བཀའ་ཤག་གིས་གཏན་ལ་ཕབ་པའི་སྲིད་བྱུས་འདི་འཕྲལ་སེལ་གྱི་ཐབས་ལམ་ཞིག་ལས་གཞི་རྩའི་ཕུགས་རྒྱང་རིང་པོའི་འོག་གི་འདྲ་མཉམ་གཏོང་བའི་འཆར་གཞི་དང་གྲ་སྒྲིག་མ་རེད། བུད་མེད་ཀྱི་གནས་བབ་ཞན་པོ་ཡོད་པ་འདི་དངོས་ཡོད་གནས་ཚུལ་རེད་མོད། འདི་ལ་གཞིགས་ནས་གྲངས་འབོར་དང་ས་མིག་མང་དུ་བཏང་བ་ཙམ་གྱིས་འདྲ་མཉམ་ཆགས་གི་མ་རེད་ལ། དེ་ལས་ཀྱང་བོད་རང་གི་སྤྱི་ཚོགས་ཀྱི་བྱེད་སྒོ་མང་པོ་འཐུས་ཤོར་ལ་འགྲོ་བའི་ཉེན་ཁ་ཞིག་རེད་ཟེར།
ཚེས་ ༡༤ ཉིན་བཀའ་ཤག་གིས་གསལ་བསྒྲགས་ཤིག་སྤེལ་བའི་ནང་དུ། བཙན་བྱོལ་བོད་གཞུང་གིས་བོད་མིའི་སྤྱི་ཚོགས་ཁྲོད་བུད་མེད་ཀྱི་ནུས་ཤུགས་སྤེལ་བའི་སྲིད་བྱུས་ལས་རིམ་ཞིག་གཏན་ལ་ཕབ་ཡོད་འདུག་ལ། སྲིད་བྱུས་འདིར་ཁྱོན་བསྡོམས་དོན་ཚན་བརྒྱད་འདུག གཙོ་བོ་དེ་གཞིས་སྒར་ཁག་གི་ས་གནས་མགོ་འཛིན་དང༌། ས་གནས་འཐུས་མི། རྒྱ་བལ་འབྲུག་གསུམ་གྱི་སྡེ་ཚན་སོ་སོ་དང༌། ས་གནས་སྒྲིག་འཛུགས་རྣམས་སུ་བུད་མེད་ཀྱི་གྲངས་འབོར་གོང་མཐོར་གཏོང་བ། བཙུན་མའི་སྡེ་ཡི་སློབ་གཉེར་ལ་མཐུན་འགྱུར་གནང་རྒྱུ་དང༌། དགེ་སློང་མའི་དགེ་འདུན་བསྐྱར་གསོ་ཡོང་ཐབས། མཐོ་སློབ་སློབ་མའི་སློབ་ཚན་དང་ལས་རིགས་འདེམས་སྟངས་ལ་གཞུང་གིས་དོ་སྣང་གནང་རྒྱུ། བོད་ཀྱི་སྐྱེད་མ་བཟང་མོ་ཞིག་ཡོང་ཐབས་ལ་དམིགས་བསལ་ཟབ་སྦྱོང་སྤྲོད་རྒྱུ་སོགས་རེད་འདུག
འདིའི་སྒང་ལ་འདི་གའི་གསར་འགོད་པས་འབྲེལ་ཡོད་བུད་མེད་གཉིས་ལ་བཀའ་འདྲི་ཞུས་པ་ཡིན། བོད་ཀྱི་བུད་མེད་ལྷན་ཚོགས་ཀྱི་ཚོགས་གཙོ་བུ་མོ་ཚེ་རིང་ལགས་ཀྱིས། སྤྱིར་ཁྲིམས་དང་སྒྲིག་གཞིའི་སྒང་ནས་བོད་ཀྱི་སྤྱི་ཚོགས་ཁྲོད་དུ་ཕོ་མོ་འདྲ་མཉམ་ཡིན་མིན་ལ་གཞི་འཛིན་ས་མེད་མོད། ཡིན་ན་ཡང་དངོས་ཡོད་གནས་ཚུལ་ཁྲོད་དུ་བོད་ཀྱི་སྤྱི་ཚོགས་ནང་དུ་ཕོ་མོ་དབྱེ་འབྱེད་ཀྱི་ངོ་བོ་ཡོད་པ་དེར་ངོས་ལེན་བྱེད་ཀྱིན་ཡོད། ནམ་རྒྱུན་བུད་མེད་ཚོས་འཚོ་བའི་ནང་དུ་འགན་ཆེན་པོ་བླངས་ཡོད་ཀྱང༌། ཁ་