བསྟན་འཛིན་བརྩོན་འགྲུས་དང་ཁོའི་རྫི་བོ་གཉིས།

བོད་དོན་འཐབ་རྩོད་པ་བསྟན་འཛིན་བརྩོན་འགྲུས་དང་མི་དྲུག་ཅུ་ཙམ་གསང་སྟབས་ཀྱིས་ས་མཚམས་བརྒལ་ཏེ་ཕྱིར་བོད་དུ་ལོག་རྩིས་བྱས་སྟབས་རྒྱ་གར་ཉེན་རྟོག་པས་འཛིན་བཟུང་བྱས་རྗེས། གཞན་རྣམས་རང་སོར་ལོག་བཏང་ནའང་བསྟན་འཛིན་བརྩོན་འགྲུས་བཙོན་ཁང་རིམ་བརྒྱུད་ཀྱིས་ཀང་ར་རྫོང་དུ་རྩིས་སྤྲོད་བྱས་པ་དང༌། ཀང་ར་རྫོང་ངྷ་ས་ས་གནས་ཉེན་རྟོག་པས་ཁོང་དུས་ངེས་མེད་རིང་ངྷ་ས་དང་ཁ་བྲལ་མི་ཆོག་པ་བཟོས་པ་མ་ཟད། ཉེན་རྟོག་པ་གཉིས་རེ་རེས་བསྐོར་ནས་རྗེས་འདེད་ཀྱིས་ཁོང་གར་འགྲོ་སྲུང་གི་ཡོད་འདུག

ངས་སྔོན་ཆད་མཐོང་མྱོང་བའི་བོད་ཀྱི་རང་དབང་འཐབ་རྩོད་པ་ཞིག་དེ་རིང་ཞལ་མདངས་ཤོར་ཞིང༌། ལུས་སྟོབས་རྒུད་འདུག་ལ། སྐད་གདངས་ཀྱང་ཉམས་འདུག ཁོང་གི་ཀོ་ལྷམ་རྙིང་པ་དེའི་ཕྱི་སྟེང་རལ་ཏེ་ཡང་བསྐྱར་དར་སྐུད་དཀར་བོ་ཞིག་གིས་བཙེམས་པ་དང༌། དེང་རབས་ཇུན་སི་རྟགས་ཅན་གྱི་དོར་མ་སྔོན་པོའི་སྟེང་ཚུལ་དྲི་ཆགས་འདུག ཡིན་ནའང་ཁོང་གིས་དེ་ལ་སྣང་དོགས་ཅི་ཡང་བྱེད་ཀྱི་མེད་ལ། འདི་ནི་ཁོང་གི་རྒྱུན་ལྡན་གྱི་གནས་སྟངས་ཤིག་ཀྱང་ཡིན། ཐེངས་འདིར་ང་ལ་སེམས་ཚོར་ཞིག་བྱུང་བ་ནི་ངས་ཁོང་མཐོང་མ་ཐག་ཁོང་བློ་ཕམ་ཞིང་ཡིད་ཐང་ཆད་འདུག་སྙམ་པ་བྱུང་ནའང༌། རྗེས་སུ་ངེད་གཉིས་ཀྱི་གླེང་མོལ་སྐབས་ཁོང་གིས་རྒྱ་གར་གཞུང་གིས་ཁོང་ཇི་ལྟར་བཙོན་འཇུག་དང་བཀག་ཉར་བྱས་ཤིང༌། ཁོང་གི་འགྲོ་འདུག་འཕྲོག་ནའང་ཁོང་གིས་བོད་དོན་ཆེད་བཅངས་པའི་སེམས་ཤུགས་དེ་ནམ་ཡང་གནས་ངེས་རེད་ཟེར་བས། ང་ལ་སྤོབས་པ་བསྩལ་བྱུང༌། ངེད་གཉིས་བོད་གཞུང་ཕྱི་དྲིལ་ལས་ཁུངས་ནས་གནས་ཆུང་ཟ་ཁང་ནང་སྐད་ཆ་བཤད་སའི་ལྷིང་འཇགས་ཀྱི་གནས་དེར་འགྲོ་སྐབས། ལམ་བར་དུ་ཁོང་གིས་དེང་སྐབས་བོད་ནས་ཚུར་བྲོས་ཡོང་རྒྱུ་དང༌། བོད་དུ་ཕར་ལོག་རྒྱུ་གཉིས་ལས་བོད་དུ་ལོག་རྒྱུར་དཀའ་ཁག་ཆེན་པོ་འདུག རྒྱ་གར་གཞུང་གིས་རྒྱ་ནག་གི་ཨོ་ལིམ་པིག་རྩེད་འགྲན་ལ་གནོད་སྐྱོན་མི་ཡོང་ཆེད་ང་ཚོར་སྲུང་སྲུང་བ་རེད་ཟེར།

ངེད་གཉིས་གནས་ཆུང་ཟ་ཁང་གི་ཕྱི་ལོག་ཏུ་བསྡད་དེ་ཁོང་གི་རྗེས་འདེད་པ་ཉེན་རྟོག་པ་གཉིས་དང་ངེད་ཚོ་བཞི་བོར་ཇ་རེ་མངགས་རྗེས། ཉེན་རྟོག་དེ་གཉིས་ལ་པག་ལེབ་གཉིས་རེ་ཡང་མངགས་སོང་ལ། ཁོང་གིས་འདི་གཉིས་ཀྱིས་ང་སྲུང་ཕྱིར་དེ་རིང་ཉིན་གུང་གི་ཟ་མ་ཡང་ཟོས་ཡོད་པ་མ་རེད་ཟེར། སྐབས་དེར་ཕྱི་དྲོའི་ཆུ་ཚོད་བཞི་ཡོལ་ཚར་འདུག

ངས་ཁོང་ལ་ཁྱེད་རང་ཐེངས་འདིར་འཛིན་བཟུང་བཀག་ཉར་བྱེད་དོན་ཅི་ཡིན་ནམ་ཞེས་དྲིས་པར། ཁོང་གིས་ང་ཚོ་བོད་མི་དྲུག་ཅུ་ཙམ་རང་ངོས་ནས་གསང་སྟབས་ཀྱིས་ཕྱིར་བོད་དུ་ལོག་རྩིས་བྱས་སྟབས་རེད། ངས་ད་ལྟ་བར་དུ་འབད་བརྩོན་གཙོ་བོ་སོ་སོའི་ཕ་ཡུལ་དུ་ཕར་ལོག་ཐུབ་རྒྱུར་རེ་བ་བརྒྱབ་པ་ཡིན། བཙན་བྱོལ་ནང་ལས་འགུལ་རྣམ་གྲངས་མང་བོ་ཞིག་སྤེལ་བ་རེད། ཡིན་ནའང༌། ད་ལོ་དུས་ཚོད་ཛ་དྲག་འདི་འདྲ་ཞིག་ཏུ་སོ་སོའི་ཕ་ཡུལ་དུ་ལོག་དགོས་ཀྱིན་འདུག དེ་ཡང་རང་དབང་བྱས་ནས་འགྲོ་ཆོག་པའི་ཐོབ་ཐང་དགོས་ཀྱི་འདུག་ཅེས་རྩོད་ལེན་བྱེད་ཀྱི་ཡོད་པ་རེད། འདི་གཙོ་བོ་དེ་རེད།

