བོད་པའི་བུ་མོ་བསྟན་འཛིན་གསལ་སྒྲོན་ལགས་རྒྱལ་སྤྱིའི་དུས་བབ་དུས་དེབ་ཀྱི་ཕྱི་ལོ་ ༢༠༢༦ ལོའི་ཤུགས་རྐྱེན་ཆེས་ཆེ་བའི་གནམ་གཤིས་འགྱུར་ལྡོག་སྲུང་སྐྱོབ་བྱེད་པའི་མི་སྣ་བརྒྱ་དང་དེའི་ནང་ནས་ཀྱང་གསར་གཏོད་མི་སྣ་ ༢༠ ཁོངས་སུ་བདམས་འདུག
བོད་པའི་བུ་མོ་བསྟན་འཛིན་གསལ་སྒྲོན་ལགས་ཕྱི་ལོ་ ༢༠༢༦ ལོའི་འཛམ་གླིང་ནང་གནམ་གཤིས་འགྱུར་ལྡོག་གི་དཀའ་ངལ་སྲུང་སྐྱོབ་བྱེད་པར་ཤུགས་རྐྱེན་ཆེས་ཆེ་བའི་མི་སྣ་བརྒྱའི་ཁོངས་དང་དེའི་ནང་ནས་ཀྱང་གསར་གཏོད་ཀྱི་ཤུགས་རྐྱེན་ཆེས་ཆེ་བའི་མི་སྣ་ ༢༠ ཁོངས་སུ་བདམས་འདུག ཁོང་མོས་འཛམ་གླིང་རྒྱལ་ཁབ་ཁག་གི་(GDP) རྒྱལ་ཡོངས་སྤྱི་འབོར་ཐོན་སྐྱེད་ནི་ཕྱིར་འདོན་བྱས་པའི་ཐོན་སྐྱེད་ཡོངས་ཀྱི་སྤྱི་འབོར་ཁོ་ནར་རྩིས་རྒྱག་པ་ལས་སླར་གསོ་བྱེད་པར་རིན་ཐང་སྤྲོད་པའི་རྒྱལ་ཡོངས་སྤྱི་འབོར་བསྐྱར་གསོ་ (GDR) ཞེས་པའི་སྒྲོམ་གཞི་ཞིག་གསར་གཏོད་བྱས་ཡོད།
བསྟན་འཛིན་གསལ་སྒྲོན་ལགས་ཀྱི་གསར་གཏོད་ཀྱི་ལྟེ་བ་ནི་རྒྱལ་ཡོངས་སྤྱི་འབོར་ཐོན་སྐྱེད་ (Gross Domestic Product – GDP) ཅེས་པའི་དཔལ་འབྱོར་འཇལ་ཚད་དེའི་ཚབ་ཏུ་རྒྱལ་ཡོངས་སྤྱི་འབོར་བསྐྱར་གསོ་ (Gross Domestic Regeneration – GDR) ཞེས་པའི་འཇལ་ཐབས་གསར་པ་ཞིག་འཛུགས་དགོས་པ་དེ་རེད། རྒྱལ་ཡོངས་སྤྱི་འབོར་བསྐྱར་གསོ་ཞེས་པ་ནི་དཔལ་འབྱོར་གྱི་འཕེལ་རྒྱས་ནི་ཐོན་སྐྱེད་དང་དངུལ་འབོར་འཕར་བ་ཙམ་ལ་མི་བལྟ་བར། རང་བྱུང་ཁོར་ཡུག་སླར་གསོ་བྱེད་པ། མིའི་བདེ་ཐང་དང་འཚོ་བ་ཡར་རྒྱས་གཏོང་བ། ཡུན་གནས་ཀྱི་འཚོ་ཐབས་གསར་གཏོད་བྱེད་པ་བཅས་ལ་གཞིགས་ནས་འཇལ་དགོས་པའི་ལྟ་བ་ཞིག་རེད། ཁོང་མོའི་རྒྱལ་ཡོངས་སྤྱི་འབོར་བསྐྱར་གསོའི་སྒྲོམ་གཞིར་རྩ་བའི་ཀ་བ་གསུམ་ཡོད་པ་སྟེ། ཁོར་ཡུག་བསྐྱར་གསོ། སྤྱི་ཚོགས་བསྐྱར་གསོ། དཔལ་འབྱོར་བསྐྱར་གསོ་བཅས་རེད། མདོར་ན་བསྟན་འཛིན་གསལ་སྒྲོན་ལགས་ཀྱིས། དངོས་གནས་ཀྱི་འབྱོར་ཕྱུག་ནི་དཔལ་འབྱོར་གྱིས་ཅི་ཙམ་ཐོན་སྐྱེད་བྱེད་པ་ཁོ་ནས་འཇལ་བ་མ་ཡིན་པར། དེས་རང་བྱུང་ཁོར་ཡུག་དང་། སྤྱི་ཚོགས། མ་འོངས་པའི་མི་རབས་བཅས་ལ་ཕན་ཐོགས་ཡོད་པའི་གནས་བབ་ལེགས་པོ་ཞིག་བསྐྲུན་ཐུབ་མིན་ལ་བལྟ་དགོས་པ་དེ་གཙོ་འདོན་གནང་གི་འདུག
