དགའ་ལྡན་བྱང་རྩེ་གྲྭ་ཚང་གི་ཏྲེ་ཧོར་ཁམས་ཚན་ནས་ཡིན་པའི་དགེ་འདུན་པ་བཀྲ་ཤིས་དོན་གྲུབ་ལགས་དམར་གསོད་གཏོང་མཁན་གྱི་དོགས་ཡོད་ཉེས་ཅན་ལྔ་འཛིན་བཟུང་བྱས་ཏེ་ཁྲིམས་ཁང་དུ་ཁྲིམས་གཏུག་གནང་རྒྱུ་ཡིན་འདུག
ཉེ་སྔོན་རྒྱ་གར་ལྷོ་ཕྱོགས་ནས་ཡིན་པའི་བོད་པའི་དགེ་འདུན་པ་ཞིག་གི་སྐུ་ཕུང་གི་པར་ཞིག་སྤྱི་ཚོགས་དྲ་ལམ་ཁག་ཏུ་ཁྱབ་སྤེལ་བྱས་ཏེ་འགྲེལ་བཤད་སྣ་ཚོགས་བརྒྱབ་ཡོད་ཀྱང་། སྐབས་དེར་ཞིབ་ཕྲའི་གནས་ཚུལ་གང་ཡང་ཤེས་རྟོགས་བྱུང་མེད་ཀྱང་། ཟླ་འདིའི་ཕྱི་ཚེས་ ༤ ཉིན་དགེ་འདུན་པ་དེ་གསོད་མཁན་གྱི་དོགས་ཡོད་ཉེས་ཅན་གསུམ་འཛིན་བཟུང་བྱས་ཟིན་པ་དང་། ཁ་སང་ཕྱི་ཚེས་ ༥ ཉིན་མི་གཞན་གཉིས་ཀྱང་འཛིན་བཟུང་བྱས་ཐུབ་པའི་གནས་ཚུལ་ཐོན་འདུག
དེ་ཡང་རྒྱ་གར་གྱི་གསར་འགྱུར་བརྒྱུད་ལམ་ཁག་ཏུ་དེ་འབྲེལ་གནས་ཚུལ་ཐོན་པའི་ནང་། རྒྱ་གར་ལྷོ་ཕྱོགས་ཀར་ན་ཊ་ཀ་ (Karnataka) མངའ་སྡེའི་ནང་ཡོད་པའི་དྷར་ཝ་ཌི་ (Dharwad) གྲོང་ཁྱེར་གྱི་ཉེན་རྟོག་ཁང་གི་སྤྱི་ཁྱབ་ཉེན་རྟོག་པ་གྷུན་ཇན་ (Gunjan Arya) གྱིས། བོད་ཀྱི་དགེ་འདུན་པ་བཀྲ་ཤིས་དོན་གྲུབ་ལགས་བཙན་འཁྲིད་བྱས་ཏེ་བསད་པའི་ནག་ཉེས་འོག རྒྱ་གར་གྱི་མ་ཧཱ་ར་ཤི་ཊ་ར་ (Maharashtra) མངའ་སྡེའི་ཀོ་ལ་པུར་ (Kolhapur) རྫོང་པན་ཌི་ཝ་རི་གྲོང་གསེབ་ (Pandivare Village) ཏུ་གནས་སྡོད་རང་ལོ་ ༢༤ ཡིན་པའི་སན་ཀེ་ཐི་ (Sanketh Sattappa Yadav) དང་། རང་ལོ་ ༣༠ ཡིན་པའི་ཅཱ་ཝན་ (Vaibhav Maruti Chavan)། རང་ལོ་ ༡༨ ཡིན་པའི་སི་དྷེ་ཤི་ (Siddesh Sunil Bhosle)། དེ་བཞིན་ཉེས་ཅན་པ་གཞན་གཉིས་བཅས་ཁྱོན་ཉེས་ཅན་པ་ལྔ་འཛིན་བཟུང་བྱས་ཡོད་འདུག ཉེ་སྔོན་ཉེན་རྟོག་པས་ཉེས་ཅན་པ་གསུམ་ལ་འདྲི་བརྩད་བྱེད་སྐབས། ཁོ་ཚོས་དངུལ་འཕྲོག་བཅོམ་བྱེད་པར་དམིགས་ཏེ་དགེ་འདུན་པ་བཀྲ་ཤིས་དོན་གྲུབ་ལགས་བཙན་འཁྲིད་བྱས་ཡོད་ཀྱང་། དངུལ་འཕྲོག་རྒྱུ་མ་རག་པར་བརྟེན། གཅར་རྡུང་ཐེངས་མང་བཏང་ནས་བསད་ཡོད་པ་དང་། དེ་ནས་ཕུང་པོ་ཧ་ལི་ཡལ་གཞུང་ལམ་གྱི་ཟམ་འོག་ཏུ་གཡུགས་པའི་ནག་ཉེས་ངོས་ལེན་བྱས་ཡོད་པ་མ་ཟད། ས་གནས་ཉེན་རྟོག་པས་མོན་གྷོའི་རླངས་སྣུམ་ས་ཚིགས་ཀྱི་གསང་མིག་བརྙན་ཆས་ནང་ཞིབ་བཤེར་བྱས་ཏེ། དོགས་ཡོད་ཉེས་ཅན་དེ་དག་ངོ་ཐག་ཆོད་དེ་ས་གནས་ཉེན་རྟོག་པའི་དམིགས་བསལ་རུ་ཁག་བརྒྱད་བཏང་ནས་འཛིན་བཟུང་བྱས་ཡོད་སྐོར་དང་། སང་ཉིན་ཁྲིམས་ཁང་དུ་ཁྲིམས་གཏུག་བྱ་རྒྱུ་ཡིན་སྐོར་སོགས་བརྗོད་འདུག
ཉེ་སྔོན་ཕྱི་ཟླ་ ༤ ཚེས་ ༢༩ ཉིན་གྱི་མཚན་མོར་རྒྱ་གར་ལྷོ་ཕྱོགས་ཧུབ་ལི་ (Hubli) ནས་དྷར་ཝ་ཌི་ (Dharwad) བར་ཧ་ལི་ཡལ་གཞུང་ལམ་ (Haliyal Road) གྱི་ཟམ་འོག་ནས་དགེ་འདུན་པ་ཁོང་གི་སྐུ་ཕུང་རྙེད་ཡོད་པ་དང་། མཇིང་པ་སོགས་སུ་རྨས་སྐྱོན་མང་པོ་བཟོས་ཡོད་པ་མ་ཟད། རྐང་པ་གཉིས་ཐག་པ་དཀར་པོ་ཞིག་གིས་བསྡམས་འདུག ཉེན་རྟོག་པའི་ཕྱོགས་ནས་བརྗོད་པ་ལྟར་ན། དོགས་ཡོད་ཉེས་ཅན་པ་དེ་དག་གིས་དགེ་འདུན་པ་བཀྲ་ཤིས་དོན་གྲུབ་ལགས་མོན་གྷོ་འདོད་རྒུ་གླིང་གཞིས་ཆགས་ཀྱི་གཞིས་གྲོང་དང་པོ་ནས་རླངས་འཁོར་ཞིག་གི་ནང་བཙན་འཁྲིད་བྱས་ཏེ། ལམ་བར་ནས་དངུལ་སྤྲོད་དགོས་པའི་བཙན་སྐུལ་བྱེད་སྐབས་ཁོང་ལ་དངུལ་མེད་ཅེས་ཡང་ཡང་བཤད་ཡོད་ནའང་གཅར་རྡུང་དྲག་པོ་བཏང་སྟེ་རླངས་འཁོར་ནང་བསད་ཡོད་པ་དང་། དེ་ནས་སྐུ་ཕུང་ཧ་ལི་ཡལ་གཞུང་ལམ་གྱི་ཟམ་པའི་འོག་ཏུ་གཡུགས་ནས་བྲོས་ཕྱིན་ཡོད་འདུག
དེ་རིང་འདི་གའི་གསར་འགོད་པས་ཁ་པར་བརྒྱུད་མོན་གྷོ་འདོད་རྒུ་གླིང་གཞིས་མགོ་རིན་ཆེན་དབང་མོ་ལགས་སུ་གནད་དོན་དེ་དང་འབྲེལ་ནས་བཀའ་འདྲི་ཞུས་པར་ཁོང་མོས། ད་ལྟའི་ཆར་གནད་དོན་དེ་དང་འབྲེལ་ནས་ཉེན་རྟོག་པས་ཞིབ་བཤེར་བྱས་དང་བྱེད་མུས་ཡིན་ལ། ཉེན་རྟོག་པའི་ཞིབ་འཇུག་གྲུབ་འབྲས་འཐོན་རྒྱུ་རེད། ང་ཚོའི་ངོས་ནས་གནད་དོན་དེ་དང་འབྲེལ་ནས་ཞིབ་འཇུག་དང་འདྲི་བརྩད་ཀྱི་གྲུབ་འབྲས་གང་མགྱོགས་མགྱོགས་རག་རྒྱུའི་རེ་བ་བྱེད་ཀྱི་ཡོད། ཅེས་འགྲེལ་བརྗོད་གནང་བྱུང་།
རང་ལོ་ ༣༩ ཡིན་པའི་དགེ་འདུན་པ་བཀྲ་ཤིས་དོན་གྲུབ་ལགས་ནི་མོན་གྷོ་འདོད་རྒུ་གླིང་གཞིས་ཆགས་སུ་ཡོད་པའི་དགའ་ལྡན་བྱང་རྩེ་གྲྭ་ཚང་གི་ཏྲེ་ཧོར་ཁམས་ཚན་ནས་ཡིན་འདུག
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། པདྨ་མཚོ།
