ཨ་རིའི་གྲོས་ཚོགས་ནང་བོད་དོན་དང་འབྲེལ་བའི་ཁྲིམས་འཆར་ངོ་སྤྲོད་གནང་།

རྒྱ་ནག་གཞུང་གིས་རྒྱལ་སྤྱིའི་ཉེས་ཁྲིམས་ལས་འགལ་བའི་བོད་ནང་མི་རིགས་རྩ་གཏོར་དང་སྡེབ་གསོད་བྱེད་ཀྱི་ཡོད་མེད་ཞིབ་འཇུག་བྱས་ཏེ་ཨ་རིས་རྒྱ་ནག་ཉེས་ཆད་གཅོད་དགོས་པའི་ཁྲིམས་འཆར་བཏོན།

དེ་རིང་ཨ་རིའི་ཆབ་སྲིད་ཚོགས་པ་གཉིས་ཀྱི་འཐུས་མི་ལས་གྲུབ་པའི་བོད་དོན་རྒྱབ་སྐྱོར་ཚོགས་ཆུང་ཞིག་གིས། ཨ་རིའི་གྲོས་ཚོགས་ནང་བོད་དོན་དང་འབྲེལ་བའི་ཁྲིམས་འཆར་ཞིག་ངོ་སྤྲོད་གནང་འདུག་ཅིང་། ཁྲིམས་འཆར་དེ་ནི་རྒྱ་ནག་གཞུང་གིས་བོད་ནང་ལག་བསྟར་བྱེད་བཞིན་པའི་སྲིད་ཇུས་དག་གིས་བོད་མི་རིགས་རྩ་གཏོར་རམ་སྡེབ་གསོད་ཀྱི་རྒྱལ་སྤྱིའི་ཉེས་ཁྲིམས་དང་འགལ་ཡོད་མེད་དབྱེ་ཞིབ་བྱ་དགོས་ཀྱི་ཡོད་པ་དང་། གལ་སྲིད་རྒྱ་ནག་གིས་རྒྱལ་སྤྱིའི་ཁྲིམས་ལུགས་ཀྱི་ནང་དོན་ལ་འགལ་བའི་ཉེས་སྐྱོན་བཟོས་ཡོད་ཚེ། ཨ་རིས་རྒྱ་ནག་ལ་ཐོངས་མཆན་བཀག་སྡོམ་དང་ཕྱི་སྲིད་འབྲེལ་ལམ་སོགས་ཀྱི་ཐོག་ནས་ཆད་པ་ནན་མོ་གཅོད་དགོས་སྐོར་བརྗོད་འདུག

ཨ་རིའི་ཕྱི་སྲིད་ལས་ཁུངས་ཀྱིས་ཁྲིམས་འཆར་དེ་དང་འབྲེལ་ནས། རྒྱ་ནག་གཞུང་ལ་དུས་ནས་དུས་སུ་གནོན་ཤུགས་སྤྲད་དེ། རྒྱ་ནག་གཞུང་གིས་བོད་ནང་མི་རིགས་རྩ་གཏོར་རམ་སྡེབ་གསོད་བྱེད་ཀྱི་ཡོད་མེད་ལ་ཞིབ་འཇུག་བྱས་ཏེ། ད་ནས་རྩིས་པའི་ལོ་གཅིག་གི་ནང་ཚུད་དུ་གྲོས་ཚོགས་ལ་ཞིབ་འཇུག་གྲུབ་དོན་སྙན་གསེང་ཞུ་དགོས་ཀྱི་འདུག

ཁྲིམས་འཆར་ངོ་སྤྲོད་གནང་མཁན་སྐུ་ཞབས་རིག་སི་ཀོ་ཊི་ལགས་ཀྱིས། རྒྱ་ནག་གཞུང་གིས་བོད་ནང་མི་རིགས་དམར་གསོད་ཀྱི་ནག་ཉེས་བསགས་ཡོད། དེ་ལ་གཡོལ་ཐབས་མེད། ལམ་ལུགས་ལྡན་པའི་དམར་གསོད་དང་། མནར་གཅོད། བཙན་ཤེད་ཀྱིས་ཕྲུ་གུ་མེད་པར་བཟོ་བ་དང་གནས་སྤོ་བྱེད་པ། བོད་མི་རིགས་ལ་གཉའ་གནོན་དང་མི་ཆོས་ལ་འགལ་བའི་ཉེས་པ་མང་པོ་བཏང་ཡོད་ཅེས་བརྗོད་འདུག

