རྒྱ་ནག་གཞུང་གིས་དམངས་གཙོའི་རྒྱལ་ཁབ་ཆེ་ཤོས་རྒྱ་གར་ནང་གི་གསར་འགོད་རང་དབང་ལ་ཐེ་གཏོགས་བྱས་ཏེ། རྒྱ་ནག་གི་རྫུན་རྐུབ་བརྡོལ་མཁན་གྱི་བོད་པ་དང་རྒྱལ་སྤྱིའི་གསར་འགོད་པའི་ལས་དོན་འགོག་ཐབས་བྱེད་བཞིན་འདུག
འདི་ལོའི་ཕྱི་ཟླ་ ༩ ཚེས་ ༡༢ དང་ ༡༣ ཉིན་གཉིས་རིང་རྒྱ་དཀར་ནག་གཉིས་དང་། ལྷོ་ཨ་ཧྥི་རི་ཀ་དང་བྷིར་ཛལ། ཨུ་རུ་སུ་བཅས་མཐུན་ཕྱོགས་རྒྱལ་ཁབ་ཁག་ལྔ་ཡི་བྷི་རིག་(BRICS Summit) ལྷན་ཚོགས་ཐེངས་བཅོ་བརྒྱད་པ་དེ་རྒྱ་གར་གྱི་རྒྱལ་ས་ལྡི་ལི་རུ་འཚོག་རྒྱུ་ཡིན་པ་ལྟར། དེ་རིང་རྒྱ་གར་གྱི་གསར་ཁང་ (ThePrint) གིས་གནས་ཚུལ་སྤེལ་བ་ལྟར་ན། རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་རྒྱ་ནག་གཞུང་ཚབ་ཁང་གིས། བཙན་བྱོལ་བོད་མིའི་གསར་ཁང་ཁག་གི་གསར་འགོད་པ་རྣམས་དང་བོད་ཀྱི་བདེན་པའི་གནས་ཚུལ་ལ་རྒྱབ་སྐྱོར་གནང་མཁན་གྱི་གསར་འགོད་པ་གཞན། དེ་བཞིན་རྒྱ་ནག་གི་རྩ་རླུང་སྒོམ་སྒྲུབ་ཉམས་ལེན་ཚོགས་པ་(Falun Gong) སོགས་ཀྱི་གསར་འགོད་པ་དང་འབྲེལ་ཡོད་མི་སྣ་རྣམས་ལྷན་ཚོགས་དེའི་ནང་མཉམ་ཞུགས་བྱ་རྒྱུ་བཀག་སྡོམ་དགོས་པ་དང་ལྷག་པར་དུ་སྐབས་དེར་རྒྱ་ནག་གི་སྐུ་ཚབ་མི་སྣར་བོད་དོན་དང་འབྲེལ་བའི་དྲི་བ་འདྲི་བ་སོགས་ཀྱི་གོ་སྐབས་རྩ་བ་ནས་སྤྲོད་མི་ཆོག་པའི་སྐོར་རྒྱ་གར་ཕྱི་སྲིད་ལྷན་ཁང་ལ་ནན་བརྗོད་བྱས་ཡོད་འདུག
རྒྱ་ནག་གཞུང་གིས་རྒྱ་ནག་ནང་བཀག་སྡོམ་བྱས་པའི་རྩ་རླུང་སྒོམ་སྒྲུབ་ཉམས་ལེན་ཚོགས་པ་དང་འབྲེལ་བའི་ཨེ་ཕོག་དུས་བབ་ (Epoch Times) དང་ཤིན་ཐང་རིན་རྒྱ་ཡིག་དྲ་བ (NTD)། རེ་བའི་འབོད་སྒྲ་ (Sound of Hope)། རྒྱ་ནག་ལ་ལྟ་བ་ (Secret