ད་ལྟ་འཛམ་གླིང་གི་རྒྱལ་ཁབ་ཚང་མས་རྒྱལ་ཁབ་ཅིག་གི་སྤྱི་འབོར་ཐོན་སྐྱེད་ནི་ཚོང་ཟོག་དང་ཞབས་ཞུ་ཙམ་དུ་མ་ཟད། དམག་འཁྲུག་དང་རང་བྱུང་གོད་ཆག དེ་བཞིན་གཏེར་ཁ་སྔོག་འདོན་སོགས་དྲང་ལྡོག་གཉིས་ཀྱི་ཕྱིར་འདོན་རིན་འབབ་ཡོངས་ལ་གོ་བ་ལེན་གྱིན་ཡོད་ཀྱང་། བསྟན་འཛིན་གསལ་སྒྲོན་ལགས་ཀྱི་རྒྱལ་ཡོངས་སྤྱི་འབོར་བསྐྱར་གསོའི་ཐབས་ལམ་ནང་། ཐོན་སྐྱེད་དང་ལྷན་དུ་ནགས་ཚལ་དང་སྐྱེ་དངོས་སྣ་མང་སྲུང་སྐྱོབ། ས་ཞིང་གི་ས་གཤིས་ཡག་ཏུ་གཏོང་བ། ཆུ་གཙང་མ་དང་སྦགས་བཙོག་ཉུང་དུ་གཏོང་བ། སྤྱི་ཚོགས་ལ་འགན་སྲུང་དང་འཚོ་བ་ཡར་རྒྱས་གཏོང་བ་བཅས་གཙོ་བོར་བཟུང་བའི་ཐོག་ནས་རྒྱལ་ཁབ་ཅིག་གི་སྤྱི་འབོར་ཐོན་སྐྱེད་ཚད་འཇལ་དགོས་པའི་གྲོས་གཞི་འདོན་གྱི་འདུག་ལ། ད་ལྟའི་ཆར་ཁོང་མོའི་གསར་གཏོད་ཀྱི་སྒྲོམ་གཞི་འདི་ཉིད་གྲུབ་ཆ་ཚང་བའི་རྒྱལ་ཁབ་ཀྱི་དཔལ་འབྱོར་འཇལ་ཐབས་ཤིག་ཏུ་གྱུར་མེད་ཀྱང་། སྒྲོམ་གཞི་འདི་འབྲུག་གི་བདེ་སྐྱིད་ཀྱི་རྒྱལ་ཡོངས་སྤྱི་འབོར་ཐོན་སྐྱེད་ (Gross National Happiness) དང་། རྒྱལ་ཚོགས་ཀྱི་མི་འབོར་འཕེལ་རྒྱས་གྲངས་ཐོ་སོགས་དྲང་ཕྱོགས་ཀྱི་ཚད་འཇལ་སྒྲོམ་གཞི་སྔོན་མ་ཁག་ལ་གཞི་བཅོལ་བ་ཞིག་ཡིན་ཁར། འཛམ་གླིང་གི་དཔལ་འབྱོར་རིག་པ་བ་དང་གནམ་གཤིས་དང་ཁོར་ཡུག་སོགས་སྲུང་སྐྱོབ་བྱེད་མཁན་གྱི་མགོ་ཁྲིད་དང་ཆེད་མཁས་པ་མང་པོའི་དོ་སྣང་བྱེད་ཡུལ་གལ་ཆེན་ཞིག་ཏུ་གྱུར་འདུག
བསྟན་འཛིན་གསལ་སྒྲོན་ལགས་ཀྱིས། ང་ཕྱི་ལོ་ ༢༠༢༦ ལོའི་དུས་བབ་དུས་དེབ་ཀྱི་གནམ་གཤིས་འགྱུར་ལྡོག་སྲུང་སྐྱོབ་བྱེད་མཁན་གྱི་མགོ་ཁྲིད་མི་སྣ་བརྒྱའི་ཁྲོད་བདམས་པར་དགའ་སྤོབས་བྱུང་། རང་བྱུང་ཁོར་ཡུག་སྲུང་སྐྱོབ་བྱེད་པ་ནི་དགེ་རྩའི་ལས་དོན་ཙམ་མིན་པར། དཔལ་འབྱོར་གྱི་ཆ་ཤས་གལ་ཆེན་ཞིག་ཏུ་ངོས་འཛིན་དགོས་པ་དང་། ལྷག་པར་དུ་ས་གནས་ཀྱི་མི་མང་དང་ཁོར་ཡུག་སྲུང་སྐྱོབ་བྱེད་མཁན་གྱི་མི་སྒེར་དང་ཚོགས་སྡེ་ཁག་ལ་གཙིགས་འཛིན་དགོས་གལ་ཆེ་སྐོར་བརྗོད་འདུག