དང་པོ་གཞུང་འབྲེལ་མིན་པའི་ཚོགས་པ་ལྔ་བརྒྱུད་ནས་བོད་བར་གྱི་ཞི་བའི་གོམ་བགྲོད་ནང་འཛུལ་བ་ཡིན། དེ་དུས་དཀའ་ངལ་མང་བོ་འཕྲད་བྱུང༌། བཙོན་ལ་བཅུག ཁྲིམས་ཆད་བཏང། ཡང་བཙོན་ལ་བཅུག ཁྲིམས་ཆད་བཏང། ཁྲིམས་ཐག་ཁ་ཤས་ད་དུང་ཆོད་ཡོད་པ་མ་རེད། ཟླ་འདིའི་ཟླ་མཇུག་ཏུ་ཡང་བསྐྱར་ཁྲིམས་ཁང་དུ་འགྲོ་དགོས། བཙོན་ཁང་མི་འདྲ་བ་གསུམ་ནང་ཕྱིན་པ་ཡིན་ལ། བོད་བར་གྱི་གོམ་བགྲོད་ནང་མི་ ༤༠༠ ལྷག་སྡེ་ཚན་མི་འདྲ་བའི་ནང་འཛུལ་བ་རེད། དེ་ཕྱི་ཟླ་ ༦ པའི་ནང་མཇུག་སྒྲིལ་བ་རེད། ཡིན་ནའང༌། སོ་སོའི་འདུན་པའི་ནང་ད་ལྟའི་དུས་ཚོད་འདི་འདྲ་ཞིག་གི་ནང་དུ་ཕར་བོད་དུ་ལོག་ཐུབ་དགོས་ཀྱི་འདུག སོ་སོའི་ཐོབ་ཐང་རྩོད་དགོས་ས་གཙོ་བོ་བོད་ནང་ཡིན་སྟབས་ཕ་གིར་འགྲོ་ཐུབ་ན་བསམ་བསམ་འདུག གཉིས་པ་ད་ལོའི་ཕྱི་ཟླ་གསུམ་པའི་ནང་བོད་དུ་ཞི་བའི་སྒེར་ལངས་ཆེན་པོ་དེ་འདྲ་ཞིག་བྱུང་བ་རེད། བོད་ཁྱོན་ཡོངས་ལ་བྱུང་བ་རེད། དེ་རྗེས་དམ་དྲག་བྱས་པ་རེད་ལ། དམ་དྲག་དེ་ད་དུང་མུ་མཐུད་ནས་འགྲོ་བསྡད་ཡོད་པ་རེད། སྤུན་ཟླ་མང་བོ་བཙོན་ལ་ཚུད་བསྡད་ཡོད་པ་རེད། དུས་ཚོད་འདི་འདྲའི་ཁག་པོ་ཞིག་གི་ནང་དུ་ཕ་ཡུལ་དུ་སྤུན་ཟླ་ཚོས་མྱང་བསྡད་དུས་སོ་སོ་མཉམ་དུ་ཡོད་ན་བསམ་པ་དེ་ཤུགས་ཆེན་པོ་འདུག་ཅེས་ཁོང་བོད་ལ་ལོག་འདུན་ནི་གཞིས་ལུས་སྤུན་ཟླས་མྱོང་བཞིན་པའི་སྐྱིད་སྡུག་མཉམ་མྱོང་ཆེད་ཡིན་ཞེས་དང༌། ཡང་ཁོང་གིས་བོད་མི་གཞན་ཁག་ཅིག་ཀྱང་ཁོང་དང་འདྲ་བར་དུས་སྐབས་འདིར་བོད་དུ་ལོག་འདོད་ཡོད་པའི་སྐོར་བརྗོད་དོན། ང་ཚོ་གྲོགས་པོ་མང་བོ་ཡོད། ཁོང་ཚོ་མང་ཆེ་བ་བོད་ནས་ཚུར་གསར་དུ་འབྱོར་ཏེ་ལོ་ལྔ་ནས་བཅུ་མ་གཏོགས་འགྲོ་གི་མེད་པ་དེ་འདྲ་རེད། ཁོང་ཚོ་ནི་སོ་སོའི་ཕ་མ་སྤུན་མཆེད་ཚང་མ་བོད་ལ་ཡོད་པ་རེད་ལ། ང་ཚོ་ཚང་མའི་བསམ་བློ་མཐུན་པོ་རེད། དེར་བརྟེན་ཚོགས་པའི་ངོས་ནས་མིན་ནའང་སོ་སོ་སྒེར་ངོས་ནས་གསང་སྟབས་ཀྱིས་བོད་ནང་འགྲོ་ཐུབ་ན་བསམ་སྟེ། གྲ་སྒྲིག་བྱས་པ་ཡིན། ཡིན་ནའང་རྒྱ་གར་གཞུང་གིས་ང་ཚོ་མུ་མཐུད་བོད་ལ་ལོག་རྒྱུའི་བསམ་བློ་ཡོད་པར་ཚོད་དཔག་བྱས་འདུག་སྟབས། ས་མཚམས་སུ་མ་སླེབས་གོང་རྒྱ་གར་གསང་བའི་ལས་ཁུངས་དང་ཉེན་རྟོག་པས་ང་ཚོ་མི་དྲུག་ཅུ་ཙམ་འཇུས་པ་རེད། ང་ཚོས་གོ་སྒྲིག་ལྟར་ང་ལོགས་སུ་སོང་བ་དང་ཁོང་ཚོ་མཉམ་དུ་འགྲོ་བཞིན་ཡོད་ནའང༌། བྷུན་ཊར་ (Bhuntar) རྟ་ཕོ་དགོན་པར་འབྱོར་སྐབས་ང་ཚོ་ཚང་མ་འཇུས་པ་རེད། དེ་ནི་རྒྱ་གར་ནས་བོད་ལ་འགྲོ་སའི་ལམ་བར་དུ་མི་སྡོད་སའི་ས་ཆ་མཐའ་མ་དེ་རེད། དེ་རྗེས་རི་བརྒྱུད་ནས་འགྲོ་དགོས། 

