བོད་ཀྱི་འཐབ་རྩོད་ནི་ཐོབ་ཐང་མིན་པར་ལས་འགན་ཡིན།

༧གོང་ས་མཆོག་གིས་དབུ་ཁྲིད་པའི་བཙན་བྱོལ་བོད་གཞུང་དང་བོད་ནང་གི་རྒྱ་ཆེའི་མི་མང་གིས་རང་སྲོག་བློས་གཏོང་ངང་འཐབ་རྩོད་བྱེད་བཞིན་པ་དེ་ཐོབཐང་གཉེར་བའི་འཐབ་རྩོད་ཅིག་ཡིན་པར་སྙམ་གྱིན་ཡོད་ཀྱང་དེ་ནི་ཐོབ་ཐང་གི་ཆེད་དུ་མ་ཡིན་པར་ལས་འགན་ཞིག་གི་ཆེད་དུ་ཡིན།
 
ཚེས་ ༡༣ ཉིན་བོད་ཀྱི་སློབ་མ་ ༨༠ མ་ཟིན་ཙམ་ལ་བཀའ་ཁྲི་ཟམ་གདོང་རིན་པོ་ཆེ་མཆོག་གིས་གངས་སྐྱིད་སྤྱི་ཐབ་དུ་ན་གཞོན་རྣམས་མ་འོངས་པའི་མགོ་ཁྲིད་ཡིན་པའི་དངོས་ཡོད་གནས་ཚུལ་དང༌། བོད་ཀྱི་ཆབ་སྲིད་དང་སྤྱི་ཚོགས།  ལེགས་བྱང་སོགས་གང་འདྲ་ཞིག་ཏུ་འགྱུར་མིན་དེ་སློབ་སྦྱོང་གནང་བཞིན་པའི་གཞོན་སྐྱེས་ཚོར་རག་ལས་ཡོད་པའི་གནད་དོན་གསུངས་ཞོར་མཐོ་རིམ་སློབ་མ་རྣམས་ལ་བོད་ཀྱི་འཐབ་རྩོད་ཀྱི་ངོ་བོ་དང་རྒྱ་བོད་འབྲེལ་མོལ་གྱི་གནས་སྟངས། དེའི་བྱུང་རིམ་སོགས་ཀྱི་སྐོར་ལ་ཡང་བླང་དོར་བཀའ་སློབ་གནང་ཡོད་པ་རེད། སྟོན་པ་བཅོམ་ལྡན་འདས་ཀྱིས་ལེགས་པར་གསུངས་པའི་ཟབ་རྒྱས་ཀྱི་ཆོས་ཚུལ་ལ་གཞི་བཅོལ་བའི་ལེགས་བྱང་གི་སྲོལ་རྒྱུན་དྲི་མ་མེད་པ་དེ་ད་ལྟའི་གནས་སྐབས་ལ་ཆ་ཚང་བ་ཞིག་བོད་ལ་མ་གཏོགས་མེད་པའི་རྒྱུ་མཚན་གྱིས་དུས་རབས་ ༢༡ ནང་གི་འགྲོ་བ་མིའི་ཕན་བདེ་སྒྲུབ་པ་ལ་ང་ཚོའི་མི་རིགས་འདི་ལ་འགན་ཆེན་པོ་ཞིག་ཡོད། ང་ཚོའི་འཐབ་རྩོད་འདི་འགྲོ་བ་མི་སྤྱི་ཡོངས་ཀྱི་ཁེ་ཕན་དང་འབྲེལ་བའི་འཐབ་རྩོད་ཅིག་ཡིན་པ་མ་གཏོགས་བོད་མི་རྐྱང་བའི་ཆབ་སྲིད་དང་སྤྱི་ཚོགས་ཀྱི་མདུན་ལམ་བཙལ་བ་ཞིན་མིན་པ་དེ་ང་ཚོ་བོད་མི་རང་གིས་ཀྱང་ངོ་གསལ་པོ་ཤེས་དགོས་པ་ཡིན།  སྤྱིར་བཏང་མཐོ་སློབ་ཀྱི་སློབ་མ་ཚོ་མི་རིགས་འདྲ་མིན་དང་མཉམ་དུ་སློབ་གཉེར་བྱེད་ཀྱིན་ཡོད་ལ་སློབ་གསོའི་ཁ་ཕྱོགས་དེ་ནུབ་ཕྱོགས་པའི་ཤེས་ཡོན་ལམ་སྲོལ་ཅིག་ཡིན་སྟབས་ཁྱེད་ཚོའི་བསམ་བློའི་འཁྱེར་ཕྱོགས་ལའང་ནུབ་ཕྱོགས་པའི་ཤན་ཞུགས་ཡོད་པ་རེད་བསམ་གྱིན་ཡོད། ནུབ་ཕྱོགས་པས་ཐོབ་ཐང་ཟེར་བ་དེ་ལས་འགན་ལས་རྩ་ཆེ་བ་དང་སྔོན་ལ་བཤད་ཀྱིན་ཡོད། ལས་འགན་ཟེར་བའི་ཚིག་འདི་མཐོང་དཀོན་པོ་ཡིན་ལ་གལ་ཏེ་ཡོད་ཀྱང་ཐོབ་ཐང་གི་རྗེས་ནས་ཡོང་སྲིད།  