བོད་པ་ཞིག་ཏུ་སྐྱེས་པའི་ཉེས་དམིགས།

Rebecca Novick ཡིས་བྲིས། ལུང་རིགས་རྒྱལ་གྱིས་བསྒྱུར།

“སྔོན་མ་ཡིན་ན་ས་ཆ་འདི་སྐྱིད་ཤོས་ཤིག་ཡིན། ཡིན་ནའང་ད་ལྟ་བཙོན་ཁང་འདྲ་བོ་ཞིག་ཆགས་འདུག ངས་བརྙན་འཕྲིན་ལ་ལྟ་སྐབས། ཚང་མ་སྐྱག་རྫུན་རེད། དེར་བརྟེན་ང་ཁྲོམ་ལ་ཕྱིན་པ་སྐབས་དམག་མི་ཚོས་ངའི་ངོ་རྟགས་ལག་འཁྱེར་ལ་ཞིབ་བཤེར་བྱེད་གི་འདུག གལ་སྲིད་དོན་དག་ཕྲན་བུ་ཞིག་ནོར་ཚེ། ཁྱེད་རང་ཚར་བ་རེད། ང་ཚོས་བཟོད་སྒོམ་བྱས་ན་འགྲིག་གི ཡིན་ནའང་ད་ནི་བཟོད་སྒོམ་བྱེད་ཚོད་མི་འདུག“

འདི་ནི་བོད་རིགས་གཞོན་སྐྱེས་ཤིག་ལ་བཅར་འདྲི་བྱས་པ་ཞིག་བོད་ནས་གསང་སྟབས་ཀྱིས་ཁྱེར་ཡོང་བའི་ནང་ཁོས་དེང་སྐབས་ཀྱི་ལྷ་སའི་འཚོ་བའི་སྐོར་འགྲེལ་བཤད་ཇི་ལྟར་བརྒྱབས་པ་དེ་ཡིན་ལ། ལོ་འདིའི་ཕྱི་ཟླ་གསུམ་པའི་ངོ་རྒོལ་རྗེས་སུ་བཙོན་དུ་ཚུད་པའི་མི་ཞིག་གིས་དངོས་སུ་མྱངས་པའི་ཁུངས་སྐྱེལ་གསལ་བོ་ཞིག་ཡིན།

མི་འདིས་ཁོ་རང་འཇུས་པ་དང་ལྷ་སའི་བཀག་ཉར་ཁང་ཞིག་ཏུ་ཁོང་གིས་དངོས་སུ་མྱངས་པའི་སྐོར་འགྲེལ་བཤད་བརྒྱབས་ལ། (རྒྱུ་མཚན་གལ་ཆེན་ལ་བརྟེན་ནས་ཁོང་གི་ངོ་རྟགས་ཕྱིར་བརྟོལ་བྱེད་རྒྱུ་མིན།) རྒྱ་ནག་གི་ཉེན་རྟོག་པ་ཚོ་ཁོང་གི་ཁྱིམ་ཚང་ནང་འཛུལ་ཏེ། “སྒོ་ལྔ་བཅག གང་སར་སྔོག་བཤེར་བྱས། ཅ་དངོས་མཐོང་ཚད་ས་ལ་གཏོར། མི་མཐོང་ཚད་ལ་རྡུང་རྡེག་བྱས། དེ་ནི་ཇག་བཅོམ་བྱས་པ་ལྟ་བུ་ཞིག་རེད།“

ཁོང་བཙོན་ཁང་ལ་འབྱོར་རྗེས། སྐོར་སྲུང་བས་ཁོང་གི་མགོ་གང་སར་གཞུས་སོང་ཟེར། “དང་ཐོག་ངས་ཁོང་ཚོས་ང་གསོད་གི་རེད་བསམ་སོང་། ང་ཚོར་ཉིན་མ་རེར་བག་ལེབ་ཕྱེད་ཀ་གཅིག་རེ་མ་གཏོགས་སྤྲོད་ཀྱི་མི་འདུག མི་ཚང་མ་ཞེ་དྲག་སྐོམ་གི་འདུག མང་པོ་ཞིག་གིས་སོ་སོའི་གཅིན་པ་བཏུང་བ་རེད། ང་ཚོར་གྱོན་ཆས་མེད། ཉལ་ཆས་མེད། མར་ཉལ་སའི་གདན་མེད། དེ་དུས་ཧ་ལས་པའི་གྲང་མོ་འདུག ཉིན་བཞིའི་རིང་མི་གཅིག་གིས་ཀྱང་ང་ཚོར་ཡ་བྱས་མ་སོང་། ཁོང་ཚོས་ང་ཚོ་དེ་མུར་གཡུག་བཞག་སོང་།“

