བཙན་དབང་ཀྱི་ཁྲིམས་ཆད།

ལོ་འདིའི་ཞི་བའི་གྱེན་ལངས་སྐབས་འཛིན་བཟུང་བྱས་པའི་ཆབ་མདོ་ཁུལ་གོ་འཇོ་ཐང་སྐྱ་དགོན་པའི་གྲྭ་བ་འགར་ཚེ་བཙོན་དང་ལོ་ངོ་ལྔའི་ཡན་གྱི་བཙོན་འཇུག་གི་ཁྲིམས་ཐག་བཅད་ཡོད་འདུག
 
སྤྱི་འཐུས་སྨོན་ལམ་མཐར་ཕྱིན་ལགས་ཀྱིས་འདི་གར་གནས་ཚུལ་མཁོ་སྤྲོད་བྱས་པ་ལྟར་ན། ཕྱི་ཟླ་ ༩ ཚེས་ ༢༣ ཉིན་བོད་ལྗོངས་ཆབ་མདོ་འབྲིང་རིམ་མི་དམངས་ཁྲིམས་ཁང་གིས་རང་ལོ་ ༢༧ ཡིན་པའི་གྲྭ་འགྱུར་མེད་དོན་གྲུབ་ལགས་ལ་ཚེ་བཙོན་དང༌། རང་ལོ་ ༣༡ ཡིན་པའི་བཤད་གྲྭའི་སྐྱོར་དཔོན་རྡོ་རྗེ་དབང་རྒྱལ་ལ་ལོ་ངོ་ ༡༥ ། རང་ལོ་ ༢༨ ཡིན་པའི་གྲྭ་རིན་ཆེན་རྒྱལ་མཚན་ལ་ལོ་ ༡༠ བཅས་དོན་དངོས་བདེན་དཔང་འཕེར་བའི་ཁྲིམས་གཤེར་ར་སྤྲོད་གང་ཡང་མེད་པའི་ཐོག་བཙོན་འཇུག་ཁྲིམས་ཐག་བཅད་འདུག ཕྱི་ཟླ་ ༣ ཚེས་ ༢༢ ཉིན་སྐྱ་འབལ་ཤང་མི་དམངས་སྲིད་གཞུང་དུ་གཡག་གི་རྭ་ཅོའི་ནང་ས་རྡོ་གཏོར་བྱེད་ཀྱི་འགད་རྫས་བླུག་སྟེ་གཡུག་པར་བརྟེན། ཟླ་ ༤ ཚེས་ ༡ ཉིན་ཆབ་མདོ་ནས་དྲག་དམག་རླངས་འཁོར་བཞི་སྐྱ་ཐང་དགོན་པར་འབྱོར་ཏེ་ར་སྤྲོད་གང་ཡང་མེད་པའི་ཐོག་འབར་རྫས་གཡུག་པར་ཁག་དཀྲི་བྱས་ཏེ་གོང་གི་གྲྭ་བ་དེ་དག་བཟུང་བ་ཡིན་འདུག ཟླ་ ༤ ཚེས་ ༣ ཉིན་གྲྭ་མང་གིས་ཁོ་ཚོ་གློད་དགོས་པ་དང༌། གལ་ཏེ་གློད་གྲོལ་མ་བཏང་ཚེ་ང་ཚོ་ཡང་མཉམ་ཤི་བྱ་རྒྱུ་ཡིན་ལུགས་བཤད་ཅིང༌། སྨྲ་བརྗོད་དང་ཆོས་དད་རང་མོས། བོད་རང་བཙན་སོགས་ཀྱི་འབོད་སྒྲ་བསྒྲགས་པར་བརྟེན། ཡང་བསྐྱར་བཟུང་བའི་རང་ལོ་ ༣༠ ཡིན་པ་གྲྭ་ཚེ་བརྟན་ད་དུང་ཡང་གོ་འཇོ་རྫོང་དུ་བཀག་ཉར་བྱེད་བཞིན་པ་རེད། རང་ལོ་ ༡༩ ཡིན་པ་གྲྭ་ཀུན་དགའ་ཕུན་ཚོགས་ལ་ལོ་ ༡༠ ཡི་ཁྲིམས་ཐག་བཅད་ཡོད་པ་དང༌། རང་ལོ་ ༢༠ ཡིན་པ་གྲྭ་ཚེ་དབང་ཡེ་ཤེས་ལ་ལོ་ ༩ ། རང་ལོ་ ༢༡ ཡིན་པ་གྲྭ་འཕྲིན་ལས་དབང་རྒྱལ་ལ་ལོ་ ༥ བཅས་ཀྱི་ཁྲིམས་ཐག་བཅད་འདུག ཁོང་ཚོ་དང་མཉམ་དུ་བཟུང་བའི་གྲྭ་ཀུན་བཟང་ཚེ་རིང་དང༌། གྲྭ་ཚེ་རིང་དབང་འདུས་གཉིས་ཟླ་གཅིག་རིང་བཙོན་འཇུག་ཉེས་རྡུང་བཏང་རྗེས་གློད་གྲོལ་བཏང་འདུག དེ་རྗེས་ཡང་བསྐྱར་གྲྭ་བ་གསུམ་བཟུང་བ་ལས་རང་ལོ་ ༡༧ ཡིན་པ་གྲྭ་ཚེ་རིང་ལ་ལོ་ ༡༠ དང༌། རང་ལོ་ ༢༠ ཡིན་པ་གྲྭ་ཀུན་བཟང་བསྟན་འཛིན་ལ་ལོ་ ༡༥ བཅས་ཀྱི་ཁྲིམས་ཐག་བཅད་འདུག་ལ། ཁོང་གཉིས་དང་མཉམ་དུ་བཟུང་བའི་རང་ལོ་ ༢༧ ཡིན་པ་གྲ་ཉི་མ་དབང་ཕྱུག་ཟླ་གཅིག་རིང་བཙོན་འཇུག་ཉེས་རྡུང་བཏང་རྗེས་གློད་གྲོལ་བཏང་འདུག དེ་བཞིན་ཞིན་ཧྭ་གསར་འགྱུར་ཁང་ཞེས་པ་ནས་གོང་གི་གྲྭ་བ་འདི་དག་གིས་འབར་རྫས་གཡུག་གཏོར་བྱས་པ་ཡིན་ཚུལ་སོགས་ཀྱི་ཁྱབ་བསྒྲགས་ཀྱང་བྱས་འདུག་ལ། ད་དུང་གོང་གི་གྲྭ་བ་དེ་དག་བཟུང་བའི་སྐབས་རླངས་འཁོར་དུ་བླུག་ཅིང་ཁྲོམ་སྐོར་གྱིས་ཁོ་ཚོ་ནི་རྒྱལ་ཁབ་དང་མི་རིགས་ཁ་བྲལ་གཏོང་མཁན་རེད་ཅེས་དང༌། མི་སུ་ཡིན་རུང་ཁོ་ཚོ་ནང་བཞིན་གྱི་བྱ་བ་བསྒྲུབ་མི་རུང་བ་དང༌། གལ་ཏེ་སུ་ཞིག་གིས་ཁོ་ཚོ་ནང་བཞིན་གྱི་བྱ་ངན་བསྒྲུབ་ན་ཉེས་ཆད་ཕོག་རྒྱུ་ཡིན་ལུགས། ཁོ་ཚོ་ནི་རང་སྲོག་ལ་བདག་པོ་རྒྱག་མི་ཤེས་མཁན་གྱི་མི་རེད་ཅེས་བརྗོད་དེ་མི་མང་ལ་འཇིགས་སྐུལ་བྱས་འདུག