དམངས་གཙོའི་དུས་དྲན་ཐེངས་ ༦༦ པ་སྲུང་གཙི་གནང་། 

བཞུགས་སྒར་དྷ་སར་བོད་མིའི་དམངས་གཙོའི་དུས་ཆེན་ཐེངས་  ༦༦ པ་ཧྲིལ་པོ་འཁོར་བའི་གཞུང་འབྲེལ་མཛད་སྒོ་འཚོགས།

དེ་རིང་ཕྱི་ཟླ་ ༩ ཚེས་ ༢ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ། བོད་ཀྱི་དམངས་གཙོ་དབུ་བརྙེས་ཏེ་ལོ་ངོ་ ༦༦ འཁོར་བའི་གཞུང་འབྲེལ་མཛད་སྒོའི་ཐོག་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་། སྤྱི་འཐུས་ཚོགས་གཙོ་བཀྲས་ཁང་སྒྲོལ་མ་ཚེ་རིང་མཆོག ཕྱི་ལོ་ ༡༩༨༩ ལོར་པེ་ཅིན་གནམ་སྡེ་སྒོ་མོ་ཆེའི་ཐང་ཆེན་དུ་སློབ་ཕྲུག་གིས་ཞི་བའི་ངོ་རྒོལ་གྱི་ལས་འགུལ་སྤེལ་སྐབས་སྣེ་འཁྲིད་མཁན་ཝང་ཊན་ (Wang Dan) ལགས་གཙོས། དབུས་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་སོགས་ཆེད་ཕེབས་གནང་འདུག་ལ། མཛད་སྒོའི་ཐོག་འདི་ལོའི་རྒྱ་གར་རྒྱལ་ཡོངས་འཛིན་རིམ་བཅུ་གཉིས་ཀྱི་ཡིག་རྒྱུགས་ཁྲོད་བརྒྱ་ཆ་ ༩༥ ཡན་ལེན་མཁན་སློབ་མ་བཞི་ལ་ཕུལ་བྱུང་བྱ་དགའ་དང་། སློབ་མ་བཅུ་ལ་དགའ་ལྡན་ཕོ་བྲང་གི་བྱ་དགའ་གནང་སོང་།

སྲིད་སྐྱོང་སྤེན་པ་ཚེ་རིང་མཆོག་གིས་བཀའ་ཤག་གི་གསུང་འཕྲིན་སྙན་སྒྲོན་གནང་བའི་ནང་། དེང་སང་རྒྱལ་སྤྱིའི་སྡིངས་ཆའི་སྟེང་གི་འཐབ་རྩོད་མངོན་གསལ་དོད་ཤོས་ཤིག་ནི། རང་དབང་མང་གཙོའི་ལམ་ལུགས་དང་སྲིད་དབང་སྒེར་གཅོད་ལམ་ལུགས་དབར་གྱི་དཀའ་རྙོག་དེ་ཡིན་པ་ཀུན་གྱིས་མཐོང་ཆོས་ལྟར། རྒྱ་དམར་གཞུང་གིས་གཙོས་པའི་སྒེར་གཅོད་རྒྱལ་ཁབ་ཁག་ངན་པ་ཁ་མཐུན་གྱིས། བྱེད་ཐབས་སྣ་ཚོགས་བརྒྱུད་སྒེར་གཅོད་ཀྱི་ལྟ་གྲུབ་དང་། ལམ་ལུགས་ཁྱབ་སྤེལ་བྱས་ཏེ། མང་གཙོའི་རྒྱལ་ཁབ་ཁག་ལ་ཁ་གཏད་དང་འགྲན་རྩོད་བྱེད་བཞིན་ཡོད། ང་ཚོའི་བོད་དོན་འཐབ་རྩོད་ཀྱང་གོ་ལ་ཧྲིལ་པོའི་རང་དབང་དང་སྒེར་གཅོད་དབར་འཐབ་རྩོད་ཀྱི་ཆ་ཤས་ཤིག་ཆགས་ཀྱི་ཡོད་སྟབས། ང་ཚོས་མང་གཙོ་ཚད་ལྡན་ཞིག་ལག་བསྟར་ཐུབ་པ་བྱ་རྒྱུ་ནི། སྲིད་དབང་སྒེར་གཅོད་ལམ་ལུགས་ལ་གདོང་ལེན་བྱེད་པའི་ཐབས་ལམ་ཡག་ཤོས་ཤིག་ཡིན། འདས་པའི་མི་ལོ་ ༦༦ ལ་ཕྱིར་ལྟ་བྱེད་སྐབས། ང་ཚོར་ངེས་ཤེས་རྙེད་པའི་ཉམས་མྱོང་ཞིག་ནི། ཕ་རོལ་པོའི་མ་རུང་བའི་བསམ་སྦྱོར་ལ་ཁ་གཏད་དང་། སྤྱི་ཚོགས་སྐྱོན་བྲལ་ངང་ཡར་རྒྱས་འགྲོ་བའི་རྨང་གཞི་གཙོ་བོ་ཞིག་ནི། མང་གཙོའི་ལྟ་གྲུབ་ལ་མོས་གུས་དང་། མང་གཙོ་ལམ་ལུགས་ལག་བསྟར་བྱ་རྒྱུ་དེ་ཡིན་པ་དང་། དེ་ཡང་མང་གཙོ་ནི་མི་མང་གིས་དབང་སྒྱུར་བྱེད་པ་ཁོ་ན་མིན་པར། མི་མང་གི་སྐུ་ཚབ་ཀྱིས་གཏན་ལ་ཕབ་པའི་ཁྲིམས་ཀྱིས་དབང་སྒྱུར་བྱེད་དགོས་པའི་རྩ་དོན་རྒྱུན་འཁྱོངས་དང་། ང་ཚོ་མི་རེ་ངོ་རེར་བཅའ་ཁྲིམས་ཀྱིས་འགན་སྲུང་བྱས་པའི་གཞི་རྩའི་ཐོབ་ཐང་ཡོད་པ་དང་མཉམ་དུ། སྤྱི་ཚོགས་ཀྱི་བདེ་འཇགས་དང་རྩ་དོན་ལ་སྲུང་སྐྱོབ་བྱེད་པའི་བཅའ་ཁྲིམས་ཀྱིས་བསྐུར་བའི་ལས་འགན་ཡང་ཡོད་པ་དེ་ངེས་པར་དུ་བྱ་དགོས། ཞེས་གསལ་འདུག

ཡང་བསྒྲགས་གཏམ་ནང་། མང་གཙོའི་སྤྱི་ཚོགས་ནང་བསམ་ཚུལ་མི་མཐུན་པ་ཡོང་རྒྱུ་ནི་ཆོས་ཉིད་ཡིན་ལ། དེང་སང་སྤྱི་ཚོགས་དྲ་རྒྱའི་དུས་རབས་འདིར། རང་དབང་བེད་སྤྱོད་ལོག་པར་བཏང་སྟེ། ཁ་གཏད་གཅོག་ཡུལ་ངོ་མ་དེ་ཟུར་དུ་བཞག་ནས། ང་ཚོའི་སྤྱི་ཚོགས་ནང་ཁུལ་དུ་ཕར་ཚུར་དམའ་འབེབས་དང་། ཆོལ་ཁ་དང་ཆོས་ལུགས་ཀྱི་འཐེན་ཁྱེར། དཀྲོག་གཏམ་དཀྲུགས་ཤིང་འགྲེམས་སྒྲོགས་རྒྱུན་མཐུད་ཡོང་བཞིན་ཡོད་པའི་ཁོངས། རྒྱ་དམར་གཞུང་གི་དངུལ་དངོས་ཀྱི་ཁེ་ཕན་རྗེས་འབྲངས་བྱེད་མཁན་དེ་ཚོར་གདོང་ལེན་མཐའ་གཅིག་ཏུ་བྱ་རྒྱུ་ལས་གདམ་ག་གཞན་མེད་ལ། དེ་མིན་ང་ཚོ་ནང་ཁུལ་ནས་ལས་གཞི་གང་ཞིག་སྤེལ་སྐབས་དང་། སྐད་ཆ་གང་ཞིག་ཤོད་སྐབས། གཞིས་ལུས་མི་མང་སེམས་ཤུགས་ཆགས་གཞི་དང་། ཕར་ཕྱོགས་ཁ་གཏད་ཀྱི་གྲོགས་སུ་འགྱུར་གཞིའི་དགྲ་དགའ་གཉེན་སྡུག་ཇི་ཆགས་ངེས་པར་དུ་བསམ་བློ་གཏོང་ཐུབ་དགོས།འཛམ་གླིང་སྤྱི་དང་བོད་ཀྱི་ཆབ་སྲིད་འཐབ་རྩོད་ཀྱི་བྱུང་རིམ་དུ། ནང་ཁུལ་རྡོག་རྩ་ཆིག་སྒྲིལ་བྱུང་ན་རྒྱལ་ཁ་ཐོབ་ཀྱི་ཡོད་པ་དང་། དེ་མིན་ནང་ཁུལ་གྱི་རྙོག་དྲ་ནང་དུ་ཐིམ་ནས། ཕ་རོལ་པོར་ཁ་གཏད་གཅོག་པའི་ནུས་པ་ཉམས་དམས་སུ་སོང་ན་ཕམ་ཁ་འབྱུང་རྒྱུ་ལས་མེད་པས། ང་ཚོ་བོད་མི་ཚོས་དེ་ལས་བསླབ་བྱ་བླངས་ཏེ། ང་ཚོའི་བོད་དོན་འཐབ་རྩོད་ཀྱི་ནུས་སྟོབས་ཉམས་དམས་དང་། ནང་ཁུལ་གྱི་ཆིག་སྒྲིལ་གཏོར་བཤིག་གཏོང་བའི་གཏམ་སྤྱོད་རིགས་ལ་གདོང་ལེན་བྱ་རྒྱུར་བོད་མི་ཚང་མས་སྤྱང་གྲུང་དོད་པོ་དང་། རྣམ་དཔྱོད་རྩལ་སྤྲུགས་བྱེད་དགོས། ཞེས་དང་།  རྒྱ་དམར་གཞུང་གིས་བོད་ས་བཙན་བཟུང་བྱས་པ་ནས་ད་བར་བོད་མི་རིགས་རྩ་མེད་གཏོང་བའི་སྲིད་བྱུས་རྒྱུན་མཐུད་སྤེལ་ཡོད་པ་དང༌། ལྷག་པར་ཉེ་བའི་ལོ་ངོ་བཅུ་ཕྲག་ལྷག་ཙམ་གྱི་གོང་ནས་ཇེ་སྡུག་ཇེ་ཐུར་སོང་བའི་སྐོར་མཉམ་འབྲེལ་རྒྱལ་ཚོགས་དང་། རྒྱལ་སྤྱིའི་སྤྱི་ཚོགས་ནས་སྙན་ཐོ་རིམ་པར་བཏོན་ཏེ་རྒྱལ་སྤྱིའི་ཁྲིམས་དང་མ་མཐུན་པའི་ཁུངས་སྐྱེལ་བྱས་ཡོད་པ་ལྟར། ང་ཚོའི་ངོས་ནས་དེར་དགག་པ་དང་ངོ་རྒོལ་ཡོད་ཅེས་འབོད་ཚིག་བསྒྲགས་པ་ཙམ་གྱིས་མི་འདང་བར། རྒྱ་དམར་གཞུང་གི་ངན་བྱུས་རྣམས་རྒྱུས་ལོན་ཡོད་པའི་ཐོག་ནས་ཐེར་འདོན་དང་གདོང་ལེན་བྱེད་དགོས་པ་ཡིན་པས། བོད་མིའི་སྒྲིག་འཛུགས་ནས་གདོང་ལེན་བྱེད་སྒོ་ཁག་ལ་མང་ཚོགས་ནས་ཀྱང་མཉམ་རུབ་དགོས། ཞེས་གསལ་འདུག