ཁོས་སྐུ་ཞོགས་ཚོ་ནི་དམིགས་བསལ་གྱི་མནར་གཅོད་ཆེད་ཁེར་རྐྱང་དུ་འཇོག་གི་འདུག་ཚུལ་བཤད་སོང་། “ང་སྐུ་ཞོགས་དེ་ཚོར་སེམས་ཁྲལ་བྱུང་། དམག་མི་ཚོས་ཁོང་ཚོ་ནི་དམིགས་བསལ་གྱིས་མ་འདྲ་བ་ཞིག་ལ་ལྟ་གིན་འདུག ངས་ཁོང་ཚོས་སྐུ་ཞོགས་ཚོར་ཡ་ང་མེད་པའི་མནར་གཅོད་གཏོང་དོན་མགོ་ཚོད་མ་སོང་།“

“ང་མི་རྒན་འཁོགས་རྩིབས་རུས་གཉིས་བཅག་བཞག་པ་ཞིག་ལ་ཐུག་བྱུང་། ཁོང་བཀྱིག་ནས་བཞག་པར་བརྟེན་གཟུགས་པོ་དྲང་པོར་ལངས་ཐུབ་པ་མི་འདུག ཁོང་གིས་ཚེ་ཟིན་གྱི་མི་འདུག དེར་བརྟེན་ཉེན་རྟོག་པས་ཁོང་མི་དམངས་སྨན་ཁང་ནང་དུ་ཁྲིད་འདུག སྨན་ཁང་ལ་འཁྲིད་ཀྱིན་པའི་མི་དེ་ཚོ་ནི་ནམ་རྒྱུན་ཡིན་ན་མེ་མདའ་ཕོག་མཁན་དང་ཉེས་རྡུང་ཚབས་ཆེན་ཕོག་མཁན་གྲས་རེད། ཁོང་ཚོའི་ཕལ་ཆེ་བ་སྨན་ཁང་རང་ནས་གྲོངས་འགྲོ་གི་འདུག བུ་ཞིག་དང་ཁོའི་སྤུན་ཡ་བུ་མོ་ཞིག་མཉམ་དུ་ཁང་བ་གཅིག་གི་ནང་བཅུག་འདུག གློ་བུར་ཐོལ་རྒྱག་ལ་དམག་མི་རྣམས་ཡོང་ནས་ཁོང་གཉིས་ཁང་བརྩེགས་ཤིག་གི་སྒེའུ་ཁུངས་ནས་གཡང་ལ་གཡུག་སོང་། བུ་དེ་ནི་མཐོང་ས་དེ་ག་རང་ལ་གྲོངས་སོང་། སྤུན་ཡ་བུ་མོ་དེ་གྲོངས་མི་འདུག ཡིན་ནའང་མོ་རང་ས་ལ་ཉལ་ཐུབ་པ་མི་འདུག མོ་རང་ཙོག་ཙོག་འདྲ་བོ་ཞིག་བྱས་ནས་སྡོད་དགོས་པ་ཆགས་འདུག ཁོང་ཚོས་ཕུང་པོ་དེ་ཁྱེར་ཕྱིན་སོང་ལ་བུ་མོ་དེར་གནས་ཚུལ་འདི་སུ་གང་ལ་བཤད་ཆོག་གི་མེད་ཚུལ་བཤད་སོང་།

ངས་མི་ཤི་བསྡད་པ་མཐོང་མ་བྱུང་། ཡིན་ནང་བཙོན་ཁང་ནང་གི་མེ་དེ་ཚོས་“མི་ཞིག་གྲོངས་འདུག་“ཅེས་ཉེན་རྟོག་པ་དང་དམག་མི་སྐད་གཏོང་གི་འདུག“ ཁོས་བཤད་དོན། མི་ཞིག་ལ་སྟོད་གཡོག་ཇག་ཁེ་ཊི་ཞིག་ཡོད་པ་དེ་རྐུན་མ་བརྒྱབས་པར་དོགས་ནས་སྐོར་སྲུང་བས་རྡུང་ནས་བསད་སོང་ཟེར་ལ། “ང་ཚོ་དུས་རབས་ ༢༡ པའི་ནང་ཡོད་པ་རེད་ལབ་ན་ང་རང་ཡིད་ཆེས་ཀྱི་མི་འདུག་“ཟེར།

བཅར་འདྲི་ཞུ་སའི་མི་དེས་མཐོ་འབྲིང་སློབ་གྲྭའི་སློབ་ཕྲུག་ལོ་ ༡༧ ཡིན་པ་ངོ་རྒོལ་ནང་ཞུགས་མྱོང་མེད་མཁན་ཞིག་ལ་མནར་གཅོད་བྱས་པའི་སྐོར་བཤད། རྗེས་ལ་ཁོས་བྱ་དགོས་པ་ཚང་མ་བྱས་པ་ཡིན་ཟེར། དེ་ནི་མི་ཚང་མར་བྱུང་ཡོད་པ་རེད། ཁོང་ཚོས་བཙན་དབང་གིས་མི་རྣམས་ལ་སོ་སོས་གཏན་ནས་བྱས་མྱོང་མེད་པའི་ལས་ཀ་དག་བྱས་མྱོང་ཚུལ་ངོས་ལེན་བྱེད་དུ་བཅུག ཉེས་པ་ཅི་ཡང་བསགས་མེད་པའི་མི་རྣམས་ལ་འདྲི་རྩད་མང་པོ་བྱས་ཤིང་། མཐའ་མར་ཁོང་ཚོའི་ཉེས་པ་ནི་བོད་མི་ཞིག་གི་སྐྱེ་བ་བླངས་པ་དེ་ཡིན་འདུག