དེ་བཞིན་འཛམ་གླིང་རྒྱལ་ཚོགས་ཀྱིས་ཀྱང་འགྲོ་བ་མིའི་ཀུན་སྤྱོད་ཀྱི་ཐོབ་ཐང་ཞེས་ཡོངས་ཁྱབ་གསལ་བསྒྲགས་སྤེལ་ཡོད་པ་ལས་འགྲོ་བ་མིའི་ཀུན་སྤྱོད་ཀྱི་ལས་འགན་ཞེས་ཡོངས་ཁྱབ་གསལ་བསྒྲགས་སྤེལ་མེད་པ་འདིས་ནུབ་ཕྱོགས་པའི་འཇིག་རྟེན་ལྟ་ཚུལ་དེ་རང་དོན་གཙོ་བོ་དང་གཞན་ལས་རང་གཙོ་བོ་ཡིན་པ།  ལས་འགན་ལས་ཐོབ་ཐང་གལ་ཆེན་པོ་ཡིན་པ་གསལ་པོ་བསྟན་ཡོད་པ་རེད།  དེའི་རྐྱེན་གྱིས་ཁྱེད་ཚོའི་བསམ་བློའི་ནང་ལ་ཡང་༧གོང་ས་མཆོག་གིས་དབུ་ཁྲིད་པའི་བཙན་བྱོལ་བོད་གཞུང་དང་བོད་ནང་གི་རྒྱ་ཆེའི་མི་མང་གིས་རང་སྲོག་བློས་གཏོང་ངང་འཐབ་རྩོད་བྱེད་བཞིན་པ་དེ་ཐོབ་ཐང་གཉེར་བའི་འཐབ་རྩོད་ཅིག་ཡིན་པར་སྙམ་གྱིན་ཡོད་ཀྱང་དེ་ནི་ཐོབ་ཐང་གི་ཆེད་དུ་མ་ཡིན་པར་ལས་འགན་ཞིག་གི་ཆེད་དུ་ཡིན།  རྒྱ་ནག་གིས་བོད་ལ་ཆབ་སྲིད་ཀྱི་དབང་བསྒྱུར་བྱེད་སྟངས་འདིའི་འོག་ནས་བོད་མི་རིགས་ཀྱིས་གལ་གནད་ཆེ་བའི་ལས་འགན་མང་པོ་ཞིག་སྒྲུབ་པའི་གོ་སྐབས་འགག་ཡོད་པ་རེད་ལ།  དེའི་རྐྱེན་གྱིས་རྒྱ་ནག་གིས་ང་ཚོའི་སྒང་ལ་བེད་སྤྱོད་བྱེད་བཞིན་པའི་རིང་ལུགས་དེ་འགྲིག་གིན་མེད་པར་བརྗོད་ཀྱི་ཡོད་པ་ལས་གུང་ཁྲན་རིང་ལུགས་ལ་ངོ་རྒོལ་བྱེད་པ་མིན། གལ་ཏེ་གུང་ཁྲན་རིང་ལུགས་ཀྱིས་མི་དམངས་ཀྱི་མངོན་འདོད་སྒྲུབ་ཐུབ་ཀྱི་ཡོད་ན་ང་ཚོས་རིང་ལུགས་དེ་ལ་ངོ་རྒོལ་བྱེད་དགོས་པ་ཆགས་མེད་པ་རེད། དེའི་རྐྱེན་གྱིས་བོད་མི་རིགས་ལ་འཇིག་རྟེན་ཀུན་ལ་འཁྲི་བའི་ལས་འགན་ཆེན་པོ་ཞིག་ཡོད་པ་དེ་མ་འགྲུབ་པ་ཞིག་ཆགས་ཡོད་ཅེས་གསུངས་བྱུང༌།

ཡང་ཟམ་གདོང་རིན་པོ་ཆེ་མཆོག་གིས་བོད་རྒྱ་གཉིས་ཀྱི་འབྲེལ་མོལ་ཐད་གསུངས་དོན། འཛམ་གླིང་གི་རྒྱལ་ཁབ་མང་པོ་ཞིག་གིས་གྲོས་མོལ་བྱེད་སྐབས་དགྲ་གྲོགས་ཀྱི་ལྟ་སྟངས་གཅིག་པར་ཆགས་ཡོད་ཀྱང་རྒྱ་བོད་གཉིས་ལ་མཚོན་ན་རྒྱ་ཕྱོགས་ནས་ང་ཚོ་དགྲ་དང་ང་ཚོས་རྒྱ་ནག་མ་འོངས་པའི་གྲོགས་ལ་ལྟ་བཞིན་ཡོད་པས་རྒྱ་བོད་གཉིས་ལ་ཐུན་མོང་གི་སྡིངས་ཆ་ཞིག་ཡོད་རྒྱུ་ཁག་པོ་རེད། སྡིངས་ཆ་ཁག་པོ་འདིའི་སྒང་ནས་གྲོས་མོལ་བྱེད་སྐབས་གོ་བརྡ་སྤྲོད་རྒྱུ་དེ་དཀའ་ལས་ཡོད་པ་རང་བཞིན་གྱི་གནས་སྟངས་ཤིག་ཆགས་ཡོད་པ་རེད། ཡིན་ན་ཡང་ང་ཚོས་ད་ལྟ་བར་དུ་རྒྱ་ནག་དང་འབྲེལ་མོལ་བྱེད་པའི་རྒྱུད་རིམ་ཁྲོད་རྒྱ་ཕྱོགས་ཀྱི་དོགས་པ་སེལ་ཡོད་པ་དང་ང་ཚོའི་མངོན་འདོད་གསལ་བོ་བསྟན་ཐུབ་ཡོད་པ་རེད།  ང་ཚོར་དོན་དམ་གྱི་གྲུབ་འབྲས་ཐོབ་མེད་ཀྱང་སྤྱིར་བཏང་གི་ཆ་ནས་གནས་ཚུལ་མང་པོ་ཞིག་གསལ་བོར་ཕྱིན་ཡོད་པ་རེད།  དེའི་སྒང་ནས་ཕྱོགས་གཉིས་ལ་འགལ་ཟླ་ཆེན་པོ་གཉིས་ཡོད་པ་གསལ་བོར་གྱུར་ཡོད་པ་ལས་དང་པོ་དེ།  བོད་ཀྱི་འདས་པའི་བྱུང་རབས་ཀྱི་ལྟ་སྟངས་དེ་མཐུན་གྱི་མེད་པ་དང༌། གཉིས་པ་ནི་མ་འོངས་པར་བོད་མི་རིགས་ཡོངས་རྫོགས་གཅིག་སྒྲིལ་བྱེད་རྒྱུ་དེར་མཐུན་གྱི་མེད་པ་རེད། གལ་ཏེ་ང་ཚོས་བོད་ཀྱི་བྱུང་རབས་ལོ་རྒྱུས་དེ་རྒྱ་ནག་གི་ཁོངས་ཡིན་པ་ཁས་ལེན་མ་བྱས་ན་ ༡༩༥༡ ལོ་དེར་བཙན་འཛུལ་བྱས་པ་དང་མ་འོངས་པར་བཙན་བཟུང་བྱེད་པ་སོགས་ཀྱི་ཐད་ནས་ཁོ་ཚོ་ཁྲིམས་མཐུན་ཆགས་ཀྱི་མེད་པ་འགྲེལ་བརྗོད་གནང་བཞིན་ཡོད་པ་དང༌།  ཆོལ་གསུམ་བོད་ཡོངས་རྫོགས་གཅིག་གྱུར་བྱས་ཏེ་རྒྱ་ནག་གི་མངའ་ཁོངས་ནས་འདུག་རྒྱུ་བཤད་ཀྱང་རྒྱ་ནག་གིས་ཁས་མི་ལེན་པ་སོགས་རེད།   ད་ཐེངས་བོད་དུ་བྱུང་བའི་ཛ་དྲག་གནས་ཚུལ་ལ་གཞིགས་ནས་རྒྱ་ནག་འཐབ་ཕྱོགས་གཅིག་གྱུར་གྱི་མགོ་ཁྲིད་ཚོ་དང་༧གོང་ས་མཆོག་གཙོས་རང་གཞུང་གི་སྐུ་ཚབ་གཉིས་མཇལ་ཏེ་ནང་མོལ་ཞིག་བྱུང་ཡོད་པ་དང་འབྲེལ་མོལ་ངོ་མ་དེ་ཟླ་ ༦ པའི་ཚེས་ ༡༡ ཉིན་གཏན་འཁེལ་བྱས་ཡོད་ཀྱང་རྒྱ་ནག་ནང་གི་ས་ཡོམ་གྱི་གནས་ཚུལ་ལ་བསྟེན་ནས་དུས་ཚོད་ཕྱིར་འགྱངས་བྱས་ཡོད་ལ།  རྗེས་ནས་ཁོ་ཚོས་དུས་ཚོད་ཅིག་གཏན་འཁེལ་བྱས་པ་དེར་ང་ཚོར་སྟབས་མ་བདེ་བས་གནས་སྐབས་དེ་ལྟར་རང་བཞག་ཡོད།  ཡིན་ན་ཡང་མི་རིང་བར་འབྲེལ་མོལ་མགོ་འཛུགས་རྒྱུ་དང་དེ་ལ་རེ་བ་བཅིངས་ཡོད།