གྲོས་ཚོགས་འཐུས་མི་སྐུ་ཞབས་ཇེ་ཧྥི་མར་ཁེ་ལེ་ལགས་ཀྱིས། རྒྱ་ནག་གཞུང་གིས་བོད་མིའི་ཐོག་མུ་མཐུད་དུ་འཇིགས་སྐུལ་དང་རིག་གཞུང་རྩ་མེད་གཏོང་བ། བྱིས་པ་ཁ་བྲལ་གཏོང་བ། བཙོན་འཇུག་བྱེད་པ་དང་མནར་གཅོད་གཏོང་བ་སོགས་ལ་ཨ་རི་ཁུ་སིམ་མེར་སྡོད་མི་ཐུབ། རྒྱ་ནག་གཞུང་གིས་མུ་མཐུད་རྒྱལ་སྤྱིའི་ཁྲིམས་འོག་གི་བོད་མིའི་ཐོབ་ཐང་ལ་སྣང་མེད་གཏོང་བཞིན་ཡོད་པས། ང་ཚོས་ཉེས་པ་འདི་དག་སྣང་མེད་དུ་འཇོག་མི་རུང་བ་གསལ་པོ་བཟོ་དགོས་ཞེས་བརྗོད་འདུག་པ་མ་ཟད། ཨ་རིས་རྒྱ་ནག་ཁྲིམས་འགལ་གྱི་བྱ་སྤྱོད་དག་ལ་ངེས་པར་དུ་ལན་འདེབས་དགོས་པར་བཤད་འདུག

ཁྲིམས་འཆར་དེའི་ནང་གཏན་འབེབས་བྱས་པའི་གནད་དོན་ཁག་གསལ་འདོན་བྱས་ཡོད་ཅིང་། དེ་དག་ལས་གལ་གནད་ཅན་ཁག་ཅིག་ནི། ལམ་ལུགས་ལྡན་པའི་དམར་གསོད་དང་ལུས་སེམས་གཉིས་ལ་ཚབས་ཆེའི་གནོད་སྐྱོན།  དེ་བཞིན་གཞི་རྩའི་དགོས་མཁོ་མེད་པ་བཟོ་བ་དང་བཙན་དབང་གིས་གནས་སྤོ་བྱེད་པའི་སྲིད་ཇུས་བརྒྱུད་ནས་མི་འབོར་རྩ་གཏོར་གྱི་སྲིད་ཇུས་སོགས་ཀྱི་དཔང་རྟགས་བསྡུ་ལེན་བྱེད་དགོས་ཀྱི་འདུག་ལ། ད་དུང་བཙན་གྱིས་མངལ་སྦྲུམ་མེད་པར་བཟོ་བ་དང་། རྒྱ་ནག་གི་མི་སེར་སྤེལ་བའི་སློབ་གྲྭའི་ལམ་ལུགས་འོག་བོད་ཀྱི་བྱིས་པ་བཙན་གྱིས་གནས་སྤོ་བའི་བྱ་ཐབས་ལ་ཞིབ་འཇུག་བྱེད་དགོས་པ་བརྗོད་ཡོད།