གནས་ཚུལ་འདི་དག་དངོས་སུ་མཐོང་མཁན་གྱི་མི་འདི་གློད་ཡོད་ནའང་། དེ་ནས་བཟུང་ཁོང་གི་འགྲོ་སྡོད་དང་ལས་ཀ་རྣམས་ལ་ལྟ་རྟོག་ངེས་པར་དུ་བྱེད་ཀྱི་ཡོད་པ་རེད།

“ང་ལ་རྒྱ་གར་ན་སྤུན་ཉེ་ཞིག་ཡོད། ངས་སོ་སོས་གང་མཐོང་བ་དང་ཐོས་པ་རྣམས་དེ་ག་རང་བྲིས་ཏེ་དྲ་རྒྱའི་ནང་ནས་བཏང་བ་ཡིན། ངས་ཐུང་ཐུང་ཞིག་བྲིས་ནས་ཡིག་གཏགས་ནང་ཉར་ཚེགས་བྱས་པ་ཡིན། གློ་བུར་ཐོལ་རྒྱག་ལ་དེ་མེད་པ་ཆགས་སོང་། དེ་ནས་ང་རང་ཞེད་བྱུང་། ངས་གློག་འཕྲིན་ཁ་ཕྱེ་མེད། ང་ལ་ཕྱི་རྒྱལ་ན་གྲོགས་པོ་མང་པོ་ཡོད། ཁོང་ཚོས་གློག་འཕྲིན་མང་པོ་བཏང་ཡོང་གི་རེད། ཡིན་ནའང་ངས་དེ་ཚོ་ཁ་ཕྱེ་མེད།“

ཁོས་བློ་ཕམ་གྱི་རྣམ་འགྱུར་ཞིག་དང་མཉམ་དུ་དྲན་གསོས་ཤིང་སྔོན་མ་ཁོས་རང་གི་ནང་མིའི་ཞལ་ལག་བཟོ་སྟངས་ལ་སྡུག་ར་བཤད་པ་འི་སྐོར་བཤད། “ངས་བཙོན་ཁང་ནས་མཚམས་རེར་ཟ་མ་རྨི་ལམ་ལ་འཁོར་གི་འདུག ངས་རང་གི་ཨ་མ་ལགས་དང་སྤུན་ཡ་བུ་མོའི་ཞལ་ལག་དྲན་ཡོང་གི་འདུག ངས་སོ་སོའི་ནང་གི་ཞལ་ལག་དེར་བྲོ་བ་ག་འདྲ་ཞིག་འདུག་བསམ་ནས་དངོས་གནས་དེ་ལ་དགའ་བོ་བྱུང་།“

མི་འདིས་ག་རེ་ཡིན་ནའང་མཐོང་ཞིང་བརྒྱུད་ནས་སླེབས་པའི་རྗེས་ལའང་། བོད་མི་རིགས་ཀྱིས་དཀའ་ཁག་གི་ཁྲོད་ནས་མི་ཚེའི་དོན་སྙིང་ཞིག་འཚོལ་རྒྱུའི་ཀླད་གྱོང་གི་གཤིས་ཀ་དེ་གཞོན་སྐྱེས་འདིའི་ཉམས་མྱོང་གི་ཁྲོད་ནས་མངོན་ཡོང་གི་འདུག ཁོས་བཤད་དོན། “འདི་ཚོ་ནི་ངས་རང་གི་མི་ཚེའི་ནང་མྱངས་པའི་དོན་དག་སྡུག་ཤོས་དག་རེད། ཡིན་ནའང་ཁྱེད་ཀྱིས་སོ་སོ་མི་ཡག་ག་ཞིག་ག་འདྲ་སུ་ཆགས་རྒྱུར་སློབ་སྦྱོང་བྱེད་དགོས་པ་རེད།“ཟེར།

བསྒྱུར་མཁན་གྱི་མཆན།
གོང་གསལ་གནས་ཚུལ་དེ་ནི་ རེ་བྷི་ཁ་ ལགས་ཀྱི་ཟིན་བྲིས་ནས་བསྒྱུར་བ་ཡིན། གལ་སྲིད་འགྱུར་མ་དག་པ་འདྲ་ཡོད་ན་རྣམ་པ་ཚོས་ཁོང་མོའི་གནས་ཚུལ་མ་ཡིག་ངོ་མ་ལ་བསྡུར་ནས་གོ་བ་ལེན་རོགས། གནས་ཚུལ་གྱི་མ་ཡིག་དེ་གཤམ་གསལ་དྲ་བྱང་ http://www.huffingtonpost.com/rebecca-novick/guilty-of-being-tibetan-s_b_115302.html
ལ་བསྣུན་ནས་ཀློག་རོགས།