རྒྱ་ནག་གཞུང་གིས་རྒྱུ་མཚན་གསལ་ཁ་གང་ཡང་མེད་པའི་ཐོག་ནས་དགེ་འདུན་པ་འཇམ་དབྱངས་བཀྲ་ཤིས་ལགས་སླར་ཡང་འཛིན་བཟུང་བཙན་འཁྲིད་བྱས་ཡོད་ཀྱང་ཁོང་གི་ད་ལྟའི་གནས་སྟངས་ཐད་གསལ་ཁ་གང་ཡང་མེད་པ་རེད།
བླ་བྲང་བཀྲ་ཤིས་འཁྱིལ་དགོན་པ། པར་འབྲེལ་ཡོད་ཀྱིས་འདི་གར་མཁོ་སྤྲོད་བྱས།
རྒྱ་ནག་གཞུང་གིས་འདི་ལོའི་ཕྱི་ཟླ་ ༢ ནང་བོད་བསང་ཆུ་རྫོང་ནས་ཡིན་པའི་བླ་བྲང་བཀྲ་ཤིས་འཁྱིལ་གྱི་དགེ་འདུན་པ་འཇམ་དབྱངས་བཀྲ་ཤིས་ལགས་སླར་ཡང་འཛིན་བཟུང་བཙན་འཁྲིད་བྱས་ཡོད་ཅིང་། ཁོང་ཉིད་འཛིན་བཟུང་བཙན་འཁྲིད་བྱ་དགོས་པའི་རྒྱུ་མཚན་དང་། གཟུགས་གཞིའི་གནས་སྟངས་སོགས་ཤེས་རྟོགས་ཁ་གསལ་བྱུང་མེད་པ་རེད། འདས་ལོར་རྒྱ་ནག་གཞུང་ཁོང་ཉིད་ཀྱིས་བཙན་བྱོལ་བོད་མི་རྣམས་ལ་འབྲེལ་འདྲིས་བྱས་ཡོད་པའི་དོགས་གཞིའི་འོག་ནས་ཟླ་དྲུག་རིང་འཛིན་བཟུང་བཀག་ཉར་བྱས་ཡོད་འདུག
བཞུགས་སྒར་དུ་རྟེན་གཞི་བྱས་པའི་བོད་གནས་ལྟ་ཞིབ་ཁང་གིས་སྤེལ་བའི་གནས་ཚུལ་ལྟར་ན། རྒྱ་ནག་གཞུང་གིས་དགེ་འདུན་པ་འཇམ་དབྱངས་བཀྲ་ཤིས་ལགས་འཛིན་བཟུང་བཀག་ཉར་ཟླ་བ་དྲུག་བྱས་རྗེས། རྒྱ་ནག་གཞུང་གིས་ཁོང་ཉིད་གློ་བུར་དུ་བླ་བྲང་གི་སྨན་ཁང་ཞིག་ཏུ་རྒྱུ་མཚན་ཁ་གསལ་གང་ཡང་མེད་པའི་ཐོག་ནས་བསྐྱལ་ཏེ་བསལ་ཆུ་རྫོང་དུ་ཁྲིད་ཡོད་ཅིང་། ཁོང་གི་ཉེ་འབྲེལ་རྣམས་ཀྱིས་ཁོང་དང་ཐུག་འཕྲད་བྱ་རྒྱུའི་རེ་སྐུལ་ཞུས་ཀྱང་། རྒྱ་ནག་གཞུང་གིས་དམ་དྲག་ཆེན་པོས་ཐུག་འཕྲད་བྱས་བཅུག་མེད་སྐོར་དང་། ཕྱོགས་ཡོངས་ནས་དམ་དྲག་གི་དབང་གིས་དགེ་འདུན་པ་ཁོང་གི་ད་ལྟའི་དངོས་ཡོད་ཀྱི་གནས་སྟངས་ཁ་གསལ་ཤེས་རྟོགས་བྱུང་མེད་སྐོར་གསལ་འདུག
འདི་གའི་གསར་འགོད་པས་བླ་བྲང་བཀྲ་ཤིས་འཁྱིལ་ཁུལ་དུ་གནས་སྡོད་བོད་མི་ཁག་ཅིག་ལ་འབྲེལ་འདྲིས་ཀྱིས་གནས་ཚུལ་འཚོལ་ཞིབ་བྱེད་སྐབས། དགེ་འདུན་པ་ཁོང་ཉིད་གློ་བུར་དུ་གར་སོང་ཆ་མེད་དུ་གྱུར་ནས་མཐོང་རྒྱུ་མེད་པ་ལས། ཁོང་ཉིད་གང་དུ་ཡོད་མེད་ཤེས་རྟོགས་བྱུང་མེད་པའི་མུར། ཕྱོགས་ཡོངས་ནས་བླ་བྲང་བཀྲ་ཤིས་འཁྱིལ་ཁུལ་དུ་དམ་དྲག་ཆེན་པོ་བྱེད་མུས་ཡིན་པས། ཆབ་སྲིད་དང་འབྲེལ་བའི་གནད་དོན་མང་དག་ཅིག་ལ་གསལ་ཁ་ཆེན་པོ་མེད་སྐོར་བརྗོད་བྱུང་།
འདས་ལོའི་ཕྱི་ཟླ་ ༡༠ ནང་རྒྱ་ནག་གཞུང་གིས་བོད་བླ་བྲང་བཀྲ་ཤིས་འཁྱིལ་དགོན་པ་གཙོས་ཁུལ་དེའི་ལྷ་སྡེ་མང་པོར་སྔོག་བཤེར་བྱས་ཏེ་༧གོང་ས་རྒྱལ་བ་རིན་པོ་ཆེ་མཆོག་གི་སྐུ་པར་སྒྲིག་གཤོམ་བྱས་ཡོད་པ་རྣམས་ཁྲིམས་འགལ་ཡིན་ལུགས་བརྗོད་དེ་སྐུ་པར་ཁུག་མ་ཆེན་པོ་བཞི་ཙམ་བཙན་འཕྲོག་བྱས་ཡོད་པའི་གནས་ཚུལ་བྱུང་ཡོད་ལ། ཉེ་ཆར་ཡང་རྒྱ་ནག་གཞུང་གིས་མུ་མཐུད་དུ་བླ་བྲང་བཀྲ་ཤིས་འཁྱིལ་གྱི་དགེ་འདུན་པ་རྣམས་ལ་དངོས་ཤུགས་བརྒྱུད་གསུམ་ནས་ལྟ་རྟོག་དང་དམ་དྲག་བྱེད་མུས་ཡིན་པ་རེད།
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