ཁྲིམས་འཆར་ནང་ཨ་རིའི་ཕྱི་སྲིད་ལས་ཁུངས་ཀྱིས་གྲོས་ཚོགས་ལ་གཞི་རྟེན་ཡོད་པའི་དཔང་རྟགས་ཀྱི་ཞིབ་ཕྲ་བཀོད་པའི་སྙན་ཐོ་ཞིག་འབུལ་དགོས་པ་དང་།  དེའི་ནང་དུ་བོད་ཀྱི་ནང་ཆོས་རྒྱ་བསྒྱུར་བྱེད་པ་དང་བོད་སྐད་དང་རིག་གཞུང་ལ་གཉའ་གནོན་བྱེད་པའི་སྲིད་ཇུས་ཁག་ཚུད་དགོས་པ་མ་ཟད། གཞན་ཡང་ཨ་རིའི་ཕྱི་སྲིད་ལས་ཁུངས་ཀྱི་བོད་དོན་དང་འབྲེལ་བའི་སྙན་ཐོ་དང་ཡིད་རྟོན་རུང་བའི་དཔྱད་ཞིབ་གཞན་ཁག་ནས་རྙེད་པའི་གྲུབ་དོན་ཁག་འདུས་དགོས་ཀྱི་ཡོད་འདུག

ཐེངས་འདིའི་ཁྲིམས་འཆར་དེ་ངོ་སྤྲོད་གནང་མཁན་སྤྱི་མཐུན་ཚོགས་པའི་གྲོས་ཚོགས་གོང་མའི་འཐུས་མི་སྐུ་ཞབས་རིག་སི་ཀོ་ཊི་ (Rick Scott) ལགས་དང་དམངས་གཙོ་ཚོགས་པའི་གྲོས་ཚོགས་གོང་མའི་འཐུས་མི་སྐུ་ཞབས་ཇེ་ཧྥི་མར་ཁེ་ལེ་(Jeff Merkley) ལགས་རྣམ་གཉིས་ཡིན་ཞིང་། སྐུ་ཞབས་སི་ཀོ་ཊི་ལགས་ཀྱིས་༸གོང་ས་མཆོག་ལ་ཆེ་བསྟོད་དང་བོད་མིའི་སྒྲིག་འཛུགས་དང་རྒྱ་ནག་བར་གྲོས་མོལ་སླར་གསོ་དགོས་པ། བོད་ནང་གི་ཆབ་སྲིད་བཙོན་མའི་གནས་སྟངས་ཞུ་གཏུགས་སོགས་གནང་ཡོད་པ་མ་ཟད། ཕྱི་ལོ་ ༢༠༢༢ ལོར་རྒྱ་ནག་ཏུ་རྒྱལ་སྤྱིའི་དགུན་དུས་ཨོ་རྩལ་རྩེད་འགྲན་འཚོགས་སྐབས། ཁོང་གིས་རྒྱ་ནག་གཞུང་ནི་འཛམ་གླིང་ནང་རང་དབང་རྡོག་རོལ་གཏོང་མཁན་དང་དམིགས་བསལ་བོད་མིར་དྲག་གནོན་བྱེད་བཞིན་པར་སྐྱོན་བརྗོད་ནན་མོ་བྱས་ཡོད་འདུག དེ་བཞིན། སྐུ་ཞབས་ཇེ་ཧྥི་མར་ཁེ་ལེ་ལགས་ཀྱིས་ཕྱི་ལོ་ ༢༠༢༤ ལོའི་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་ངོ་སྤྲོད་གནང་སྟེ། ལོ་དེའི་ཟླ་ ༧ པར་དངོས་སུ་ཨ་རིའི་ཁྲིམས་ལ་བསྒྱུར་ཡོད་ཅིང་། ཕྱི་ལོ་ ༢༠༢༥ ལོར་ཁོང་གིས་༸གོང་ས་མཆོག་གི་འཁྲུངས་སྐར་ནི་བྱམས་བརྩེའི་ཉིན་མོ་སྲུང་གཙི་དགོས་པའི་ཁྲིམས་འཆར་བཏོན་ཏེ་དངོས་སུ་ཨ་རིའི་ཁྲིམས་ཆགས་ཡོད། དེ་བཞིན། ཁོང་གིས་ཨ་རིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་བ་ཇིམ་མག་གྷོ་ཝན་ལགས་དང་མཱེ་ཁལ་མཱ་ཁོལ་སོགས་དང་ལྷན་དུ་བོད་དོན་དང་འབྲེལ་བའི་ཕྱག་ལས་མང་པོ་གནང་མྱོང་འདུག

གསར་འགོད་པ། སྐལ་བཟང་སྦྱིན་པ།