China) ཞེས་པ་སོགས་ཀྱི་གསར་འགོད་པ་རྣམས་དང་། བཞུགས་སྒར་དུ་རྟེན་གཞི་བྱས་པའི་བོད་པའི་གསར་ཁང་ནོར་ཝེ་བོད་ཀྱི་རླུང་འཕྲིན་ཁང་དང་ཕ་ཡུལ། བོད་ཀྱི་བང་ཆེན་དང་བོད་ཀྱི་དུས་བབ། བོད་ཀྱི་ཆ་འཕྲིན་དང་བོད་ཀྱི་རླུང་འཕྲིན། དེ་བཞིན་ཨེ་ཤ་ཡ་རང་དབང་རླུང་འཕྲིན་ཁང་སོགས་ཀྱི་གསར་འགོད་པ་རྣམས་བྷི་རིག་ལྷན་ཚོགས་ནང་མཉམ་ཞུགས་བྱས་ཏེ་གནས་ཚུལ་བསྡུ་འགོད་དང་དྲི་བ་དྲི་ལན་བྱ་རྒྱུ་བཀག་འགོག་བྱེད་རྩིས་འདུག་ལ། ཟླ་ ༧ ཚེས་ ༢༧ ཉིན་ནས་རྒྱ་གར་ཕྱི་སྲིད་ལྷན་ཁང་གིས་ལྷན་ཚོགས་དེའི་སྟེང་མཉམ་ཞུགས་བྱེད་མཁན་གྱི་གསར་འགོད་པ་རྣམས་ལ་ཆོག་མཆན་དང་ཐོ་འགོད་མགོ་བཙུགས་འདུག
རྒྱ་ནག་གཞུང་གིས་རྒྱ་ནག་གི་རྫུན་རྐུབ་བརྡོལ་མཁན་གྱི་བོད་པའི་གསར་ཁང་ཁག་དང་། རྒྱ་ནག་གི་དམངས་གཙོ་དོན་གཉེར་བ་དང་རྩ་རླུང་སྒོམ་སྒྲུབ་ཚོགས་པ་སོགས་ཀྱི་གནས་ཚུལ་བོད་ནང་དང་རྒྱ་ནག་ནང་བཀག་སྡོམ་ནན་མོ་བྱས་དང་བྱེད་མུས་ཡིན་ལ། ད་ལྟ་བོད་ནང་དུ་བཙན་བྱོལ་བོད་མིའི་གསར་ཁང་ཁག་གི་གནས་ཚུལ་ལ་ལྟ་ཉན་བྱེད་པ་དང་བརྒྱུད་སྐུར་བྱས་པ་ཤེས་རྟོགས་བྱུང་ཚེ། འཕྲལ་དུ་འཛིན་བཟུང་བཀག་ཉར་བྱེད་བཞིན་ཡོད་པའི་དཔེ་མཚོན་གསར་ཤོས་ཤིག་ནི། ཕྱི་ལོ་ ༢༠༢༣ ལོར་རྒྱ་ནག་གཞུང་གིས་བླ་བྲང་དང་དེའི་གཡས་གཡོན་གྱི་དགེ་འདུན་པ་བཅུ་སྐོར་ཞིག་ལ་ཕྱི་ཕྱོགས་ཀྱི་གནས་ཚུལ་བརྒྱུད་སྤེལ་བྱས་པའི་ཉེས་མིང་འོག་འཛིན་བཟུང་བྱས་ཏེ་ཁ་པར་ལ་སྔོག་བཤེར་དང་། ཟླ་གཉིས་ཡས་མས་ལ་ཆབ་སྲིད་ཀྱི་སློབ་གསོ་ཟེར་བ་བཏང་ཡོད། འདས་ལོར་མཉམ་འབྲེལ་རྒྱལ་ཚོགས་ཀྱིས་ཀྱང་། རྒྱ་ནག་གཞུང་གིས་ཕྱི་ཕྱོགས་ཀྱི་གནས་ཚུལ་ལ་ལྟ་ཉན་དང་བརྒྱུད་སྐུར་བྱས་པའི་ཉེས་མིང་འོག་བོད་ནང་གི་བོད་མི་ཁྱོན་ ༦༠ ལྷག་འཛིན་བཟུང་བྱས་པའི་སྙན་ཐོ་བཏོན་ཡོད།
གནས་ཚུལ་ལྟར་ན། རྒྱ་ནག་གཞུང་གིས་ད་ལྟ་ནས་རྒྱ་ནག་དམར་ཤོག་ཚོགས་པའི་ག་གཏད་གཅོག་མཁན་བོད་པ་དང་རྩ་རླུང་སྒོམ་སྒྲུབ་ཚོགས་པ་སོགས་ཀྱི་འབྲེལ་ཡོད་གསར་འགོད་པ་བཀག་འགོག་བྱེད་དོན་ནི། འཚོག་ལ་ཉེ་བའི་བྷི་རིག་ལྷན་ཚོགས་སྟེང་རྒྱ་ནག་གི་གཙོ་འཛིན་ཞི་ཅིན་ཕིན་མཉམ་ཞུགས་བྱ་སྲིད་པས་ཡིན་སྐོར་བརྗོད་འདུག་ནའང་། ད་ལྟ་ཞི་ཅིན་ཕིན་དང་ཨུ་རུ་སུའི་སྲིད་འཛིན་པུ་ཊིན་གཉིས་ལྷན་ཚོགས་དེར་མཉམ་ཞུགས་བྱེད་སྲིད་སྐོར་བརྗོད་པ་ལས་གཞུང་འབྲེལ་གྱི་ཐོག་ནས་གཏན་འཁེལ་བྱུང་བའི་གནས་ཚུལ་གང་ཡང་མི་འདུག
ཕྱི་ལོ་ ༢༠༢༣ ལོར་རྒྱ་ནག་གཞུང་གིས་རྒྱ་ནག་ནང་དང་རྒྱལ་སྤྱིའི་སྟེང་རྒྱ་ནག་གི་ཤུགས་རྐྱེན་རྒྱ་ཁྱབ་གཏོང་བར་ཆེས་ཆེ་བའི་འགོག་རྐྱེན་ནམ་ཉེན་ཁ་དུག་ལྔ་ཞེས་པ་ཐེར་འདོན་བྱས་པའི་ཁྲོད། བོད་རང་བཙན་འཐབ་རྩོད་དང་ཐའེ་ཝན་རང་བཙན། ཤར་ཊུ་ཀི་སི་ཐན་ནམ་ཡུ་གུར་མི་མང་གི་ལས་འགུལ། རྩ་རླུང་སྒོམ་སྒྲུབ་ཉམས་ལེན་ཚོགས་པ་དང་རྒྱ་ནག་གི་དམངས་གཙོའི་ལས་འགུལ་བཅས་ཚུད་ཡོད་ལ། ཐེངས་འདིར་ཡང་རྒྱ་ནག་གཞུང་བོད་ཀྱི་བདེན་པའི་འཐབ་རྩོད་དང་འགྲོ་བ་མིའི་ཐོབ་ཐང་གི་གནས་བབ། ཆོས་དད་རང་དབང་སོགས་ཀྱི་དངོས་ཡོད་གནས་ཚུལ་ལ་གཡོལ་ཆེད་བོད་པ་དང་རྩ་རླུང་སྒོམ་སྒྲུབ་ཉམས་ལེན་ཚོགས་པ་དང་འབྲེལ་བའི་གསར་འགོད་པ་རྣམས་བཀག་འགོག་བྱེད་ཐབས་ཀྱི་འབད་བརྩོན་བྱེད་མུས་རེད་འདུག
གོ་ལའི་དཔལ་འབྱོར་དང་རྒྱལ་ཁབ་སོ་སོའི་དཔལ་འབྱོར་འཕེལ་རྒྱས་སུ་དམིགས་པའི་བྷི་རིག་ལྷན་ཚོགས་དེ་ཕྱི་ལོ་ ༢༠༠༦ ལོར་ཐོག་མར་གྲོས་མགོ་བཏོན་པ་དང་ ༢༠༠༩ ལོར་དངོས་སུ་རྒྱ་དཀར་ནག་གཉིས་དང་བྷར་ཛིལ། ཨུ་རུ་སུ། ལྷོ་ཨ་ཧྥི་རི་ཀ་བཅས་ཀྱིས་གསར་འཛུགས་བྱས་ཡོད། ད་ལྟ་ལྷན་ཚོགས་དེར་ཚོགས་མི་འཛམ་གླིང་རྒྱལ་ཁབ་ཁྱོན་ ༡༡ ཡོད་ཅིང་། འདི་ལོའི་ལྷན་ཚོགས་དེའི་མགོ་ཁྲིད་རྒྱ་གར་ཡིན་འདུག་ལ། ད་ལོ་རྒྱ་གར་ནང་བྷི་རིག་ལྷན་ཚོགས་ཐེངས་བཞི་པ་དེ་འཚོག་གི་འདུག དེ་སྔ་ཕྱི་ལོ་ ༢༠༡༢ དང་ ༢༠༡༦། ༢༠༢༡ བཅས་སུ་རྒྱ་གར་ནང་བྷི་རིག་ལྷན་ཚོགས་འཚོགས་མྱོང་འདུག
གསར་འགོད་པ། སྐལ་བཟང་སྦྱིན་པ།
