ཧོང་ཀོང་གི་ཁྲིམས་ཁང་ཞིག་གིས་ཧོང་ཀོང་གི་དམངས་གཙོའི་ལས་འགུལ་བ་དང་ཆར་གདུགས་གསར་བརྗེའི་སྣེ་འཁྲིད་པ་ཇོ་ཧྲ་ཝང་ཡིས་ཕྱི་རྒྱལ་གྱི་ཚོགས་སྡེ་ཁག་དང་ལག་འབྲེལ་བྱས་པའི་ནག་ཉེས་ངོས་ལེན་བྱས་ཡོད་ཟེར།
ཧོང་ཀོང་གི་ཁྲིམས་ཁང་ཞིག་གིས་ཧོང་གོང་གི་དམངས་གཙོའི་ལས་འགུལ་གྱི་སྣེ་འཁྲིད་པ་ཇོ་ཤི་ཇོ་ཧྲ་བོང་ (Joshua Wong) ལགས་ཀྱིས་ཕྱི་རྒྱལ་གྱི་ཚོགས་སྡེ་ཁག་དང་ལག་འབྲེལ་བྱས་པའི་ནག་ཉེས་ངོས་ལེན་བྱས་ཡོད་སྐོར་བསྒྲགས་འདུག་ལ། ད་ལྟའི་ཆར་ཁོང་ལ་ཁྲིམས་ཆད་ཡོངས་བསྒྲགས་བྱས་མེད་ཀྱང་། རྒྱ་ནག་གཞུང་གིས་ཧོང་ཀོང་ནང་ལག་བསྟར་བྱེད་བཞིན་པའི་རྒྱལ་ཁབ་བདེ་འཇགས་ཀྱི་ཁྲིམས་འོག་ནས་ཁོང་ལ་ཚེ་བཙོན་གྱི་ཁྲིམས་ཐག་འབབ་སྲིད་ཀྱི་ཡོད་སྐོར་བརྗོད་འདུག
ཁྲིམས་ཁང་དེས་བརྗོད་དོན་ལྟར་ན། ཇོ་ཧྲ་ཝོང་དང་ད་ལྟ་དབྱིན་ཡུལ་དུ་སྐྱབས་བཅོལ་ཡོད་པའི་ན་ཐན་ལོའུ་གཉིས་ཀྱིས་ཨ་རི་དང་འཇར་མན། ཨི་ཊ་ལི་སོགས་སུ་འབྲེལ་བ་བྱས་ཏེ། འཛམ་གླིང་རྒྱལ་ཁབ་ཁག་དང་རྒྱལ་སྤྱིའི་ཚོགས་སྡེ་ཁག་གིས་ཧོང་ཀོང་གི་གནད་དང་འབྲེལ་ནས་རྒྱ་ནག་དང་ཧོང་ཀོང་གི་འབྲེལ་ཡོད་མི་སྣར་ཁྲིམས་ཆད་གཅོད་དགོས་པའི་རེ་སྐུལ་ཞུས་ཡོད་འདུག
ཁྲིམས་ཁང་གིས་ཇོ་ཧྲ་ཝང་གི་གྱོད་གཞི་ཡོངས་བསྒྲགས་བྱེད་སྐབས། ཇོ་ཧྲ་ཝང་གི་གྲོགས་པོ་དང་རྒྱབ་སྐྱོར་བ་མང་པོ་ཁྲིམས་ཁང་དུ་ཕྱིན་ནས་ཇོ་ཧྲ་ཝང་ལ་ཤུགས་རྒྱོབས་ཞེས་སྐད་འབོད་བརྒྱབ་ཡོད་ཅིང་། ཇོ་ཧྲ་ཝང་གིས་ཀྱང་འཛུམ་མདངས་དང་བཅས་མགོ་བོ་ལྡེམ་ལྡེམ་གྱིས་ཡ་ལན་སྤྲད་ཡོད་འདུག
ད་ཐེངས་ཇོ་ཧྲ་ཝང་ལ་བསྐྱར་དུ་ནག་ཉེས་ཕོག་པར་ཁོང་གི་རྒྱབ་སྐྱོར་བ་མང་པོས་སེམས་འཚབ་བྱེད་ཡོད་ཅིང་། དེ་སྔའི་དམངས་གཙོ་སྤྱི་ཚོགས་ཡར་ཐོན་ཚོགས་པའི་ཚོགས་མི་དང་ཇོ་ཧྲ་ཝང་གི་གྲོགས་པོ་ཚང་ཀི་ཤིན་(Tsang Kin-shing) ལགས་ཀྱིས། ཇོ་ཧྲ་ཝང་ད་ལྟའི་བར་ཉིན་ ༢༠༠༠ ལྷག་རིང་བཙོན་ཁང་དུ་བཅུག་ཡོད་པས། ཐེངས་འདིར་ཁྲིམས་ཆད་ཡང་མོ་གཅོད་པའི་རེ་བ་ཡོད་ཅེས་བརྗོད་འདུག ཕྱི་ལོ་ ༢༠༢༤ ལོར་རྒྱ་ནག་གཞུང་གིས་ཇོ་ཧྲ་ཝོང་གཙོ་བྱས་པའི་ཧོང་ཀོང་གི་དམངས་གཙོའི་ལས་འགུལ་བ་ ༤༥ ལ་རྒྱལ་ཁབ་མགོ་རྟིང་སློག་ཐབས་བྱས་པའི་ནག་ཉེས་བཙུགས་ཏེ། ཇོ་ཧྲ་ཝང་ལ་ལོ་བཞི་དང་ཟླ་བརྒྱད་ཀྱི་བཙོན་འཇུག་ཁྲིམས་ཐག་བཅད་དེ་ད་ལྟའང་བཙོན་ཁང་དུ་ཁྲིམས་ཆད་འཁུར་མུས་ཡིན་པ་རེད།
