༧གོང་ས་མཆོག་དེ་རིང་བཞུགས་སྒར་ནས་ཆིབས་ཐོན་གྱིས་ཨ་རིར་ཕེབས་སོང་ལ། ཁོང་གི་སྐུ་ཚབ་རྣམ་པ་རྒྱ་ནག་ནས་ཐེངས་བདུན་པར་ཕྱིར་འཁོར་མཚམས་ནས་རྒྱ་གཞུང་གིས་ཁོང་དང་བཙན་བྱོལ་བོད་གཞུང་། བཙན་བྱོལ་གྱི་སྒྲིག་འཛུགས་ཁག་བཅས་ལ་སྐྱོན་བརྗོད་བྱེད་པ་ཤུགས་ཆེ་རུ་ཕྱིན་ཡོད། ཁོང་ཉིད་ཐེངས་འདིའི་འབྲེལ་མོལ་མཐའ་མའི་གྲུབ་འབྲས་ཐད་ཐུགས་ཕམ་བྱུང་ཡོད་ལ། ཉིན་གཉིས་སྔོན་གྱི་ཁོང་གི་འཁྲུངས་སྐར་དེ་ཡང་གཞིས་ལུས་མི་དམངས་ཀྱི་མནར་སྡུག་དང་ཚེ་སྲོག་ཤོར་བ་རྣམས་ལ་མྱ་ངན་གུས་འདུད་མཚོན་བྱེད་དུ་འཚོགས་ཡོད།
པེ་ཅིན་གྱི་ཨོ་ལིམ་པིག་འཚོགས་རྒྱུར་ཟླ་གཅིག་ཏག་ཏག་ལས་མེད་པའི་ཉིན་འདིར་༧གོང་ས་མཆོག་གིས་ཨ་རིར་བདུན་ཕྲག་གཉིས་རིང་གི་ཆིབས་སྒྱུར་གནང་མགོ་བཙུགས་ཡོད་ལ། ཆིབས་བསྒྱུར་འདིའི་རྗེས་ནས་ཉིན་ཤས་རིང་ངྷ་སར་གསུང་ཆོས་གནང་རྒྱུ་ཡིན་ལ། འཆར་ཟླའི་ཚེས་ ༡༥ ཉིན་ཧྥ་རན་སིར་ཆིབས་བསྒྱུར་བསྐྱང་རྒྱུ་ཐུགས་གཏན་འཁེལ་ཡོད། འོན་ཀྱང་། ཁོང་གིས་ཐོག་མཐའ་བར་གསུམ་དུ་ཨོ་ལིམ་པིག་རྩེད་འགྲན་ལ་རྒྱབ་སྐྱོར་གནང་གི་ཡིན་ལུགས་ཡོངས་ཁྱབ་གསུང་གིན་པར་མ་ལྟོས་རྒྱ་གཞུང་གིས་ཁོང་ལ་མུ་མཐུད་ནས་ལོ་འདིའི་རྩེད་འགྲན་ལ་གཏོར་སྐྱོན་ཕྲ་མོ་ཙམ་ཡང་གཏོང་མི་ཆོག་ཅེས་བརྗོད་ཀྱིན་ཡོད་པ་རེད།