ང་བྷུན་ཊར་ནས་བཟུང་སྟེ་ཀུ་ལུ་ (Kullu) ལ་ཁྲིམས་རྩོད་ཅིག་བྱས་རྗེས་ཟླ་ ༨ ཚེས་ ༤ ལ་གློད་པ་རེད། ཡིན་ནའང༌། ཀུ་ལུ་ནས་མན་ཌིའི་ (Mandi) ལ་རྩིས་སྤྲོད་བྱས། མན་ཌིས་རྫོང་གིས་ཡང་བསྐྱར་ཁྲིམས་རྩོད་ཅིག་བྱས་པ་རེད། དེའི་སྐབས་ཡང་བསྐྱར་ཁྲིམས་ཤིག་བཙུགས་ཏེ་ཁྲིམས་ཁང་དུ་བཅུག་སོང༌། བཙོན་ཁང་དེ་ཕྱི་ཟླ་གསུམ་པ་ནས་བརྩིས་ན་བཙོན་ཁང་ལྔ་པ་དེ་ཆགས་འདུག ང་བཟུང་ནས་མ་གློད་པར་ཉིན་བཅུ་གཅིག་ལ་བཙོན་ཁང་ནང་སྡོད་དགོས་བྱུང་སྟབས་ངས་ཆུ་མ་འཐུང་ཟ་མ་མ་ཟོས་པར་ཉིན་ལྔའི་རིང་ཟས་བཅད་ཆུ་བཅད་ཀྱིས་ངོ་རྒོལ་བྱས་པ་ཡིན་ལ། ཁོང་ཚོས་ང་བཙན་དབང་གིས་སྨན་ཁང་དུ་ཁྲིད་དེ་རྐང་ལག་གཉིས་ཉལ་ཁྲིའི་སྟེང་བསྡམས་རྗེས་གནམ་ཁབ་བརྒྱབ་སོང༌། ཁང་པ་ཆུང་ཆུང་ཞིག་རེད་ལ། མི་བཅོ་ལྔ་ཙམ་འདུག ཁོང་ཚོ་འགའ་ཤས་ཀྱིས་ཕྱི་ནས་སྲུང༌། འགའ་ཤས་ཀྱིས་ངའི་མགོ་སྔ་བསྡམས་ཏེ་ཁབ་བརྒྱབ་པ་རེད་ཅེས་བཤད་ཞོར་དུ་ཁོང་གིས་དཔུང་སྟེང་དུ་བཙུགས་པའི་ཁབ་ཤུལ་འགའ་ང་ལ་བསྟན་བྱུང༌། དཔུང་པ་ཤུགས་ཀྱིས་བསྡམས་ཤུལ་དུ་ད་དུང་དམར་བོ་ཆགས་འདུག་ལ་ཁབ་བཙུགས་ཤུལ་ཡང་གསལ་བོར་ཤེས་ཀྱིན་འདུག ཁོང་གིས། ཁབ་བཙུགས་ནས་ཁྲག་མང་བོ་ཐོན་སོང༌། ཡིན་ནའང་ཐབས་ཤེས་གང་ཡང་མི་འདུག་ཅེས་ཧ་ཅང་བློ་ཕམ་པའི་ཚུལ་གྱིས་བརྗོད་བྱུང༌།

ཡང་ཁོང་གིས་མུ་མཐུད་དེ། དེ་ལྟར་ཁ་སང་ཁྲིམས་ཁང་ནས་གློད་པ་རེད། ཡིན་ནའང་ཁྲིམས་རྩོད་ཡོད་ཡོད་པ་རེད། ཕྱི་ཚེས་ ༡༢ ཉིན་གྱི་ཞོགས་པའི་ཆུ་ཚོད་གསུམ་པའི་སྟེང་མན་ཌིའི་རྫོང་གི་ཉེན་རྟོག་པས་ཀང་ར་རྫོང་གི་ངྷ་རམ་ས་ལའི་ཉེན་རྟོག་པར་རྩིས་སྤྲད་སོང་ལ། ངྷ་ས་ཉེན་རྟོག་པས་རྩིས་ལེན་བྱས་པ་དང་ཁྱེད་རང་ཨོ་ལིམ་པིག་རྩེད་འགྲན་མ་ཚར་བར་ཕྱི་ལོགས་སུ་འགྲོ་ཆོག་གི་མ་རེད་ཅེས་ཡིག་ཆ་ཞིག་སྤྲད་སོང༌། དེ་ཡང་དུས་ཚོད་ངེས་མེད་དང་གཞུང་འབྲེལ་རེད། དེ་མིན་ཁོང་གཉིས་ངའི་གྲིབ་ནག་ནང་བཞིན་རེད། གང་དུ་སོང་ནའང༌། ང་མཉམ་དུ་ཡོད་ཡོད་པ་རེད་ཟེར་ཞོར་ཁོང་སྲུང་མཁན་གྱི་ཉེན་རྟོག་པ་གཉིས་ཀྱི་ཕྱོགས་སུ་མིག་ཅེར་སོང༌།

