༧གོང་ས་རྒྱལ་བ་རིན་པོ་ཆེ་མཆོག་ནས་བོད་མི་ཚོས་འཛམ་གླིང་ལ་ནང་ཆོས་དར་སྤེལ་གནང་ཐུབ་ན་བསྟན་པའི་བྱ་བ་ཆེན་པོ་ཞིག་རེད་ཅེས་གསུངས་འདུག
དེ་རིང་ཕྱི་ཚེས་ ༢༨ ཉིན་བཞུགས་སྒར་རྒྱལ་བའི་ཕོ་བྲང་དུ་༧གོང་ས་རྒྱལ་བ་རིན་པོ་ཆེ་མཆོག་ནས་དྷ་ས་རིགས་ལམ་སློབ་གཉེར་ཁང་གི་ཝེ་ཐི་ནམ་གྱི་དྲ་ཐོག་ནང་ཆོས་ཆེད་སྦྱོང་འཛིན་གྲྭའི་སློབ་གཉེར་བ་རྣམས་དང་། རྒྱ་གར་ཆ་དྷི་སི་གྷར་མངའ་སྡེའི་སྤྱི་ཁྱབ་བློན་ཆེན་ཟུར་པ་བྷུ་པེཤ་བ་གྷེལ་(Bhupesh Baghel ) ལགས། རྒྱ་གར་གྲོས་ཚོགས་ཀྱི་ལས་བྱེད་ཁག་ཅིག་གཙོས། དད་ལྡན་མང་ཚོགས་ ༣༤༩ ལྷག་ལ་མཇལ་ཁ་སྩལ་འདུག
མཇའ་ཁའི་སྐབས་༧གོང་ས་རྒྱལ་བ་རིན་པོ་ཆེ་མཆོག་ནས། སྔོན་མ་རྒྱ་གར་ནས་བོད་ལ་ནང་ཆོས་ཁྱབ་སྤེལ་བྱུང་བ་རེད། ད་ང་ཚོས་རྒྱ་གར་ལ་ཉམས་བསྡད་པ་དེ་ང་ཚོས་བོད་ནས་ཚུར་འཁྱེར་ཡོང་བ་ཡག་པོ་ཞེ་དྲགས་བྱུང་སོང་། གཞུང་ཆེན་པོ་ཏིས་མཚོན་པའི་དཔེ་ཆ་མང་པོ་ཞིག་བལྟས་ནས། དེང་སང་བོད་པས་འཛམ་གླིང་ནུབ་ཕྱོགས་ཀྱི་མི་ཚོ་ལ་སེམས་ཁམས་རིག་པ་སོགས་འགྲེལ་བཤད་རྒྱག་ཐུབ་པའི་གནས་སྟངས་ཤིག་ཆགས་བསྡད་ཡོད་རེད། དངོས་གནས་དྲང་གནས་བསྟན་པའི་བྱ་བ་ཆེན་པོ་རེད། ཐུགས་རྗེ་ཆེ། ཞེས་གསུངས་འདུག
ཡང་༧གོང་ས་རྒྱལ་བ་རིན་པོ་ཆེ་མཆོག་ནས་མཇལ་བཅར་བ་ཁག་ཅིག་ལ་མཇལ་ཁ་སྩལ་སྐབས། ངོས་རང་ཞོགས་པ་གཉིད་ལས་སད་མ་ཐག་བྱང་ཆུབ་ཀྱི་སེམས་བསམ་བློ་གཏོང་གིན་ཡོད་ལ། དགོང་མོར་མར་མ་ཉལ་གོང་དུའང་བྱང་ཆུབ་ཀྱི་སེམས་བསམ་བློ་གཏོང་གི་ཡོད། ཅེས་གསུངས་འདུག
དྷ་ས་རིགས་ལམ་སློབ་གཉེར་ཁང་གི་དྲ་ཐོག་ནང་ཆོས་ཆེད་འཁྲིད་གནང་བ་དང་འབྲེལ་ནས་མཚན་ཉིད་གྲྭ་ཚང་གི་འགན་འཛིན་དགེ་བཤེས་བསམ་གཏན་རྒྱ་མཚོ་ལགས་ཀྱིས་ནོར་ཝེ་བོད་ཀྱི་རླུང་འཕྲིན་ཁང་ལ། མཚན་ཉིད་རིགས་ལམ་སློབ་གཉེར་ཁང་གིས་ཕྱི་ལོ་ ༢༠༢༤ ལོ་ནས་ཝེ་ཐི་ནམ་ལ་བཞུགས་ཡོད་པའི་དད་ལྡན་ཉིས་བརྒྱ་ལྔ་བཅུ་ལྷག་ཅིག་ལ། ན་ནིང་ལོར་བསྡུས་སྒྲ་ཆ་ཚང་ཞིག་དང་། ད་ལོ་བློ་རིག་དང་རྟེན་འབྲེལ་འཆད་འཁྲིད་བྱས་ཏེ། ད་ལན་མི་གྲངས་ཉིས་བརྒྱ་ལྷག་ལ་མཇལ་ཁ་སྩལ་ཁོམ་མེད་སྟབས། མི་གྲངས་བདུན་ཅུ་ལྷག་ཅིག་གིས་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་ཁ་ཞུས་ཏེ་ལས་དོན་རྣམས་སྙན་གསེང་ཞུས་ཡིན། ཞེས་དང་། ད་ལན་མཚན་ཉིད་རིགས་ལམ་སློབ་གཉེར་ཁང་གིས་འཆད་ཁྲིད་ནང་མཉམ་ཞུགས་གནང་མཁན་ཁྲོད། ཝེ་ཐི་ནམ་གྱི་ཚོང་པ་དང་། ཁེ་ལས་པ་སོགས་ཡོད་ཅིང་། ཁོང་ཅག་གིས་འདས་པའི་ལོ་གཅིག་ལྷག་གི་རིང་མཚན་ཉིད་གྲྭ་ཚང་གི་འཆད་འཁྲིད་བརྒྱུད་སློབ་གཉེར་གནང་སྟབས། ཉེ་ལམ་ཡིག་ཚད་བཏང་ནས་རྒྱུགས་འབྲས་ཀྱང་ཡག་པོ་ཞིག་བྱུང་སྟེ། ཕྱི་ཚེས་ ༣༠ ཉིན་ཝི་ཐི་ནམ་གྱི་ནང་ཆོས་སློབ་གཉེར་བ་རྣམས་ལའང་ལག་ཁྱེར་དབུལ་རྒྱུ་ཡིན་སྐོར་སོགས་བརྗོད་འདུག
དགའ་ལྡན་ཕོ་བྲང་ཡིག་ཚང་གི་དྲ་རྒྱར་གསལ་བའི་༧གོང་ས་རྒྱལ་བ་རིན་པོ་ཆེ་མཆོག་གི་མཛད་འཆར་ལྟར་ན། ཕྱི་ཟླ་ ༥ ཚེས་ ༢༠ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ། མདོ་ཁམས་ཆུ་བཞི་སྒང་དྲུག་དབུས་སྤྱི་ཁྱབ་རྒྱུན་ལས་ཁང་དང་། ཧི་མ་ལ་ཡ་ནང་པའི་རིག་གཞུང་མཐུན་ཚོགས་གཉིས་ཀྱིས་བརྟན་བཞུགས་བསྟར་འབུལ་ཞུ་རྒྱུ་ཡིན་འདུག
གསར་འགོད་པ། དཔལ་ལྡན།