ཧོང་ཀོང་ནང་རྒྱལ་ཁབ་བདེ་འཇགས་ཀྱི་ཁྲིམས་ལག་བསྟར་བྱས་པ་ནས་ད་བར་ཧོང་ཀོང་སྲིད་གཞུང་གིས་དམངས་གཙོའི་ལས་འགུལ་བ་ཁྱོན་ ༤༡༥ ལྷག་འཛིན་བཟུང་བྱས་ཡོད་པ་དང་། རྒྱལ་སྤྱིའི་སྤྱི་ཚོགས་ཀྱིས་ཧོང་ཀོང་གི་བདེ་འཇགས་ཁྲིམས་གསར་ལག་བསྟར་ཐད་རྒྱ་ནག་གཞུང་ལ་སྐྱོན་བརྗོད་ཤུགས་ཆེན་བྱས་ཡོད་པ་མ་ཟད། ཨ་རིའི་རང་དབང་ཁང་པས་ཕྱི་ལོ་ ༢༠༢༠ ལོའི་རང་དབང་གཟེངས་རྟགས་དེ་ཧོང་ཀོང་གི་དམངས་གཙོའི་ལས་འགུལ་བ་རྣམས་ལ་སྤྲད་ཡོད་པ་རེད།
དམངས་གཙོའི་ལས་འགུལ་བ་ཇོ་ཧྲ་ཝང་ལགས་ནི་ཧོང་ཀོང་གི་རྒྱལ་ཁབ་བདེ་འཇགས་ཁྲིམས་གསར་རྐྱེན་གྱིས་སྒོ་བརྒྱབ་པའི་ཌེ་མོ་སིས་ཊོ་ (Demosisto) ཞེས་པའི་ཧོང་ཀོང་གི་དམངས་གཙོ་དོན་གཉེར་བའི་ཆབ་སྲིད་ཚོགས་པའི་སྤྱི་ཁྱབ་དྲུང་ཆེ་ཡིན་ཞིང་། ཁོང་ཧོང་ཀོང་གི་སློབ་མའི་ལས་འགུལ་ཁང་ (Scholarism) ཞེས་པ་གསར་འཛུགས་བྱེད་མཁན་གྱི་གྲས་ཤིག་ཀྱང་ཡིན་ལ། ཕྱི་ལོ་ ༢༠༡༤ ལོར་ཧོང་ཀོང་གི་ཆར་གདུགས་གསར་བརྗེའི་ལས་འགུལ་གྱི་གཞོན་སྐྱེས་སྣེ་འཁྲིད་པ་ཞིག་ཏུ་གྱུར་ཏེ། རྒྱལ་སྤྱིའི་སྟེང་དོ་སྣང་ཆེན་པོ་བྱེད་ཡུལ་ཞིག་ཆགས་ཡོད། ཨ་རིར་རྟེན་གཞི་བྱས་པའི་དུས་བབ་དུས་དེབ་ (Times Magazine) ཀྱིས་ཕྱི་ལོ་ ༢༠༡༤ ལོའི་འཛམ་གླིང་གི་གཞོན་སྐྱེས་ཤུགས་རྐྱེན་ཆེ་ཤོས་གྲས་སུ་ངོས་འཛིན་བྱས་ཡོད་པ་མ་ཟད། ལོ་དེའི་འཛམ་གླིང་གི་ཤུགས་རྐྱེན་ཆེ་ཤོས་ཀྱི་མི་སྣའི་འོས་མིར་ཡང་བདམས་ཡོད། དེ་ཙམ་དུ་མ་ཟད། ཕྱི་ལོ་ ༢༠༡༥ ལོར་ཨ་རིའི་ཧྥོར་ཆུན་དུས་དེབ་ (Fortune Magazine) ཀྱིས་ཁོང་འཛམ་གླིང་གི་རླབས་ཆེན་མགོ་འཁྲིད་(World’s Grestest Leaders) གྲས་སུ་ངོས་འཛིན་བྱས་ཡོད། ཁོང་དམངས་གཙོའི་གཞུང་རྒོལ་ལས་འགུལ་ནང་ཞུགས་པའི་རྐྱེན་གྱིས། ཕྱི་ལོ་ ༢༠༡༧ དང་ ༢༠༡༨ ། དེ་བཞིན་ཕྱི་ལོ་ ༢༠༢༠ ལོ་ནས་བསྟུད་མར་བཙོན་ཁང་དུ་བཙོན་འཇུག་ཁྲིམས་ཆད་འཁུར་མུས་ཡིན།
གསར་འགོད་པ། སྐལ་བཟང་སྦྱིན་པ།