ཡོད་ལག་ཡོད་ནང་གི་འཛིན་སྐྱོང་དང༌། ཆབ་སྲིད་ཀྱི་སྡེ་ཚན་ཁྲོད་དུ་ཕོ་མོ་དབྱེ་འབྱེད་དང་གྲངས་འབོར་གྱི་མང་ཉུང་ཡོད་པ་དེ་སྔོན་གྱི་སྤྱི་ཚོགས་ལས་ལྷག་པའི་གནད་དོན་རེད། སྔོན་གྱི་གོམས་གཤིས་དང་བསམ་བློའི་བག་ཆགས་འདི་དག་རྒྱང་ཕུད་ལ་བཏང་ནས་དེ་སེལ་ཐབས་ལ་དོ་སྣང་མ་བྱས་པས་ལན་པ་རེད། བཀའ་ཤག་གིས་གཏན་ལ་ཕབ་པའི་སྲིད་བྱུས་འདི་འཕྲལ་སེལ་གྱི་ཐབས་ལམ་ཞིག་ལས་གཞི་རྩའི་ཕུགས་རྒྱང་རིང་པོའི་འོག་གི་འདྲ་མཉམ་གཏོང་བའི་འཆར་གཞི་དང་གྲ་སྒྲིག་མ་རེད། བུད་མེད་ཀྱི་གནས་བབ་ཞན་པོ་ཡོད་པ་འདི་དངོས་ཡོད་གནས་ཚུལ་རེད་མོད། འདི་ལ་གཞིགས་ནས་གྲངས་འབོར་དང་ས་མིག་མང་དུ་བཏང་བ་ཙམ་གྱིས་འདྲ་མཉམ་ཆགས་གི་མ་རེད་ལ། དེ་ལས་ཀྱང་བོད་རང་གི་སྤྱི་ཚོགས་ཀྱི་བྱེད་སྒོ་མང་པོ་འཐུས་ཤོར་ལ་འགྲོ་བའི་ཉེན་ཁ་ཞིག་རེད། དཔེ་ཞིག་བཞག་ན་ང་རང་གཞིས་ཆགས་ཁག་ཏུ་ཚོགས་ཆེན་གྱི་བསམ་འཆར་བསྡུ་བར་འགྲོ་དུས་གཞིས་ཆགས་ཤིག་གི་བརྒྱ་དཔོན་བུད་མེད་ཅིག་བསྐོ་འཇོག་གནང་འདུག དེ་ལ་སྐྱེས་པ་ཞིག་གིས་ཁྱེད་ཚོའི་བུད་མེད་ཚོགས་པའི་བུད་མེད་ཀྱི་ཐོབ་ཐང་ནང་བཞིན་ང་ཚོའི་བརྒྱ་དཔོན་ཡང་བུད་མེད་ཅིག་ཡིན་ཟེར། ཡིན་ན་ཡང་བརྒྱ་དཔོན་བུད་མེད་དེ་ཡིས་ཡི་གེ་མི་ཤེས་པས་མི་དེ་ཚོ་རྒྱབ་གཉེར་ཡི་གེ་ལེན་དུ་ཡོང་ན་དམ་ཕྲུག་གམ་ཡང་ན་ཐམ་ཀ་ཞིག་བེད་སྤྱོད་གཏོང་གི་ཡོད་ཟེར། འདི་ལྟ་བུའི་ས་གནས་ས་ཐོག་གི་མི་སྣ་རྣམས་འཛིན་སྐྱོང་སྡེ་ཚན་སོགས་ཀྱི་ནང་ལ་ཡོང་བསྡད་ན་འདི་རྩ་བའི་སྤྱི་ཚོགས་ཀྱི་ནུས་པ་དང༌། ཡར་རྒྱས་ཀྱི་ཁ་ཕྱོགས་ལ་ལྡོག་ཕྱོགས་ནས་ནུས་པ་ཐོན་གི་རེད། དེ་ཡིན་དུས་སྲིད་བྱུས་འདི་བུད་མེད་ཚོའི་སེམས་ཤུགས་འཕར་བར་ཕན་ཐོགས་སྲིད་ཀྱང༌། རྩ་བའི་ཆ་ནས་གཞི་རྩའི་སློབ་གསོའི་རྨང་གཞི་དང༌། ནུས་པ། བསམ་བློ་བཅས་ཀྱི་སྒང་ནས་གདེང་ཚོད་ཡོང་ཐབས་གནང་དགོས། དེ་མ་གཏོགས་དམིགས་བསལ་གྱི་མིང་ཚིག་འདྲ་བོ་ལབ་བསྡད་ན་ང་རང་གི་ངོས་ནས་ནུས་པ་མེད་པ་ཞིག་ལ་སྙིང་རྗེ་ནས་དམིགས་བསལ་གྱི་ལམ་ཁ་ཞིག་སྤྲོད་བཞིན་པའི་སྣང་བ་འདུག ཅེས་གསུངས་བྱུང༌།
