡིན་པ་ལས་འདི་ག་གསར་ཁང་གི་དགོངས་ཚུལ་ཡིན་པས་མ་ཁྱབ།
