ཨ་རིའི་སྲིད་འཛིན་འོས་གཞི་བྷ་རག་ཨོ་བྷ་མ་ལགས་ཀྱིས་ཁོང་ཉིད་ཕྱི་རྒྱལ་ཁག་ཏུ་ཕྱོགས་བསྐྱོད་བྱས་པའི་དབང་གིས་༧གོང་ས་མཆོག་ལ་མཇལ་མ་ཐུབ་པར་བློ་འགྱོད་ཤིན་ཏུ་ཆེ་ཚུལ་གསུངས་ཡོད་པ་རེད།
སྐུ་ཞབས་ཨོ་བྷ་མ་ལགས་ཀྱིས་ཕྱི་ཚེས་ ༢༤ ཉིན་༧གོང་ས་མཆོག་ལ་ཕྱག་བྲིས་ཤིག་གནང་བའི་ནང་འཁོད་དོན། ཟླ་འདིའི་ནང་ཁྱེད་ཉིད་ཨ་རིར་ཕེབས་པའི་སྐབས་ངེད་རང་ཕྱི་རྒྱལ་ཁག་ཏུ་འགྲོ་དགོས་པར་གྱུར་ཏེ་ཁྱེད་ལ་མཇལ་མ་ཐུབ་པ་དེར་བློ་འགྱོད་ཆེན་པོ་ཡོད། ཡིན་ནའང་ངས་གོ་སྐབས་འདི་བཟུང་ནས་ཁྱེད་ལ་བསྐྱར་དུ་ཞུ་རྒྱུ་ཞིག་ལ། ངས་ཁྱེད་དང་ཁྱེད་ཀྱི་དགོངས་གཞི། དུས་ཚོད་གཉན་འཕྲེང་གི་སྐབས་འདིར་ཁྱེད་ཀྱི་མི་དམངས་བཅས་ལ་ཚད་མཐོ་བའི་བརྩི་བཀུར་དང་རྒྱབ་སྐྱོར་ཡོད། ངའི་ཡི་གེ་འདི་དང་སྐུ་ཞབས་རྗོན་མ་ཁིན་ལགས་ཁྱེད་ལ་མཇལ་འཕྲད་གནང་བ་དེས་ང་ཚོའི་གལ་ཆེ་བའི་འོས་བསྡུའི་ལོ་འདིར་ཆབ་སྲིད་ཀྱི་ལངས་སྟངས་མི་འདྲ་ནའང་ཨ་མི་རི་ཀས་ཁྱེད་དང་ཁྱེད་ཀྱི་མི་དམངས་ལ་བཟུང་བའི་རྒྱབ་སྐྱོར་དང་དོ་སྣང་དེ་ཡོངས་ཁྱབ་དང་གསལ་བོ་ཡིན་པ་གསལ་བོ་ཆགས་པའི་རེ་བ་ཡོད། ཅེས་གསུངས་ཤིང་། ཁོང་གིས་མུ་མཐུད་ནས། ངས་ཁྱེད་ཀྱི་སྐུ་ཚབ་རྣམ་པ་དང་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་མགོ་ཁྲིད་ཚོའི་བར་གྱི་འབྲེལ་མོལ་དེ་རྒྱུན་མཐུད་ནས་ཡོད་པ་ཤེས་སྐབས་ཡིད་ཆེས་རྙེད་བྱུང་། ཕྱོགས་གཉིས་བར་གྱི་ཡར་རྒྱས་ཀྱི་རྣམ་པ་དེ་དལ་མོར་མཐོང་ནའང་། བོད་མི་རིགས་ཀྱི་འབད་རྩོལ་དེ་མུ་མཐུད་ནས་ཡོང་ལ། གལ་སྲིད་ཕྱོགས་གཉིས་ཀྱིས་དམིགས་ཡུལ་བཟང་པོ་ཁྱེར་ཞིང་གཉིས་མོས་ཀྱི་ལྟ་ཚུལ་ཁྱེར་བ་ཡིན་ན་འབྲེལ་མོལ་དང་ཞི་མོལ་གྱི་རིམ་པ་འདིར་བཟང་ཕྱོགས་ཀྱི་གྲུབ་འབྲས་ཡོང་བར་ངས་ཡིད་ཆེས་བྱེད་ཀྱིན་ཡོད། ངས་ནི་བརྒྱུད་རིམ་འདི་ཨོ་ལིམ་པིག་རྩེད་འགྲན་གྱི་རྗེས་ནས་མུ་མཐུད་དེ་ཡོང་བར་རེ་བ་མཐོང་གི་ཡོད་ལ། ངས་མུ་མཐུད་ནས་རྒྱབ་སྐྱོར་བྱེད་རྒྱུ་ཁས་ལེན་བྱེད་གི་ཡོད་ཅེས་གསུངས་ཡོད་པ་རེད།
ཨོ་བྷ་མས་བོད་མི་རིགས་ཀྱི་ཐོབ་ཐང་ཐད་གསུངས་དོན། ཉེས་ཆད་དམ་ཡང་ན་བཀག་འགོག་མེད་པའི་ཐོག་རང་གི་ཆོས་ལུགས་དད་མོས་ལག་ལེན་བྱེད་པའི་ཐོབ་ཐང་ནི་བོད་མི་རིགས་ལ་ངེས་པར་དུ་རག་དགོས་པ་ཞིག་ཡིན་ལ། ངས་རྒྱ་ནག་གི་དཔོན་རིགས་ཚོར་སོ་སོའི་རྣམ་རྟོག་ཟུར་དུ་བཞག་སྟེ་རྩ་ཁྲིམས་ལ་བསྟུན་ནས་ལས་ཀ་བྱེད་རྒྱུར་སྐུལ་མ་གཏོང་གི་ཡིན། ངས་ཁྱེད་ཉིད་དང་བོད་མི་རིགས་ཀྱི་ཐོབ་ཐང་ལ་མུ་མཐུད་ནས་རྒྱབ་སྐྱོར་བྱེད་ཀྱི་ཡིན། ཁྱེད་ཀྱིས་ཕྱག་ལས་ཅི་ཞིག་གནང་གིན་པ་དང་ཁྱེད་ཀྱི་ལངས་ཕྱོགས་ཅི་ཡིན་ཐད་འཛམ་གླིང་གི་ཆོས་ལུགས་རིས་མེད་ཀྱི་སྐྱེས་བུ་དག་གིས་དགའ་མོས་ཐོབ་ཀྱི་ཡོད་ལ། ངས་དུས་ཚོད་གཞན་ཞིག་ནས་ཁྱེད་ལ་མཇལ་རྒྱུར་སྒུག་ནས་བསྡད་ཡོད་ཅེས་གསུངས་འདུག
ཨོ་བྷ་མའི་གཏམ་བཤད་འདིར་བོད་པ་ཞིག་གི་དྲང་ཕྱོགས་ནས་གོ་བ་བླངས་ན། ༧གོང་ས་མཆོག་ལ་མཇལ་སྒྱུར་སྒུག་ནས་བསྡད་ཡོད་ཅེས་པ་འདི་རེད། ཡང་ཁོང་གིས། རྒྱ་ནག་གི་དཔོན་རིགས་ཚོས་སོ་སོའི་རྣམ་རྟོག་ཟུར་དུ་བཞག་སྟེ། རྩ་ཁྲིམས་ལ་བསྟུན་ནས་ལས་ཀ་བྱེད་རྒྱུར་སྐུལ་མ་གཏོང་གི་ཡིན་ཟེར་བ་འདི་ནི་ཁྲིམས་མཐུན་མིན་པའི་གཞུང་ཞིག་ལ་ཁྲིམས་མཐུན་ཡིན་པའི་རྒྱབ་སྐྱོར་སྤྲད་པའི་དཔང་རྟགས་སུ་འགྲོ་སྲིད་པས་ན། འདིར་དམངས་གཙོ་དོན་གཉེར་བ་དང་བོད་དོན་འཐབ་མོ་བ་དག་གིས་བསམ་གཞིགས་བྱེད་དགོས་པ་ཞིག་ཆག་འདུག་སྙམ།