བོད་ཀྱི་བུད་མེད་རྩོམ་པ་པོ་ཆུ་སྐྱེས་སྒྲོལ་མ་ཡིས། བཀའ་ཤག་གིས་གནང་བའི་སྲིད་བྱུས་དེ་ཡག་པོ་རེད་ལ་གལ་ཆེན་པོ་རེད། དེ་ལ་བུད་མེད་ཚོས་ངོས་འཛིན་གསལ་བོའི་ཐོག་ནས་མཉམ་ཞུགས་དང་གོ་སྐབས་ལེན་དགོས་པ་རེད་བསམ་གྱིན་ཡོད། ད་ལྟ་བར་དུ་ལས་ཀ་གང་ཞིག་གི་ནང་དུ་ཡང་བུད་མེད་མ་སླེབས་པའི་ས་མིག་ཞིག་ཡོད་པ་མ་རེད་མོད་དེ་གྲངས་འབོར་གྱི་ཆ་ནས་ཁྱད་པར་ཤོར་ཡོད་པ་རེད། བཀའ་ཤག་གི་གསལ་བསྒྲགས་སུ་ཡོད་པ་བཞིན་བོད་ཀྱི་ལོ་རྒྱུས་ནང་དུ་ཕོ་མོ་འདྲ་མཉམ་མིན་པ་དེ་འདྲ་བྱུང་མེད་ལ། དཔེར་ན། རྒྱལ་བོ་དང་རྒྱལ་མོ། དགེ་སློངདང་དགེ་སློང་མ་སོགས་མིང་ཚིག་རང་གི་ངོ་བོའི་ཐོག་ནས་ཀྱང་འདྲ་མཉམ་ཡོད་པ་ལས་དབྱེ་འབྱེད་མེད་པར་མཐོང་གི་ཡོད། ཡིན་ན་ཡང་བུད་མེད་ཀྱིས་འགན་ཁུར་བའི་བསམ་བློ་དང༌། ནུས་པ་འདོན་རྒྱུར་ཁྱད་པར་ཆེན་པོ་ཤོར་ཡོད། དེ་ཁོར་ཡུག་དང་སྤྱི་ཚོགས་ཀྱི་ཤུགས་རྐྱེན་ལས་བྱུང་བ་རེད་ལ། བུད་མེད་རང་གིས་སྤྱི་ཚོགས་ཀྱི་ཁ་ཐོག་ལ་བཞག་ནས་དེ་ལ་རྒོལ་ལན་སྤྲད་མེད་པ་རེད་བསམ་གྱིན་ཡོད། དེ་བཞིན་ད་ལྟ་བར་བོད་ཀྱི་སྤྱི་ཚོགས་ཁྲོད་དུ་བུད་མེད་ཀྱི་ཐོབ་ཐང་རྩོད་པའི་དཀའ་རྙོག་དེ་འདྲ་བྱུང་མེད་པ་འདི་ཕྱོགས་གཅིག་ནས་ང་ཚོ་ནང་པའི་སྤྱི་ཚོགས་ཤིག་ཡིན་པས་རེད་བསམ་གྱིན་ཡོད། ང་རང་དགེ་རྒན་ཅིག་ཡིན་པའི་ཆ་ནས་དཔེར་ན་སློབ་ཕྲུག་ཚོར་འཇོན་གི་མེད་པ་ལབ་ནས་དམའ་འབེབས་བྱས་ན་ནམ་ཡང་འཇོན་གི་མེད་བསམ་ནས་སྡོད་གི་འདུག དེ་ལ་བསྟོད་པ་བཏང་ནས་འཇོན་གི་རེད་ཅེས་ལབ་ན་ཧུར་ཐག་བྱེད་གི་འདུག དེ་བཞིན་བོད་ཀྱི་སྤྱི་ཚོགས་ཁྲོད་དུ་ཡང་༧གོང་ས་མཆོག་གི་ཐུགས་རྗེ་བཀའ་དྲིན་འོག་ཚང་མར་འཇོན་ཐང་འདོན་ས་ཡོད་པས་བུད་མེད་རྣམས་ཀྱིས་གཙོ་བོ་དེ་རང་ངོས་ནས་འགན་ལེན་དགོས་པའི་ངོས་འཛིན་གསལ་བོ་གནང་དགོས། ཅེས་གསུངས་བྱུང༌།
