ཨོ་ལིམ་པིག་ལ་ངོ་རྒོལ་བྱེད་ཆེད་བོད་མི་དྲུག་གིས་ལྡི་ལི་ནས་ཟས་དང་ཆུ་གང་ཡང་མི་སྤྱོད་པར་དུས་ངེས་མེད་ཀྱི་ཟས་བཅད་ངོ་རྒོལ་ལ་བསྡད་ཡོད་པ་རེད།
ཕྱི་ཚེས་ ༢༨ ཉིན་ལྡི་ལིར་བོད་ཀྱི་གཞོན་ནུ་ལྷན་ཚོགས་ཀྱི་གོ་སྒྲིག་འོག་བོད་མི་དྲུག་གིས་ཟས་བཅད་ངོ་རྒོལ་བྱེད་མགོ་བརྩམས་ཡོད་ལ། ཐེངས་འདིའི་ཟས་བཅད་ངོ་རྒོལ་བ་རྣམས་ཀྱིས་རྒྱ་ནག་གཞུང་གིས་ཁོང་ཚོའི་རེ་འདུན་དང་ལེན་མ་བྱས་པར་ཟ་མ་དང་ཆུ་ཡང་མི་འཐུང་བར་ཟས་བཅད་ངོ་རྒོལ་བྱེད་རྒྱུ་ཡིན་འདུག འདི་ནི་གཞོན་ནུ་ལྷན་ཚོགས་ཀྱི་ངོས་ནས་ཐེངས་གཉིས་པའི་མི་དམངས་མདུན་སྐྱོད་ཀྱི་ལས་འགུལ་ཆེན་མོའི་སྟ་གོན་ལྟ་བུ་ཡིན་ལ། ལོ་སྔོན་མའི་ཟླ་ ༨ པའི་ཚེས་ ༨ ཉིན་རྒྱ་ནག་ཏུ་ཨོ་ལིམ་པིག་རྩེད་འགྲན་འཚོགས་རྒྱུར་ཐེངས་དང་པོའི་མི་དམངས་མདུན་སྐྱོད་ཀྱི་ལས་འགུལ་སྤེལ་སྐབས་རྒྱ་གར་གྱི་ས་གནས་ཁག་དང་བལ་ཡུལ། ཕྱི་རྒྱལ་བཅས་ཀྱི་གྲྭ་བཙུན་དང་མི་མང་ཉིས་ཁྲི་ལྷག་ལྡི་ལིར་འཛོམས་ཏེ། ཞི་བའི་ངོ་རྒོལ་བྱས་ཡོད་ལ། སྐབས་དེར་བོད་མི་བཅུ་བཞིས་ཉིན་ ༣༣ རིང་ཟས་བཅད་ངོ་རྒོལ་བྱས་ཡོད།
ཐེངས་འདིའི་ཟས་བཅད་ངོ་རྒོལ་ནང་ཞུགས་མཁན་རྣམས་ནི་ལྷོ་ཕྱོགས་སེ་ར་བྱེས་ཏྲེ་ཧོར་ཁང་ཚན་གྱི་རང་ལོ་ ༣༧ ཡིན་པའི་གྲྭ་ཤེས་ཚེར་ཉི་མ་དང་རང་ལོ་ ༣༡ ཡིན་པའི་བསོད་ནམས་གྲགས་པ། རང་ལོ་ ༢༥ ཡིན་པའི་བསྟན་པ་དར་རྒྱས། འབྲས་སྤུངས་བློ་གསལ་གླིང་གི་རང་ལོ་ ༢༣ ཡིན་གྲྭ་ཚེ་རིང་དང་ངྷ་ས་མེག་ངྷན་གྱི་རང་ལོ་ ༢༨ ཡིན་པའི་བྱང་ཆུབ་བཟང་པོ། ནོར་བུ་གླིང་གའི་རང་ལོ་ ༣༡ ཡིན་པའི་དབང་འདུས་ཕུན་ཚོགས་བཅས་ཡིན་ལ། བསོད་ནམས་གྲགས་པ་ལགས་ནི་འདིའི་སྔོན་ངྷ་ས་ནས་ལྷ་ས་བར་གྱི་ཞི་བའི་གོམ་བགྲོད་དུའང་ཞུགས་ཡོད་འདུག
གཞོན་ནུ་ཚོགས་གཙོ་ཚེ་དབང་རིག་འཛིན་ལགས་ཀྱིས་ཉིན་དེར། ང་ཚོ་བོད་ཀྱི་གཞོན་ནུའི་ངོས་ནས་ཟས་བཅད་ངོ་རྒོལ་གྱི་ལས་འགུལ་འདི་གོ་སྒྲིག་བྱེད་དོན་ནི་འདི་ལོའི་གསུམ་བཅུའི་དུས་དྲན་ཉིན་ནས་བོད་ནང་གཞིས་ལུས་བོད་མི་ཚོས་རྒྱ་ནག་ལ་ལོ་རྒྱུས་རང་བཞིན་ལྡན་པའི་ཞི་བའི་ངོ་རྒོལ་གྱི་ལས་འགུལ་སྤེལ་བ་དེས། ད་ལྟའི་བོད་ནང་གི་གནས་སྟངས་ཧ་ཅང་ཛ་དྲག་ཏུ་གྱུར་ཡོད་ཅིང༌། གཞིས་ལུས་བོད་མི་ཚོས་རྒྱ་ནག་གི་སྡུག་སྦྱོང་མནར་གཅོད་མྱོང་བཞིན་ཡོད་པས། ང་ཚོ་བྱེས་གྱར་བོད་མི་ཚོས་ཀྱང་བོད་དོན་འདི་བཞིན་རྒྱལ་སྤྱིའི་སྡིངས་ཆའི་སྟེང་འདེད་རྒྱུར་མུ་མཐུད་ལས་འགུལ་སྤེལ་དགོས་ལ། རྒྱ་ནག་གཞུང་ཡང་འབུད་རྒྱག་གཏོང་དགོས་པ་རེད་ཅེས་བརྗོད་ཡོད།
ཟླ་བརྒྱད་པའི་ཚེས་ ༧ ཉིན་བོད་ཀྱི་གཞོན་ནུས་མི་དམངས་མདུན་སྐྱོད་ཀྱི་ལས་འགུལ་ཐེངས་གཉིས་པ་སྤེལ་རྒྱུ་གཏན་འཁེལ་བྱས་ཡོད་ལ། དེ་ནི་པེ་ཅིན་ཨོ་ལིམ་པིག་རྩེད་འགྲན་གྱི་སྔ་ཉིན་ཏུ་འཁེལ་བར་བྱས་ཡོད།