བོད་མི་མང་སྤྱི་འཐུས་ཚོགས་གཙོ་བཀྲས་ཁང་སྒྲོལ་མ་ཚེ་རིང་མཆོག་གིས་སྤྱི་འཐུས་ལྷན་ཚོགས་ཀྱི་གསུང་འཕྲིན་སྙན་སྒྲོན་གནང་བའི་ནང་།  བོད་ཀྱི་མང་གཙོ་ནི་དབང་ཆའི་འཐབ་རྩོད་བྱས་ནས་ཐོབ་པ་ཞིག་མ་ཡིན་པར་གཟིགས་རྒྱང་རིང་བའི་༧གོང་ས་རྒྱལ་བ་རིན་པོ་ཆེ་མཆོག་ནས་མི་མང་གི་ནུས་པར་གདེང་འཇོག་གིས་གསོལ་རས་གནང་བ་ཞིག་ཡིན་པས། དེ་རིང་གི་ཉིན་མོ་འདི་ནི་བདག་ཅག་གངས་ཅན་པ་རྣམས་ཀྱི་མེ་ཏོག་གང་ལ་ཕོག་པའི་ལྷ་བསྐལ་༸གོང་ས་ཡིད་བཞིན་ནོར་བུ་མཆོག་གི་བཀའ་དྲིན་དྲན་བཞིན་དུ་བཙན་བྱོལ་ནང་མང་གཙོའི་ཁེ་དབང་ལོངས་སུ་སྤྱོད་རྒྱུ་ཡོད་པས་དགའ་གུས་ཞུ་བ་དང་མཉམ། མང་གཙོའི་ལམ་སྲོལ་དེ་སྔར་ལས་འཕེལ་རྒྱས་འགྲོ་བའི་མུར་རང་རང་སོ་སོའི་འགན་འཁྲིར་མཉམ་ཞུགས་བྱེད་པ། དེ་བཞིན་ང་ཚོས་བཙན་བྱོལ་ནང་སྦྱངས་པའི་མང་གཙོའི་རང་དབང་དེ་མ་འོངས་གཞིས་བྱེས་མཉམ་འཛོམས་སྐབས་བོད་ཀྱི་མང་གཙོ་དང་། ཞི་བདེ། ཐུན་མོང་གི་གུས་བརྩི་བཅས་ཀྱི་གཞི་རྩ་ཞིག་ཏུ་འགྱུར་ཐུབ་པ་བྱེད་དགོས། ཞེས་གསལ་འདུག

