སྐྱེ་ཁམས་ཁོར་ཡུག་ལ་སྲུང་སྐྱོབ་བྱེད་ཕྱོགས་ཀྱི་ཤེས་བྱ།

སྐྱེ་ཁམས་ཁོར་ཡུག་ལ་སྲུང་སྐྱོབ་སྐོར་གྱི་གནའ་དེང་གི་ཤེས་བྱ་དང་། རྒྱལ་སྤྱིའི་སྟོངས་ལ་ཉེ་བའི་རི་སྐྱེས་སྲོག་ཆགས་ངོ་སྤྲོད།
སྐྱེ་ཁམས་ཁོར་ཡུག་ལ་སྲུང་སྐྱོབ་སྐོར་གྱི་གནའ་དེང་གི་ཤེས་བྱ་དང་། རྒྱལ་སྤྱིའི་སྟོངས་ལ་ཉེ་བའི་རི་སྐྱེས་སྲོག་ཆགས་ངོ་སྤྲོད་ཅེས་པའི་དཔེ་དེབ་འདི་ངག་དབང་རབ་རྒྱལ་ལགས་ཀྱིས་བརྩམས་ཤིང་། ནང་དུ་དམིགས་བསལ་བཀའ་སློབ་ཁག་ཅིག་དང་འཛམ་གླིང་སྤྱིའི་སྐྱེ་ཁམས་ཁོར་ཡུག་སྤྱི་བཤད། བོད་ཀྱི་རང་བྱུང་ཁོར་ཡུག་གི་གནས་བབས་ངོ་སྤྲོད། རི་སྐྱེས་སྲོག་ཆགས་སྐོར་སྤྱི་བཤད། གཅན་གཟན་རི་དྭགས། འདབ་ཆགས། ཆུ་གནས་དང་ལྟོ་འགྲོ་སྲོག་ཆགས་སྐོར་ངོ་སྤྲོད་དང་། དེ་མིན་རྩི་ཤིང་སྨན་རྩ་ངོ་སྤྲོད་དང་། ཁ་དོན་མི་མཚུངས་པའི་རི་སྐྱེས་སྲོག་ཆགས་སྲུང་སྐྱོབ། ཟུར་རྒྱན་བཅས་ས་བཅད་ལེའུ་ཆེན་པོ་བདུན་གྱི་གྲུབ་ཡོད་པ་དང་། ཤོག་གྲངས་ ༡༤༥ ཡོད། རི་སྐྱེས་སྲོག་ཆགས་དང་རྩི་ཤིང་ངོ་སྤྲོད་མཉམ་དུ་ཚོན་ཁྲའི་ཐོག་དེ་དག་གི་པར་ཡང་འདུག་ཅིང་། རྒྱ་གར་བདག་མེད་སེམས་ཅན་སྲུང་སྐྱོབ་ཚོགས་པས་དཔར་སྐྲུན་བྱས་ཡོད་པ་རེད། ༧གོང་ས་མཆོག་གིས་ནང་པའི་ཆོས་ཀྱི་གཞུང་ནས་ཕྱི་སྣོད་ཀྱི་ཁོར་ཡུག་དང་། ནང་བཅུད་ཀྱི་སེམས་ཅན་བར་གཅིག་ལ་གཅིག་རྟེན་གྱི་འཚོ་གནས་འབྲེལ་བ་དམ་པོ་ཡོད་པར་བརྗོད་ཅེས་གསུངས་པ་ལྟར་དེབ་འདིའི་རྩོམ་པ་པོ་ངག་དབང་རབ་རྒྱས་ལགས་ཀྱིས་ང་ཚོ་འགྲོ་བ་མིས་གཙོས་པའི་དུད་འགྲོ་སེམས་ཅན་དབུགས་ཐོག་ཡོད་ཚད་གནས་སའི་རང་བྱུང་ཁམས་ཀྱི་ཁོར་ཡུག་དང་། མི་དང་དུད་འགྲོའི་བར་གྱི་གཅིག་ལ་གཅིག་རྟེན་གྱི་འབྲེལ་བར་བླ་མེད་ཀྱི་བཀུར་བརྩི་བྱས་པ་དང་འབྲེལ། དེབ་འདིའི་ནང་རང་བྱུང་ཁོར་ཡུག་ལ་འབག་བཙོག་མི་བཟོ་བར་གཙང་ཉར་བྱ་དགོས་པའི་བླངས་བྱ་བཏོན་པ་དང་། སྟོང་ལ་ཉེ་བའི་རི་སྐྱེས་སྲོག་ཆགས་ངོ་སྤྲོད་བྱས་ཏེ། དེ་དག་ལ་སྲུང་སྐྱོབ་བྱེད་དགོས་པ་དང་། རྒྱལ་སྤྱིའི་སྟོངས་ལ་ཉེ་བའི་རི་སྐྱེས་སྲོག་ཆགས་རེ་རེ་བཞིན་ངོ་སྤྲོད་བྱས་ཏེ། འགྲོ་བ་མིའི་རིགས་ཀྱིས་རང་བྱུང་ཁོར་ཡུག་གི་སེམས་ཅན་གཞན་ལའང་གཅེས་སྤྲོས་བྱེད་དགོས་པ་མ་ཟད། བོད་མི་རིགས་ཀྱི་སྲོལ་རྒྱུན་གྱི་གོམ་སྲོལ་ལྟར་གཡུ་བྱུ་རུ་དང་བ་སོའི་ལག་གདུབ་ལྟ་བུའི་རྒྱན་ཆ་འདོགས་པ། སྟག་གཟིགས་སྲམ་པགས་ཀྱི་ཕྱུ་པ་གྱོན་པ་དེས་རི་སྐྱེས་སྲོག་ཆགས་རྩ་ཆེན་མང་བོའི་ཚེ་སྲོག་ལ་ཐད་ཀར་རྒོལ་གྱིན་མེད་ནའང་། དེ་དག་རྩ་སྟོང་དུ་འགྲོ་བའི་མཐུན་རྐྱེན་སྐྲུན་བཞིན་པའི་གསལ་འདེབས་བྱས་ཡོད།