ད་ལྟ་བསྟན་འཛིན་གསལ་སྒྲོན་ལགས་ཀྱིས་རང་ཉིད་ཀྱི་ལྟ་བའི་སྒྲོམ་གཞི་དེ་ཉིད་ལག་བསྟར་ཡོང་ཆེད་འཛམ་གླིང་གི་རྒྱལ་ཁབ་ ༡༥ དང་ལྷན་དུ་གྲོས་མོལ་བྱེད་བཞིན་ཡོད་ཅིང་། འདི་ལོའི་ཕྱི་ཟླ་ ༩ ནང་ཁོང་མོའི་སྙིང་རྩའི་མ་དངུལ་ཐེབས་རྩ་ (Pulse Fund) ཡིས་ཨ་སྒོར་ས་ཡ་ ༦༣ བསྡུ་རུབ་ཐུབ་པའི་གསལ་བསྒྲགས་སྤེལ་བ་དང་བསྟུན། ད་ལྟ་ཚོགས་པ་དེས་འཛམ་གླིང་ནང་ནུས་རྒྱུ་འཕོ་འགྱུར་དང་། ཟས་རིགས་དང་ཞིང་ལས། གཞི་རྩའི་མཁོ་ཆས། འགྲིམ་འགྲུལ་བཅས་གནམ་གཤིས་འགྱུར་ལྡོག་དང་འབྲེལ་བའི་ལས་གཞི་གསར་བ་ཁག་ལ་མ་དངུལ་བཞག་དང་འཇོག་མུས་ཡིན་པ་རེད།
བསྟན་འཛིན་གསལ་སྒྲོན་ལགས་ནི་རྒྱ་གར་ཧི་མ་ཅལ་མངའ་སྡེའི་དྷ་རམ་ས་ལར་བཙས་པའི་བཙན་བྱོལ་བོད་མིའི་ཁྱིམ་ཚང་ཞིག་གི་བུ་མོ་ཡིན་ཞིང་། ཆུང་དུས་ནས་ཧི་མ་ལ་ཡའི་གངས་རི་ཞུ་བཞིན་པ་དང་། བོད་གཞིས་བྱེས་མི་མང་གི་འཚོ་བའི་དཀའ་ངལ་ཁྲོད་ཀྱི་ཁོར་ཡུག་དང་གནམ་གཤིས་ཀྱི་གནད་དོན་ལ་དོ་སྣང་བྱུང་། ཁོང་གིས་སི་ཊན་ཧྥོར་ཌི་གཙུག་ལག་སློབ་ཆེན་ནས་རྩེ་ཕུད་སློབ་ཐོན་བྱས་པ་དང་། དབྱིན་ཇིའི་ཨོག་སི་ཧྥོར་ཌི་གཙུག་ལག་སློབ་ཆེན་ནས་ (Rhodes ) སློབ་ཡོན་ཐོབ་མཁན་གྱི་བོད་རིགས་ཨ་རི་བ་ཐོག་མ་དེ་ཡིན། ཁོང་མོས་དེ་སྔ་ཐེ་ལན་ཌི་ནང་གི་མཉམ་འབྲེལ་རྒྱལ་ཚོགས་ཀྱི་ཁོར་ཡུག་སྲིད་ཇུས་ལས་དོན་ཐོག་ལས་ཀ་གནང་མྱོང་། ད་ལྟ་ཁོང་མོ་ནི་འཛམ་གླིང་ནང་གནམ་གཤིས་འགྱུར་ལྡོག་གི་དཀའ་ངལ་སྲུང་སྐྱོབ་དང་འབྲེལ་བའི་ལས་གཞི་གསར་བ་ཁག་ལ་མ་འཛུགས་བྱེད་མཁན་དང་། མི་ཆོས་རོགས་སྐྱོར་བ་ཞིག་ཡིན་པ་རེད།
འདི་ལོའི་ཕྱི་ཟླ་ ༣ ནང་བསྟན་འཛིན་གསལ་སྒྲོན་ལགས་སུ། ཨ་རིའི་ལོ་སི་ཨན་ཇིལ་སིའི་དུས་བབ་ཀྱི་ལོ་རེའི་དངུལ་ཁང་དང་དངུལ་རྩིས་ལས་དོན་གྱི་ཕྱི་ལོ་ ༢༠༢༦ ཆེ་བསྟོད་ངོས་འཛིན་ཐོབ་ཡོད། ཕྱི་ལོ་ ༢༠༡༧ ལོར་ཁོང་མོ་རྒྱལ་སྤྱིའི་ (Forbes) དུས་དེབ་སྟེང་གསར་གཏོད་ཀྱི་ལམ་ནས་ཡར་ཐོན་ཚོང་ལས་གསར་འཛུགས་ཀྱིས་སྤྱི་ཚོགས་ནང་བཟང་ཕྱོགས་ཀྱི་འགྱུར་བ་བསྐྲུན་པའི་ཨ་རིའི་གཞོན་སྐྱེས་ ༣༠ ཁོངས་སུ་མིང་འདོན་བྱས་ཡོད།
གསར་འགོད་པ། སྐལ་བཟང་སྦྱིན་པ།