ཡང་བསྒྲགས་གཏམ་ནང་། རྒྱ་ནག་དམར་གཞུང་གིས་མཐུན་སྒྲིལ་དང་ཡར་རྒྱས་ལ་ཁ་གཡར་ཏེ་མི་རིགས་རྩ་མེད་བཟོ་རྒྱུའི་ངན་བྱུས་ཀྱི་ཁྲིམས་ཡིག་མི་རིགས་མཐུན་སྒྲིལ་ཡར་ཐོན་བསྐུལ་འདེད་ཀྱི་ཁྲིམས་ཡིག་ཟེར་བ་ལག་བསྟར་གྱི་ཉིན་གཉིས་པ་སྟེ། ཕྱི་ལོ་ ༢༠༢༦ ཟླ་ ༧ ཚེས་ ༢ ཉིན་བོད་ཀྱི་རྒྱལ་གཅེས་དཔའ་བོ་རང་བཙན་བློ་དགའ་ལགས་ཀྱིས་ཨ་རིའི་གྲོང་ཁྱེར་ནེའུ་ཡོག་ཏུ་རྟེན་གཞི་བྱས་པའི་འཛམ་གླིང་མཉམ་འབྲེལ་རྒྱལ་ཚོགས་ཀྱི་ལས་ཁུངས་མདུན་ཐང་དུ་བོད་རང་དབང་རང་བཙན་སླར་གསོའི་ཆེད་རྒྱ་ནག་དམར་གཞུང་ལ་ངོ་རྒོལ་གྱིས་རང་ལུས་མེར་བསྲེགས་བཏང་སྟེ་ འདས་གྲོངས་སུ་གྱུར་བའི་ཡིད་སྐྱོའི་གནས་ཚུལ་ཐོན་ཡོད། ཁྲིམས་ཡིག་དེ་ནི་བོད་མི་རིགས་དང་རྒྱ་ནག་དམར་གཞུང་འོག་མྱངས་དང་མྱོང་བཞིན་པའི་མི་རིགས་དེ་ཚོ་གཅིག་པུའི་གནས་ཚུལ་ཞིག་མིན་པར། མི་རིགས་ཤིག་གི་ངོ་བོར་ཉེན་ཁ་བྱུང་ཚེ་རྒྱལ་སྤྱིའི་འགྲོ་བ་མིའི་ཐོབ་ཐང་གི་སྒྲོམ་གཞིའི་གཞི་རྟེན་ལའང་ཉེན་ཁ་བཟོ་བཞིན་ཡོད་མེད་རྟོགས་ཞིབ་དགོས་པ་ཡིན། དེ་བཞིན་ཁྲིམས་དེས་རྒྱལ་མཚམས་ལས་བརྒལ་བའི་དྲག་གནོན་བྱེད་ཤུགས་ཆེ་རུ་གཏོང་ཉེན་ལ་སོང་། རང་དབང་ལུང་བའི་ནང་བདེན་པ་དང་། འཚེ་མེད་ཞི་བའི་ཐོག་ནས་རང་དབང་སླར་གསོའི་ཆེད་ལས་འགུལ་སྤེལ་མཁན་དང་རྒྱབ་སྐྱོར་བྱེད་མཁན་རྣམས་ལ་སྲུང་སྐྱོབ་དགོས་པའི་འབོད་སྐུལ་ཞུ་རྒྱུ་ཡིན། རང་དབང་ལུང་བའི་ནང་གནས་བའི་གཞིས་ལུས་རྒྱ་ཆེ་མང་ཚོགས་ཀྱི་མགྲིན་ཚབ་པ་རྣམས་ནས་ཀྱང་དབའ་བོ་དབའ་མོའི་བློས་གཏོང་རྣམས་ཡིད་ལ་བཅངས་ནས་རྒྱ་ནག་དམར་གཞུང་གི་སྲིད་བྱུས་འདིའི་ཐོག་རྒྱུས་ལོན་གྱིས་སོ་སོའི་ས་གནས་སུ་གོ་རྟོགས་སྤེལ་བ་བརྒྱུད་བོད་དོན་རྒྱབ་སྐྱོར་ཐོབ་ཐབས་སུ་ཞུ་སྐུལ་མུ་མཐུད་སྤེལ་ཐུབ་པ་བྱ་དགོས། ཞེས་གསལ་འདུག

དེ་རིང་གི་སྐུ་མགྲོན་གཙོ་བོ་ཕྱི་ལོ་ ༡༩༨༩ ལོར་པེ་ཅིན་གནམ་སྡེ་སྒོ་མོ་ཆེའི་ཐང་ཆེན་དུ་སློབ་ཕྲུག་གིས་ཞི་བའི་ངོ་རྒོལ་གྱི་ལས་འགུལ་སྤེལ་སྐབས་སྣེ་འཁྲིད་མཁན་ཝང་ཊན་ལགས་ཀྱིས།  ང་ཚོས་སྙིང་ནས་རེ་བ་བྱེད་པ་ནི་རྒྱ་ནག་དང་བོད་ཀྱི་གྲོས་ཚོགས་དབར་ཕན་ཚུན་འབྲེལ་བ་དང་། ལོ་མང་རིང་བོད་མི་ཚོས་བསགས་པའི་དམངས་གཙོའི་ཉམས་མྱོང་ལས་སློབ་སྦྱོང་བྱེད་ཐུབ་རྒྱུ་དེ་རེད། དེ་དང་ཆབས་ཅིག ངས་༧གོང་ས་རྒྱལ་བ་རིན་པོ་ཆེ་མཆོག་ནས་དབུ་མའི་ལམ་གསུངས་པ་དེའི་གལ་ཆེའི་རང་བཞིན་དེ་ཆབ་སྲིད་ཀྱི་དཀའ་ངལ་སེལ་ཐབས་ཤིག་ཡིན་པ་ངོས་འཛིན་བྱེད་ཀྱི་ཡོད། ངས་རེ་བ་བྱེད་པ་ནི་ཕྱི་རྒྱལ་དུ་གནས་སྡོད་བོད་པ་དང་རྒྱ་མི་རིགས་གཉིས་ཀྱིས་ཚོགས་འདུ་དང་ཐབས་ལམ་གཞན་བརྒྱུད་ནས་བསྐྱར་དུ་ཐད་ཀར་དང་རྒྱུན་ལྡན་གྱི་གྲོས་མོལ་གྱི་སྟེགས་བུ་ཞིག་བསྐྲུན་ཏེ། བོད་དོན་དང་འབྲེལ་བའི་ཆབ་སྲིད་ཀྱི་གནད་དོན་སྣ་ཚོགས་དང་། བོད་མི་དང་རྒྱ་མི་རིགས་གཉིས་ཀའི་ཆོས་ཕྱོགས་ཀྱི་ཁྱིམ་གཞིས་བསྐྱར་གསོ་བྱ་རྒྱུའི་སྐོར་ལ་ཆབ་སྲིད་དང་རིག་གཞུང་གི་གྲོས་མོལ་བྱེད་ཐུབ་རྒྱུ་དེ་རེད། ཅེས་བརྗོད་སོང་།

ཡང་ཁོང་གིས། ངས་ཕྱི་རྒྱལ་གྱི་དམངས་གཙོ་དོན་གཉེར་བ་དང་ངོ་རྒོལ་ལས་འགུལ་གྱི་གྲོགས་པོ་མང་པོས་མཉམ་འདུས་ཀྱི་གླེང་སྟེགས་ཤིག་བསྐྲུན་པར་དགའ་བསུ་དང་རེ་བ་བྱེད་ཀྱིན་ཡོད། བོད་མི་དང་རྒྱ་མི་རིགས་གཉིས་ཀ་དབང་སྒྱུར་དང་གཉའ་གནོན་ལས་ཐར་ཏེ། རང་དབང་དང་། དམངས་གཙོ། ཆེ་མཐོང་བཅས་ལ་ལོངས་སྤྱོད་ཐུབ་པ་དང་། རང་གི་མ་འོངས་པ་དངོས་གནས་ཐག་གཅོད་ཐུབ་པར་ཤོག ཅེས་བརྗོད་སོང་།

གསར་འགོད་པ། རྟ་མགྲིན་མཚོ། དཔལ་ལྡན། རྩོམ་སྒྲིག་བྱེད་མཁན། ཆོས་རྒྱལ་སྐྱབས།