ངས་ཁོང་ལ་བཙོན་ཁང་ནང་ཁྱེད་ལ་ནག་ཉེས་འཛུགས་སྐབས། ནག་ཉེས་གཙོ་བོ་གང་རེད་ཅེས་པར་ཁོང་གིས། ཁྲིམས་ཀྱི་སྟེང་ནས་ལྟ་སྟངས་གཉིས་འདུག ཀུ་ལུ་ལ་བཟུང་དུས་ཁྱེད་ཀྱི་དམིགས་ཡུལ་བོད་མི་མང་བོར་སྐུལ་མ་བྱས་ཏེ། ས་མཚམས་བརྒལ་ཏེ་བོད་ལ་འགྲོ་རྩིས་རེད་འདུག དེ་རྒྱ་དཀར་ནག་གི་འབྲེལ་ལམ་དང༌། རྒྱ་གར་གྱི་བདེ་འཇགས་དང་ཞི་བདེ་ལ་གནོད་ས་རེད། དེར་བརྟེན་ང་ཚོས་བཀག་ཉར་བྱེད་ཀྱིན་ཡོད་ཅེས་པ་དེ་རེད་ལ། མན་ཌེའི་ནས་ཁྱེད་རང་ངྷ་རམ་ས་ལའི་མི་རེད། ཡིན་ནའང༌། ངྷ་ས་ནས་ཕྱི་ལ་འགྲོ་སྐབས་ཆོག་མཆན་ཞུས་མི་འདུག་ཅེས་པ་འདི་རེད། གང་ལྟར་རྒྱུ་མཚན་ག་རེ་ཡིན་ནའང༌། རྒྱལ་སྤྱིའི་རྩེད་འགྲན་དེ་ཚེས་ ༨ ལ་མགོ་བཙུགས་པ་རེད། དེ་མཇུག་མ་སྒྲིལ་བར་དུ་རྒྱ་གར་གཞུང་གིས་ང་གློད་གི་མིན་པ་དེ་གཏན་ཁེལ་ཚར་འདུག དམིགས་ཡུལ་གཙོ་བོ་དེ་རེད། རྩེད་འགྲན་སྐབས་ང་ཁོང་ཚོས་བཀག་ཉར་བྱས་ནས་འཇོག་རྒྱུ་དེ་རེད་ཟེར།

ངེད་གཉིས་ཀྱིས་གླེང་མོལ་མཚམས་འདིར་སླེབས་སྐབས་ངས་ཁོང་ལ་གནད་དོན་གཞན་གསུམ་གྱི་སྟེང་དྲི་བ་དྲིས། དེ་ནི་ཨོ་ལིམ་པིམ་མཇུག་སྒྲིལ་རྗེས་བོད་ནང་བཟང་ཕྱོགས་ཀྱི་འགྱུར་བ་ཞིག་འགྲོ་རྒྱུར་རེ་བ་བརྒྱབ་ཡོད་མེད་དང༌། བོད་རྒྱ་འབྲེལ་མོལ་ཐེངས་བརྒྱད་པར་ལྟ་ཚུལ་གང་འདྲ་ཡོད་པ། ལོ་འདིར་བོད་གཞུང་མང་ཛ་དྲག་ལས་འགུལ་ཚོགས་ཆུང་དང༌། གཞུང་འབྲེལ་མིན་པའི་ཚོགས་པ་ཁག་གིས་སྤེལ་བའི་ལས་འགུལ་ཁག་ལ་འདོད་བློ་ཁེངས་ཡོད་མེད་བཅས་ཡིན། དྲི་བ་འདི་དག་ཁོང་གི་ད་ལྟའི་གནས་སྟངས་དང་མཚམས་ཀྱི་མེད་ནའང༌། ཁོང་ནི་རྒྱུན་དུ་བོད་དོན་ཕྱོགས་ལ་དོ་སྣང་ཆེ་བའི་མི་སྣ་ཞིག་ཡིན་སྟབས་ཁོང་ལ་གནད་དོན་འདི་དག་གི་ཐད་ལྟ་ཚུལ་ཡོད་པར་ངས་ཚོད་དཔག་བྱས་པས་ཡིན། ཁོང་གིས་ཨོ་ལིམ་པིག་མཇུག་སྒྲིལ་ནའང་རྒྱ་ནག་གིས་བོད་ལ་ཡག་པོ་ཞིག་གཏན་ནས་བྱ་སྲིད་ཀྱི་མ་རེད་ལ། བོད་ནང་དུ་འདི་ལས་སྡུག་པའི་གནས་སྟངས་ཤིག་མ་བྱུང་ནའང༌། གནས་སྟངས་ཡག་པོ་ཞིག་ཡོང་རྒྱུར་རེ་བ་ནམ་ཡང་མེད་ཅེས་དང༌། ངས་བོད་རྒྱ་འབྲེལ་མོལ་ལ་སྔོན་མ་ནས་རེ་བ་བརྒྱབ་མེད། ཡིན་ནའང༌། ཐེངས་འདིར་བློ་ཕམ་ཆེ་ཤོས་དེ་གཞུང་འབྲེལ་མིན་པའི་ཚོགས་པ་ཁག་གིས་མཉམ་རུབ་ཀྱིས་ལས་འགུལ་སྤེལ་མ་ཐུབ་པ་དེ་ཡིན། ད་ལྟའི་དུས་འདིར་ནུས་ཤུགས་གཅིག་ཏུ་སྒྲིལ་ཏེ་བོད་དོན་ཆེད་ལས་འགུལ་སྤེལ་བའི་དུས་རེད། ཡིན་ནའང་དེ་ལྟར་མ་བྱུང་བ་རེད། དེ་མིན་བོད་གཞུང་མང་ཛ་དྲག་ལས་འགུལ་ཚོགས་ཆུང་ནི་ཛ་དྲག་གི་གནས་སྟངས་སྐབས་བཙུགས་པའི་ཚོགས་པ་ཞིག་རེད་ལ། ཛ་དྲག་གི་གནས་སྟངས་མཇུག་སྒྲིལ་ན་ཛ་དྲག་གི་ལས་འགུལ་ཡང་མཇུག་སྒྲིལ་གི་རེད་ཅེས་བརྗོད་བྱུང་ལ། མཇུག་ཏུ་ཁོང་གིས་ང་ལ་ཐེངས་འདིར་ང་ཀུ་ལུ་དང་མན་ཌའི་ནས་གློད་ཆེད་ཀུ་ལུ་དང་མན་ཌའི། ཕོན་ཌ་སོགས་ཉེ་འཁོར་གྱི་ས་གནས་ཁག་གི་བོད་མི་ཚོ་རོགས་རམ་ བྱེད་དུ་སླེབས་སོང་ལ། ཐེངས་འདིར་ང་ཚོ་མི་དྲུག་ཅུའི་གོམ་བགྲོད་སྐབས་བླ་མ་ཤང་བཟའ་རིན་པོ་ཆེས་སྣེ་ཁྲིད་པ་ཡིན་ཟེར།

ངེད་གཉིས་ཀྱིས་གླེང་མོལ་གྲུབ་རྗེས་རྒྱ་གར་ཉེན་རྟོག་པ་གཉིས་ཀྱིས་ཀྱང་ཁོང་གིས་མངགས་པའི་ཇ་དང་པག་ལེབ་ཟོས་ཚར་ནས་བསྒུགས་འདུག་ལ། ཁོང་ངྷ་ཤོལ་དུ་འགྲོ་དགོས་སྐོར་བརྗོད་བྱུང༌། ངས་ཁོང་ལ་པར་འགའ་བླངས། ཡིན་ནའང་ཁོང་གིས་ཅི་ཙམ་ཨུ་ཚུགས་ཀྱིས་གདོང་ལ་འཛུལ་ཞིག་བསྡུ་བའི་ཐབས་ཤེས་བྱས་ཀྱང༌། པར་ངོས་སུ་ཁོང་ཁྲོ་དང་ཡིད་ཆད་ཀྱི་ཉམས་ཤིག་ལས་ཤར་རྒྱུ་མི་འདུག

གསར་འགོད་པ། འགྱུར་མེད།