ཀུན་སྤྱོད་རྣམ་བཞག་གི་གསར་འགོད་རིག་པ། སྤྱི་ལོ་ ༢༠༠༧ ལོར་འདི་ག་གསར་ཁང་ནས་འདོན་སྤེལ་བྱས་ཤིང་། རྩོམ་པ་པོ། བོད་ཀྱི་དུས་བབ་གསར་ཤོག་གི་རྩོམ་སྒྲིག་པ་མི་ནག་ཚང་ལུང་རིགས་རྒྱལ་ཡིན།
དེབ་འདིའི་ནང་དོན་གཙོ་བོ་ནི། གསར་འགོད་ལས་རིགས་ལ་འཇུག་ཚུལ་དང་། གསར་འགོད་པ་ཞིག་ལ་ཚང་དགོས་པའི་ཐོག་མའི་ཆ་རྐྱེན་ཏེ། སྙིང་སྟོབས་དང་རྣམ་རིག བརྟན་རླིང་གི་གཤིས་ཀ་དང་། གཟབ་ནན་གྱི་གོམས་སྲོལ། ཕྱིའི་ཀུན་སྤྱོད། ནང་གི་ཀུན་སློང་། གདོང་གི་རྣམ་འགྱུར། ངག་གི་ཉམས་འགྱུར། དུས་ཀུན་གྱི་དོ་སྣང་དང་ཉམས་འཇོག་བྱ་ཡུལ། དང་པོ་གནས་ཚུལ་རྒྱུས་ལོན་བྱེད་ཡུལ་དུ་སྐྱོད་སྐབས་ཐོག་མའི་གྲ་སྒྲིག་དང་། བར་དུ་གནས་ཚུལ་དངོས་བསྡུ་ལེན་བྱེད་སྐབས་དོ་སྣང་བྱ་ཡུལ་ཁག མཐའ་མར་གནས་ཚུལ་འབྲི་འགོད་བྱེད་སྐབས་བླངས་དོར་དང་དབྱེ་ཞིབ་བྱ་ཚུལ་སོགས་གསར་འགོད་པའི་ཀུན་སྤྱོད་རྣམ་བཞག་གི་སྐོར་དང་། གསར་འགྱུར་གྱི་ཐོག་མའི་གྲུབ་ཆ་གལ་ཆེན་གསུམ་སྟེ། གཡོ་རྫུན་གྱི་བསྲེ་ལྷད་མེད་པར་དྲང་བདེན་ཡིན་པ། དྲི་བ་དང་དོགས་པ་མེད་པར་ཁ་གསལ་བ། ཆད་ལྷག་དང་ཕྱོགས་ལྷུང་མེད་པར་དོ་མཉམ་པ་སོགས་གསར་འགྱུར་ཚད་ལྡན་ཞིག་འབྲི་བའི་ཐབས་ལམ་གྱི་སྐོར། དེ་བཞིན། གསར་འགྱུར་ཞིབ་འབྲི་དང་། གསར་འགྱུར་འབྲིང་གྲས། གསར་འགྱུར་སྙིང་བསྡུས། བཅར་འདྲི་སོགས་གསར་འགྱུར་གྱི་རྩོམ་ལུས་དང་དེའི་བྱེད་ལས་ནུས་པ་བཅས་ཀྱི་སྐོར་རྒྱས་བསྡུས་འཚམ་པའི་གཞུང་ལུགས་ཀྱི་ཚུལ་དུ་བྲིས་ཡོད།
དཔེ་དེབ་འདི་ནི་བཙན་བྱོལ་བོད་པའི་སྤྱི་ཚོགས་ནང་གསར་འགྱུར་རིག་པའི་སྐོར་ལ་བཏོན་པའི་དཔེ་དེབ་ཐོག་མ་དེ་ཆགས་ཡོད་པ་དང་། དེབ་འདིར་ཐུན་མོང་མ་ཡིན་པའི་ཁྱད་ཆོས་གཞན་ཞིག་ལྡན་པ་ནི། སློབ་སྦྱོང་དང་དཔེ་ཀློག་ཐན་ཐུན་བྱས་པ་དང་། གཞན་གྱི་ས་ནས་མཐོང་ཐོས་དང་ལད་འབྲི་ཁོ་ན་མ་ཡིན་པར། གསར་འགྱུར་ལས་རིགས་ཀྱི་ཤེས་བྱ་ཚད་མཐོ་ཞིང་། མི་དམངས་བྱིངས་གསར་འགྱུར་ལ་དོ་སྣང་ཆེ་བའི་ནུབ་ཕྱོགས་རྒྱལ་ཁབ་དག་གི་ཁྱབ་ཆེ་བའི་གསར་འགྱུར་བརྒྱུད་ལམ་ཁག་གི་གསར་འགྱུར་འབྲི་ཐབས་ལ་ཞིབ་འཇུག་མཐིལ་ཕྱིན་བྱས་ཤིང་། ལོ་ཡི་བགྲང་བྱ་བཅུ་ཕྲག་ལ་ཉེ་བའི་རིང་བོད་ཀྱི་དུས་བབ་གསར་ཁང་གི་གསར་འགོད་པ་དང་། རྩོམ་སྒྲིག་པའི་ཕྱག་ལས་གནང་མུས་ཀྱི་ཉམས་མྱོང་དངོས་ཕྱོགས་སྡོམ་བྱས་ཏེ་ལས་ཞོར་དུ་བྲིས་པ་ཞིག་ཡིན་སྟབས། གཞུང་ལུགས་འདི་ཡང་གསར་འགྱུར་ཚན་པ་གཅིག་དང་མཚུངས་པར་ཁ་གསལ་ཞིང་གོ་བདེ་བའི་ཁྱད་ཆོས་ཡོད །
ང་རང་བོད་ན་ཡོད་དུས་གསར་འགོད་རིག་པ་ཞེས་པ་དེར་དགའ་མོས་བྱེད་མྱོང་མེད་ལ་དེའི་དགོས་པ་ག་རེ་ཡིན་པ་འང་མི་ཤེས།
བར་སྐབས་ཤིག་ནས་ངས་རང་གི་ཉེ་འཁོར་གྱི་གནས་ཚུལ་ཕྲ་རགས་མང་བོ་ཞིག་ཡིག་ཐོག་ཏུ་བཀོད་ནས་ཉིན་ཐོའི་ཚུལ་ཉར་རྒྱུའི་གོམས་གཤིས་ཤིག་ཆགས་སོང་།
དེ་དང་བསྟུན་ནས་ངས་མི་ནག་ཚང་གིས་བརྩམས་པའི་གསར་འགོད་ཆེད་དེབ་དེ་ལ་ཐེངས་ཁ་ཤས་ལ་གཟབ་ནན་གྱིས་བཀླགས་པ་ཡིན། དེས་ངའི་དགའ་ཕྱོགས་དེ་སྔར་ལས་ཇེ་ཟབ་ལ་བཏང་སོང་། དཔེར་ན་གང་སྒྲ་དྲུག་གི་གསར་འགྱུར་འབྲི་སྟངས་ལྟ་བུས་་་་་་གསར་འགྱུར་འབྲི་སྟངས་ཀྱི་ཞིབ་ཇེ་ཚགས་སུ་གཏོང་རྒྱུ་ནུས་པ་ཤུགས་ཆེན་ལྡན་པས་དཔེ་དེབ་དེའི་རིགས་ཀྱིས་ང་ཚོའི་སྤྱི་ཚོགས་ཀྱི་སྟོང་ཆ་མང་བོ་ཞིག་སྐོང་ཐུབ་གི་བསམ་ཡོད།