སངས་རྒྱས་ཆོས་ལུགས་ནི་འཛམ་གླིང་ནང་ཆོས་ལུགས་སྣ་ཚོགས་ཤིག་ཡོད་པའི་ནང་ནས་ཆོས་དད་པ་ཆེས་མང་མཐར་སླེབས་པའི་ཆོས་ལུགས་དེ་མིན་རུང༌། རིན་ཐང་གི་ཐད་ནས་ཆེས་ཡང་རྩེར་སོན་པར་བརྩི་ཆོག་པ་ཞིག་ཡིན་པར་གཟུར་གནས་སུས་ཀྱང་ཁས་ལེན་བྱེད་ངེས་ལྟ་བུར་སྣང༌། དེ་ལྟའི་ཆོས་ལུགས་འདི་འཛམ་གླིང་སྤྱི་དང༌། ཡང་སྒོས་གླིང་ཆེན་ཨེ་ཤ་ཡའི་ནང་དར་ཁྱབ་ཆེན་པོ་ཞིག་བྱུང་ཡོད་མོད། འོན་ཀྱང་བོད་བརྒྱུད་སངས་རྒྱས་ཆོས་ལུགས་ནི། ཐེག་པ་ཆེ་ཆུང་སྔགས་དང་བཅས་པ་ཆ་ཚང་བས་ཡུལ་ལུང་གཞན་གྱི་སངས་རྒྱས་ཆོས་ལུགས་ལས་བླ་ལྷག་གིས་རིན་ཐང་ཆེ་བ་ཞིག་ཡིན་པར་ཁས་འཆེ་བ་བཞིན། གཅིག་བྱས་ཚེ་དེ་ལྟར་ཡིན་སྲིད་ན་ཡང༌། ད་དུང་ངེས་པར་དུ་བསམ་ཞིབ་བྱེད་དགོས་པ་གཞན་ཞིག་ནི། བོད་བརྒྱུད་སངས་རྒྱས་ཆོས་ལུགས་ལ་ཆེས་ཐོག་མའི་སངས་རྒྱས་ཆོས་ལུགས་སམ། ཡང་ན་བོད་དུ་དར་ཁ་མའི་རྒྱ་གར་གྱི་སངས་རྒྱས་ཆོས་ལུགས་དང་མི་འདྲ་བར་བོད་ཀྱི་ཡུལ་སྲོལ་གོམས་གཤིས་ཀྱི་བསྲེ་སླད་ཅི་ཙམ་ཞུགས་ཡོད་མིན་ནི་ངེས་པར་དུ་ཞིབ་འཇུག་བྱེད་དགོས་པའི་གཙོ་གནད་ཅིག་རེད། སོ་མཚམས་འདི་ནས་ཆོས་ལུགས་པ་དང༌། ཆབ་སྲིད་པ་ཇི་སྙེད་ཅིག་གིས་སྐབས་འཚོལ་སྒོས་སྤྱི་ཚོགས་ཀྱི་ཁེ་འཚོལ་ལམ་བུ་གང་མང་ཞིག་ཆོས་ལུགས་ལ་ཁ་གཡར་ནས་མང་ཚོགས་མགོ་སྐོར་གཏོང་བ་དང༌། རང་གི་ཁེ་བཟང་འཚོལ་བའི་ངན་གཡོའི་ཟློས་གར་སྣ་ཚོགས་ཤིག་ཆོས་ལུགས་ནང་མཉམ་བསྲེ་བྱས་ནས་ལོ་རྒྱུས་ཀྱི་དུས་སྐབས་རིམ་པར་འཁྲབ་སྟོན་བྱས་པ་བོད་ཀྱི་བྱུང་རབས་ལ་ཞིབ་ལྟ་ཞིག་བྱས་ཚེ་སུས་ཀྱང་གསལ་རྟོགས་བྱེད་ཐུབ་པ་ཞིག་ཡིན། འདིར་དཔེ་མཚོན་ཕྲན་བུ་ཞིག་བཀོད་ན། དེ་སྔའི་ལོ་རྒྱུས་ཀྱི་གླེང་རྙོག་ཅིག་ད་ལྟའི་སྤྱི་ཚོགས་ཀྱི་དཀའ་ངལ་དུ་ཆགས་པའི་དོལ་རྒྱལ་ཟེར་བ་འདི་ཉིད་ཀྱང༌། དེ་སྔའི་བོད་རྒན་ཞིག་གིས་ངན་གཡོའི་དྲན་འཕྲུལ་གྱི་ཟུར་ཁ་ཙམ་ཡིན་པ་བོད་བརྒྱུད་སངས་རྒྱས་ཆོས་ལུགས་ཀྱི་བྱུང་རབས་ལ་ཞིབ་འཇུག་བྱས་མྱོང་མཁན་སུས་ཀྱང་ཤེས་གསལ་ཞིག་རེད། ཡིན་ན་ཡང་བདག་གི་བསམ་པར་སངས་རྒྱས་ཆོས་ལུགས་ཀྱི་ངོས་ཐད་ནས་བཤད་ན་དོལ་རྒྱལ་ཙམ་མིན་པར། ད་དུང་བོད་སྐྱོང་ལྷ་སྲུང་གི་མིང་ཅན་ཚང་མ་བསྟེན་གསོལ་བྱེད་འོས་ཤིག་མིན་ལ། དེ་ཚོར་རིན་ཐང་ཡོད་པ་ཞིག་ཏུའང་མི་འདོད་པས་འདི་ཚོ་ཚང་མ་བོད་རྒན་འགས་ངན་གཡོའི་དྲན་ཐེངས་རེ་རེར་ཆོས་ལུགས་ཀྱི་མིང་ཐོག་ནས་སངས་རྒྱས་ཆོས་ལུགས་ལ་བསྲེ་སླད་བྱས་པའི་ཤུལ་བཞག་རེ་རེ་རེད། དེར་བརྟེན་སངས་རྒྱས་ཆོས་ལུགས་ཀྱི་བདག་པོ་སྟོན་པ་ཤཱཀྱ་ཐུབ་པ་ཡིན་པར་ཁས་ལེན་པ་དང༌། ཡང་དག་པའི་སངས་རྒྱས་ཆོས་ལུགས་ཤིག་བྱེད་པར་ཁོང་གི་གསུང་རབ་ལ་གཞི་བཅོལ་དགོས་པར་འདོད་ཚེ། ད་དུང་དོལ་རྒྱལ་ལས་གཞན་པའི་ལྷ་འདྲེའི་དབུང་ཚོགས་དང༌། སྤྲུལ་པ་དང་སྤྲུལ་སྐུ། རྣམ་འཕྲུལ་སོགས་ཡིན་ཚུལ་སྟོན་མཁན་རྣམས་ཀྱང་སངས་རྒྱས་ཆོས་ལུགས་ཀྱི་ངོས་ཐད་ནས་བཤད་ན་དེ་ལྟར་ཁས་ལེན་ཐབས་མེད་པས་ཀུན་གྱིས་འདོར་དགོས་པ་ཞིག་ཡིན་ལ། དེ་ལྟར་བྱས་ཚེ་བོད་བརྒྱུད་སངས་རྒྱས་ཆོས་ལུགས་ལ་དག་ཐེར་ཡག་པོ་བྱེད་ཐུབ་པ་ཙམ་མ་ཟད། སྐབས་དེར་ཡུལ་ལུང་གཞན་ལས་ལྷག་པའི་རིན་ཐང་ཞིག་ཀྱང་ཡོང་ངེས་པ་ཡིན། ཕལ་སྐད་རང་གིས་བཤད་ན་སངས་རྒྱས་ཆོས་ལུགས་ཀྱི་གལ་ཆེའི་རྩ་དོན་རང་བཞིན་ཞིག་ནི་གང་ཟག་ལ་མི་སྟོན་ཆོས་ལ་སྟོན་པ་ཡིན་ཞིང༌། དེ་ནི་རྒྱུ་མཚན་ཡོད་མིན་ལ་བལྟ་བ་གནད་ཆེ་བ་ལས། ཤོད་མཁན་ལ་བལྟ་བ་གནད་མི་ཆེ་བ་དང༌། ཕྱོགས་མཚུངས་དེའི་ཟུར་ནས་གོ་ཐུབ་པ་ནི་རང་རེ་བོད་ལ་མཚོན་ན་དགེ་བཤེས་དང༌། ཤེས་ཡོན་པའི་སློབ་སྟོན་ལ་ཉན་འཇོག་གུས་བརྩི་བྱེད་དགོས་པ་ལས་མི་ཆེན་དཔོན་ཆེན་རྒྱུ་མཚན་དུ་བྱས་ནས་ཁོ་ཚོའི་རྗེས་སུ་འབྲང་བ་གལ་མི་ཆེ་བ་བསྟན་པ་ཡིན་མོད། ཡིན་ཡང་དེང་སང་གི་བོད་བརྒྱུད་སངས་རྒྱས་ཆོས་ལུགས་པ་ཚོས་ཆོས་ལ་མི་སྟོན་གང་ཟག་ལ་སྟོན་པའི་ཉམས་ལེན་བྱཻད་བཞིན་པ་འདི་ནི། དེང་སྐབས་བོད་བརྒྱུད་སངས་རྒྱས་ཆོས་ལུགས་ལ་ཉམས་ཆག་ཚབ་ཆེན་སོང་བའི་འབྲས་རྟགས་ཤིག་ཡིན་པས། བོད་བརྒྱུད་སངས་རྒྱས་ཆོས་ལུགས་པ་དང༌། བོད་ཀྱི་ཤེས་ཡོན་ཅན་སུས་ཀྱང་ཐུགས་སྣང་བྱེད་དགོས་པའི་ལོ་རྒྱུས་ཀྱི་འགག་མཚམས་ཤིག་ཡིན་པར་འདོད། སྤྱིར་བཏང་བྱས་ན་བོད་ལ་སངས་རྒྱས་བྱང་སེམས་ཀྱི་སྤྲུལ་པ་ང་ཡིན་ཁོ་ཟེར་མཁན་བརྒྱ་ཕྲག་སྟོང་ཕྲག་ཡོད་སྟབས་བོད་མི་དཀྱུས་མ་ཚོར་འདི་འདྲའི་འགན་བབ་མེད་པ་ལྟ་བུ་ཞིག་ཡིན་མོད། འོན་ཀྱང་ནམ་ཡང་བརྗེད་མི་རུང་ཞིང་དྲན་དགོས་པ་ཞིག་ནི། ཇུས་མི་རིགས་ཀྱིས་བགྲང་བྱ་བརྒྱ་ཕྲག་མང་པོའི་རིང་རང་དབང་གི་འཐབ་རྩོད་ལུ་གུ་བརྒྱུད་དུ་བྱས་པའི་ཁྲོད་ཀྱི་མཐའ་མའི་སྡོམ་ཚིག་ཅིག་ལ་དཀོན་མཆོག་ཟེར་པའི་མིའི་རིགས་ལ་བྱམས་སེམས་དང་མགོན་སྐྱབས་བྱེད་མཁན་ཞིག་མེད་པ་གསལ་རྟོགས་བྱུང་སོང་ཞེས་བཤད་པ་བཞིན། རང་རེས་ཀྱང་གནས་ལུགས་རྟོགས་སོང་བ་ཞིག་དང༌། ར་འཕྲོད་སོང་བ་ཞིག རྒྱུས་ལོན་སོང་བ་ཞིག་ནི་གངས་རེའི་ལྗོངས་ཀྱི་སངས་རྒྱས་བྱང་སེམས་ཀྱི་སྤྲུལ་བ་ཡིན་རབས་དང༌། མཐུ་དང་རྫུ་འཕྲུལ་གྱི་བདག་པོ་ཡིན་རབས་ཀྱི་ཁ་ཕོ་ཆེ་གནམ་དུ་སྒྲོག་མཁན་དེ་ཚོ་ཚང་མ་བཤུ་བཞོག་པའི་ཁ་གཡང་ཡིན་པ་དང༌། བསླུ་བྲིད་ཀྱི་སྟོང་གཏམ་ཡིན་པ་ནམ་ཡང་བརྗེད་མི་རུང༌། འདི་ནི་ལོ་རྒྱུས་ཀྱི་བསླབ་བྱ་ཡིན། འདི་ནི་སྐྱེས་བུ་རང་གི་ཉམ་མྱོང་ཡིན། འདི་ནི་གཞོན་པ་ང་ཚོའི་ཤེས་རྟོགས་ཡིན།
དྲ་ངོས་ཀྱི་གནས་ཚུལ་ཚང་མའི་པར་དབང་བོད་ཀྱི་དུས་བབ་ལ་ཡོད།
བསམ་ཚུལ་འདི་ང་ཚོ་བོད་པའི་ན་གཞོན་མང་པོ་ཞིག་གི་སེམས་སུ་གནོན་མི་ཐུབ་པར་ཡོང་བཞིན་ཡོད་ནའང༌། ལེ་བར་མང་པོའི་བར་ཐག་ཆོད་པའི་གོམས་གཤིས་སམ་བག་ཆགས་མཐུག་པོ་ཞིག་ལ་གྱེས་ཕྱག་འཚལ་མ་ཐུབ་པར་ལུས་ནས་ཡོད། གང་ལ྄ྟར་ས྄ྔ་གཞུག་མ་གཏོགས་འདི་ལ་རེ་བ་མེད་པ་དཔྱོད་ཤེས་ཡོད་མཁན་ཚང་མས་ལོས་ཤེས། དེའི་ཕྱིར་གཞོན་ཚོས་དེང་དུས་ཀྱི་ལམ་ཁ་ཞིག་འཚོལ་ངེས་ཡིན། བདེ་མོ། གཡུ་མཚོན་ནས།